لاہور: (ویب ڈیسک) تیل کے ڈپو میں آگ لگنے سے 5 افراد زخمی ہوگئے۔
افسوسناک واقعہ امامیہ کالونی شاہدہ میں پیش آیا جہاں تیل کے ڈپو میں اچانک آگ بھڑک اٹھی، آگ کی زد میں آکر 5 افراد زخمی ہوگئے۔
آگ کے بلند شعلے اٹھنے سے علاقے میں خوف وہراس پھیل گیا، واقعہ کی اطلاع ملتے ہیں ریسکیو ٹیموں نے موقع پر پہنچ کر آگ بجھانے کا عمل شروع کردیا۔
ریسکیو1122 نے زخمیوں کو طبی امداد فراہم کرنے کے بعد ہسپتال منتقل کردیا۔

لاہور: (ویب ڈیسک) مسلم لیگ ن کے رہنما کیپٹن (ر) صفدر نے کہا ہے کہ 2018ء کا الیکشن کس نے چوری کیا اس حقیقت سے پردہ اٹھنا چاہئے۔
ورکرز کنونشن سے خطاب کرتے ہوئے مسلم لیگی رہنما نے کہا کہ ہم سیاست نہیں بلکہ حق کی بات کرتے ہیں، مریم نواز سے ایئر پورٹ پر عہد لیں گے ان کرداروں کو کیفر کردار تک پہنچانا ہوگا۔
پنجابی میں خطاب کرتے ہوئے انہوں نے کہا کہ ایویں اسیں نعرہ لگاتے ہیں اک واری فیر شیر، انہوں نے کہا کہ نواز شریف ایٹمی دھماکے کرے اور مشرف ملک کے ساتھ غداری کرے فیر کی فائدہ اک واری فیر شیر دا، اس دفعہ شیرسب کو پکڑے گا۔
کیپٹن (ر) صفدر کا کہنا تھا کہ نواز شریف کو ولیوں کی خیرات ہے، نواز شریف نے ایٹمی پاکستان بنایا، نوازشریف کا کمیوں سے پالا پڑا، نواز شریف کو کمزور پاکستان دیا گیا تھا، ہر دور میں نواز شریف نے پاکستان کو سنبھالا۔
انہوں نے کہا کہ جب نوازشریف کو پاکستان ملا تو سندھ، بلوچستان پروان چڑھا، جب ملک ترقی کر رہا تھا تو نوازشریف کو سازش کے ذریعے روکا گیا۔

لاہور: (ویب ڈیسک) ن لیگ کے رہنما ملک احمد خان نے عمران خان اور قاسم سوری پر آرٹیکل 6 کا مقدمہ نہ بنانے کو اپنی حکومت کی غلطی قرار دے دیا۔
رہنما ن لیگ نے کہا کہ عمران خان نے آرمی چیف کو اپنے آئینی کردار تک محدود رہنے پر گالیاں دیں، کہا کہ جیسے حکومت بنائی تھی اسی طرح بچاؤ بھی اور چلاؤ بھی، لفظ نیوٹرل کو گالی بنا کر جانور تک کہا گیا۔
فواد چوہدری کے بارے میں ملک احمد خان نے کہا کہ یہ وہ فواد نہیں ہے جسے وہ جانتے تھے، مگر جو کچھ بھی ہے انہیں ہتھکڑیاں اور چادر ڈال کر نہیں لانا چاہیے تھا۔
علاوہ ازیں سابق وزیرخزانہ مفتاح اسماعیل نے بھی کہا ہے کہ فواد چوہدری کو گرفتار اور ہتھکڑیاں لگا پیش نہیں کرنا چاہیے تھا۔

اسلام آباد: (ویب ڈیسک) وزیر مملکت برائے خارجہ حنا ربانی کھر نےکہا ہےکہ بھارت کے ساتھ اس وقت کوئی بیک ڈور ڈپلومیسی نہیں، بیک ڈور ڈپلومسی نتیجہ خیز ہو تو ضرور ہونی چاہیے۔
سینیٹ میں اظہار خیال کرتے ہوئے وزیر مملکت خارجہ حنا ربانی کھر نےکہا کہ بھارت کے ساتھ تجارت پر کوئی بات چیت نہیں ہوئی، ابھی سرحد پار سے دشمنی ایک منفرد طرز کی ہے، جو سرحد پار حکومت کے باعث ہے،کوشش ہےکہ لائن آف کنٹرول اور تمام سرحدیں پر امن رہیں۔
حنا ربانی کھرکا کہنا تھا کہ خطے کے مفاد میں نہیں کہ لاشیں گریں، خون بہتا رہے، ہم ایسا ریلیف ہر روز دیں گے جس سے ملک کے لوگ شہید ہونا بند ہوں، ہم امن کے راستے پر ہیں، پاکستان نے اپنی تاریخ سے سبق سیکھا لیکن خطے کے بعض ممالک نے نہیں سیکھا، اب بی بی سی کی دستاویزی فلم سے دنیا کو وہ سب آشکار ہوا ہے جو ہمارا موقف تھا۔
وزیر مملکت کا کہنا تھا کہ سابقہ دور حکومت میں بیک ڈور ڈپلومیسی ہو رہی تھی، بھارت کے ساتھ اس وقت کوئی بیک ڈور ڈپلومیسی نہیں،بیک ڈور ڈپلومسی نتیجہ خیز ہو تو ضرور ہونی چاہیے، دنیا میں لوگ ہمیں کہتے ہیں کہ بھارت کے ساتھ امن کے راستے پر کیوں نہیں چلتے، اگرسرحد پار وزیراعظم کہےکہ ایٹمی اثاثے دیوالی کے لیے نہیں رکھے، تو آپ کیا کریں گے؟
ان کا کہنا تھا کہ کرتاپور راہدری سابقہ حکومت نے بنائی، اس سے پہلےکی حکومت نےکام شروع کیا تھا، امن اور مذہبی سیاحت کو آگے بڑھانے میں پاکستان انتظار نہیں کرتا۔

کراچی: (ویب ڈیسک) سابق گورنر سندھ اور پاکستان تحریک انصاف کے رہنما عمران اسماعیل نے کہا ہے کہ سابق وفاقی وزیر فواد چودھری کی گرفتاری کی مذمت کرتے ہیں۔
کراچی میں میڈیا سے گفتگو کرتے ہوئے سابق گورنر سندھ نے کہا کہ ہمارا دور آیا تو ہم ایسا نہیں کر سکتے، ہمارے لیڈر نے ہمیں کچھ اور سکھایا ہے، ہم قانونی اور آئینی ہاتھوں سے نمٹیں گے، فواد چودھری کا جسمانی ریمانڈ کیوں لیا گیا ہے، یہ سوچے سمجھے منصوبے کا حصہ ہے، ان کے منہ پر کپڑا لا کر پیش کیا گیا، کیا وہ گینگسٹر ہے یا ری پلسٹ ہے، الیکشن کمیشن منشی کہنے پر ناراض ہو جاتا ہے۔
عمران اسماعیل نے مزید کہا کہ اسحاق ڈار ہے نا منشی، جب سے پنجاب میں نگران حکومت قائم ہوئی ہے حالات ٹھیک نہیں، فواد چودھری کو گھر میں بغیر وارنٹ کے گھس کر گرفتار کیا گیا، عمران خان کی گرفتاری کا منصوبہ کارکنان نے ناکام بنایا، کورٹ کی حکم عدولی کی گئی، جبری اسلام آباد لے جایا گیا، عدالتی احکامات کو ردی کی ٹوکری میں پھینکا جا رہا ہے۔
تحریک انصاف کے مرکزی رہنما نے مزید کہا کہ پاکستان کو ایک منصوبے کے ساتھ بنانا ری پبلک بنایا جا رہا ہے، جو اقتدار میں ہیں ان کی نہ تو کوئی اہلیت ہے نہ مقبولیت، ڈالر میں 25 روپے کا اضافہ ہوا، اکنامک ایمرجنسی کی آڑ میں تباہی پھیلائی جا رہی ہے، آئی ایم ایف، ورلڈ بینک نے تعاون سے انکار کر دیا ہے۔

اسلام آباد: (ویب ڈیسک) پاکستان تحریک انصاف نے انتقامی کارروائیوں میں ملوث افسروں کی فہرست الیکشن کمیشن میں جمع کرا دی، فہرست سینئر وکیل فیصل فرید ایڈووکیٹ کی جانب سے جمع کرائی گئی۔
تحریک انصاف نےانتقامی کارروائیوں میں ملوث افسروں کو پنجاب میں مقرر نہ کرنے کی سفارش کر دی، فہرست میں ایڈمنسٹریٹو سروسز، پراونشل مینجمنٹ سروسز اور پولیس سروسز کے افسر شامل ہیں۔
فہرست میں ڈی ایم جی میں نبیل اعوان، کیپٹن عثمان، عمر شیر چٹھہ سمیر سید، محمد علی رندھاوا،اجمل بھٹی،احمد رضا سرور کے نام شامل ہیں۔
عامر کریم خان، ڈاکٹر راشد منصور،عامر خٹک اور سید علی مرتضیٰ کے نام بھی فہرست میں موجود ہیں۔
پولیس سروسز کے سی سی پی او بلال صدیق کمیانہ، کیپٹن (ر) عثمان انور، کیپٹن (ر) سہیل چودھری، راؤ سردار علی خان، رضا صفدر کاظمی، ڈاکٹر عابد خان، حافظ عطاالرحمان بابر سرفراز الپا، سہیل ظفر چٹھہ،رانا ایاز سلیم اور سید علی ناصر رضوی کے نام بھی فہرست میں شامل کیے گئے ہیں۔