لاہور: (ویب ڈیسک) پنجاب اسمبلی کے رکن واثق قیوم نے ڈپٹی اسپیکر کا حلف اٹھا لیا۔
اسپیکر پنجاب اسمبلی سبطین خان کی زیرصدارت پنجاب اسمبلی کا اجلاس 2 گھنٹے 10 منٹ کی تاخیر سے شروع ہوا۔ حزب اختلاف کے کسی بھی رکن نے اجلاس میں شرکت نہیں کی۔
اسمبلی سبطین خان نے کاغذات نامزدگی کی حوالے سے ایوان کو بتایا کہ واثق قیوم کے علاوہ کسی نے کاغذ جمع نہیں کرائے۔
انہوں نے کہا کہ واثق قیوم بطور ڈپٹی اسپیکر بلا مقابلہ کامیاب ہوگئے ہیں۔ جس کے بعد نومنتحب ڈپٹی اسپیکر واثق قیوم سے اسپیکر پنجاب اسمبلی نے حلف لیا۔
واضح رہے کہ گزشتہ روز پاکستان تحریک انصاف (پی ٹی آئی) کے امیدوار واثق قیوم بلا مقابلہ ڈپٹی اسپیکر پنجاب اسمبلی منتخب ہوئے۔
ڈپٹی اسپیکر سردار دوست محمد مزاری کے خلاف عدم اعتماد کی تحریک کامیاب ہونے کے بعد ڈپٹی اسپیکر کی نشست خالی تھی، جس کے بعد پی ٹی آئی نے ڈپٹی اسپیکر کے لیے واثق قیوم عباسی کو امیدوار نامزد کیا اور انہوں نے اپنے کاغذات مامزدگی جمع کرائے تاہم اب وہ بلا مقابلہ ڈپٹی اسپیکر پنجاب اسمبلی منتخب ہو گئے۔

لاہور: (ویب ڈیسک) پاکستان تحریک انصاف (پی ٹی آئی) کے چیئرمین عمران خان نے کہا ہے کہ سیلاب متاثرین کی ہر ممکن مدد کی جائے۔
چیئرمین پی ٹی آئی عمران خان سے وزیر اعلیٰ پنجاب پرویز الہٰی اور مونس الہٰی نے ملاقات کی۔ اس موقع پر باہمی دلچسپی کے امور، سیاسی صورتحال اور پنجاب کے انتظامی معاملات پر تبادلہ خیال کیا گیا۔
عمران خان نے وزارت اعلیٰ کا منصب سنبھالنے پر چودھری پرویز الہٰی کو مبارک باد دی۔ پرویز الہٰی نے وفاداریاں بدلنے والوں کے خلاف بھرپور مؤقف پر کھڑا رہنے پر عمران خان کی بصیرت کو سراہا۔
عمران خان نے پنجاب کی عوام کو ریلیف دینے کے لیے تمام تر کاوشیں بروئے کار لانے کی ہدایت کی اور وزیراعلیٰ پنجاب نے سیلاب متاثرین کی مدد کے لیے کیے گئے حکومتی اقدامات سے آگاہ کیا۔
عمران خان نے سیلاب متاثرہ علاقوں میں امدادی سرگرمیاں مزید تیز کرنے کی ہدایت کرتے ہوئے کہا کہ سیلاب متاثرین کی ہرممکن مدد کی جائے۔

کراچی : (ویب ڈیسک) کراچی کے سمندر میں نہانے پر پابندی کے باوجود 6 نوجوان ڈوب گئے۔ سینڈز پٹ پر ڈوبنے والے دو افراد کی لاشیں نکال لی گئی،ٹرٹل بیچ پر مزید چار افراد ڈوب گئے۔
کراچی میں دفعہ 144 کی خلاف ورزی جاری ہے۔ سمندر میں نہانے پر پابندی کے باوجود ساحل پر رش لگا رہتا ہے۔ گزشتہ روز سینڈ پٹ پر نارتھ کراچی انڈہ موڑ کے رہائشی دو نوجوان ڈوب گئے تھے جن کی لاشیں رات گئے ایدھی بحری ٹیم نے نکال لی تھیں۔
آج صبح دوستوں کے ساتھ پکنک پر ہاکس بے آنے والے مزید چار افراد ڈوب گئے۔ جن میں سے دو کی لاشیں نکال کر سول اسپتال منتقل کردی گئیں جبکہ مزید دو کی تلاش جاری ہے۔ایدھی حکام کے مطابق ڈوبنے والے افراد لیاقت آباد سندھی ہوٹل کے رہائشی ہیں۔

کوئٹہ: (ویب ڈیسک) امیر جماعت اسلامی پاکستان سراج الحق نے کہا ہے کہ سیلاب نے ثابت کر دیا حکومت نے جھوٹے دعوؤں کے سوا کچھ نہیں کیا۔
امیر جماعت اسلامی پاکستان سراج الحق نے میڈیا سے گفتگو کرتے ہوئے کہا کہ بلوچستان میں سیلاب سے شدید تباہی ہوئی ہے لیکن افسوس کی بات ہے کہ متاثرین کے پاس گورنر اور وزیراعلیٰ سمیت کوئی نہیں آیا۔
انہوں نے کہا کہ وزیر اعظم بھی سیلاب متاثرہ علاقوں میں تماشا کر کے چلے گئے۔ ان کے پاس اربوں روپے کے وسائل ہیں لیکن عوام کے لیے کچھ نہیں کیا۔ ہیلی کاپٹر لوگوں کو مارنے کے لیے تو ہے مگر امداد کے لیے نہیں۔
سراج الحق نے کہا کہ حکمران جب ساتھ نہیں دیں گے تو لوگ بھی آپ کا ساتھ نہیں دیں گے۔ سیلاب نے ثابت کر دیا صوبائی اور وفاقی حکومت نے جھوٹے دعوؤں کے سوا کچھ نہیں کیا۔
انہوں نے کہا کہ وفاقی حکومت پورے بلوچستان کو آفت زدہ قرار دے، وزیر اعظم نے 5 لاکھ روپے کا اعلان کیا ہے لیکن بتائیں کون سا انجینئر اتنے پیسوں میں گھر بنا سکتا ہے۔

کراچی: (ویب ڈیسک) کراچی سمیت ملک بھر میں آج مادر ملت محترمہ فاطمہ جناح کا 129 واں یوم ولادت عقیدت و احترام سے منایا جارہا ہے، مادر ملت کی قبر پر قرآن خوانی کا اہتمام کیا گیا۔
متحرمہ فاطمہ جناح کے یوم ولادت کے سلسلے میں مزار قائد انتظامیہ کی طرف سے ایصال ثواب کے لئے قرآن خوانی کا اہتمام کیا گیا، فاتحہ خواں قاری محمد شمس الدین نے مادر ملت کی قبر پر خصوصی دعا کروائی اور قبر پر پھولوں کی چادر چڑھائی گئی۔
دعا کے اجتماع میں مزار قائد کے ملازمین کے علاوہ شہری اور پاک بحریہ اور سندھ رینجرز کے جوان بھی شریک ہوئے۔

اسلام آباد: (ویب ڈیسک) چیف جسٹس کے جوڈیشل کمیشن اجلاس کی ریکارڈنگ جاری کیے جانے کے بعد اٹارنی جنرل اشتر اوصاف کا بیان بھی آ گیا، اٹارنی جنرل کا کہنا ہے کہ ججز کا تقرر کرنا کمیشن کا مقدس فرض ہے جس کی ادائیگی میں کسی قسم کی عدم شفافیت کا شائبہ بھی نہیں ہونا چاہئے۔
ججز تقرر کے اٹھائس جولائی کے اجلاس کے معاملہ پر اٹارنی جنرل نے اپنے بیان میں کہا ہے کہ میری جانب سے اجلاس موخر کیے جانے کو کوئی اور رنگ نہ دیا جائے، میں نے ان ناموں کی مخالفت کی تھی اور جسٹس (ر) سرمد جلال کی رائے سے مکمل اتفاق کیا تھا۔
انہوں نے کہا کہ میں نے اجلاس میں کہا تھا کہ جسٹس اطہر من اللہ ہی اس وقت ہائی کورٹ کے سینیر اور اہل جج ہیں، انہیں نامزد ہونا چاہئے۔ اٹارنی جنرل اشتر اوصاف نے اپنے بیان میں کہا کہ نامزد کیے گیے ججز کی معلومات اجلاس سے بہت پہلے فراہم کی جانی چاہئیں تاکہ ان کاجائزہ لیا جا سکے، میں نے صرف اسی تناظر میں اجلاس موخر کرنے بات کی تھی۔

لاہور: (ویب ڈیسک) حکومت پنجاب نے محرم الحرام کے حوالے سے دفعہ 144 نافذ کر دی۔
محکمہ داخلہ پنجاب کے مطابق محرم الحرام میں ہر قسم کے اسلحہ کی نمائش پر پابندی ہو گی، لائسنسی اسلحہ بھی ساتھ رکھنے پر پابندی ہو گی۔
حکومت کی جانب سے 9 اور 10 محرم کو ڈبل سواری پر پابندی کا اعلان کیا گیا ہے۔

اسلام آباد: (ویب ڈیسک) وزیر اعظم شہباز شریف نے آج خیبر پختونخوا کے سیلاب سے متاثرہ علاقوں کا دورہ ملتوی کر دیا۔
وزیر اعظم شہباز شریف نے آج ڈیرہ اسماعیل خان اور ٹانک میں بارش سے متاثرہ علاقوں کا دورہ کرنا تھا جو موسم کی خرابی کے باعث ملتوی کر دیا گیا۔
اس سے قبل وفاقی وزیر اطلاعات مریم اورنگزیب نے سماجی رابطے کی ویب سائٹ ٹوئٹر پر وزیر اعظم کے دورے سے متعلق اطلاع دیتے ہوئے لکھا تھا کہ وزیر اعظم شہباز شریف آج خیبر پختونخوا کے ضلع ٹانک اور ضلع ڈیرہ اسماعیل خان کے سیلاب سے متاثرہ علاقوں کا دورہ کریں گے۔
انہوں نے کہا تھا کہ وزیر اعظم سیلاب سے متاثرہ علاقوں میں جاری امدادی کاموں کا جائزہ لیں گے۔
گزشتہ روز وزیر اعظم شہباز شریف نے بلوچستان کا دورہ کیا تھا اور بارشوں سے ہونے والی تباہی کا جائزہ لیا تھا۔

لاہور: (ویب ڈیسک) وزیر اعلیٰ پرویز الہیٰ نے پنجاب کے سیلاب متاثرین کے لیے مالی امداد کا اعلان کر دیا۔
وزیراعلیٰ پنجاب چودھری پرویز الہیٰ نے ڈیرہ غازی خان، راجن پور، مظفر گڑھ اور میانوالی کے سیلاب متاثرین کے لیے مالی امداد کا اعلان کرتے ہوئے کہا کہ پنجاب حکومت سیلاب سے جاں بحق ہونے والے افراد کے لواحقین کو 8،8 لاکھ روپے مالی امداد دے گی۔
انہوں نے کہا کہ گھروں، فصلوں اور مویشیوں کے نقصانات کا تخمینہ لگا کر متاثرہ افراد کی مالی معاونت کی جائے گی۔
وزیراعلیٰ پنجاب چودھری پرویز الہٰی نے متاثرہ علاقوں میں سڑکوں کی جلد تعمیر ومرمت کا حکم دیتے ہوئے کہا کہ سڑکوں کی بحالی کا کام جنگی بنیادوں پر شروع کیا جائے اور میڈیکل کیمپس میں سیلاب متاثرین کو وبائی امراض سے بچاؤ کی ویکسین بھی لگائی جائے۔
وزیر اعلیٰ پنجاب نے سیلاب متاثرہ علاقوں میں میڈیکل کیمپس لگانے کی ہدایت کی اور کہا کہ سانپ کے کاٹنےاور ہیضہ سے بچاؤ کی ادویات میڈیکل کیمپس میں دستیاب ہونی چاہئیں۔
پرویز الہیٰ نے کہا کہ سیلاب متاثرین میں خشک راشن تقسیم کیا جائے اور ڈی واٹرنگ پمپس کے ذریعے سیلابی پانی کی نکاسی کو یقینی بنایا جائے۔ سرگرمیوں کی مانیٹرنگ کی جائے اور باقاعدگی سے رپورٹ پیش کی جائے۔
انہوں نے کہا کہ تمام متعلقہ محکمے مربوط انداز سے ریلیف کی سرگرمیوں کو مزید تیز کریں اور میں خود بھی جلد سیلاب متاثرہ علاقوں کا دورہ کروں گا۔ سیلاب سے متاثرہ بہن بھائیوں کو تنہا نہیں چھوڑیں گے۔

روس : (ویب ڈیسک) روس نے اقوام متحدہ اور ریڈ کراس کے ماہرین کو جیل میں یوکرین کے درجنوں جنگی قیدیوں کی ہلاکت کےالزام پر تحقیقات کی دعوت د دے دی۔
روس کی وزارت دفاع کیا جانب سے ایک بیان میں کہا گیا ہے کہ وہ بامقصد تحقیقات کے لیے اقوام متحدہ اور ریڈ کراس کے ماہرین کو دعوت دے رہی ہے۔
اس سے قبل جمعرات کی رات روس کے زیر قبضہ یوکرین کے صوبہ ڈونیٹسک کی جیل پر میزائل حملے کے بعد روس اور یوکرین ایک دوسرے پر قیدیوں کی ہلاکتوں کے الزام عائد کر رہے ہیں ۔
روسی وزیر دفاع نے الزام عائد کیا تھا کہ روس کے زیر قبضہ صوبہ ڈونیسک کی جیل میں بند یوکرینی جنگی قیدیوں پر حملہ یوکرین نے امریکہ کی جانب سے سپلائی کیے گئے میزائلوں سے کیا ہے۔
دوسری جانب یوکرینی صدر ولادیمیر زیلنسکی نے میزائل حملے کا ذمہ دار روس کو ٹھہرایا ہے۔ ان کا کہنا ہے کہ روس نے جان بوجھ کر جنگی جرم کا ارتکاب کیا اور یوکرینی فوجیوں کا اجتماعی قتل کیا۔
یو کرینی فوج کا کہنا ہے کہ روسی توپ خانے نے جیل کو نشانہ بنایا تاکہ وہاں جنگی قیدیوں کے ساتھ رکھے گئے ناروا سلوک کو چھپایا جا سکے۔
صوبہ ڈونیٹسک میں روس کے حمایت یافتیہ علیحدگی پسندوں نے جیل میں مرنے والے جنگی قیدیوں کی تعداد 53 بتائی تھی۔
جیل میں ہلاک ہونے والوں میں وہ جنگی قیدی بھی شامل ہیں جنہوں نے جنوبی شہر ماریوپول میں کئی ہفتے روسی حملوں کا مقابلہ کرنے کے بعد ہتھیار ڈال دیے تھے۔