اسلام آباد: (ویب ڈیسک) پاکستان مسلم لیگ ق کے سینئر رہنماؤں طارق بشیر چیمہ اور سالک چودھری نے کہا کہ ہے قانونی و آئینی طور پر چودھری شجاعت حسین ہی پارٹی کے صدر ہیں۔
نیوز کانفرنس سے خطاب کرتے ہوئے طارق بشیر چیمہ نے کہا کہ آج ہم نے جنرل کونسل کی اسلام آباد میں میٹنگ رکھی تھی، جنرل کونسل میں چاروں صوبوں کی نمائندگی ہونا تھی، چودھری شجاعت حسین کی طبعیت خرابی کی وجہ سے آج جنرل کونسل کی میٹنگ نہیں ہوسکی۔
انہوں نے کہا کہ ہمیں پتا ہے لاہورمیں ڈرامہ ہو رہا ہے، وقت آنے پر بتائیں گے لاہور میں ڈرامہ کیوں ہو رہا ہے، یہ وہ ٹولہ ہے جو باضابطہ طور پر پی ٹی آئی میں ضم ہونے جا رہا تھا، ہمیں کوئی اعتراض نہیں پرویزالٰہی جس مرضی پارٹی میں جائیں۔
طارق بشیر چیمہ نے کہا کہ آج دوسرا ڈرامہ کیا گیا کہ عمران کے شانہ بشانہ الیکشن لڑیں گے، انہوں نے کہا کہ مسلم لیگ (ق) کے صدر چودھری شجاعت حسین ہیں، الیکشن کمیشن کا فیصلہ اگر میرٹ پر ہوا تو چودھری شجاعت کے حق میں ہو گا، یہ ممکن نہیں پنجاب کا صدر مرکزی صدر اور تمام عہدے داروں کو تبدیل کر دے۔
نیوز کانفرنس سے خطاب کرتے ہوئے سالک چودھری کا کہنا تھا کہ وقت آنے پر ظاہر کریں گے کہ لاہور میں ڈرامہ کیوں چل رہا ہے، اگر جنرل کونسل کا اجلاس بلانا ہے تو 10 دن پہلے نوٹس دیا جاتا ہے، آج لاہور والے اجلاس میں ان کے سارے ایم پی ایز بھی پورے نہیں آئے۔
انہوں نے کہا کہ جنرل کونسل اجلاس میں کون سے لوگ آئے؟ جنرل کونسل اجلاس کے حوالے سے دھوکہ دیا جا رہا ہے، سارا کچھ انہوں نےجلد بازی میں کیا ہے، کل انہوں نے پارٹی میں ایک نام نہاد الیکشن بھی کروانا ہے، انہوں نے کہا کہ قانونی و آئینی طور پر چودھری شجاعت حسین ہی پارٹی کے صدر ہیں۔

کراچی: (ویب ڈیسک) پاکستان تحریک انصاف کے رہنما اسد عمر نے کہا کہ پولیس نے عدالتی فیصلوں کی حکم عدولی کی، فواد چودھری کو پیش نہیں کیا گیا، آئین کی کھلم کھلا خلاف ورزیاں کی جا رہی ہیں۔
میڈیا سے گفتگو کرتے ہوئے انہوں نے کہا عمران خان دلیرانہ فیصلے کرنے والے آدمی ہیں، بتائیں کس قانون کے تحت عمران خان کو گرفتار کیا جائے گا؟ ہم اپنی ذات پر تکلیف برداشت کرنے کیلئے تیار ہیں، اسحاق ڈار کہا کرتے تھے ڈالر 200 روپے سے نیچے لائیں گے، آج ڈالر مارکیٹ میں 250 روپے کا بھی نہیں مل رہا۔
سابق وفاقی وزیر اسد عمر نے کہا کہ ملک میں ہزاروں کاروبار بند ہو گئے، لاکھوں لوگ بیروز گار ہو گئے، قوم اس وقت عمران خان کے ساتھ کھڑی ہوئی ہے، اس وقت آئین کو کھلم کھلا چیلنج کیا جا رہا ہے، ملک احمد خان کے بیان سے لگتا ہے کہ وہ آئین سے بغاوت کرنے جا رہے ہیں۔
پاکستان تحریک انصاف کے رہنما نے کہا ایک ہفتہ بعد بھی پنجاب میں گورنر نے الیکشن کی تاریخ کا اعلان نہیں کیا، آئین کے اندر واضح لکھا ہوا ہے جب اسمبلیاں تحلیل ہوں گی تو گورنر نے الیکشن کی تاریخ کا اعلان کرنا ہے، خیبر پختونخوا میں بنائی جانے والی کابینہ پی ڈی ایم کی کابینہ ہے۔

چونیاں: (ویب ڈیسک) 2 سگے بھائیوں میں لین دین کے تنازع پر بڑے بھائی نے چھوٹے بھائی کو قتل کر کے خود کشی کر لی۔
نواحی گاؤں برقی چک 18 میں دو سگے بھائیوں ساجد اور عابد میں لین دین کے تنازع پر جھگڑا ہو گیا، جھگڑے میں بڑے بھائی ساجد نے فائر مار کر عابد کو قتل کر دیا جبکہ ساجد نے خود بھی زہر پی کر زندگی کا خاتمہ کر لیا۔
چونیاں پولیس کے مطابق مقتول عابد کی عمر 30 سال جبکہ ساجد کی عمر 35 سال تھی دونوں بھائی شادی شدہ تھے، پولیس نے دونوں بھائیوں کی لاشوں کو پوسٹ مارٹم کے لیے ہسپتال منتقل کر کے کارروائی شروع کر دی

لاہور: (ویب ڈیسک) اصدر مملکت ڈاکٹر عارف علوی نے کہا ہے کہ مائنس عمران فارمولا کامیاب نہیں ہو سکتا، عمران کی گرفتاری یا مائنس ون فارمولے پر سخت عوامی ردعمل سامنے آئے گا۔
گورنر ہاؤس میں سینئر صحافیوں سے ملاقات میں گفتگو کرتے ہوئے صدر مملکت ڈاکٹر عارف علوی نے کہا کہ حکومت کو کئی مرتبہ اپوزیشن سے مذاکرات کی دعوت بھیجی۔
صدر مملکت عارف علوی نے مزید کہا کہ حکومت نے میری طرف سے مذاکرات کی دعوت کا کوئی جواب نہیں دیا، مذاکرات کے حوالے سے حکومت کی جانب سے مکمل خاموشی ہے۔
انہوں نے کہا الیکشن کے حوالے سے حکومت اور اپوزیشن کو مل بیٹھنا چاہیے، عمران خان کو خدشہ ہے کہ حکومت الیکشن کرانے میں سنجیدہ نہیں، فواد چودھری کے ساتھ جو سلوک کیا گیا اس پر شرمندگی ہوئی۔