کھیوڑہ: (ویب ڈیسک) مارٹن کے ایریا میں واقع کوئلے کی کان میں دب جانے سے 2 بھائی جان کی بازی ہار گئے۔
واقعہ میں 5 افراد زخمی بھی ہوئے ہیں، زخمیوں اور جاں بحق افراد کی لاشوں کو ضلع چکوال کلر کہار کے ہسپتال منتقل کر دیا گیا ہے۔
ابتدائی معلومات کے مطابق کوئلہ کی کان میں ہونے والا حادثہ کان کی چھت بیٹھ جانے کے باعث پیش آیا۔

سیالکوٹ: (ویب ڈیسک) پاکستان مسلم لیگ (ن) کے رہنما اور وزیر دفاع خواجہ آصف نے کہا ہے کہ آصف زرداری پر الزامات عمران خان کا نیا پینترا ہے، عمران خان نے سیاست کا رخ تشدد کی طرف موڑنے کی کوشش کی ہے، عمران خان کے بیان سے پیپلز پارٹی لیڈرشپ کی جان کو خطرہ ہو سکتا ہے۔
پریس کانفرنس سے گفتگو کرتے ہوئے لیگی رہنما خواجہ آصف نے کہا کہ پیپلز پارٹی نے دہشتگردی کیخلاف جنگ میں بہت بڑی قربانی دی ہے، دہشتگردی کی جنگ میں بینظیر بھٹو شہید ہوئیں، اتنی بڑی قربانی کے باوجود پیپلز پارٹی نے سیاسی جدوجہد جاری رکھی۔
انہوں نے کہا کہ سیاسی رہنماؤں کو جھوٹے الزامات اور مقدمات میں قید نہیں کرنا چاہیے، سیاسی انتقام کا سخت مخالف ہوں، اگر خدانخواستہ کوئی بڑا سانحہ ہوا تو اس کا ذمہ دار عمران خان ہوگا۔
خواجہ آصف نے کہا کہ عمران خان ایک دن میں کئی بار پینترا بدلتا ہے، استعفے منظور ہوگئے تو اب کہتے ہیں عدالت میں جا رہے ہیں، جب استعفے منظور ہونے شروع ہوئے تو کہا کہ اسمبلی میں واپس آنا چاہتے ہیں، عمران خان نے استعفے دیے اور اسمبلی کے خلاف بیانات دیے۔
وزیر دفاع کا مزید کہنا تھا کہ عمران خان پہلے کہتے رہے مجھے بین الاقوامی سازش کے تحت اقتدار سے ہٹایا گیا، اب اس کے بیان کا رخ نگران وزیر اعلیٰ محسن نقوی پر آگیا ہے، جس طرح سے سیاست کا رخ بدل رہا ہے اس سے بڑی بد دیانتی کوئی نہیں ہوسکتی۔

اسلام آباد: (ویب ڈیسک) وزیراعظم محمد شہباز شریف نے ضلع لسبیلہ میں مسافر کوچ حادثے پر گہرے دکھ اور افسوس کا اظہار کیاہے ۔
وزیراعظم محمد شہباز شریف نے حادثے میں جاں بحق ہونے والوں کے بلندی درجات کے لئے دعا اور لواحقین سے تعزیت کا اظہار کیا ہے ۔
وزیراعظم نے حادثے میں زخمی ہونے والوں کی جلد صحت یابی کے لئے دعا کی ، انہوں نے زخمیوں کو ہر ممکن طبی سہولیات فراہم کرنے کی ہدایت کی۔
وزیرخارجہ بلاول بھٹو زرداری کا اظہار افسوس
پاکستان پیپلزپارٹی کے چیئرمین و وزیر خارجہ بلاول بھٹو زرداری نے بھی بلوچستان کے علاقہ لسبیلہ میں کوچ کھائی میں گرنے کے نتیجے میں قیمتی جانوں کا ضیاع پر گہرے دکھ اورافسوس کا اظہار کیا ہے۔
جاری بیان کےمطابق بلاول بھٹو زرداری نے کہا کہ اس دردناک حادثے پر پورا ملک غمزدہ ہے،حادثے میں اپنے پیاروں کو کھونے والے خاندانوں کے دکھ میں برابر کا شریک ہوں۔
بلاول بھٹو زرداری نے کہا کہ متعلقہ حکام حادثے کے اسباب معلوم کرنے کے لیے تحقیقات کریں تاکہ آئندہ ایسے سانحات سے بچا جا سکے۔
سپیکر و ڈپٹی سپیکر قومی اسمبلی کا اظہارافسوس
قومی اسمبلی کےسپیکر راجہ پرویز اشرف اور ڈپٹی سپیکر زاہد اکرم درانی نے لسبیلہ میں کوچ کو پیش آنے والے المناک حادثے میں ہونے والے قیمتی جانی نقصان پر گہرے دکھ اور افسوس کا اظہار کرتے ہوئے لواحقین سے اظہار تعزیت کیا ہے۔
واضح رہے کہ آج بلوچستان کے ضلع لسبیلہ کے علاقے میں کوئٹہ سے کراچی آنیوالی مسافر کوچ گہری کھائی میں گرنے سے کم ازکم 40 افراد جاں بحق ہوگئے۔

لاہور: (ویب ڈیسک) پاکستان تحریک انصاف (پی ٹی آئی) کے نائب چیئرمین اور سابق وزیر خارجہ شاہ محمود قریشی نے کہا ہے کہ پٹرولیم مصنوعات کی قیمتوں میں اضافہ حکومتی ناکامی کا ثبوت ہے۔
سماجی رابطے کی ویب سائٹ ٹوئٹر پر اپنے پیغام میں رہنما پی ٹی آئی شاہ محمود قریشی نے کہا کہ ملک پہلے ہی معاشی تباہی کے دہانے پر کھڑا ہے، آج عوام ان امپورٹڈ حکمرانوں کے ہاتھوں مزید بوجھ تلے آگئے ہیں۔
انہوں نے کہا کہ پٹرول اور ڈیزل کی قیمتوں میں ایک بار پھر 35 روپے کا اضافہ ان کی ناکامی کا منہ بولتا ثبوت ہے، عوام کب تک ان کی نااہلی کی قیمت ادا کریں گے، کیا اربابِ اختیار مزید تباہی کا انتظار کریں گے۔

کراچی: (ویب ڈیسک) پاکستان تحریکِ انصاف (پی ٹی آئی) کے رہنما خرم شیرزمان نے کہا ہے کہ وزیراعظم شہباز شریف اب اپنے کپڑے بیچیں اور قوم کو سستا پٹرول لا کر دیں۔
اپنے ایک بیان میں رہنما پی ٹی آئی خرم شیر زمان نے کہا کہ حکومت نے پٹرولیم مصنوعات کی قیمتیں بڑھا کرعوام دشمن حکومت ہونے کا ثبوت دیا، لگتا ہے امپورٹڈ حکومت کا مشن عوام کے منہ سے نوالہ چھیننا ہے۔
انہوں نے کہا کہ پیٹرول مہنگا ہونے سے ہر چیز مہنگی ہوگی،صنعتیں، سفری کاروبار متاثر ہوں گے، عوام کو ریلیف دینے کیلئے کہتے ہیں پیسہ نہیں ہے، قوم کا پیسہ غیر ضروری دوروں، سرجریوں پر خرچ کیا جا رہا ہے۔
ان کا مزید کہنا تھا کہ حکومت نے مہنگائی سے عوام کی چیخیں نکال دیں ہیں، پی ڈی ایم ٹولے کو گھر بھیجنا ضروری ہے۔

لاہور: (ویب ڈیسک) چئیر مین تحریک انصاف و سابق وزیراعظم عمران خان نے پٹرولیم مصنوعات کی قیمتوں میں ہوشربا اضافے پر شدید ردعمل کا اظہار کیا ہے ۔
چیئرمین پی ٹی آئی اور سابق وزیراعظم عمران خان نے سماجی رابطے کی ویب سائٹ ٹوئٹر پر جاری اپنے بیان میں کہا کہ امپورٹڈ حکومت نے بد انتظامی کے ذریعے ملکی معیشت کا برا حال کر کے تنخواہ دار اور غریب عوام کو کچل کر رکھ دیا ہے۔
ان کا کہنا تھا کہ پیٹرول اور ڈیزل کی فی لیٹر قیمت میں 35 روپے کا اضافہ اور ڈالر کے مقابلے میں پاکستانی روپے کی قدر 262 روپے 60 پیسے تک پہنچ گئی ہے ، بجلی اور گیس کی قیمتوں میں بھی 35 فیصد اضافہ کیا گیا۔
عمران خان نےحکومت پر تنقید کرتے ہوئے لکھا کہ اب حکومت 200 ارب روپے کا منی بجٹ لارہی ہے جس سے مہنگائی میں بے تحاشہ اضافہ ہو گا۔
واضح رہے کہ وزیر خزانہ اسحاق ڈار نے آج صبح پریس کانفرنس کرتے ہوئے پیٹرول اور ہائی اسپیڈ ڈیزل کی قیمت میں 35 روپے فی لیٹر جبکہ مٹی کے تیل اور لائٹ اسپیڈ ڈیزل کی قیمت میں 18 روپے فی لیٹر اضافے کا اعلان کیا تھا۔
عوام کی جانب سے پیٹرولیم مصنوعات کی قیمتوں میں اضافے پر حکومت کو شدید تنقید کا نشانہ بنایا گیا ہے جبکہ ٹرانسپورٹرز نے پیٹرولیم مصنوعات کی قیمت میں اضافے کے حکومتی فیصلے کو مسترد کر دیا ہے۔

اسلام آباد: (ویب ڈیسک) چیئرمین پاکستان پیپلز پارٹی اور وزیر خارجہ بلاول بھٹو آئندہ دو ماہ کے دوران امریکہ کے 3 دورے کریں گے۔
وزیر خارجہ بلاول بھٹو 7 فروری کو امریکن کونسل آف چرچز کے دعائیہ ناشتے میں شرکت کریں گے، دعائیہ ناشتے میں امریکی صدر جو بائیڈن بھی بطور خاص شرکت کریں گے، امریکی صدر بائیڈن ناشتے کی تقریب سے خطاب اور شرکاء سے ملاقات بھی کریں گے، کونسل آف چرچز کے ناشتے میں پاکستان اور آزاد کشمیر کی مختلف شخصیات کو شرکت کی دعوت دی جاتی ہے۔
بلاول بھٹو 8 مارچ کو اقوام متحدہ کے زیر اہتمام مسلم خواتین کے حوالے سے عالمی کانفرنس میں شریک ہوں گے۔
وزیر خارجہ 18 مارچ کو اقوام متحدہ کے زیر اہتمام اسلاموفوبیا کے حوالے سے خصوصی تقریب میں بھی شرکت کریں گے، اقوام متحدہ نے ہر سال 15 مارچ کو یہ دن عالمی سطح پر منانے کی منظوری دی تھی، رواں سال مارچ میں پہلی دفعہ یہ دن منایا جائے گا اقوام متحدہ 18 مارچ کو اسلاموفوبیا کے حوالے سے ایک خصوصی تقریب منعقد کر رہا ہے جس میں بلاول بھٹو پاکستان کی نمائندگی کریں گے۔

چشتیاں: (ویب ڈیسک) نواحی علاقہ 24 گجیانی کے قریب پیش آنے والے خوفناک حادثے میں 6 افراد جان کی بازی ہار گئے، جاں بحق افراد شادی میں شرکت کے لئے جا رہے تھے۔
تیز رفتار کار موٹر سائیکل سے ٹکرانے کے بعد درخت کو جا لگی، حادثے میں 6 اموات کے علاوہ 2 افراد زخمی بھی ہوئے ہیں۔
ریسکیو ٹیموں نے موقع پر پہنچ کر لاشوں کو ہسپتال منتقل کر دیا جبکہ حادثے سے متعلق ابتدائی معلومات میں یہ چیز سامنے آئی ہے کہ حادثہ تیز رفتاری کے باعث پیش آیا۔

لاہور: (ویب ڈیسک) دبئی کے گینیز ورلڈ ریکارڈ ہولڈر ڈاکٹر بو عبداللہ نے سابق وزیر اعظم اور چیئرمین پاکستان تحریک انصاف عمران خان سے زمان پارک میں ملاقات کی ہے۔
سماجی رابطے کی ویب سائٹ ٹوئٹر پر اپنے پیغام میں ڈاکٹر بو عبداللہ نے کہا کہ سابق وزیراعظ عمران خان سے ملاقات کر کے بہت خوشی ہوئی ہے۔
ڈاکٹر بو عبداللہ کا مزید کہنا تھا کہ عمران خان پاکستانیوں کی محبت اور یقین کے حق دار ہیں۔