اسلام آباد : (ویب ڈیسک) وزیراعظم محمد شہباز شریف نے آج (جمعہ) کو مارگلہ ریلوے سٹیشن اسلام آباد پر گرین لائن ایکسپریس ٹرین سروس کا افتتاح کیا ۔
جاری بیان کے مطابق وزیراعظم شہباز شریف نےاس موقع پر ٹرین میں سفری سہولیات کاجائزہ لیا ۔ اس موقع پر وزیرخزانہ اسحاق ڈار، وزیرریلوے خواجہ سعد رفیق، وزیر منصوبہ بندی احسن اقبال وزیراعظم کے ہمراہ تھے ۔
وزیر ریلوے خواجہ سعد رفیق نے وزیر اعظم کو ٹرین بارے بریفنگ دی ۔
جدید سہولیات سے آراستہ گرین لائن ایکسپریس ٹرین اسلام آباد سے کراچی براستہ پاکستان ریلویز مین لائن ون پیسنجر سروس مہیا کرے گی ، یہ ٹرین راولپنڈی، چکلالہ ،لاہور ، خانیوال ، بہاولپور، روہڑی ، حیدرآباد اور ڈرگ روڈ ریلوے سٹیشنز پر رکے گی۔

لاہور: (ویب ڈیسک) سابق وزیراعلیٰ پنجاب چودھری پرویز الٰہی نے کہا ہے کہ فواد چودھری اور ان کے خاندان سے برسوں پر محیط نہایت احترام و عقیدت کا رشتہ ہے، کل کے نادانستہ بیان سے فواد چودھری اور اہلخانہ کے جذبات مجروع ہوئے جس پر افسوس ہے۔
سابق وزیراعلیٰ پنجاب چودھری پرویز الٰہی نے فواد چودھری کے بھائی فیصل فرید ایڈووکیٹ سے ٹیلی فون رابطہ کیا، اس موقع پر چودھری پرویز الٰہی نے گرفتاری کے حوالے سے بیان پر فواد چودھری کے اہلِ خانہ سے معذرت کی اور کہا کہ ان کی گرفتاری و جھوٹے پرچے کا اندراج سفاکیت، نہایت قابلِ مذمت ہے۔
چودھری پرویز الٰہی نے کہا کہ اپنے بیان پر معذرت کرتا ہوں، فواد چودھری اور اہلِ خانہ سے مکمل یکجہتی کا اظہار کرتا ہوں۔
اس موقع پر فیصل فرید ایڈووکیٹ کا کہنا تھا کہ چودھری صاحب معذرت کرنا آپ کا بڑا پن ہے، آپ ہمیں شرمندہ کر رہے ہیں، آپ بڑے ہیں، میں اور میرا خاندان آپ کو اپنا بزرگ سمجھتے اور نہایت احترام کی نگاہ سے دیکھتے ہیں، ہم بطور خاندان آپ اور آپ کے اہلِ خانہ کی سلامتی کیلئے دعاگو ہیں۔

لاہور: (ویب ڈیسک) پنجاب کی نگران کابینہ کے 8 وزراء کو قلمدان سونپ دیئے گئے۔
نگران صوبائی حکومت نے وزراء کو قلمدان سونپے جانے کا نوٹیفکیشن بھی جاری کر دیا جس کے مطابق بلال افضل کو کمیونیکیشن اینڈ ورکس اور ایکسائز اینڈ ٹیکسیشن کا قلمدان دیا گیا ہے۔
ایس ایم تنویر کو انرجی، انڈسٹری اینڈ کامرس، ڈاکٹر جاوید اکرم سپیشلائزڈ ہیلتھ کیئر اور میڈیکل ایجوکیشن کے وزیر ہوں گے۔
اس کے علاوہ ابراہیم مراد لوکل گورنمنٹ، ڈاکٹرجمال ناصر پرائمری اینڈ سیکنڈری ہیلتھ کیئر، اظفرعلی محکمہ اوقاف، زکوۃ و عشر اور منصور قادر محکمہ ہائر ایجوکیشن اینڈ سکولز کے وزیر ہوں گے۔

اسلام آباد: (ویب ڈیسک) پیپلزپارٹی کے سیکرٹری جنرل اور سابق چیئرمین سینیٹ نیئر بخاری نے کہا ہے کہ عارف علوی صدر کے عہدے کا جواز کھو بیٹھے ہیں، عارف علوی ریاست کے سربراہ ہیں لیکن حاضریاں زمان پارک میں دیتے ہیں۔
انہوں نے کہا کہ عارف علوی کے ماورائے اقدام کو سپریم کورٹ نے ختم کر کے اسمبلی بحال کی وہ اب صدر کے عہدے کا جواز کھو بیٹھے ہیں۔
پی پی رہنما کا کہنا تھا کہ سیاسی مذاکرات کھلے دل سے ہوتے ہیں مشروط نہیں ہوتے،عمرانی سوچ کے تحت مقصد حکمرانی اور اقتدار میں بیٹھنا ہو تو معاملات نہیں چلتے۔
انہوں نے مزید کہا کہ وزیراعظم کے خلاف عدم اعتماد کی تحریک جمع ہونے کے باوجود عارف علوی نے اسمبلی توڑی، عمران دور کی عوام کو دی گئی تکالیف اور مشکلات کا خاتمہ حکومت کی ترجیح ہے، مستقبل کو مد نظر رکھ کر انتخابات کا لائحہ عمل بنائیں گے۔

لاہور: (ویب ڈیسک) سابق وزیراعلیٰ پنجاب چودھری پرویز الٰہی کے فواد چودھری سے متعلق بیان پر پی ٹی آئی رہنما کی اہلیہ حبا کا بیان بھی سامنے آیا ہے۔
یاد رہے کہ گزشتہ روز چودھری پرویز الٰہی کی ایک مبینہ آڈیو لیک ہوئی تھی جس میں وہ فواد چودھری سے متعلق نازیبا زبان استعمال کرتے ہوئے کہہ رہے تھے کہ اگر فواد چودھری کو ایک ماہ پہلے گرفتار کر لیا جاتا تو اسمبلی نہ ٹوٹتی۔
فواد چودھری سے متعلق سابق وزیراعلیٰ پنجاب کے بیان پر فواد چودھری کی اہلیہ حبا کا بیان سامنے آیا ہے جس میں انہوں نے کہا ہے کہ پرویز الٰہی کو بھی ان کی 5 سالہ وزارت اعلیٰ سے پہلے 2002 میں گرفتار کر لیا جاتا تو آج پنجاب کا حال وہ نہ ہوتا جو ہے۔
خیال رہے کہ بعد ازاں چودھری پرویز الٰہی نے فواد چودھری سے متعلق اپنے بیان پر معذرت بھی کر لی تھی، ان کا کہنا تھا کہ ہمارے فواد چودھری کے خاندان کے ساتھ اچھے روابط ہیں۔

راولپنڈی: (ویب ڈیسک) سربراہ پاکستان عوامی مسلم لیگ اور سابق وفاقی وزیر شیخ رشید نے بھی نگران وزیر اعلیٰ پنجاب کی تقرری سپریم کورٹ میں چیلنج کر دی۔
شیخ رشید نے سردار عبد الرازق ایڈووکیٹ کے ذریعے درخواست سپریم کورٹ میں دائر کی، درخواست میں محسن نقوی کی تقرری کو غیر آئینی قرار دینے کی استدعا کی گئی۔
درخواست میں شیخ رشید نے موقف اپنایا کہ محسن نقوی اپوزیشن مخالف اور حکومتی مددگار کے طور پر سامنے آئے، وہ پی ٹی آئی حکومت کے خاتمے کے آپریشن کے اہم کردار ہیں، ان کی موجودگی میں پنجاب میں صاف اور شفاف انتخابات نہیں ہوسکتے۔
درخواست میں وفاقی سیکرٹری قانون، محسن نقوی، سیکرٹری قانون پنجاب اور الیکشن کمیشن کو فریق بنایا گیا ہے۔

اسلام آباد: (ویب ڈیسک) رہنما پاکستان تحریک انصاف اور سابق وفاقی وزیر اطلاعات و نشریات فواد چودھری کی عدالت میں پیشی کے موقع پر ان کی اہلیہ حبا چودھری کی پولیس سے تکرار ہوگئی۔
فواد چودھری کو ہتھکڑی لگا کر اور ان کے اوپر چادر ڈال کر عدالت پیش کرنے پر ان کی اہلیہ حبا چودھری نے اہلکاروں سے تکرار کرتے ہوئے کہا کہ میرے خاوند کے اوپر چادر نہ ڈالی جائے۔
انہوں نے کہا کہ میرے خاوند کو مزید ریمانڈ پر بھیجا گیا تو ہم احتجاج کریں گے، فواد کو جیل بھیجا گیا تو ملک گیر احتجاج ہوگا۔
میڈیا نمائندگان سے غیر رسمی گفتگو کرتے ہوئے حبا چودھری کا کہنا تھا کہ فواد پر تشدد کا علم نہیں، ان کے منہ پر کپڑا اور ہتھکڑیاں لگا کر نہیں لانا چاہیے، فواد چودھری کیا دہشتگرد ہے کہ اس طرح پیش کیا جا رہا ہے۔

اسلام آباد: (ویب ڈیسک) پاکستان تحریک انصاف نے نگران وزیر اعلیٰ پنجاب کی تقرری سپریم کورٹ میں چیلنج کر دی۔
تحریک انصاف نے بطور سیاسی جماعت اور اسد عمر نے بطور سیکرٹری جنرل پی ٹی آئی درخواست دائر کی ہے۔
درخواست میں محسن نقوی کو بطور نگران وزیر اعلیٰ پنجاب کام سے روکنے کی استدعا کی گئی، پی ٹی آئی نے راجہ ریاض کو اپوزیشن لیڈر بنانے کا نوٹی فکیشن بھی چیلنج کر دیا ہے۔
درخواست میں پی ٹی آئی کی جانب سے کہا گیا کہ محسن نقوی کو بطور وزیر اعلیٰ پنجاب جانبدار قرار دیا جائے، الیکشن کمیشن کے ممبر بابر حسن بھروانہ اور اکرام اللہ خان کی تعیناتی اور محسن نقوی کا نگران وزیر اعلیٰ پنجاب تعیناتی کا نوٹی فکیشن غیر آئینی قرار دیا جائے۔