اسلام آباد (سٹاف رپورٹر) پاکستان سمیت دنیا بھر میں مقیم پاکستانی کشمیریوں کے ساتھ بھرپور یکجہتی کے لئے یوم یکجہتی کشمیر آج بھرپور انداز میں منائیں گے، وزیراعظم پاکستان عمران خان مظفر آباد میں آزاد جموں وکشمیر قانون ساز اسمبلی اور کشمیر کونسل کے اجلاس سے خطاب کریں گے ، آج (بدھ ) کوعام تعطیل ہوگی، پاکستان اور آزاد کشمیر کو ملانے والے تمام اہم پلوں پر انسانی ہاتھوں کی زنجیر بنائی جائے گی۔ بھارت کی جانب سے مقبوضہ کشمیر کی خصوصی حیثیت کے خاتمے اور کئی ماہ سے لاک ڈاﺅن کی وجہ سے رواں سال یوم یکجہتی کشمیر معمول سے ہٹ کر منایا جائے گا۔ اس دن کی مناسبت سے یادگاری ڈاک ٹکٹ کا اجراءکیا جائے گا۔ دن 10 بجے ایک منٹ کے لئے خاموشی اختیار کی جائے گی جس کا وزارت داخلہ کی جانب سے نوٹیفکیشن بھی جاری کیا گیا ہے۔ وزیر اعظم عمران خان کے احکامات کی روشنی میں رواں سال یوم یکجہتی کشمیر کی تقریبات کا آغاز 27 جنوری سے کر دیا گیا تھا۔یوم یکجہتی کشمیر کے موقع پر چاروں صوبائی دارالحکومتوں میں ریلیوں سے صوبائی وزیراعلیٰ خطاب کریں گے جبکہ ہر ضلع کی سطح پر ریلیوں کا انعقاد کیا جائے گا۔تمام بین الاقوامی ہوائی اڈوںاور ریلوے سٹیشنوں پر یوم یکجہتی کشمیر کے حوالے سے بینرز آویزاں کئے گئے ہیں۔ پی ٹی اے کی جانب سے یوم یکجہتی کشمیر کے حوالے سے 10کروڑخصوصی ایس ایم ایس بھیجے جائیں گے۔ وفاقی تعلیمی اداروں میں مباحثے اور مضمون نویسی کے مقابلے ہوں گے۔ پاکستان سپورٹس بورڈکے زیر اہتمام خواتین کے مابین ہاکی اور مردوں کے فٹ بال میچ کا انعقاد کیا جائے گا۔ اس کے علاوہ مختلف شہروں میں سٹی برانڈنگ کی گئی ہیں۔ اسلام آباد میں سینٹورس مال اور صفا گولڈ مال میں کشمیر سیل کے زیر اہتمام خصوصی ڈیسک قائم کئے گئے ہیں جبکہ یہاںپر دستخطی مہم کا انتظام بھی کیا گیا ہے۔ ایوان اقبال لاہور میں یوم یکجہتی کشمیر کے حوالے سے تصاویری نمائش کا اہتمام کیا گیا ہے۔ تمام آرٹ گیلریوں میں تصاویری نمائش کا اہتمام کردیا گیا ہے ۔ تمام فارن مشنز میں یوم یکجہتی کشمیر کے سلسلے میں خصوصی پروگرامات منعقد کئے جائیں گے۔ پرنٹ اور الیکٹرانک میڈیا پر خصوصی مہم چلائی جائے گی۔دن کے آغاز پر مساجد میں کشمیر کی آزادی کے لئے خصوصی دعائیں کی جائیں گی۔ ڈی چوک اسلام آباد میں انسانی ہاتھوں کی زنجیر بنائی جائے گی۔ قومی کشمیر کمیٹی کے زیر اہتمام قومی اسمبلی کے تمام حلقوں میں انسانی ہاتھوں کی زنجیر بنائی جائے گی جس میں متعلقہ رکن قومی اسمبلی شرکت کریں گے۔ یوم یکجہتی کشمیر کے موقع پر تمام چھوٹے بڑے شہروں میں آزاد کشمیر کے پرچم لہرا دیئے گئے ہیں۔ ریلیوں کا اہتمام کیا جائے گا۔ بیرون ملک مقیم پاکستانی تارکین وطن بھی بھر پور تقاریب کا انعقاد کررہے ہیں۔

اسلام آباد، لاہور (نمائندگان خبریں) پاکستان مسلم لیگ کے صدر و سابق وزیراعظم چودھری شجاعت حسین سے پاکستان الیکٹرک فین مینوفیکچرنگ ایسوسی ایشن کے وفد نے مرزا جمشید کی قیادت میں ملاقات کی جس میں عبدالرزاق ، غیاث الدین پال، راجہ قمر و دیگر ہدیدار شامل تھے۔ وفد نے الیکٹرک فین کو لگژری آئٹم میں شامل کیے جانے پر اپنے تحفظات سے آگاہ کیا جس پر چودھری شجاعت حسین نے کہا کہ حکومت ہینڈ فین کو بھی لگژری آئٹم قرار دے کر بجٹ میں ٹیکس لگانے کی تجویز دے۔ انہوں نے کہاکہ تاجر برادری کو کاروباری سہولتیں فراہم کرنا حکومت کا فرض ہے لیکن حکومت نے الیکٹرک فین کو بھی لگژری آئٹم میں شامل کر لیا ہے حالانکہ ایسا کرنے والوں کے اپنے باتھ رومز میں ایئر کنڈیشنڈ لگے ہوئے ہیں، الیکٹرک فین ہر غریب آدمی کی ضرورت ہے اس کو لگژری آئٹم میں شامل کرنا کسی طور بھی ٹھیک نہیں۔ انہوں نے کہا کہ بہت سی فوڈ آئٹم ایسی ہیں جن پر ڈیوٹی لگائی جا سکتی ہے مثلاً سیب وغیرہ جو ہم دوسرے ممالک کو ایکسپورٹ کرتے ہیں۔ حکومت کی اتحادی جماعت مسلم لیگ (ق) کے رہنما چودھری مونس الہی نے کہا ہے کہ کچھ لوگ عمران خان کو فیل کرنا چاہتے ہیں۔ ق لیگ چھوڑنے والے کچھ لوگ عمران خان کو گمراہ کرتے ہیں۔ مونس الہی نے اپنے بیان میں بتایا ہے کہ ان کی وزیراعظم کے ساتھ پہلی ملاقات اچھی رہی جس میں ان کیساتھ کھل کرباتیں ہوئیں تھیں۔ وزیراعظم نے جو باتیں کیں، ان کو کلئیر کیا۔ خیال تھا کہ سب باتیں ہونے کے بعد معاملات ٹھیک ہو جائیں گے۔ وزیراعظم سے ملاقات میں پارٹی خدشات سے آگاہ کرتے ہوئے انھیں یقین دلایا تھا کہ ہم حکومت کے ساتھ ہیں۔ چاہتے ہیں معاملات احسن انداز سے حل ہوں۔ تاہم ایک کمیٹی کے ہوتے ہوئے دوسری کمیٹی کا قیام بلا جواز تھا۔ ان کا کہنا تھا کہ ہمارا معاہدہ تھا کہ ہمارے وزرا با اختیار ہوں گے۔ 3 اضلاع کے حوالے سے معاملات طے ہوئے تھے۔ طے ہوا تھا کہ ہماری وزارتوں میں مداخلت نہیں کی جائے گی۔ ق لیگی رہنما نے بتایا کہ پہلی کمیٹی سے جو معاملات طے ہوئے تھے، ان پر کام شروع ہو گیا تھا۔ وفاقی وزیر شفقت محمود نے کہا جو پہلی کمیٹی سے معاملات طے ہوئے، اس پر عمل ہوگا۔ مونس الہی نے بتایا کہ ن لیگ کے لوگوں سے ملاقات ہوتی رہتی ہے۔ اسمبلی میں کئی لوگ ہماری سوچ کے ہیں۔ تاہم انہوں نے تردید کی کہ چودھری پرویز الہی وزیراعلی کے امیدوار نہیں، ہماری کوشش اور خواہش ہے کہ حکومت کے ساتھ اتحاد چلے اور اگلا الیکشن بھی مل کر لڑیں۔انہوں نے امید ظاہر کی کہ آٹے اور چینی کے بحران پر حکومت قابو پا لے گی۔ چیزیں اب بہتری کی طرف چل پڑی ہیں۔ مسلم لیگ ن کے رہنما رانا ثناءاللہ نے کہا ہے کہ 15ماہ میں حکومت مکمل بے نقاب ہو گئی ہے۔ حکومت کو اتنا وقت دینا چاہیے تھے ان کے دعوے بے نقاب ہو جائیں۔ نجی ٹی وی پروگرام میں گفتگو کرتے ہوئے ان کا کہنا تھا کہ اپوزیشن ہفتوں اور مہینوں میں حکومت کا خاتمہ کر دے گی۔ پنجاب میں ق لیگ کے ساتھ مل کر حکومت بنانا مستقبل ہو سکتا ہے۔ ق لیگ سے رابطے ہیں لیکن ان کے حکومت سے اختلافات ہماری ایماءپر نہیں۔ ایک سوال پر انکا کہنا تھا کہ مسلم لیگ ن کے اندر کوئی اختلاف نہیں ہے۔ ہم سب متفق ہیں کہ ہمارا قائد نواز شریف اور پارٹی صدر شہباز شریف ہیں ۔ شہباز شریف فروری کے اختتام پر یا مارچ میں وطن واپس آ جائیں گے۔

پترا جایا (اے پی پی) وزیراعظم عمران خان اور ان کے ملائیشین ہم منصب ڈاکٹر مہاتیر محمد نے دونوں ممالک میں مضبوط اقتصادی تعاون پر مبنی تعلقات کو فروغ دینے کیلئے تجارت اور سرمایہ کاری کے مواقع کو بروئے کار لانے پر اتفاق کیا ہےدونوں رہنماﺅں نے منگل کو پی ایم آفس پتراجایا میں مشترکہ پریس کانفرنس سے خطاب کرتے ہوئے تجارت، سرمایہ کاری، دفاع، قانون کے نفاذ، سیاحت اور تعلیم کے شعبوں میں باہمی تعاون پر اظہار خیال کیا۔ وزیراعظم عمران خان نے کہا کہ ان کے دو روزہ دورہ ملائیشیا کا مقصد دونوں ممالک کے درمیان تجارت و سرمایہ کاری کے شعبوں میں تعاون کے شاندار امکانات کے پیش نظر تعلقات کو مزید مضبوط بنانا ہے۔ انہوں نے کہا کہ ہم نے وسیع تر تجارتی تعلقات، سرمایہ کاری اور دفاعی شعبہ میں مشترکہ تعاون کو فروغ دینے کے بارے میں تبادلہ خیال کیا۔ وزیراعظم عمران خان نے کہا کہ پاکستان اپنی تزویراتی حیثیت سے سرمایہ کاری کیلئے بڑی مارکیٹ بن چکا ہے اور یہ بالخصوص چین۔پاکستان اقتصادی راہداری اور اپنے خصوصی اقتصادی زونز کے ذریعے چین کی مارکیٹ تک رسائی فراہم کرتا ہے۔ انہوں نے ملائیشین وزیراعظم مہاتیر محمد کا کشمیریوں کیلئے آواز اٹھانے پر شکریہ ادا کیا جو بھارتی حکومت کی جانب سے گذشتہ 6 ماہ سے کرفیو میں محصور ہیں۔ وزیراعظم نے ڈاکٹر مہاتیر محمد سے کہا کہ آپ نے کشمیریوں کیلئے انصاف کی بات کی ہے جس کیلئے ہم آپ کے شکرگزار ہیں۔ انہوں نے کہا کہ ہمیں یہ معلوم ہوا ہے کہ بھارت نے کشمیر کی حمایت پر ملائیشیا کو پام آئل کی درآمد روکنے کی دھمکی دی ہے، پاکستان اس کے ازالہ کیلئے ہر ممکن تعاون کرے گا۔ ڈاکٹر مہاتیر محمد نے کہا کہ وزیراعظم عمران خان کے ساتھ ملاقات میں اپنے لوگوں کیلئے مواقع پیدا کرنے سے متعلق باہمی مفاد کے مختلف امور پر تبادلہ خیال کیا گیا ہے، موجودہ دور کے چیلنجز کا مقابلہ کرنے کیلئے ضروری وسیع تر تعاون کی بنیاد پر ہمارے تعلقات نے ایک نئی صورت اختیار کی ہے، ہم دونوں ممالک کے بہترین مفاد میں دوطرفہ تعلقات کو مزید مضبوط بنانے کے سلسلہ میں شراکت داری کیلئے پرعزم ہیں۔ انہوں نے کہا کہ وزیراعظم عمران خان اور میں نے دوطرفہ تعاون کے ساتھ ساتھ علاقائی اور عالمی امور پر بھی تبادلہ خیال کیا ہے، یہ دوطرفہ تعلقات کو مضبوط بنانے کیلئے ہمارے باہمی عزم کا عکاس ہے۔ اس موقع پر فریقین نے تمام سطحوں پر وفود کے تبادلے بڑھانے پر بھی اتفاق کیا تاکہ دوطرفہ تعلقات کے مستقبل کے لائحہ عمل کا تعین ہو سکے۔ ڈاکٹر مہاتیر محمد نے کہا کہ ملاقات میں دونوں ممالک کی مختلف وزارتوں کے درمیان تعاون کو مزید بڑھانے کی ضرورت پر زور دیا گیا ہے اور دونوں ممالک کی امور خارجہ کی وزارتوں کے حکام کے درمیان دوطرفہ مشاورت کے کامیاب انعقاد کا خیرمقدم کیا ہے۔ اقتصادی تعاون کے حوالہ سے انہوں نے کہا کہ دونوں ممالک کے درمیان تجارت و سرمایہ کاری کے شعبہ میں شراکت داری کو فروغ دینے، مختلف معیشتوں کے مابین نیٹ کے قیام اور نجی شعبہ کے مابین روابط کے وسیع مواقع موجود ہیں۔ انہوں نے ملائیشیا اور پاکستان کے درمیان قریبی اقتصادی شراکت داری کی اہمیت کا اعادہ کرتے ہوئے اس سلسلہ میں 8 نومبر 2007ءکو کوالالمپور میں طے پانے والے معاہدہ پر اطمینان کا اظہار کیا جس میں اہم شعبوں میں حائل رکاوٹوں کو دور کرنے اور تجارت میں توازن کے حوالہ سے باقاعدہ بات چیت پر اتفاق کیا گیا ہے۔ انہوں نے کہا کہ ملائیشیا جوائنٹ کمیٹی کے چوتھے اجلاس کے اسلام آباد میں انعقاد کا منتظر ہے۔ پاکستان میں سرمایہ کاری کے امکانات کے حوالہ سے ایک سوال کے جواب میں انہوں نے کہا کہ یہ 20 کروڑ نفوس پر مشتمل ترقی پذیر آبادی کا حامل ملک ہے اور ان کی ضروریات ملائیشیا کے ساتھ مشترکہ منصوبوں کے ذریعے پوری کی جا سکتی ہیں۔ ڈاکٹر مہاتیر محمد نے پاکستان میں فوٹون کار کے آٹوموٹیو پلانٹ کے قیام کا حوالہ دیتے ہوئے کہا کہ اس سے انجینئرنگ کے کاروبار کو مزید فروغ ملے گا۔ وزیراعظم عمران خان نے پتراجایا میں ملائیشیا کے وزیراعظم مہاتیر محمد سے ملاقات کی جس میں دوطرفہ تعلقات، مقبوضہ کشمیر ،خطے کی صورتحال سمیت اہم امور پر تبادلہ خیال کیا گیا،پاکستان اور ملائیشیا کے درمیان وفود کی سطح پر مذاکرات ہوئے ،دونوں رہنماﺅں کے درمیان ہونے والی ملاقات میں دفاع، تعلیم اور سرمایہ کاری سمیت دیگر شعبوں میں تعاون بڑھانے سمیت اہم معاہدوں پر دستخط کئے گئے، پاکستان اور ملائیشیا نے قیدیوں کی حوالگی کے دوطرفہ معاہدے سمیت تجارت کو فروغ دینے پر بھی اتفاق کیا جبکہ وفود کی سطح پر ہونے والے مذاکرات کے دوران پاکستان نے ملائیشیا سے پام آئل خریدنے میں دلچسپی کا اظہار کیا۔وزیر خارجہ شاہ محمود قریشی، وفاقی وزیر اسد عمر، مشیر تجارت عبدالرزاق داد اور سیکرٹری خارجہ سہیل محمود بھی اس موقع پر موجود تھے۔وزیراعظم عمران خان ملائیشیا کے دورے پر، پترا جایا میں ملائیشین ہم منصب کے آفس آمد پر وزیراعظم ڈاکٹر مہاتیر محمد نے وزیراعظم عمران خان کا پرتپاک استقبال کیا۔ اس موقع پر عمران خان نے مہمانوں کی کتاب میں اپنے تاثرات درج کیے۔ بعد میں وزیراعظم عمران خان کی ملائیشین ہم منصب کے ساتھ ملاقات ہوئی جس میں دوطرفہ تعلقات، خطے کی صورتحال، کشمیر سمیت اہم امور پر تبادلہ خیال کیا گیا۔ وزیراعظم عمران خان کا کہنا ہے کہ مسلم دنیا کی تو حالت یہ ہے کہ مسئلہ کشمیر پر اسلامی تعاون تنظیم (او آئی سی) کا سربراہ اجلاس تک نہیں بلاسکتے کشمیر اور میانمار میں ریاستی جبر کا سامنا کرنے والوں کی آواز بننے کی ضرورت ہے۔ وزیراعظم عمران خان کا ملائیشین تھنک ٹینک سے خطاب میں کہنا تھا کہ دنیا میں صرف ایک کروڑ سے کچھ زائد یہودی ہیں لیکن ان کے اثرو رسوخ اور طاقت کی وجہ سے کوئی ان کیخلاف ایک لفظ نہیں کہہ سکتا مسلمانوں کی ایک ارب 30کروڑ کی آبادی ہونے کے باوجود ہماری کوئی آواز نہیں کیونکہ ہم تقسیم ہیں۔ ملائیشیا میں ایڈوانس اسلامک انسٹی ٹیوٹ سے خطاب کرتے ہوئے وزیراعظم نے کہا کہ قائداعظم برصغیر کے عظیم رہنما تھے پاکستان سے متعلق قائداعظم کا وژن ہی میرا وژن ہے۔ پاکستان کو ایک حقیقی فلاحی ریاست کے طور پر دیکھنا چاہتے ہیں۔ انہوں نے کہا کہ کوئی بھی فلاحی ریاست برداشت اور انصاف کی بنیادوں پر قائم کی جاتی ہے ہم پاکستان کو ایک حقیقی فلاحی ریاست کے طور پر دیکھنا چاہتے ہیں اس کیلئے کئی فلاحی منصوبے شروع کئے ہیں مدینہ دنیا کی پہلی فلاحی ریاست تھی مدینہ کی ریاست میں انصاف اور مساوات کو بنیادی حیثیت حاصل تھی اور پاکستان کا تصور بھی مدینہ کی ریاست کے مطابق تھا لیکن بدقسمتی سے ہم درست سمت سے ہٹ گئے ہیں۔