کراچی(ویب ڈیسک) وزیراعلیٰ سندھ مراد علی شاہ نے ایڈیشنل آئی جی سندھ ڈاکٹر امیر شیخ کو عہدہ چھوڑنے کی ہدایت کردی۔ذرائع کے مطابق وزیراعلیٰ سندھ مراد علی شاہ نے کراچی کے علاقے بھینس کالونی ارشاد رانجھانی نامی شخص کے سرعام قتل کے واقعے کا سختی سے نوٹس لیا ہے اور واقعے پر پولیس کی غفلت و غیر پیشہ ورانہ رویے پر اظہار برہمی کا اظہار کرتے ہوئے کہا ہے کہ دردناک واقعے نے مجھے تو ہلا دیا ہے۔وزیراعلیٰ سندھ کا کہنا ہے کہ 6 فروری کو رحیم شاہ نے قومی شاہراہ پر بھیس کالونی کے پاس ارشاد رانجھانی کو قتل کیا، سوشل میڈیا پر موجود فوٹیج دکھا رہی ہے کہ یہ غیرانسانی اور ظالمانہ رویہ تھا، قاتل نے خود جج بن کر سزا دینے کا عمل کیا، حکومت کی رٹ کو چیلنج کیا اور اس نے زخمی ارشاد رانجھانی کو اسپتال لے جانے کی اجازت بھی نہیں دی۔مراد علی شاہ نے کہا کہ اگر قاتل رحیم شاہ کا دعویٰ درست سمجھ بھی لیا جائے پھر بھی قانون ارشاد رانجھانی کو قتل کرنے کا لائسنس نہیں دیتا، یہ فیصلہ عدالتیں ہی کرسکتی ہیں۔ اس واقعے سے عوام کا ریاست پر اعتماد مجروح ہوا اور حکومت کی جانب سےجان و مال کی حفاظت کرنے کا عوامی اعتماد بھی متاثر ہوا ہے۔وزیراعلیٰ کا کہنا تھا کہ واقعے پر پولیس نے بھی غیر ذمہ دارانہ رویہ دکھایا اور وقت پر جائے وقوعہ پر نہیں پہنچ سکی جس وجہ سے ارشاد رانجھانی زخموں کا تاب نہ لاتے ہوئے چل بسا، واقعہ پولیس کی کارکردگی میں بڑے پیمانے پر بہتری لانے کی گنجائش کو ظاہر کرتا ہے،اور پیشہ ورانہ صلاحیتوں اور کارکردگی پر شکوک و شبہات پیدا کرتا ہے، عوام پولیس کی کارکردگی اور اس واقعے کو ہینڈل کرنے پر بہت سارے سوالات اٹھا رہے ہیں، اور اس واقعے کو غلط طریقے سے ہینڈل کرنے کی وجہ سے لسانی جذبات پیدا ہونے کے خدشات پیدا ہوگئے ہیں۔مراد علی شاہ کا مزید کہنا تھا کہ صوبہ بھر میں سندھ پولیس اپنے تمام انتظامی معاملات میں مکمل طورپر بااختیارہے، سندھ ہائی کورٹ نے پولیس کو اپنی کارکردگی بہتر کرنے کے لیے آزادانہ کام کرنےکی اجازت دی ہے، صوبے کا چیف ایگزیکٹیو ہونے کی حیثیت سے میں اتنی بڑی ناکامی کو تماشبین کی حیثیت سے نہیں دیکھ سکتا، یہ میری آئینی ذمہ داری بنتی ہے کہ میں قدرتی انصاف کے اصولوں اور منصفانہ برتاﺅ کا پابند رہوں۔وزیراعلیٰ سندھ نے ایڈیشنل آئی جی سندھ ڈاکٹر امیر شیخ کو عہدہ چھوڑنے کی ہدایت جاری کرتے ہوئے آئی جی پولیس کلیم امام کو ہدایت دی کہ تفتیش کو جلد سے جلد مکمل کی جائے، اور تفتیش میں متعلقہ افسران جنہوں نے اس واقعے کو خراب طریقے سے ہینڈل کیا ان پر جوابدہی لاگو کرکے 48 گھنٹوں میں رپورٹ دی جائے۔

راولپنڈی(ویب ڈیسک) آرمی چیف جنرل قمر جاوید باجوہ سے اسلامی فوجی اتحاد کے سربراہ راحیل شریف نے جی ایچ کیو میں ملاقات کی۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجو ہ سے اسلامی فوجی اتحاد کے کمانڈر انچیف جنرل (ر) راحیل شریف نے ملاقات کی، ملاقات جی ایچ کیو میں ہوئی، جس میں علاقائی امن واستحکام سمیت باہمی دلچسپی کے امور پرتبادلہ خیال کیا گیا۔آئی ایس پی آر کے مطابق آرمی چیف جنرل قمر جاوید باجوہ نے علاقائی امن و استحکام کے لئے اسلامی فوجی اتحاد کی کوششوں کو سراہا۔

اسلام آباد(ویب ڈیسک) سپریم کورٹ نے از خود نوٹس کے فیصلوں پر نظر ثانی اپیل دائر کرنے کا حق دینے کی درخواست مسترد کردی۔ذرائع کے مطابق سپریم کورٹ کو اپنے رولز میں ترمیم کرکے ازخود نوٹس فیصلوں میں اپیل کا حق دینے کی تجویزدی گئی تھی تاہم عدالت عظمیٰ نے درخواست مسترد کردی، ذرائع کا کہنا ہے کہ اپیل کا حق نہ دینے کا فیصلہ فل کورٹ اجلاس میں متفقہ طور پر کیا گیا۔صدر سپریم کورٹ بارایسوسی ایشن امان کنرانی کا کہنا ہے کہ از خود نوٹس فیصلوں کے خلاف اپیل کا حق نہیں اور از خود فیصلوں کے خلاف نظرثانی کی درخواست کا دائرہ محدود ہوتا ہے اس لئے عدالتِ عظمیٰ کو اپیل کا حق دینے کی تجویز دی تھی۔ سپریم کورٹ نے ازخود نوٹس فیصلوں میں اپیل کا حق دینے سے انکار کرتے ہوئے ازخود نوٹس کا اختیار آئین کے مطابق استعمال کرنے کا فیصلہ کیا ہے۔

کراچی(ویب ڈیسک) وزیراعلیٰ سندھ مراد علی شاہ کا کہنا ہے کہ ہمارے لیے ایک قانون اور پنجاب میں الگ ہے، پنجاب میں آئی جی کو ہٹا دیا جائے کوئی فرق نہیں پڑتا مگر سندھ میں ہم ایسی بات نہیں کرسکتے۔ سندھ اسمبلی میں اظہار خیال کے دوران وزیراعلیٰ سندھ مراد علی شاہ کا کہنا تھا کہ ارشاد رانجھانی قتل میں پولیس بھی ملوث ہے، سندھ پولیس اسٹیٹ نہیں ہے، یہاں عوام کی حکمرانی ہے۔ جس جس پر ایف آئی آر ہے بندوق اٹھائیں اور مار دیں، چور یا ڈکیت کو گرفتار کیا جاسکتا تھا لیکن انسانیت مر گئی ہے، جو پولیس افسران واقعہ میں ملوث ہوئے ان کے خلاف خود ایف آئی آر درج کراﺅں گا۔وزیراعلیٰ سندھ کا کہنا تھا کہ پولیس میں اصلاحات کے لیے کام کررہے ہیں جب کہ وفاقی حکومت مسائل کی طرف توجہ نہیں دے رہی، ہمارے لیے ایک قانون اور پنجاب میں الگ ہے، پنجاب میں آئی جی کو ہٹا دیا جائے کوئی فرق نہیں پڑتا مگر سندھ میں ہم ایسی بات نہیں کرسکتے۔وزیراعلیٰ سندھ مراد علی شاہ نے کہا کہ اس ایوان سے پولیس قوانین میں تبدیلی لائیں گے، پولیس گولیاں لگنے والے کو اسپتال کے بجائے تھانے لے جاتی ہے، ارشاد رانجھانی قتل کے واقعے نے مجھے ہلا دیا ہے، پولیس کا مائنڈ سیٹ تبدیل کرنا ہوگا، پولیس انسان بنے۔وزیراعلیٰ سندھ کا کہنا تھا کہ پی ٹی آئی والے کہتے ہیں کہ ہمیں پی اے سی کی چیئرمین شپ نہیں دی گئی عمران خان پہلے (ن) لیگ اور پیپلزپارٹی سے میثاق جمہوریت سائن کریں پی اے سی کی سربراہی دینے کو تیار ہیں۔

راولپنڈی(ویب ڈیسک) نیب راولپنڈی نے سابق صدر کے خلاف اثاثہ جات کیس میں بریت کے خلاف اپیل ری اوپن کرادی۔ذرائع کے مطابق آصف علی زرداری کے خلاف شکنجہ سخت ہوگیا، نیب راولپنڈی نے سابق صدر کے خلاف اثاثہ جات کیس میں بریت کے خلاف اپیل ری اوپن کرادی۔ نیب نے اپنی اپیل میں موقف اختیار کیا کہ آصف زرداری کے خلاف ریفرنس مضبوط ہے اور اس میں مزید شواہد بھی مل چکے لہذا بریت ختم کرکے ملزم کو کڑی سزا اور نااہل قرار دیا جائے۔دوسری جانب جسٹس قاسم خان نے نیب کی درخواست منظور کرتے ہوئے اپیل 6 مارچ کو سماعت کے لئے مقرر کردی جب کہ ہائی کورٹ نے احتساب عدالت کو نوٹس کرتے ہوئے ریکارڈ بھی طلب کر لیا۔واضح رہے کہ راولپنڈی کی احتساب عدالت نے سابق صدر آصف علی زرداری کو غیر قانونی اثاثہ جات ریفرنس کیس میں بری کردیا تھا۔

سری نگر(ویب ڈیسک) مقبوضہ کشمیر میں کشمیری رہنما مقبول بٹ کی برسی پر سید علی گیلانی، میر واعظ عمر فاروق، یاسین ملک اور دیگرحریت رہنماوئں نے ہڑتال کی کال دی ہے۔تفصیلات کے مطابق مقبول بٹ شہید کی 34 ویں برسی کے موقع پرآج مقبوضہ وادی میں مکمل ہڑتال ہے، کاروباری مراکز، تعلیمی ادارے، ٹرانسپورٹ مکمل طور پر بند ہے۔کشمیری لیڈر مقبول بٹ شہید کی برسی منانے سے روکنے کے لیے کٹھ پتلی انتظامیہ نے سید علی گیلانی، میرواعظ عمر فاروق اور یاسین ملک سمیت دیگر حریت رہنماو¿ں کو نظر بند کردیا ہے۔