لاہور : (ویب ڈیسک) پاکستان تحریک انصاف ( پی ٹی آئی ) کے نائب صدر اور سابق وفاقی وزیر فواد چودھری کو پنجاب پولیس نے لاہور میں ان کے گھر سے گرفتار کر لیا۔
پی ٹی آئی رہنما فرخ حبیب نے سماجی رابطے کی ویب سائٹ ٹوئٹر پر اپنے ایک پیغام میں فواد چودھری کی گرفتاری کی اطلاع دیتے ہوئے کہا کہ ’’ فواد چوہدری کو پولیس نے ان کے گھر سے ابھی گرفتار کرلیا ہے، امپورٹڈ حکومت بوکھلاہٹ کا شکار ہوگئی ہے ‘‘۔
فرخ حبیب نے اپنے ایک اور پیغام میں چند گاڑیوں کی فوٹیج بھی شیئر کی اور دعویٰ کیا کہ پولیس کی یہ گاڑیاں فواد چودھری کو گرفتار کر کے لے جا رہی ہیں۔
قبل ازیں چیئرمین پاکستان تحریک انصاف ( پی ٹی آئی ) اور سابق وزیر اعظم عمران خان کی گرفتاری کے خدشات کے پیش نظر پی ٹی آئی کے سینئر رہنماء اور کارکنان کی بڑی تعداد رات گئے زمان پارک کے باہر جمع ہو ئی۔
اس موقع پر میڈیا سے گفتگو کرتے ہوئے سابق وفاقی وزیر فواد چودھری کا کہنا تھا کہ عمران خان زمان پارک میں موجود ہیں، گرفتار کر کے دکھائیں، عمران خان کو گرفتار کرنا ایک سازش ہے، ہماری شرافت کو کمزوری نہ سمجھا جائے۔
انہوں نے مزید کہا کہ کارکن ملک میں فسطائیت قائم نہیں کرنے دیں گے۔

تاشقند: (ویب ڈیسک) پاکستان پیپلز پارٹی کے چیئرمین اور وزیر خارجہ بلاول بھٹو زرداری نے ازبکستان کے دارالحکومت تاشقند میں سیکرٹری جنرل اقتصادی تعاون تنظیم خسرو نوزیری سے ملاقات کی۔
دفتر خارجہ کے مطابق ملاقات کے دوران وزیر خارجہ نے بانی رکن کی حیثیت سے اقتصادی تعاون تنظیم کے وژن کے لیے پاکستان کے عزم کا اعادہ کیا۔
سیکرٹری جنرل اقتصادی تعاون تنظیم خسرو نوزیری نے خطے میں ترقی اور رابطوں کو فروغ دینے میں پاکستان کے کردار کو سراہا۔

لاہور: (ویب ڈیسک) ایڈووکیٹ جنرل پنجاب احمد اویس سمیت 97 لاء افسروں کو عہدوں سے ہٹا دیا گیا۔
ایڈووکیٹ جنرل آفس کے 97 لاء افسروں کو بھی عہدوں سے فارغ کر دیا گیا، جن کا نوٹیفکیشن بھی جاری کر دیا گیا ہے، نوٹیفکیشن کے مطابق 32 ایڈیشنل ایڈووکیٹ جنرل اور 65 اسسٹنٹ ایڈووکیٹ جنرل کو عہدوں سے ہٹایا گیا ہے۔
ذرائع کے مطابق ایڈیشنل ایڈووکیٹ جنرل چودھری جواد یعقوب کو ایڈووکیٹ جنرل کے امور دیکھنے کی ہدایت کی گئی ہے۔
محکمہ قانون و پارلیمانی امور پنجاب کی جانب سے 55 وکلا کا بطور ایڈیشنل اور اسسٹنٹ ایڈووکیٹ جنرل تقرر کا نوٹیفکیشن جاری کر دیا گیا، ایڈووکیٹ جنرل آفس میں 20 نئے ایڈیشنل ایڈووکیٹ جنرل اور 35 اسسٹنٹ ایڈووکیٹ جنرل پنجاب کا تقرر کیا گیا ہے۔

اسلام آباد: (ویب ڈیسک) وفاقی وزیر برائے منصوبہ بندی ترقی اور خصوصی اقدامات احسن اقبال نے کہا ہے کہ موجودہ حکومت ہنر پر مبنی تعلیم پر توجہ دے رہی ہے اور اسے فروغ دینے کے لیے بھرپور اقدامات اٹھائے جا رہے ہیں، ہمارے لیے یہ ضروری ہے کہ ہم اپنے تعلیمی نظام کو جدید رجحانات کے مطابق ڈھالیں۔
تعلیم کے عالمی دن کے موقع پر نیشنل سکلز یونیورسٹی (این ایس یو) میں خطاب کرتے ہوئے وفاقی وزیر نے اساتذہ پر زور دیا کہ وہ تھیوری کے بجائے عملی علم کو فروغ دیں، تقریب میں چیئرمین ہائر ایجوکیشن کمیشن ڈاکٹر مختار احمد، وائس چانسلر این ایس یو ڈاکٹر محمد مختار اور طلباء اور اساتذہ کی بڑی تعداد نے شرکت کی۔
پروفیسر احسن اقبال کا مزید کہنا تھا کہ وژن 2025 کے تحت قومی نصابی اصلاحات کا آغاز کیا گیا اور قومی نصاب کونسل بھی قائم کی گئی لیکن پچھلی حکومت نے اصلاحات کے ایجنڈے کو متنازعہ بنا دیا۔
انہوں نے کہا کہ چار اہم چیزوں یعنی نصابی اصلاحات، اساتذہ کی تربیت، امتحانات اور مدرسہ اصلاحات پر فوری توجہ دینے کی ضرورت ہے کیونکہ یہ وژن 2025 کا حصہ تھا لیکن بدقسمتی سے سابق حکومت نے ان منصوبوں کو روک دیا۔
اس موقع پر خطاب کرتے ہوئے وفاقی وزیر نے کہا کہ تعلیم کی حقیقتیں بدل چکی ہیں کیونکہ سکلز بیس ایجوکیشن نے ڈگری بیس ایجوکیشن سسٹم کو پیچھے چھوڑ دیا ہے۔
یاد رہے کہ دسمبر 2018 میں اقوام متحدہ کی جنرل اسمبلی نے امن اور ترقی کے لیے سیکھنے کے کردار کو منانے کے لیے 24 جنوری کو تعلیم کا عالمی دن منانے کا اعلان کیا تھا۔

اسلام آباد: (ویب ڈیسک) ملکی تاریخ کی پہلی پیپر لیس ڈیجیٹل مردم و خانہ شماری یکم مارچ سے شروع ہو گی، نوٹیفکیشن جاری کر دیا گیا۔
نوٹیفکیشن کے مطابق یکم مارچ سے شروع ہونے والی ڈیجیٹل مردم و خانہ شماری یکم اپریل تک جاری رہے گی۔
واضح رہے کہ ملکی تاریخ میں پہلی ڈیجیٹل مردم شماری، ساتویں خانہ و مردم شماری کا آغاز ہو رہا ہے، پہلی پیپر لیس مردم شماری میں جیوٹیگنگ شامل ہے۔
ملک بھر میں 7ویں خانہ و مردم شماری پر 34 ارب روپے لاگت آئے گی، ہر شہری پورٹل پر ڈیجیٹل مردم شماری میں از خود اپنا ڈیٹا اپ لوڈ کر سکے گا۔

اسلام آباد: (ویب ڈیسک) دنیا بھر میں مقیم کشمیری 26 جنوری کو بھارت کے یوم جمہوریہ کو یوم سیاہ کے طور پر منائیں گے جس کا مقصد عالمی برادری کو یہ واضح پیغام دینا ہے کہ وہ اپنے مادر وطن پر بھارت کے قبضے کو مسترد کرتے ہیں۔
یوم سیاہ منانے کی کال کل جماعتی حریت کانفرنس نے دی ہے اور بھارت کے غیر قانونی طور پر زیر قبضہ جموں و کشمیر میں آزادی پسند جماعتوں نے اس کی حمایت کی ہے، کل جماعتی حریت کانفرنس کے چیئرمین مسرت عالم بٹ نے دہلی کی بدنام زمانہ تہاڑ جیل سے اپنے ایک پیغام میں بھارت کے غیر قانونی طور پر زیر قبضہ جموں و کشمیر اور دنیا بھر میں مقیم کشمیریوں سے اس دن کو یوم سیاہ کے طور پر منانے کی اپیل کی ہے۔
انہوں نے کہا کہ بھارت مقبوضہ علاقے میں انسانیت کے خلاف جنگی جرائم میں ملوث ہے اور اسے خود کو بڑا جمہوری ملک قرار دینے کا دعویٰ کرنے کا کوئی حق حاصل نہیں ہے، دریں اثناء کل جماعتی حریت کانفرنس کے سینئر رہنما نعیم احمد خان نے کشمیری عوام پر زور دیا کہ وہ بھارت کے یوم جمہوریہ کو یوم سیاہ کے طور پر منائیں۔
تہاڑ جیل میں نظر بند رہنما نے اپنے پیغام میں جموں و کشمیر پر بھارت کے غیر قانونی اور زبردستی قبضے کی مذمت کرتے ہوئے کہا کہ بھارتی حکمرانوں نے جموں و کشمیر کے عوام کو اپنی سیاسی قسمت کا فیصلہ آزادانہ، منصفانہ اور غیر جانبدارانہ استصواب رائے کے ذریعے کرانے کے اپنے وعدوں کے باوجود کشمیری عوام کی امنگوں کو طاقت کے زور پر دبانے کے لیے پرتشدد راستے کا انتخاب کیا ہے۔
انہوں نے کہا کہ عالمی برادری کی یہ ذمہ داری ہے کہ وہ بھارت کے کشمیر پر غیر قانونی قبضہ کا سنجیدگی سے نوٹس لے جو خطے میں بدامنی کی ایک بڑی وجہ ہے، ادھر ڈیموکریٹک فریڈم پارٹی نے بھی کل جماعتی حریت کانفرنس کی ہڑتال کی کال کی مکمل حمایت کا اعادہ کیا ہے تاکہ دنیا کو یہ پیغام دیا جاسکے کہ ان کے مادر وطن پر بھارت کا غیر قانونی اور زبردستی قبضہ ان کے لیے ناقابل قبول ہے۔
ڈیموکریٹک فریڈم پارٹی کے ترجمان نے ایک بیان میں کہا کہ بھارت کشمیر میں ہلاکتوں اور تباہی میں ملوث ہے اور اس نے لاکھوں کشمیریوں کو بندوق کی نوک پر یرغمال بنایا ہوا ہے اور اسے یوم جمہوریہ منانے کا کوئی حق نہیں ہے۔
انہوں نے کہا کہ پوری دنیا اس بات سے آگاہ ہے کہ بھارت ایک غاصب ملک ہے جس نے ہمیشہ کشمیریوں کی امنگوں اور ان کے جمہوری حقوق کو پامال کیا ہے اور انہیں گزشتہ 75 سال سے زائد عرصے سے غیر قانونی فوجی قبضے میں رکھا ہوا ہے۔

لاہور: (ویب ڈیسک) چیف جسٹس لاہور ہائی کورٹ کے حکم پر بی آئی ایس پی نے نوٹس لیتے ہوئے ملتان ریجن کے 149 اے ٹی ایمز اور بائیو میٹرک سسٹم مکمل طور پر فعال کر دیئے۔
ترجمان بی آئی ایس پی نے کہا ہے کہ تمام اے ٹی ایمز 24 گھنٹے کی بنیاد پر فعال ہیں، مستحقین سے غیر قانونی کٹوتیوں میں ملوث مافیا کے خلاف قانونی کارروائی کی گئی، پنجاب ریجن میں 312 پی او ایس ایجنٹس کو شکایات کی بنیاد پر بلاک کیا گیا، 30 ایف آئی آر درج کر کے 19 پی او ایس ایجنٹس کو گرفتار کر لیا۔
ترجمان بی آئی ایس پی نے مزید کہا کہ رقوم میں کٹوتی یا کسی بھی شکایت کی صورت میں قریبی BISP تحصیل دفتر سے رجوع کیا جائے، مستحقین کی شکایات کے ازالے کیلئے خصوصی کنٹرول روم بھی قائم کر دیا گیا ہے۔

اسلام آباد: (ویب ڈیسک) الیکشن کمیشن نے گوشوارے جمع کروانے کے بعد 16 اراکین پارلیمنٹ کی رکنیت بحال کر دی جن میں 4 سینیٹرز اور 12 اراکین اسمبلی شامل ہیں۔
الیکشن کمیشن کے مطابق رکن اسمبلی شہر یار مہر اور سید محمد راشد شاہ کی رکنیت بحال کر دی، سینیٹر کامران مائیکل ، سیف اللہ آبڑو، محسن عزیز اور ثانیہ نشتر کی رکنیت بھی بحال کر دی گئی ہے۔
چودھری عابد رضا، عصمت اللہ، لال چند، موسیٰ گیلانی اور خالد مقبول صدیقی کی رکنیت بھی بحال کر دی گئی، الیکشن کمیشن نے مالی گوشواروں کی تفصیلات نہ جمع کروانے پر ان اراکین کی رکنیت معطل کر رکھی تھی۔