لندن: (ویب ڈیسک) سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ الیکشن کمیشن نے پنجاب کے نگران وزیراعلیٰ پر ڈنڈی ماری تو پنجاب الیکشن کا قبرستان بن جائے گا۔
سماجی رابطے کی ویب سائٹ ٹوئٹر پر اپنے پیغام میں شیخ رشید احمد نے لکھا کہ غلطی کی گنجائش نہیں، زرداری کی جیب کی گھڑی، گیم چینجروں کی ہاتھ کی چھڑی، الیکشن سلیکشن میں بدل دے گی۔
سابق وزیر کا مزید کہنا تھا کہ حالات انتہائی سنگین ہیں، نہ آٹا نہ قبر کیلئے زمین میسر ہے، ملک خانہ جنگی کی طرف جا رہا ہے، کل وطن واپس آ رہا ہوں۔

پشاور: (ویب ڈیسک) تھانہ بڈھ بیر شیخان میں گشت پر مامور پولیس موبائل کے قریب دھماکہ، تاہم کوئی جانی نقصان نہیں ہوا۔
تفصیلات کے مطابق پشاور کے علاقے فرنٹیئر روڈ پر انچارج تھانہ بڈھ بیر شیخان بمعہ ٹیم پٹرولنگ پر تھے کہ اچانک دھماکہ ہوگیا، دھماکے سے گاڑی کو جزوی نقصان پہنچا ہے تاہم کوئی جانی نقصان نہیں ہوا ہے۔
پولیس کا کہنا ہے کہ دھماکے میں ایک کلو بارودی مواد استعمال کیا گیا ہے، دھماکا خیز مواد پینٹ کے ڈبے میں نصب کیا گیا تھا۔

پاکپتن: (ویب ڈیسک) تیزرفتار ٹریکٹر ٹرالر نے موٹر سائیکل سواروں کو کچل دیا، حادثہ میں خاتون سمیت دو افراد موقع پر ہی جان کی بازی ہار گئے۔
ریسکیو ذرائع کا کہنا ہے کہ دونوں لاشیں ڈی ایچ کیو ہسپتال منتقل کر دیا گیا ہے، حادثہ ٹریکٹر ٹرالر کی تیزی رفتاری کے باعث پیش آیا۔
قبل ازیں کورنگی نمبر 4 میں گرلز کالج کے قریب تیز رفتار ڈمپر نے موٹر سائیکل سواروں کو کچل دیا تھا، حادثے میں ایک شخص موقع پر جاں بحق ہوگیا جبکہ 3 افراد زخمی ہوئے تھے۔

اسلام آباد: (ویب ڈیسک) پاکستان تحریک انصاف کے رہنما اور سابق وفاقی وزیر خزانہ اسد عمر نے اپوزیشن کی جانب سے وزیراعلیٰ پنجاب کے لئے دیئے گئے ناموں پر طنزیہ ٹوئٹ کی ہے۔
سماجی رابطے کی ویب سائٹ ٹویٹر پر اسد عمر نے لکھا کہ ’’امپورٹڈ کے فرنٹ مین کو نگراں وزیر اعلیٰ بنانے سے بہتر ہے پردہ اٹھا دیں اور نواز شریف یا آصف زرداری کو بنا دیں‘‘۔
واضح رہے کہ حکومتی اتحاد کی جانب سے احمد نواز سکھیرا اور نوید اکرم چیمہ کے نام تجویز کئے گئے ہیں، اپوزیشن نے محسن رضا نقوی اور احد چیمہ کو نامزد کررکھا ہے۔

اسلام آباد : (ویب ڈیسک) وزیراعظم محمد شہبازشریف نے سوئیڈن میں قرآن پاک کی بے حرمتی کے گھناؤنے فعل کی پرزور مذمت کرتے ہوئے اسے ناقابل قبول اقدام قرار دیا ہے ۔
سماجی رابطے کی ویب سائٹ ٹوئٹر پر ایک بیان میں وزیراعظم شہباز شریف نے کہا کہ دائیں بازو کے ایک انتہا پسند کی جانب سے قرآن پاک کی بے حرمتی کے گھنائونے فعل کی جتنی بھی مذمت کی جائے کم ہے ۔
انہوں نے مزید کہا کہ آزادی اظہار کے لبادہ کو دنیا بھر کے ڈیڑھ ارب مسلمانوں کے مذہبی جذبات کو مجروح کرنے لئے استعمال نہیں کیا جاسکتا، یہ اقدام ناقابل قبول ہے ۔
خیال رہے کہ گزشتہ روز سوئیڈن میں ترکیہ کے سفارتخانے کے باہر قرآن کریم کی بے حرمتی کا واقعہ پیش آیا تھا ، سعودی عرب، پاکستان، خلیجی ممالک اور اسلامی تعاون تنظیم (او ائی سی) کی جانب سے بھی واقعے کی سخت مذمت کی گئی ہے۔

کوئٹہ: (ویب ڈیسک) مسلم لیگ ن کے رہنما اور سابق وزیراعظم شاہد خاقان عباسی نے کہا ہے کہ ملک میں سیاسی استحکام ناگزیر ہے، مشکل فیصلے کر کے ملک کو استحکام دینا پڑے گا، ایک دوسرے پر الزامات اور گالم گلوچ کی سیاست زہر قاتل ہے۔
کوئٹہ میں لشکری رئیسائی، مفتاح اسماعیل اور دیگر رہنماؤں کے ہمراہ پریس کانفرنس کرتے ہوئے شاہد خاقان عباسی کا کہنا تھا کہ نفرت کی سیاست پاکستان کے مسائل حل نہیں کر سکتی، معاشی بدحالی انتہا پر پہنچ چکی ہے، عوام کے مسائل ایک طرف رہ گئے ہیں، مشکل فیصلے کر کے ملک کو استحکام دینا ہوگا، وقت آگیا ہے کہ لوگوں کو حقوق دیئے جائیں، ملک کے تمام مسائل کا حل آئین میں موجود ہے، آئین کو تسلیم نہیں کریں گے تو مسائل حل نہیں ہوں گے۔
شاہد خاقان عباسی نے مزید کہا کہ غیر جماعتی فورم پر ملک مسائل پر بات کرنا ہوگی، بلوچستان کے مسائل کی بڑی وجہ غیر نمائندہ لوگ ہیں، ہم مسائل کے حل کا دعوی نہیں کرتے، کیا ایوانوں میں بیٹھے لوگ بلوچستان کے مسائل حل کر رہے ہیں، سب اپنے گریبان میں دیکھیں کوئی بھی الزام سے بری الذمہ نہیں،ان سب سائل پر بات کیلئے ایک فورم رکھا جس کی ابتدا کوئٹہ سے ہوئی۔
مفتاح اسماعیل
اس موقع پر سابق وزیر خزانہ مفتاح اسماعیل کا کہنا تھا کہ 4 ماہ تک کچھ فیصلے نہ ہونے پر معیشت کو نقصان ہوا، پاکستان کا قرض بڑھ کر 51 ہزار ارب تک پہنچ چکا، رقم سہولیات کے بجائے قرضوں کی ادائیگی پر خرچ ہو رہی ہے، قرضوں کی وجہ سے مہنگائی اور بیروزگاری بڑھ رہی ہے۔
مفتاح اسماعیل نے مزید کہا عوام کو مشکلات کا سامنا ہے، 8 کروڑ پاکستان مفلسی کی زندگی گزار رہے ہیں، پچھلے 20 سالوں میں ملک کا قرضہ بڑھتا جا رہا ہے، قرضوں کی مد میں 21 ارب ڈالر واپس کرنے ہیں، گردشی قرض کا حل کسی حکومت نے نہیں نکالا، حکومت کے آئی ایم سے مذاکرات کا خیرمقدم کرتا ہوں۔
لشکری رئیسانی
لشکری رئیسائی نے پریس کانفرنس کے دوران کہا کہ معیشت کی بدحالی اپنی انتہا کو پہنچ گئی ہے، بلوچستان کے حوالے سے بات چیت کرنے کی فضا بنانا ہوگی، جس بحران سے سماج گزر رہا ہے مذاکرات کی اشد ضرورت ہے، گوادر میں بنیادی ضروریات کیلئے احتجاج ہو رہا ہے۔

ہنگو: (ویب ڈیسک) پاکستان ڈیموکریٹک موومنٹ (پی ڈی ایم) کے ترجمان حافظ حمد اللّٰہ نے کہا ہے کہ معاشی حالات ٹھیک نہ ہوئے تو الیکشن میں تاخیر ہو سکتی ہے۔
ہنگو میں پریس کانفرنس کے دوران حافظ حمد اللہ کا کہنا تھا کہ معاشی حالات ٹھیک نہ ہوئے تو الیکشن 6 ماہ مؤخر کر سکتے ہیں، جنرل الیکشن اکتوبر 2023 میں ہوں گے۔
چیئرمین پاکستان تحریک انصاف کو تنقید کا نشانہ بناتے ہوئے حافظ حمد اللہ نے کہا کہ سابق وزیراعظم عمران خان نے ملک کو معاشی طور پر کھوکھلا کیا، عمران خان نے جاتے جاتے پاکستان کے ہاتھ پاؤں معاشی طور پر باندھ کر چھوڑے، آئین اور اسمبلیوں کو توڑنا آمروں کا کام ہے۔
ترجمان پی ڈی ایم کا کہنا تھا کہ پاناما کو بہانہ بنا کر نواز شریف کو نا اہل کر کے نیا سیاسی انتشار پیدا کیا گیا اور پی ٹی آئی کو بزور بازو مسلط کیا گیا تھا۔
انہوں نے مزید کہا کہ پی ڈی ایم نے تحریک عدم اعتماد کے ذریعے مسلط کردہ حکومت کا خاتمہ کیا۔

لاہور: (ویب ڈیسک) وزیر داخلہ رانا ثنا اللہ نے مریم نوازکی وطن واپسی کی حتمی تاریخ بتادی۔
وزیر داخلہ رنا ثنا اللہ نے مریم نواز کی واپسی کا باقاعدہ اعلان کردیا۔ ان کا کہنا ہے کہ مسلم لیگ ن کی چیف آرگنائزر مریم نواز 28 جنوری کو وطن واپس پہنچیں گی۔
انہوں نے تفصیلات بتاتے ہوئے کہا ہے کہ مریم نواز کا پاکستان واپسی کا پروگرام تبدیل ہوا ہے۔ مریم نواز اب27 جنوری کو لندن سے دبئی اور 28جنوری کو دبئی سے پاکستان پہنچیں گی۔
واضح رہے کہ مریم نواز 6 اکتوبر کو بیرون ملک روانہ ہوئی تھیں۔ جس کے بعدوہ سرجری کیلیے اپنے والد کے ہمراہ لندن سے جینیوا پہنچی تھیں۔ 6 جنوری کو نواز شریف کے معالج ڈاکٹر عدنان نے بتایا تھا کہ مریم نواز کا جینیوا میں گلے کا تین گھنٹے طویل آپریشن کیا گیا۔
صحت یابی کے بعد سے مریم نواز کی وطن واپسی کی خبریں سامنے آرہی ہیں تاہم اب ان کی وپسی کی حتمی تاریخ کا اعلان کردیا گیا ہے۔

لاہور: (ویب ڈیسک) وزیراعلیٰ پنجاب چودھری پرویز الٰہی نے کہا ہے کہ پنجاب اور کیلیفورنیا کو سسٹر صوبے قرار دینے کا معاہدہ تجارتی ، معاشی ، کاروباری تعلقات میں اضافے کا باعث ہوگا، پنجاب اورامریکی ریاست کیلیفورنیا کے مابین دوطرفہ سرمایہ کاری بڑھے گی۔
ایوان وزیراعلیٰ میں چودھری پرویز الہٰی سے پاکستانی نژاد امریکی بزنس مین اور ڈیموکریٹ پارٹی کے رہنما طاہر جاوید نے ملاقات کی، ملاقات کے دوران طاہر جاوید نے مختصر مدت میں پنجاب کے عوام کی فلاح و بہبود کے لئے وزیراعلیٰ چودھری پرویزالہٰی کے مثالی اقدامات کو سراہا۔
اس موقع پر طاہر جاوید کا کہنا تھا کہ چودھری پرویز الہٰی کی قیادت میں پنجاب حکومت نے 5 سال کے کام 5 ماہ میں کئے، وزیراعلیٰ پنجاب نے عوامی خدمت کی نئی مثال قائم کی ہے، پنجاب اور امریکی ریاست کیلیفورنیا کو سسٹر صوبے قرار دینے پر وزیراعلیٰ چودھری پرویز الہٰی کو مبارکباد پیش کرتے ہیں۔
دوران ملاقات وزیراعلیٰ چودھری پرویز الٰہی نے کہا کہ پنجاب اور کیلیفورنیا کو سسٹر صوبے قرار دینے کا معاہدہ تجارتی، معاشی، کاروباری تعلقات میں اضافے کا باعث ہوگا، پنجاب اورامریکی ریاست کیلیفورنیا کے مابین دوطرفہ سرمایہ کاری بڑھے گی، تعلیم،صحت، انفارمیشن ٹیکنالوجی، ماحولیات اور ثقافت کے شعبوں میں تعلقات کو فروغ ملے گا۔
چودھری پرویزالہٰی کا مزید کہنا تھا کہ یہ معاہدہ پنجاب اور کیلیفورنیا کی ریاست کے درمیان باہمی تعلقات کو مزید مضبوط کرے گا، امریکہ میں رہنے والے پاکستانیوں نے سیلاب متاثرین کی بھرپور مدد کی ہے، وزیراعلیٰ فلڈ ریلیف فنڈ میں مخیر حضرات نے دل کھول کر عطیات دیئے ہیں۔