لاہور: (ویب ڈیسک) سابق وزیر اعلیٰ پنجاب چودھری پرویز الہٰی سے سابق سپیکر پنجاب اسمبلی سبطین خان نے ملاقات کی، اس موقع پر افضل ساہی بھی موجود تھے۔
ملاقات میں پولیس لائنز پشاور کی مسجد میں ہونے والے دھماکے کی شدید مذمت کی گئی، اس کے علاوہ ملکی سیاسی صورتحال اور آئندہ کے لائحہ عمل پر مشاورت بھی کی گئی۔
اس موقع پر گفتگو کرتے ہوئے سابق وزیر اعلیٰ پنجاب نے کہا کہ پشاور واقعہ میں ملوث عناصر انسانیت کے دشمن ہیں، نگران حکومت کے آنے کے بعد امن و امان کی صورتحال خراب ہو رہی ہے، ان کا سارا فوکس امن و امان اور عوامی ایشوز نہیں بلکہ انتقامی کارروائیوں پر ہے، نگران حکومت صرف سیاسی مخالفین کو کچلنے میں مصروف ہے۔
چودھری پرویز الہٰی نے پنجاب اور خیبرپختونخوا میں انتخابات کی تاحال تاریخ نہ دینے پر تشویش کا اظہار کرتے ہوئے کہا کہ نگران سیٹ اپ اور گورنرز اپنی آئینی ذمہ داریاں بھول کر کسی اور ایجنڈے پر گامزن ہیں، نگران سیٹ اپ اپنے مینڈنٹ سے تجاوز کر کے غیر آئینی، غیر قانونی اقدامات کا مرتکب ہو رہا ہے، نگران سیٹ اپ ہر وہ کام کر رہا ہے جو اس کامینڈنٹ ہی نہیں۔
سابق وزیر اعلیٰ نے کہا پی ڈی ایم ملک کی معاشی تباہی کی ذمہ دار ہے، ڈالر کو کنٹرول کرنے کے دعوے کرنے والوں نے ڈالر کو تاریخ کی بلند ترین سطح پر پہنچا دیا، شہباز شریف نااہلی کے ورلڈ ریکارڈ قائم کر رہے ہیں، پٹرول 250 روپے لٹر کر کے پی ڈی ایم مریم نواز کی واپسی کا جشن منا رہی ہے، حکمران انتخابات ملتوی کرنے سے باز رہیں، انہیں آئین شکنی کا حساب دینا پڑے گا۔

اسلام آباد: (ویب ڈیسک) اسلام آباد کی عدالت نے تحریک انصاف کے رہنما فواد چودھری کے مزید 4 روزہ جسمانی ریمانڈ کی استدعا مسترد کرتے ہوئے انہیں جوڈیشل ریمانڈ پر جیل بھیج دیا۔
اداروں کے خلاف اکسانے کے الزام میں گرفتار ہونے والے سابق وزیر اطلاعات فواد چودھری کو 2 روزہ جسمانی ریمانڈ مکمل ہونے پر اسلام آباد کی مقامی عدالت میں پیش کیا گیا۔
پیشی کے موقع پر پی ٹی آئی رہنما فواد چودھری کے وکیل بابر اعوان، فیصل چودھری اور حبا چودھری عدالت میں موجود تھے، اس کے علاوہ خرم نواز اور سینیٹر شہزاد وسیم بھی عدالت میں موجود رہے۔
جوڈیشل مجسٹریٹ وقاص احمد راجہ نے کیس کی سماعت کی، عدالت نے دونوں وکلاء کے دلائل سنے، اس موقع پر تفتیشی افسر کی جانب سے فواد چودھری کے مزید 4 روزہ جسمانی ریمانڈ کی استدعا کی گئی۔
تفتیشی افسر نے عدالت میں اس حوالے سے موقف اختیار کیا کہ گزشتہ دو روزہ جسمانی ریمانڈ میں لاہور سے فوٹوگرامیٹرک ٹیسٹ کروایا گیا، فواد چودھری سے موبائل لیپ ٹاپ اور دیگر ڈیوائسز برآمد کرنی ہیں۔
اگر کوئی ٹھوس وجہ پیش نہ کی جائے تو مزید جسمانی ریمانڈ نہیں دیا جا سکتا، عدالت نے مزید جسمانی ریمانڈ کی استدعا مسترد کرتے ہوئے فواد چودھری کو 13 فروری کو پیش کرنے کا حکم دے دیا۔

پشاور: (ویب ڈیسک) وزیراعظم کے معاون خصوصی اور ترجمان پیپلز پارٹی فیصل کریم کنڈی نے الزام لگایا ہے کہ عمران خان نے اپنے اسپتال میں دہشت گردوں کو پناہ دے کر ان کا علاج کرایا۔
ایک بیان میں فیصل کریم کنڈی کا کہنا تھا کہ عمران خان کے دہشت گردوں کے حق میں بیانات ریکارڈ پر موجود ہیں، عمران خان نے آصف زرداری پر الزام تراشی کرکے دہشت گردوں سے مدد مانگی ہے۔
فیصل کریم کنڈی کا کہنا تھا کہ عمران خان نے خطرناک کھیل کھیلا ہے، عمران خان نے گھناؤنی سازش کے تحت پیپلزپارٹی کی قیادت کی زندگیوں کو خطرے میں ڈال دیا ہے، ان کی سازشی ذہنیت سے ملک کو خطرہ ہے، پیپلزپارٹی عمران خان کے خلاف قانونی کارروائی کرے گی۔

اسلام آباد: (ویب ڈیسک) صدر ق لیگ چودھری شجاعت حسین نے کہا ہے کہ دشمن ایک مرتبہ پھر امن کو خراب کرنے کی کوشش کررہا ہے۔
پشاور مسجد میں خود کش دھماکے کی مذمت کرتے ہوئے انہوں نے کہا کہ معصوم لوگوں کو شہید کرنا انتہائی افسوسناک ہے۔
ان کا کہنا تھا کہ ہم قانون نافذ کرنے والے اداروں کے ساتھ کھڑے ہیں، قانون نافذ کرنے والے اداروں کے افسران بے تحاشا قربانیاں دے چکے ہیں۔
انہوں نے اپیل کی کہ اپنے زخمی بھائیوں کو زیادہ سے زیادہ خون کے عطیات دیں ۔

ہنزہ: (ویب ڈیسک) پاک چین سرحد خنجراب کو خصوصی تجارتی سرگرمیوں کیلئے کھول دیا گیا۔
پہلے مرحلے چین سے آج 11 کنٹینرز پاکستان پہنچ گئے۔ چین سے دس روزمیں 250 کینٹنرز کا سامان سوست پہنچے گا۔
کورونا کے باعث تجارتی سرگرمیاں معطل ہو گئیں تھیں جنہیں اب بحال کیا گیا ہے۔

کوہاٹ: (ویب ڈیسک) کوہاٹ کے تانڈہ ڈیم میں ڈوبنے والے مزید 13 بچوں کی لاشیں نکال لی گئیں جس کے بعد جاں بحق ہونے والے بچوں کی تعداد 30 ہوگئی ہے۔
واقعے میں جاں بحق ہونے والے 7 بچوں کی تدفین کردی گئی ہے جبکہ کشتی بان، محمکہ ایریگیشن کے ایکسی این کے خلاف مقدمہ درج کرلیا گیا ہے۔
وزیراعظم شہباز شریف نے کا واقعے پر افسوس کا اظہار کرتے ہوئے زیر علاج بچوں کو طبی سہولتیں فراہم کرنے کی ہدایت کی ہے۔
خیال رہے کہ ڈیم میں گذشتہ روز کشتی الٹنے سے 25 سے30کے قریب مدرسے کے بچے اور کشتی بان ڈوب گئے تھے جن میں سے 6کو بچا لیا گیا تھا۔
ڈپٹی کمشنر فرقان اشرف کا کہنا ہے کہ تمام لاشوں کو اسپتال لے جانے کے بعد ورثاء کے حوالے کیا جا رہا ہے۔
ڈپٹی کمشنر کے مطابق کشتی میں ملاح اور معلم سمیت 40 بچے سوار تھے، حادثہ کشتی میں اوور لوڈنگ کی وجہ سے پیش آیا، اندھیرے کی وجہ سے ریسکیو آپریشن روک دیا گیا ہے جسے کل دوبارہ شروع کیا جائے گا۔

لاہور: (ویب ڈیسک) تحریک انصاف کے چیئرمین عمران خان کی زیر صدارت مشاورتی اجلاس ہوا جس میں شاہ محمود قریشی، اسد عمر، فرخ حبیب اور دیگر رہنماؤں نے شرکت کی جبکہ قومی اسمبلی کے سابق ارکان کی بڑی تعداد بھی موجود تھی۔
اجلاس میں ملکی مجموعی سیاسی صورتحال اور آئندہ کی سیاسی حکمت عملی پر مشاورت کی گئی اس کے علاوہ پنجاب اور کے پی کے کے عام انتخابات کے التواء کیلئے حکومتی اقدامات کے حوالے سے تبادلہ خیال بھی کیا گیا
اجلاس میں تحریک انصاف کے سینئر رہنما فواد چودھری کی گرفتاری پر بھی غور ہوا، اس موقع پر پی ٹی آئی کی جانب سے عام انتخابات کے فوری انعقاد کیلئے اعلیٰ عدلیہ میں کی جانے والی پٹیشنز پر بھی مشاورت کی گئی۔

اسلام آباد: (ویب ڈیسک) پاکستان تحریک انصاف کے رہنما بابر اعوان نے کہا ہے کہ پشاور دھماکے کی شدید مذمت کرتے ہیں، قانون نافذ کرنے والے ادارے امن و امان قائم کرنے پر توجہ دیں۔
میڈیا سے گفتگو کرتے ہوئے بابر اعوان نے کہا کہ دہشت گردی کے خلاف قوم نے بہت قربانیاں دیں، خیبرپختونخوا کا گورنر اس بات پر لگا تھا کہ الیکشن نہیں کراؤں گا، گورنر حاجی غلام علی کو چلو بھر پانی میں ڈوب مرنا چاہیے۔
انہوں نے کہا عمران خان کی کس بات پر گرفتاری ہو گی؟، گرفتاری سے ڈرنے والا لندن بیٹھا ہے، تیرہ جماعتوں نے ساری زہریلی جڑی بوٹیاں کابینہ میں بٹھائی ہیں، یہ خوش نہ ہوں ان کے ایک کیس کا بھی فیصلہ میرٹ پر نہیں ہوا، این آر او ٹو والوں کے کیسز ہم کہیں نہیں جانے دیں گے۔
بابر اعوان نے کہا کہ یہ لوگوں کونہیں اپنے آپ کو بیوقوف بنانے میں لگے ہیں، ان کی اکانومی، مہنگائی پر نہیں صرف اپنے پیسے بچانے پر توجہ ہے، فواد چودھری کے خلاف جو رویہ اپنایا گیا شدید مذمت کرتا ہوں۔
انہوں نے مزید کہا کہ ہم نے کوئی لیگل راستہ نہیں چھوڑا، فواد چودھری کی ضمانت کی کل تاریخ ہے، ہمیں اچھے نتائج کی امید ہے، پی ٹی آئی رہنما کے ساتھ اظہار یکجہتی کرنے والوں کو شاباش دیتا ہوں۔