واشنگٹن: (ویب ڈیسک) امریکا نے کہا ہے کہ پاکستان پابندیوں کے باوجود روس سے تیل خرید سکتا ہے۔
امریکا کے دارالحکومت واشنگٹن ڈی سی میں میڈیا سے گفتگو کرتے ہوئے امریکا کے محکمہ خارجہ کے ترجمان نیڈ پرائس کا کہنا تھا کہ روسی پیٹرولیم مصنوعات پر پرائس کیپ (قیمتوں کی حد) پر دستخط نہ کرنے کے باوجود پاکستان روس سے رعایتی نرخوں پر تیل خرید سکتا ہے۔
نیڈ پرائس نے کہا کہ پاکستان ان رعایت سے بھی فائدہ اٹھا سکتا ہے جو امریکا نے دیگر ممالک کو روس سے تیل خریدنے کے لیے دی ہیں۔
نیڈ پرائس نے مزید کہا کہ ہم نے مختلف ممالک کو اس سے فائدہ اٹھانے کی ترغیب دی ہے، حتیٰ کہ ان ممالک کو بھی جنہوں نے قیمتوں کی حد (پرائس کیپ) پر باضابطہ طور پر دستخط نہیں کیے تاکہ وہ دوسرے ممالک کے بجائے بعض صورتوں میں روس سے بڑی رعایت پر تیل خرید سکیں۔
نیڈ پرائس نے کہا کہ امریکا نے جی 7 سمیت دیگر ممالک کے ساتھ مل کر روس سے تیل کی خریداری کے بارے میں (قیمت کی حد پر) پرائس کیپ کا طریقہ کار اپنایا ہے۔
انہوں نے بتایا کہ پرائس کیپ کا فائدہ یہ ہو گا کہ اس سے روس کو ریونیو سے محروم رکھنے کے باوجود توانائی کی منڈیوں کو وسائل حاصل ہوں گے جبکہ روس کو یوکرین کے خلاف جنگ جاری رکھنے کے لیے تیل سے ہونے والی آمدن کی ضرورت ہو گی۔
نیڈ پرائس نے کہا کہ ہم نے جان بوجھ کر روسی تیل پر پابندی عائد نہیں کی بلکہ اب یہ پرائس کیپ کا معاملہ ہے، امریکا واضح طور پر کہہ چکا ہے کہ یہ وقت روس کے ساتھ اقتصادی سرگرمیاں بڑھانے کا نہیں ہے، ہمارا ماننا ہے کہ توانائی کی عالمی منڈیوں میں وسائل کی موجودگی اور انہیں اچھی طرح سپلائی کرنے ضرورت ہے اور ہم یہ بھی سمجھتے ہیں کہ پرائس کیپ ان مقاصد کے حصول کے لیے طریقہ کار فراہم کرتا ہے۔

واشنگٹن : (ویب ڈیسک) سابق امریکی صدر ڈونلڈ ٹرمپ کا کہنا ہے کہ کسی بھی امریکی صدر پر فیس بک استعمال کرنے پرپابندی نہیں ہونی چاہیے۔
غیر ملکی میڈیا رپورٹس کے مطابق میٹا کمپنی نے اعلان کیا ہے کہ وہ جلد ہی سابق امریکی صدر ڈونلڈ ٹرمپ کے فیس بک اور انسٹاگرام اکاؤنٹس کو دوبارہ بحال کرنے کی اجازت دینے کا ارادہ رکھتی ہے ۔
2021 میں سابق امریکی صدر پر ان سوشل میڈیا ایپس کے استعمال پر پابندی کیپیٹل ہل کی عمارت پر ان کے حامیوں کے دھاوے کے بعد عائد کی گئی تھی۔
میٹا کی طرف سے جاری ایک بیان میں کہا گیا کہ ہم آنے والے ہفتوں میں مسٹر ٹرمپ کے فیس بک اور انسٹاگرام اکاؤنٹس کو دوبارہ فعال کریں گے ۔
میٹا کے بین الاقوامی امور کے سربراہ کی طرف سے ایک بیان میں کہا گیا کہ پابندی اٹھائے جانے کے بعد نئے حفاظتی اقدامات کیے جائیں گے تاکہ دوبارہ اس طرح کی خلاف ورزیوں کو روکا جا سکے ، پلیٹ فارم کی پالیسیوں کی ہر خلاف ورزی پر ریپبلکن لیڈر کا اکاؤنٹ دو سال تک کے لیے معطل کیا جا سکتا ہے۔
فیس بک اور انسٹا گرام پر دو سال کی مدت کے لیے عائد پابندی ہٹانے کے اعلان پر اپنے رد عمل میں سابق امریکی صدر نے یہ اعلان کیا ہے کہ کسی بھی صدر پر دوبارہ سوشل میڈیا پر پوسٹ کرنے پر پابندی نہیں لگائی جائے گی۔
ابھی یہ واضح نہیں کہ جب ٹرمپ صدراتی انتخابات میں حصہ لینے کا اعلان کریں گے تو وہ اس پلیٹ فارم پر واپس آنا چاہیں گے یا نہیں ۔

برلن: (ویب ڈیسک) جرمنی کے شمالی علاقے میں ایک علاقائی ریل میں سوار مسافروں پرچاقو کے حملے میں دوافراد ہلاک اور متعدد زخمی ہوگئے۔
غیرملکی میڈیا کے مطابق جرمنی کے شمالی علاقے میں کیل سے ہیمبرگ کی طرف جانیوالی مقامی ٹرین میں سوار ایک ملزم نے چاقو سے مسافروں پر حملہ کردیا۔
جرمن فیڈرل پولیس فورس کا کہنا ہے کہ ملزم نے ٹرین کے اندر دیگر افراد پر بھی حملے کی کوشش کی لیکن مسافروں نے ملزم کواس وقت تک قابو میں رکھا جب تک پولیس وہاں نہ پہنچی ، مسافروں نے ملزم کو پولیس کے حوالے کردیا۔
جرمن پولیس کے مطابق حملے میں 3 افراد شدید زخمی ہوئے جبکہ دیگر 4 مسافر معمولی زخمی ہیں ، حملے میں ملزم کو بھی چوٹیں آئی ہیں، تمام افراد کو اسپتال منتقل کردیا گیا ہے۔
جرمنی کی وزیر داخلہ نے ٹرین میں حملے پر افسوس کا اظہار کرتے ہوئے اسے وحشیانہ عمل قرار دیا ہے ۔ ریاستی وزیر سیبین سوئیٹرلین نے اس حوالے سے کہا کہ وفاقی اور علاقائی پولیس وجوہات کا تعین کرنے کے لیے مل کر کام کر رہی ہے۔
جرمنی کی قومی ریل کمپنی نے ہیمبرگ اور کیل کے درمیان ریلوے لائن پر چلنے والی بعض ٹرینوں کو منسوخ کردیا ہے تاکہ پولیس اپنی تحقیقات مکمل کرسکے۔
واضح رہے کہ جرمنی میں حالیہ برسوں میں چاقو سے متعدد مہلک حملوں کے واقعات سامنے آئے ہیں جن میں کچھ حملے انتہا پسندوں جبکہ کچھ شدید نفسیاتی مسائل سے دوچارافراد کی جانب سے کیے گئے ۔
جرمنی میں ایک عدالت نے دسمبر میں ایک شامی نژاد شخص کوٹرین پرچاقو سے حملہ کرنے کے جُرم میں 14 سال قید کی سزا بھی سنائی تھی۔

تہران : (ویب ڈیسک) ایران نے یورپی حکام اور اداروں پر ملک میں ’’ دہشت گردی کی حمایت ‘‘ اور ’’ بدامنی کو ہوا دینے ‘‘ کے الزام میں مزید پابندیاں عائد کردیں۔
غیر ملکی خبر رساں ادارے کے مطابق ایران کی وزارت خارجہ نے بدھ کے روز یورپی یونین کے تین اداروں اور 22 افراد کے علاوہ برطانیہ کے ایک ادارے اور آٹھ عہدیداروں کو بلیک لسٹ کر دیا۔
ایران کی جانب سے یورپی پارلیمنٹ کے متعدد اراکین، شہری حکام، پولیس اور فوجی کمانڈروں سمیت فرانسیسی طنزیہ میگزین ’’ چارلی ہیبڈو ‘‘ کے تین ایگزیکٹوز کو بھی بلیک لسٹ کر دیا گیا ہے۔
ایران نے ان اقدامات کا اعلان یورپی یونین اور برطانیہ کی جانب سے درجنوں ایرانی حکام اور اداروں پر پابندیوں کے دو دن بعد کیا ہے۔

دودوما : (ویب ڈیسک) تنزانیہ کے اپوزیشن لیڈر ٹنڈو لیسو 6 سال کی خود ساختہ جلاوطنی کے بعد وطن واپس پہنچ گئے، لیسو کی وطن واپسی حکومت کی جانب سے اپوزیشن کی سیاسی ریلیوں پر سے پابندی اٹھانے کے بعد ہوئی۔
غیر ملکی خبر رساں ادارے کے مطابق ٹنڈو لیسو بدھ کی سہ پہر مرکزی جولیس نیریر انٹرنیشنل ایئرپورٹ پر پہنچے جہاں اپوزیشن پارٹی کے عہدیداروں اور ایئرپورٹ کے باہر سڑک پر کھڑے انکے حامیوں نے ان کا استقبال کیا۔
اپوزیشن لیڈر نے وطن واپسی کے حوالے سے بتایا کہ انہوں نے رواں ماہ اپوزیشن کی سیاسی ریلیوں پر سے پابندی اٹھانے کے حکومتی فیصلے کے بعد گھر آنے کا فیصلہ کیا۔
شکست خوردہ سابق صدارتی امیدوار کا کہنا تھا کہ جلا وطنی گزارنا انکے ، انکے خاندان اور انکی سیاسی جماعت کیلئے مشکل تھا، امید ہے کہ اب تنزانیہ کی حکمران جماعت ماضی کے مقابلے زیادہ کھلے طرز کی سیاست کے لیے تیار ہے۔
خیال رہے کہ لیسو کو 2017 میں ایک قاتلانہ حملے کے دوران متعدد گولیاں لگی تھیں جس کے بعد وہ بیلجیئم چلے گئے تاہم وہ 2020 میں صدارتی انتخاب لڑنے کے لیے ملک واپس آئے لیکن اپنی جان کو لاحق خطرات کی وجہ سے فوراً دوبارہ جلاوطنی اختیار کر گئے تھے۔