اسلام آباد: (ویب ڈیسک) اسلام آبائی کورٹ نے اسلام آباد میں بلدیاتی الیکشن کے انعقاد کا تفصیلی فیصلہ جاری کر دیا، فیصلے کے مطابق آئینی دفعات سے نہ کوئی فرار ممکن ہے نہ کوئی رعایت دی جا سکتی ہے، لوکل گورنمنٹ سسٹم کو بے اختیار کرنا آئین کے آرٹیکل 140 اے کی خلاف ورزی ہے۔
اسلام آباد ہائی کورٹ کے فاضل جج جسٹس ارباب محمد طاہر نے 11 صفحات پر مشتمل تفصیلی فیصلہ جاری کر دیا ہے۔
عدالت عالیہ نے اپنے فیصلے میں کہا ہے کہ بلدیاتی نظام کو یقینی بنانا وفاقی اور صوبائی حکومتوں کی بنیادی ذمہ داری ہے، آئینی دفعات سے نہ کوئی فرار ممکن ہے نہ اس پر کوئی رعایت دی جا سکتی ہے۔
ہائی کورٹ نے اپنے فیصلے میں مزید کہا کہ الیکشن کمیشن اسلام آباد میں انتخابی شیڈول کا اعلان کر چکا تھا، پولنگ سے 12 دن پہلے یونین کونسلز کی تعداد بڑھا دی گئی اور اس کی کوئی ٹھوس وجہ بھی نہیں بتائی گئی، نہ ہی حکومت کا دو ٹوک مؤقف آیا۔
فیصلے میں مزید کہا گیا ہے کہ واضح جواب سامنے نہ آنے پر یہی سمجھا گیا کہ حکومت کے پاس بتانے کو کوئی وجہ نہیں، یونین کونسلز بڑھانے کا نوٹی فکیشن آبادی کے غیر مصدقہ اعداد و شمار پر جاری کیا گیا، وضاحت نہیں دی گئی کہ نئی مردم شماری نہیں ہوئی تو آبادی بڑھنے کا اندازہ کیسے لگایا گیا۔
عدالت نے کہا کہ وفاقی حکومت کا کنڈکٹ قانون سے متصادم دکھائی دیتا ہے،عدالتیں آئین کے ساتھ الیکشن کمیشن کے ادارہ جاتی تقاضوں کے تحفظ کی پابند ہیں۔
فیصلے میں کہا گیا ہے کہ بلدیاتی ایکٹ میں ترمیم کے بل پر ابھی صدر مملکت کے دستخط نہیں ہوئے، الیکشن کمیشن نے مجوزہ قانون سازی پر الیکشن ملتوی کرنے کا آرڈر دیا۔
تفصیلی فیصلے میں مزید کہا گیا ہے کہ لوکل گورنمنٹ سسٹم کو بے اختیار کرنا آرٹیکل 140 اے کی خلاف ورزی ہے، حکومتوں کے ایسے اقدامات عدالتوں سے کالعدم قرار دیئے جانے کے لائق ہیں۔
Monthly Archives: December 2022
سال 2022 میں بھی لاہور کے ترقیاتی منصوبے مکمل نہ ہو سکے
لاہور: (ویب ڈیسک) سال 2022 لاہور میں ترقیاتی منصوبوں کی وجہ سے کچھ اچھا نہ رہا، سیاسی اتھل پتھل کی وجہ سے ترقیاتی منصوبے متاثر ہوتے رہے، بزدار دور کے دو منصوبے مکمل، دو ادھورے رہ گئے، شہباز حکومت کے 4 منصوبے ابھی تک مکمل نہیں ہوئے۔
2022 میں سیاسی اتار چڑھاؤ نے لاہور کے ترقیاتی منصوبوں کی رفتار پر اثر ڈالا، سابق وزیراعلیٰ عثمان بزدار کی رخصتی کے ساتھ ان کے منصوبوں کو بریک لگی، حمزہ شہباز کے مختصر دور کے منصوبے بھی ادھورے رہ گئے، پرویز الٰہی نے ترقیاتی منصوبوں کی رفتار بڑھائی لیکن سیاسی بھونچال پھر آڑے آنے لگا۔
اس سے پہلے شہباز شریف نے جو منصوبے شروع کئے تھے وہ بھی سیاسی تبدیلی کی نذر ہوئے، بزدار حکومت کے دو بڑے منصوبے شیرانوالہ فلائی اوور اور شاہکام فلائی اوور مکمل کر کے عوام کے لیے کھول دئیے گئے، لیکن گلاب دیوی انڈر پاس اور لاہور برج کے منصوبوں کی رفتار سست پڑ گئی، منصوبوں کی تکمیل کے لیے اب بھی چار ماہ کا وقت درکار ہے۔
سگیاں روڈ توسیعی منصوبہ ڈیڈلائن گزرنے کے باوجود مکمل نہ ہوا، ایل ڈی اے سٹی نیا پاکستان اپارٹمنٹس کی سائٹ پر ایک بھی اپارٹمنٹ تعمیر نہ ہو سکا، رواں سال دو میگا پراجیکٹ شروع ہوئے، بیگم کوٹ سے سگیاں پیکیج تھری اور سمن آباد موڑ پر انڈر پاس کی تعمیر جاری ہے، مزید تین منصوبوں پر کام شروع ہونے کو ہے، منصوبوں میں شاہدرہ ملٹی لیول گرڈ سیپریشن پراجیکٹ ، بند روڈ توسیعی منصوبہ اور اکبر چوک ری ماڈلنگ کا منصوبہ شامل ہے۔
ترقیاتی کاموں کی سست رفتار اور دیگر زیر تعمیر التوا منصوبے عوام کے لیے پریشانی کا باعث بن رہے ہیں، شہر کے 9 سپورٹس کمپلیکس اور ایک موریہ پل توسیعی منصوبہ بھی مکمل نہ ہو سکا ہے۔
بجلی صارفین کیلئے بھی سال 2022 مشکل ترین
لاہور: (ویب ڈیسک) 2022 بجلی صارفین کے لیے بھی مشکل ترین سال رہا، ایک سال کے دوران بجلی کے نرخوں میں 300 فیصد تک کااضافہ ہوا اور بجلی کی فی یونٹ قیمت 32 روپے تک جاپہنچی۔
سال 2022 میں بنیادی ٹیرف میں بھی 7 روپے 91 پیسے فی یونٹ تک کا بڑا اضافہ ہوا، ایک سال کے دوران بجلی کے نرخوں میں 300 فیصد تک اضافہ، بجلی کی کم سےکم فی یونٹ قیمت 17 روپے جبکہ زیادہ سے زیادہ 32 روپے فی یونٹ تک پہنچ گئی ہے۔
سال کے آغازپر ہی 13 جنوری کو حکومت نے بجلی کے نرخوں میں 4 روپے 30 پیسے فی یونٹ اضافہ کر کے صارفین کو 440 واٹ کاجھٹکا دیا، اس کے بعد ہر ماہ فیول ایڈجسٹمنٹ اور سہ ماہی ایڈجسٹمنٹ کے نام عوام کی جیب سے اربوں روپے نکال لیے گئے۔
رواں سال حکومت نے صارفین سے فیول پرائس ایڈجسٹمنٹ کی مد میں مجموعی طور 470 ارب روپے جبکہ سہ ماہی ایڈجسٹمنٹ کی مد میں 146 ارب روپے وصول کیے گئے۔
صارفین کا کہنا ہے کہ بجلی اب تو بجلی کے بل ہی پورے نہیں ہوتے ، حکومت غریب عوا م پر کچھ رحم کرے، اس صورتحال میں حکام کا کہنا ہے کہ عوام کو سستی بجلی کی فراہمی کے لیے گرین انرجی کو عام کیا جائے گا۔
رواں برس اپریل میں کروٹ ہائیڈل پاور پراجیکٹ کی تکمیل سے نیشنل گرڈ میں 720 میگا واٹ بجلی شامل ہوئی تو دوسری جانب نیلم جہلم پراجیکٹ کی ٹنل میں دراڑ پڑنے سے 969 میگاواٹ بجلی کا منصوبہ کئی ماہ سے مکمل بند ہے۔
یوں رواں سال موسم گرما کے دوران ملک میں بجلی کا شارٹ فارٹ 4 سے 6 ہزار میگا وواٹ کے درمیان رہا جس کے باعث شہریوں کو 10 سے 12 گھنٹے لوڈ شیڈنگ کا سامنا رہا، بجلی کے نرخوں میں اضافے کے ساتھ رواں سال لائن لاسز بھی 37 فیصد تک رہے اور اس کا بوجھ بھی عام صارفین کو برداشت کرنا پڑا۔
حکومت نے 10 ماہ میں اپنے کیسز ختم، غریب سے روٹی کا نوالہ چھین لیا: شیخ رشید
راولپنڈی: (ویب ڈیسک) سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ امپورٹڈ حکومت نے 10 ماہ میں اپنے کیسز ختم اور غریب سے روٹی کا نوالہ چھین لیا۔
سماجی رابطے کی ویب سائٹ ٹوئٹر پر شیخ رشید احمد نے لکھا کہ عنقریب ان کے کیسوں کا اور اوورسیز ووٹوں کا فیصلہ سپریم کورٹ کرے گی، معاشی، سیاسی تباہی قومی سلامتی تک پہنچ گئی، ٹیکنیکل یا نگران حکومت ٹیکنیکلی ڈیفالٹ میں کیا کرے گی۔
سابق وفاقی وزیر کا کہنا تھا کہ 77 وزراء میں اسحاق ڈار کی جعلی منصوبہ بندی اور بلاول کے فضائی دورے سب ناکام ہوئے، ہائی کورٹ کے حکم پر اسلام آباد میں بلدیاتی الیکشن نہیں ہوئے، الیکشن جب بھی ہوگا 13 پارٹیوں کے خلاف اسلام آباد میں ریفرنڈم ہوگا۔
شیخ رشید نے کہا کہ عوام کے ساتھ ہاتھ کرنے والا پچھتائے گا، ترسیلات زر، برآمدات اور سرمایہ کاری میں کمی، مہنگائی 30فیصد بڑھ گئی، 10جنوری تک 1.3 ارب ڈالر دینے ہیں، نئے سال ایم کیو ایم ایک اور باپ پارٹی نیک ہوجائے گی۔
زرمبادلہ کے گرتے ذخائر کا چیلنج: آئی ایم ایف پیکج کی بحالی کیلئے بڑے اقدامات کا فیصلہ
اسلام آباد: (ویب ڈیسک) زرمبادلہ کے گرتے ذخائر کے چیلنج سے نمٹنے کیلئے آئی ایم ایف پیکج کو بحال کرانے کیلئے بڑے اقدامات کا فیصلہ کیا گیا ہے۔
ذرائع کے مطابق آئی ایم ایف پیکج کے معاملے پر پاکستان امریکہ اور مغربی ممالک کی حمایت حاصل کرے گا، پاکستان کو آئی ایم ایف پیکج کو بحال رکھنےکیلئے فلڈ لیوی، بجلی اور گیس کے نرخون میں اضافہ کرنا ہو گا۔
ذرائع کا مزید کہنا ہے کہ پاکستان آئی ایم ایف کی شرائط پر عمل درآمد کیلئے نرم رویہ اپنائے گا جبکہ آئندہ دس روز میں زرمبادلہ کے ذخائر ساڑھے 4 ارب ڈالر تک آجائیں گے۔
ووٹ سے خوفزدہ حکومت عوام اور آئین کا مذاق اڑا رہی ہے: فواد چودھری
لاہور: (ویب ڈیسک) رہنما پاکستان تحریک انصاف اور سابق وفاقی وزیر اطلاعات فواد چودھری نے کہا ہے کہ اسلام آباد میں عدالتی احکامات کے باوجود انتخابات روک دیئے گئے۔
سماجی رابطے کی ویب سائٹ ٹوئٹر پر اپنے پیغام میں فواد چودھری نے لکھا کہ ووٹ سے خوفزدہ حکومت اپنے کٹھ پتلی الیکشن کمشنر کے ساتھ مل کر عوام اور آئین کا مذاق اڑارہی ہے، اسلام آباد میں ووٹر پولنگ سٹیشن کے باہر کھڑے ہیں۔
سابق وفاقی وزیر کا مزید کہنا تھا کہ عدالت اپنے فیصلے پر عملدرآمد کروائے اور توہین عدالت کی کارروائی کی جائے، امپورٹڈ حکومت کو ملک پر مسلط کرنے کا بھیانک کھیل ملک کیلئے تباہ کن ثابت ہوا۔
رہنما پی ٹی آئی نے کہا کہ 2022 کا سال پاکستان کی معیشت کیلئے تباہ کن ثابت ہوا، تمام اعشاریے منفی ہوگئے، معیشت کی تباہی کی بنیادی وجہ سیاسی عدم استحکام ہے۔
نان بائیوں کا ازخود ہی روٹی اور نان کی قیمتوں میں اضافہ
اسلام آباد: (ویب ڈیسک) ملک بھر میں نان بائیوں نے انتظامیہ کی منظوری کے بغیر ہی روٹی اور نان کی قیمتوں میں اضافہ کر دیا۔
نان بائیوں کے من مانے اضافے کے بعد 20 روپے والا نان 25 اور 15 روپے والی روٹی 20 روپے کی ہوگئی ہے۔
دوسری جانب لاہور کی ضلعی انتظامیہ نے نان اور روٹی کی قیمت بڑھانے سے انکار کر دیا ہے۔
ضلعی انتظامیہ کے اجازت نہ دینے پر نان بائی ایسوسی ایشن نے اجلاس بلا لیا، نان بائی ایسوسی ایشن نے نان کی قیمت 35 روپے اور روٹی کی قیمت 25 روپے مقرر کرنے کا مطالبہ کر رکھا ہے۔
اسلام آباد میں روٹی کی قیمت میں 2 روپے، نان کی قیمت میں 5 روپے اور پراٹھے کی قیمت میں 10 روپے کا اضافہ کردیا گیا جبکہ روٹی 20 روپے اور پراٹھا 50 روپے کا ہوگیا۔
اسلام آباد میں شیڈول کے مطابق بلدیاتی انتخابات کرانے کا سنگل بنچ کا فیصلہ چیلنج
اسلام آباد: (ویب ڈیسک) الیکشن کمیشن آف پاکستان نے اسلام آباد میں شیڈول کے مطابق بلدیاتی انتخابات کرانے کا سنگل بنچ کا فیصلہ چیلنج کر دیا گیا۔
الیکشن کمیشن نے اسلام آباد ہائیک ورٹ فیصلے کے خلاف انٹرا کورٹ اپیل دائر کر دی، درخواست میں رہنما جماعت اسلامی میاں اسلم اور علی نواز اعوان کو فریق بنایا گیا ہے۔
الیکشن کمیشن کی طرف سے انٹرا کورٹ اپیل پر آج ہی سماعت کی استدعا کی گئی ہے۔
الیکشن کمیشن نے موقف اختیار کیا ہے کہ اتنے کم وقت میں بلدیاتی انتخابات کرانا ممکن نہیں، 14 ہزار سے زائد عملہ، سکول ٹیچرز اور دیگر ملازمین سرما کی تعطیلات پر ہیں۔
اسلام آباد بلدیاتی الیکشن: عدالتی حکم کے باوجود پولنگ شروع نہ ہو سکی
اسلام آباد: (ویب ڈیسک) اسلام آباد ہائیکورٹ کے وفاقی دارالحکومت میں بلدیاتی الیکشن کرانے کے حکم کے باوجود شہر اقتدار میں پولنگ سٹیشنز پر مکمل سناٹا ہے جبکہ اسلام آباد کے بلدیاتی انتخابات کے لئے پولنگ شروع نہیں ہو سکی۔
الیکشن کمیشن کا عملہ بھی متعلقہ پولنگ اسٹیشنز تک نہ پہنچ سکا جبکہ اسلام آباد بلدیاتی انتخابات کے لئے پولنگ 8 بجے شروع ہونی تھی۔
واضح رہے کہ گزشتہ روز اسلام آباد ہائیکورٹ نے الیکشن کمیشن کا فیصلہ کالعدم قرار دیتے بلدیاتی انتخابات شیڈول کے مطابق 31 دسمبر کو ہی کرانے کا حکم دیا تھا۔
عدالت نے الیکشن کمیشن کے فیصلے کیخلاف پی ٹی آئی اور جماعت اسلامی کی درخواستوں پر مختصر تحریری فیصلہ جاری کیا، فیصلے میں کہا گیا کہ الیکشن کمیشن کا 27 دسمبر کا فیصلہ کالعدم قرار دیا جاتا ہے، اسلام آباد کے بلدیاتی انتخابات شیڈول کے مطابق کرائے جائیں۔
اسلام آباد ہائیکورٹ نے فیصلے میں کہا کہ وفاقی حکومت انتخابات کے انعقاد کیلئے الیکشن کمیشن کو مکمل معاونت فراہم کرے، پی ٹی آئی اور جماعت اسلامی کی درخواست پر محفوظ شدہ فیصلہ جسٹس ارباب محمد طاہرنے پڑھ کر سنایا۔
شمالی کوریا کے مزید 3 بیلسٹک میزائل تجربات، جنوبی کوریا ،جاپان کی مذمت
پیانگ یانگ: (ویب ڈیسک) شمالی کوریا نے جاپان کی ساحلی حدود میں کم فاصلے تک مار کرنے والے 3 بیلسٹک میزائل کا تجربہ کیا ہے۔ خبر رساں ادارے کے مطابق جنوبی کوریا کے فوجی ترجمان نے کہا ہے کہ ہفتے کی صبح شمالی کوریا کے دارالحکومت پیانگ یانگ کے جنوب سے تین میزائل فائر کئے گئے۔ فوجی ترجمان کے مطابق شمالی کوریا کے مسلسل میزائل تجربات کے بعد انہوں نے اپنے سرحدی علاقوں کی نگرانی مزید سخت کردی ہیں جبکہ امریکا کے ساتھ مشقیں جاری رہیں گی۔ دوسری جانب جاپان کی وزارت دفاع نے ایک بیان میں کہا کہ شمالی کوریا کے مشتبہ بیلسٹک میزائل مشرقی ساحل کی طرف پانی میں گرے ، میزائل گرنے سے کسی نقصان کی اطلاع موصول نہیں ہوئی ہے ۔ جاپانی وزارت دفاع کے مطابق داغے گئے میزائلوں نے تقریباً 100 کلومیٹر کی بلندی تک پرواز کی اور 350 کلومیٹر کا فاصلہ طے کیا۔ جنوبی کوریا اورجاپان کی جانب سے شمالی کوریا کے میزائل تجربات کی شدید مذمت کی گئی ہے ۔ خیال رہے کہ شمالی کوریا نے بین الاقوامی پابندیوں کے باوجود رواں سال 90سے زائد کروز اور بیلسٹک میزائل تجربات کیے ہیں ، ان میزائل تجربات میں ایک بین البراعظمی بیلسٹک میزائل بھی شامل ہے جو امریکی سرزمین تک پہنچنے کی صلاحیت رکھتا ہے۔
جمہوریت کا راگ الاپنے والے سب سے بڑے آمر ثابت ہوئے ہیں: مسرت جمشید
لاہور: (ویب ڈیسک) ترجمان حکومتِ پنجاب اور رہنما پاکستان تحریک انصاف مسرت جمشید چیمہ نے کہا ہے کہ موجودہ حکمرانوں نے قانون کو مذاق بنا دیا ہے۔ سماجی رابطے کی ویب سائٹ ٹوئٹر پر اپنے پیغام میں مسرت جمشید چیمہ نے لکھا کہ اسلام آباد ہائی کورٹ کے حکم کے باوجود الیکشن کمیشن کا عملہ غائب ہے، جمہوریت کا راگ الاپنے والے سب سے بڑے آمر ثابت ہوئے ہیں۔ ترجمان پنجاب حکومت کا مزید کہنا تھا کہ عدالتی حکم کی یوں خلاف ورزی پر عوام کا عدالتی نظام سے اعتبار اٹھ جائے گا۔
ملک کے بیشتر علاقوں میں آج موسم سرد اور خشک رہے گا
اسلام آباد: (ویب ڈیسک) ملک کے بیشتر علاقوں میں آج موسم سرد اور خشک رہے گا۔ محکمہ موسمیات کے مطابق بالائی علاقوں اور شمالی بلوچستان میں موسم شدید سرد رہے گا، پنجاب، خیبر پختونخوا، بالائی سندھ کے میدانی علا قوں میں شدید دھند پڑنے کی توقع ہے جبکہ خطۂ پوٹھوہار میں کہرا پڑنے کا امکان ہے۔ اسلام آباد میں موسم سرد اور خشک جبکہ صبح کے اوقات میں دھند پڑنے کا امکان ہے، بلوچستان کے بیشتر اضلاع میں موسم سرد اور خشک جبکہ بالائی علاقوں میں شدید سرد رہے گا۔ محکمہ موسمیات کا کہنا ہے کہ پنجاب کے بیشتر اضلاع میں موسم سرد اور خشک رہے گا، مری، گلیات اور گرد و نواح میں موسم شدید سرد رہنے کا امکان ہے، جہلم، لاہور، گوجرانوالہ، نارووال، سیالکوٹ، فیصل آباد میں شدید دھند پڑنے کی توقع ہے۔ جھنگ، سرگودھا، ٹوبہ ٹیک سنگھ، اوکاڑہ، ساہیوال، بھکر، لیہ میں شدید دھند پڑے گی، بہاولپور، بہاولنگر،ملتان، رحیم یار خان اور ڈیرہ غازی خان میں شدید دھند پڑنے کی توقع ، خطۂ پوٹھوہار میں صبح کے اوقات میں چند مقامات پر کہرا پڑنے کا امکان ہے۔ محکمہ موسمیات کے مطابق سندھ کے بیشتر اضلاع میں موسم سرد اور خشک رہے گا، سکھر، لاڑکانہ، حیدر آباد اور موہنجوداڑو میں دھند پڑنے کا امکان ہے۔ دوسری جانب خیبرپختونخوا کے بیشتر اضلاع میں موسم سرد اور خشک رہے گا، پشاور، رشکیئ ، نوشہرہ، مردان، صوابی، چارسدہ اور ڈی آئی خان میں شدید دھند پڑنے کا امکان جبکہ گلگت بلتستان میں موسم شدید سرد اور خشک رہے گا۔ محکمہ موسمیات کا کہنا ہے کہ کشمیر میں موسم شدید سرد اور خشک رہے گا، کشمیر میں صبح کے اوقات میں چند مقامات پر کہرا پڑنے کا امکان ہے۔
اساتذہ کے پنجاب حکومت کیساتھ مذاکرات کامیاب، دھرنا ختم
لاہور: (ویب ڈیسک) میں پانچ دن سے احتجاج کرنے والے اساتذہ کے پنجاب حکومت کے ساتھ مذاکرات کامیاب ہو گئے۔ اساتذہ کی تنظیم کے میڈیا کوآرڈی نیٹر نے دھرنا ختم کرنے کا اعلان کرتے ہوئے کہا حکومت نے یقین دلایا ہے کہ گریڈ 16 کے کنٹریکٹ اساتذہ کی مستقلی کا نوٹی فکیشن جلد جاری ہو جائے گا۔ لاہور میں زمان پارک کے سامنے اساتذہ کی جانب سے دیے گئے دھرنے میں شدید سردی کے باوجود بچے اور خواتین بھی شامل رہے۔ اساتذہ کا مطالبہ تھا کہ پنجاب حکومت اساتذہ کو نوکریوں پر مستقل کرے، دھرنے کے باعث مال روڈ، مغل پورہ اور ملحقہ سڑکوں پر ٹریفک جام رہا۔ پنجاب بھر کے اساتذہ پانچ دن سے کلب چوک، مال روڈ اور کینال روڈ پر زمان پارک کے باہر دھرنا دے رہے تھے، مظاہرین کا کہنا تھا کہ 10 ہزار سے زائد اساتذہ 14 سال سے کنٹریکٹ پر کام کر رہے ہیں، حکومت وعدے کرتی ہے لیکن مستقل نہیں کرتی۔ شام کو بھی خون جما دینے والی سردی میں مظاہرین نے زمان پارک کے باہر دھرنا دیا، خواتین کمسن بچوں کے ہمراہ دھرنے میں شریک رہیں۔
