لاہور: (ویب ڈیسک) پاکستان کرکٹ ٹیم کے فاسٹ بولر محمد عامر ٹریننگ کیلئے نیشنل ہائی پرفارمنس سینٹر (این ایچ پی سی) پہنچ گئے۔
اس موقع پر صحافیوں سے گفتگو کرتے ہوئے محمد عامر نے بتایا کہ بنگلا دیش پریمئیر لیگ کیلئے جانے سے پہلے ٹریننگ کرنا چاہتا تھا، چیئرمین پی سی بی نجم سیٹھی سے این ایچ پی سی میں ٹریننگ کیلئے اجازت مانگی تھی، نجم سیٹھی نے مہربانی کی اور مجھے اجازت دی۔
محمد عامر نے مزید کہا کہ ریٹائرمنٹ واپس لینے کا نہیں سوچا ابھی صرف پی ایس ایل پر نظریں ہیں، اللہ نے چاہا تو دوبارہ پاکستان کیلئے کھیلوں گا۔
عامر نے کہا کہ کرکٹ کھیل رہا ہوں این ایچ پی سی سے اچھی سہولیات کہیں نہیں ہیں۔
انہوں نے کہا کہ کراچی ٹیسٹ میں پاکستان ٹیم اچھا کھیلی کریڈٹ دینا چاہیے، امام الحق، سرفراز احمد اور سعود شکیل نے اچھی بیٹنگ کی۔
Monthly Archives: December 2022
فتح کے قریب پہنچ گئے تھے مگر پاکستان نے اچھے کھیل کا مظاہرہ کیا، کپتان نیوزی لینڈ
کراچی: (ویب ڈیسک) نیوزی لینڈ کرکٹ ٹیم کے کپتان ٹم ساؤتھی نے کہا ہے کہ ہم فتح کے قریب پہنچ گئے تھے مگر پاکستانی بلے بازوں نے اچھے کھیل کا مظاہرہ کر کے نتیجے کو تبدیل کردیا۔
واضح رہے کہ پاکستان اور نیوزی لینڈ کے درمیان کراچی میں کھیلا جانے والا ٹیسٹ بغیر کسی نتیجے کے ختم ہوگیا، دوسری اننگز میں پاکستانی بلے بازوں نے بھرپور انداز سے کیوی بالرز کا سامنا کیا اور کھیل کے اختتام پر وکٹ پر رُک کر مزاحمت کی۔
میچ کے بعد میڈیا سے گفتگو کرتے ہوئے نیوزی لینڈ کے کپتان نے کہا کہ ہم پاکستان کے خلاف پہلا ٹیسٹ جیتنے کی پوزیشن میں آ گئے تھے مگر پاکستان کے بلے بازوں نے بہترین مزاحمت کی اور خاص طور پر آخری کھلاڑیوں نے بہترین کھیل کا مظاہرہ کیا۔
انہوں نے کہا کہ دوسرے ٹیسٹ میں نئے جذبے کے ساتھ میدان میں اتریں گے اور کامیابی حاصل کرنے کی کوشش کریں گے۔
ٹم ساؤتھی نے کہا کہ پاکستان کی جانب سے دوسری اننگز ڈیکلیئر کرنے پر قدرے حیرت بھی ہوئی، ہم نے ملنے والے ہدف کو حاصل کرنے کی کوشش بھی کی، کراچی کی وکٹ قدرے مختلف تھی، خاص طور پر ہمارے پاس بولرز کے لیے ایک چیلنج تھا، انہوں نے اچھے کھیل کا مظاہرہ کیا، مسلسل چار شکستوں کے بعد دباؤ تھا۔
نیوزی لینڈ کے کپتان نے کہا کہ کین ولیمسن کی ڈبل سنچری نہ صرف ان کے لیے بلکہ ہماری ٹیم کے لیے بھی مددگار ثابت ہوئی،طویل عرصے سے انٹرنیشنل کرکٹ میں قیادت کے بعد ٹیسٹ میں کپتانی کر کے اچھا لگا اور بہت کچھ سیکھنے کو بھی ملا۔
مری، نیو ایئر نائٹ، ویک اینڈ اور برفباری ایک ساتھ متوقع ، انتظامات مکمل رکھیں، راجہ بشارت
لاہور: (ویب ڈیسک) صوبہ پنجاب کے وزیر قانون راجہ بشارت نے کہا ہے کہ نیو ایئر نائٹ، ویک اینڈ اور برفباری ایک ساتھ متوقع ہے، اس لیے تمام ضروری انتظامات مکمل رکھے جائیں۔
انہوں ںے یہ ہدایت وزیراعلیٰ پنجاب چودھری پرویز الٰہی کی ہدایت پر منعقدہ کابینہ کمیٹی کے اجلاس کی صدارت کرتے ہوئے متعلقہ حکام کو دیں۔ اجلاس میں چیف سیکریٹری پنجاب سمیت دیگر حکام نے شرکت کی۔
اجلاس میں متوقع برفباری کے دوران مری میں موجود انتظامات کا جائزہ لیا گیا، ضلعی انتظامیہ کو ضروری ہدایات جاری کی گئیں اور سیاحوں کو بروقت سہولتوں کی فراہمی یقینی بنانے کی ہدایات دی گئیں۔ اجلاس میں ہدایت کی گئی کہ ڈپٹی کمشنر مری کی سربراہی میں قائم کمیٹی کنٹرول روم میں بیٹھ کر بروقت فیصلے کرے گی۔
صوبائی وزیر قانون راجہ بشارت نے واضح طور پر ہدایت کی کہ مقررہ تعداد سے زائد گاڑیاں مری میں داخل نہیں ہو سکیں گی، مری میں 13 سہولت مراکز قائم ہیں جو مرکزی کنٹرول روم سے منسلک ہوں گے جب کہ سیاح کسی بھی قسم کی مدد کے لیے ہیلپ لائن 9269015-051 اور 9269016 پر رابطہ کر سکیں گے۔
راجہ بشارت کی زیر صدارت منعقدہ اجلاس میں چیف سیکریٹری پنجاب نے محکمہ ہائی ویز کو ہدایت کی کہ سڑکیں کلیئر رکھیں، ہوٹل ایسوسی ایشن کے ساتھ رابطہ رکھیں، ٹورازم ا سکواڈ بھی تعینات ہوں گے۔
شرکائے اجلاس کو اے سی ایس ہوم نے بتایا کہ پی ڈی ایم اے نے کمشنر راولپنڈی کو 10 ملین روپے ہنگامی طور پر بھجوا دیے ہیں۔
وزیر قانون پنجاب راجہ بشارت کی زیر صدارت منعقدہ اجلاس میں صوبے میں 579 پرائس مجسٹریٹس کی نامزدگی کی منظوری دی گئی، پرائیویٹ سی سی ٹی وی کیمروں کو سیف سٹیز اتھارٹی سے منسلک کرنے پر غور کیا گیا جب کہ بارڈر ملٹری پولیس کے دو شہید جوانوں سجاد حسین اور محمد طاہر کو شہدا فنڈ دینے کی بھی منظوری دے دی گئی۔
ٹیکنوکریٹ نظامِ حکومت سے ملک میں عدم استحکام آئے گا، رضا ربانی
اسلام آباد: (ویب ڈیسک) پاکستان پیپلزپارٹی کے سینیٹر رضا ربانی نے کہا ہے کہ ٹیکنوکریٹ نظامِ حکومت سے ملک میں عدم استحکام آئے گا۔
اپنے بیان میں رضا ربانی کا کہنا تھاکہ طویل مدتی نگراں ٹیکنوکریٹ حکومت کے خلاف مزاحمت کریں گے۔
انہوں نے کہا کہ نگراں ٹیکنوکریٹ حکومت کی باتیں آئین کےخلاف ہیں، حکومتی ادارے ایسے غیرآئینی نظام کی تجویز دینے سے اجتناب کریں۔
ان کا کہنا تھاکہ ٹیکنوکریٹ نظام حکومت سے ملک میں عدم استحکام آئے گا، وقت آگیا ہے کہ ہم پاکستان کو بطورلیبارٹری استعمال نہ کریں۔
وفاقی حکومت کا اسلام آباد میں کل بلدیاتی انتخابات کرانے کا حکم چیلنج کرنے کا فیصلہ
اسلام آباد: (ویب ڈیسک) وفاقی حکومت نے اسلام آباد میں کل بلدیاتی انتخابات کرانے کا اسلام آباد ہائیکورٹ کا حکم چیلنج کرنے کا فیصلہ کرلیا۔
ایڈیشنل اٹارنی جنرل منوراقبال دوگل نےفیصلے کے خلاف انٹراکورٹ اپیل دائر کرنے کی تصدیق کردی۔
ایڈیشنل اٹارنی جنرل منور اقبال دوگل کا کہنا تھاکہ فیصلے کی مصدقہ نقل مل گئی، انٹراکورٹ اپیل کی تیاری کا کام جاری ہے۔
انہوں نے کہا کہ انٹراکورٹ اپیل پر آج ہی سماعت کی استدعا کی جائے گی۔
خیال رہے کہ اسلام آباد ہائیکورٹ کے ایک رکنی بینچ نے الیکشن کمیشن کو کل (31 دسمبر) کو وفاقی دارالحکومت اسلام آباد میں شیڈول کے مطابق بلدیاتی انتخابات کرانے کا حکم دیا ہے۔
چند گھنٹوں کے نوٹس پر انتخابات کیسے کرائیں؟ الیکشن حکام نے سر جوڑ لیے
اسلام آباد: (ویب ڈیسک) بلدیاتی انتخابات سے متعلق اسلام آباد ہائیکورٹ کے حکم پر الیکشن کمیشن کے حکام نے ہنگامی اجلاس کا انعقاد کیا، الیکشن کمیشن حکام نے چند گھنٹوں کے نوٹس پر انتخابات کرانے کی کیلئے سر جوڑ لیے۔
ذرائع کے مطابق ڈی جی لاء کی سربراہی میں الیکشن کمیشن کا اہم اجلاس منعقد ہوا، اجلاس میں لاء ونگ ودیگر متعلقہ ونگز کے افسروں نے شرکت کی۔
اجلاس میں ڈسڑکٹ الیکشن کمشنر وقاص ملک بھی شریک ہیں، اجلاس میں ایڈیشنل اٹارنی جنرل نے سنگل بینچ کے فیصلے کیخلاف انٹرا کورٹ اپیل کی تیاری شروع کر دی۔
ذرائع کے مطابق الیکشن کمیشن کو کم وقت میں پولنگ عملہ بلانے میں دشواری کا سامنا ہے، 14 ہزار سے زائد پولنگ عملہ سکولز ٹیچرز و دیگر اداروں کے ملازمین ہیں، پولنگ ڈیوٹی میں شامل عملہ سردیوں کی تعطیلات اور ہفتہ وار چھٹی پر چلا گیا ہے، عملے کو مختصر نوٹس پر بلانا ناممکن ہے۔
2 جنوری کو تمام بینک عوامی لین دین کیلئے بند رہیں گے
کراچی: (ویب ڈیسک) سٹیٹ بینک کی جانب سے جاری بیان کے مطابق 2 جنوری بروز پیر اسٹیٹ بینک آف پاکستان اور دیگر تمام بینک عوامی لین دین کیلئے بند رہیں گے۔
سٹیٹ بینک کی جانب سے جاری نوٹیفکیشن کے مطابق 2 جنوری بروز پیر سٹیٹ بینک آف پاکستان اور دیگر تمام بینک عوامی لین دین کیلئے بند رہیں گے اور اس روز ’بینک ہالی ڈے‘ ہوگا۔
مہنگائی کی شرح میں 0.09 فیصد کی معمولی کمی
اسلام آباد: (ویب ڈیسک) ادارہ شماریات نے مہنگائی کے ہفتہ وار اعدادوشمار جاری کر دیے جس میں مہنگائی کی مجموعی شرح 29.30 فیصد ریکارڈ کی گئی ہے، 51 اشیاء ضروریہ میں سے 23 کی قیمتوں میں اضافہ ہوا، 7 کی قیمتوں میں کمی اور 21 کی قیمتیں برقرار رہیں۔
جاری اعدادوشمار کے مطابق حالیہ ہفتے انڈے فی درجن 8 روپے مہنگے ہوئے، ٹوٹا باسمتی چاول کی قیمت میں فی کلو 4 روپے اضافہ ہوا، آٹے کا 20 کلو کا تھیلا 44 روپے مہنگا ہوا جبکہ ڈبل روٹی کی قیمت میں 3 روپے کا اضافہ ریکارڈ کیا گیا۔
ادارہ شماریات کے مطابق آگ جلانے والی لکڑی 25 روپے مہنگی ہوئی، ایل پی جی کے سلنڈر کی قیمت میں 41 روپے کا اضافہ ہوا، انرجی سیور بلب کی قیمت میں 4 روپے کا اضافہ ہوا۔
علاوہ ازیں رواں ہفتے دال مسور، چنا، پیاز اور تازہ دودھ کی قیمت میں بھی اضافہ ہوا، رواں ہفتے آلو کی قیمت میں 5 روپے فی کلو کی کمی، ٹماٹر 8 روپے اور ویجیٹبل گھی کے 2.5 کلو کے ڈبے کی قیمت میں 19 روپے کی کمی ہوئی۔
سونے کی قیمت میں ایک بار پھر اضافہ، تمام ریکارڈ توڑ ڈالے
کراچی: (ویب ڈیسک) پاکستانی صرافہ مارکیٹوں میں سونے کی فی تولہ قیمت میں 1500 روپے کے اضافے کے بعد نئی قیمت نے تمام ریکارڈ توڑ دیئے۔
بین الاقوامی مارکیٹ میں سونے کی قیمت بڑھنے سے فی اونس سونے کی قیمت 1818 ڈالر کی سطح پر پہنچ گئی۔
عالمی منڈی میں سونے کی قیمتوں میں اضافے کیساتھ ہی پاکستانی صرافہ مارکیٹوں میں بھی سونے کی فی تولہ قیمت میں 1500 روپے اور دس گرام سونے کی قیمت میں 1286 روپے کا اضافہ ہوا، جس کے بعد سونے کی نئی قیمت میں سابقہ تمام ریکارڈ توڑ دیئے۔
کراچی، حیدرآباد، ملتان، لاہور، پشاور، راولپنڈی، اسلام آباد، اور کوئٹہ کی صرافہ مارکیٹوں میں سونے کی فی تولہ قیمت ایک لاکھ 84 ہزار 100 روپے اور دس گرام سونے کی قیمت 1 لاکھ 57 ہزار 836 روپے کی نئی بلند ترین سطح پر پہنچ گئی۔
سال 2022 کے آخری کاروباری روز بھی ڈالر مہنگا ہوگیا
کراچی: (ویب ڈیسک) سال 2022 کے آخری کاروباری روز بھی امریکی ڈالر کے مہنگے ہونے کا سلسلہ نہ رک سکا۔
انٹربینک میں سال 2022 کے آخری کاروباری روز ایک ڈالر 2 پیسے مہنگا ہوکر226 روپے 43 پیسے پر بند ہوا۔
رواں سال ڈالر کی قیمت میں 47 روپے 92 پیسے کا اضافہ ہوا۔ گذشتہ سال کے اختتام پر ایک ڈالر 178 روپے 51 پیسے کا تھا۔
2022 میں ڈالر کی بلند ترین سطح 28 جولائی کو 239 روپے 94 پیسے اور کم ترین سطح 2 فروری کو 174 روپے 47 پیسے رہی۔
شام میں آئل فیلڈ کے ورکرز کی بس پرحملہ، 10 مزدور ہلاک
دمشق: (ویب ڈیسک) شام میں آئل فیلڈ کے ورکرز کی بس پر حملے میں 10 مزدور ہلاک ہوگئے۔
غیرملکی میڈیا کے مطابق حملہ شام کے صوبے دیرازور میں واقع آئل فیلڈ کے قریب کیا گیا۔ حملے میں متعدد مزدور زخمی بھی ہوئے۔ حکام نے حملے سے متعلق کوئی بیان جاری نہیں کیا۔
شام میں انسانی حقوق کے لیے کام کرنے والی تنظیم کے مطابق دھماکہ خیز ڈیوائس سے مزدورں کو لے جانے والی بسوں کو نشانہ بنایا گیا۔ گزشتہ روز کرد تنظیم ’سیرین ڈیموکریٹک فورسز‘ نے علاقے میں داعش کیخلاف کارروائی شروع کرنے کا اعلان کیا تھا۔
پاکستانی اور انڈین فنکار تنقید کرنے والوں کا آسان ہدف ہیں، ماہرہ خان
نیویارک: (ویب ڈیسک) پاکستانی اداکارہ ماہرہ خان نے کہا ہے کہ انڈیا اور پاکستان کے اندر فنکار تنقید کرنے والوں کا آسان ہدف ہیں۔
امریکی شوبز میگزین ورائٹی کو تازہ انٹرویو میں اداکارہ کا کہنا تھا کہ دونوں طرف کے فنکار اپنے تعلق کو کھلے عام بیان نہیں کرتے تاکہ وہ ایک دوسرے کا تحفظ کرسکیں۔
ماہرہ خان کا کہنا تھا کہ میرا سب سے بہترین وقت انڈیا میں کام کرتے ہوئے گزرا، میں اب بھی وہاں کے بہت سے لوگوں کے ساتھ رابطے میں ہوں اور وہاں سے بہت پیار ملتا ہے۔
اداکارہ کا کہنا تھا کہ بدقسمتی سے ہم فنکار لوگوں کی تنقید کا آسان ہدف ہیں، چاہے یہاں پاکستان میں ہوں یا انڈیا میں۔
ماہرہ خان کا مزید کہنا تھا کہ فنکار آرٹ کی وجہ سے ایک دوسرے کے ساتھ منسلک ہیں اور ہم ایک دوسرے کو بہت اچھی طرح سمجھتے ہیں۔
انہوں نے انکشاف کیا کہ ہمیں ایک دوسرے سے متعلق سوشل میڈیا پر لکھنے میں بھی احتیاط کرنی پڑتی ہے۔
ماہرہ خان کا مزید کہنا تھا کہ اگر طاقت ور حلقوں کی جانب سے ہمیں آسان ہدف نہ بنایا جائے فنکاروں کے اشتراک سے بہترین نتائج برآمد ہوں گے۔
’دی لیجنڈ آف مولا جٹ‘ کی کامیابی پر اداکارہ کا کہنا تھا کہ ایسے پروجیکٹ بنانے والوں کے پاس کہانیاں ہیں اور یہ بہت باصلاحیت ہیں، ہمیں ایسے مزید ڈائریکٹرز کی ضرورت ہے جو دل سے کہانی سنانا جانتے ہوں۔
سُپر اسٹار سلمان خان نے بالی ووڈ میں اپنی کامیابی کا راز بتا دیا
ممبئی: (ویب ڈیسک) بالی ووڈ میں بھائی جان کے نام سے مشہور سپر اسٹار سلمان خان نے انکشاف کیا ہے کہ انہیں کس طرح شہرت اور کامیابی حاصل ہوئی۔
سلمان خان نے ایک حالیہ انٹرویو میں بتایا کہ ان کے کیرئیر کی ابتداء سے ہی انہیں شہرت حاصل ہوگئی تھی مگر ان کے شہرت یافتہ اور کامیاب ساتھی اداکاروں کو بےحد آسانی سے فلموں سے نکالا جارہا تھا اور ان کی جگہ کسی اور ہیرو کو سائن کیا جارہا تھا۔
سلمان خان نے بتایا کہ یہ دیکھ کر احساس ہوا کہ انہیں ہر فلم میں بہترین اداکاری کرنا ہوگی ورنہ ان کی کامیابی بھی مستقل نہیں رہے گی۔
کسی کا بھائی کسی کی جان کے اداکار کا کہنا تھا کہ بس تب سے ہی میں نے سخت محنت شروع کر دی اور آج تک اپنی ہر فلم کیلئے سخت محنت کرتا ہوں۔
سلمان کے مطابق کامیابی کا ‘فنڈا’ یہ ہے کہ اگر کوئی کامیاب نہیں ہوتا تو اسے محنت کرنے کی ضرورت ہے اور اگر کوئی کامیاب ہوتا ہے تو اسے سخت محنت کرنے کی ضرورت ہوتی ہے۔
اداکار کا کہنا تھا کہ کامیابی کا راز یہ ہے کہ سخت محنت کا سلسلہ کامیابی حاصل کرنے کے بعد بھی رُکنا نہیں چاہیے۔ سلمان خان نے کہا کہ وہ خود کو خوش قسمت مانتے ہیں ایک وقت تھا کہ ان کی سب سے بڑی خواہش 10 لاکھ روپے کمانا تھی اور آج وہ اس سے بہت آگے نکل چکے ہیں۔
واضح رہے کہ سلمان خان نے اپنی اداکاری کا آغاز 1988 کی فلم ’بیوی ہو تو ایسی‘ سے کیا تھا اس فلم میں انہوں نے سپورٹنگ رول ادا کیا تھا۔
یاد رہے کہ سلمان خان جلد اپنی ایکشن کامیڈی فلم کسی کا بھائی کسی کی جان میں جلوے بکھیرتے نظر آئیں گے، فلم 21 اپریل 2023 کو ریلیز کی جائے گی۔
