لاہور (مانیٹرنگ ڈیسک) چینل ۵ کے تجزیوں و تبصروں پرمشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ آرمی چیف کی اسلامی اتحاد فورس کے سربراہ راحیل شریف سے ملاقات میں علاقائی مسائل زیر بحث آئے ہوں گے۔ پاکستانی عوام کی دلچسپی اس میں ہے کہ سعودی عرب یمن کے مسئلہ پر کیا پیشقدمی چاہتا ہے کیا راحیل شریف یمن جنگ میں حصہ لیں گے۔ اس سے قبل پاکستانی حکومت واضح کر چکی ہے کہ یمن جنگ میں پارٹی نہیں بنیں گے اب ایک بار پھر بحث شروع ہو چکی ہے کہ کیا پاکستان سعودی عرب کی یمن کیخلاف جنگ میں حمایت یا عمومی مدد کرے گا۔ پاکستان کی پوری کوشش ہے کہ اس جنگ میں نہ الجھے۔ جنرل (ر) راحیل شریف کی بھی یہی کوشش ہو گی کہ جنگ میں پارٹی نہ بنا جائے۔ دعا ہے کہ پاکستان اس تنازع سے خود کو محفوظ رکھ سکے کیونکہ مسلم ممالک میں پاکستان کی ایک خاص پوزیشن ہے اس لئے بہت احتیاط سے کام لینا ہو گا۔ وزیراعظم عمران خان نے یہی کہا تھا کہ یمن جنگ کے مسئلہ پر صلح اور امن کی کوشش کی صورت میں اپنی خدمات پیش کریں گے۔
نوازشریف کو طبی بنیاد پر رہائی نہیں ملے گی البتہ انہیں علاج کی سہولت قانون کے مطابق ملنی چاہئے۔ نوازشریف کو نااہلی کیس میں سزا ہو چکی ہے اب انہیں ایک عام قیدی سے زیادہ سہولت نہیں دی جا سکتی۔ عام قیدی کو تو پتھری ہونے پر بیرون ملک نہیں بھیجا جاتا۔ قیدی کو بیماری ہو تو میڈیکل بورڈ بنتا ہے جس کی سفارش پر علاج ہوتا ہے۔ چیف جسٹس آصف سعید کھوسہ سخت فیصلے کرنے والے جج ہیں۔ ان کا مزاج ایسا ہے کہ اگر وہ سمجھتے ہیں کہ اصغر خان کیس میں خلاف قانون کچھ ہوا ہے توکسی کو رعائت نہیں دیں گے۔ بریگیڈیئر (ر) حامد سعید اختر تو اعتراف کر چکے ہیں کہ پیسے تقسیم کئے گئے۔ یہ کوئی نئی منفی بات نہیں بلکہ اہم ثبوت ہے۔
حکومت نے ابھی تک طریقہ کار نہیں بتایا کہ کس معیار کے تحت ہیلتھ کارڈ تقسیم ہوں گے۔ پنجاب کی 11 کروڑ آبادی میں کیسے طے ہو گا کہ ان 7 کروڑ کو کارڈ دینے ہیں اور ان 4 کروڑ کو نہیں دینے۔ فواد چودھری نے ایک اجلاس میں کہا کہ پریس کلب ممبران کو کارڈ دیئے جائیں گے تو دیگر لوگ جو پریس میں کام کرتے ہیں ان کو کیوں نہ دیئے جائیں۔ ہمارے ایک سینئر کارکن عبدالجبار ثاقب 27 سال سے خبریں میں کام کر رہے ہیں وہ پریس کلب ممبر نہیں تاہم ان سے بڑھ کر ہیں۔ ڈپٹی ایڈیٹر پروڈکشن ہیں پورا اخبار تیار کرتے ہیں۔ اگر وہ پریس کلب کے ممبر نہیں تو انہیں ہیلتھ کارڈ کیوں نہیں دیا جا سکتا۔ حکومت کو واضح کرنا چاہئے کہ کارڈ تقسیم کرنے کا طریقہ کار اور معیار کیا ہو گا۔
عوام مہنگائی کے ہاتھوں تنگ ہیں اس لئے بجلی گیس بلوں میں مزید اضافہ برداشت نہیں کریں گے۔ عمران خان مشکل وقت میں آئی ایم ایف کے پاس نہ گئے اور دوست ممالک کے پاس جا کر مدد لی زرمبادلہ کے ذخائر کو بھر لیا۔ وزیرخزانہ کہتے ہیں کہ آئی ایم ایف سے معاہدہ کرنے کی صورت میں مہنگائی بڑھنے کا خطرہ نہیں ہے کیونکہ ہم ان کی بجلی گیس بل بڑھانے کی شرط نہیں مانیں گے۔
آصف زرداری کیخلاف غیر قانونی اثاثہ جات کیس دوبارہ کھل جاتا ہے تو ان کی مشکلات میں اضافہ ہو جائے گا۔
آئی جی پنجاب گگو منڈی میں بچی سے زیادتی کیس کا نوٹس لیں اور اگر پولیس اس کیس کو بگاڑنے میں ملوث ہے تو ذمہ داروں کیخلاف سخت کارروائی کی جائے۔
مریم نواز کا تو حق ہے کہ وہ اپنے والد کی علالت کے مسئلہ کو ایکسپلائٹ کریں وہ جو کر رہی ہیں وہ اپنے طور پر صحیح کر رہی ہیں لیکن مریم اورنگزیب اس جماعت کی ترجمان احسن اقبال بڑے لیڈر ہیں لیکن ضروری نہیں ہے کہ تینوں خواتین و حضرات جو کہتے ہیں وہ درست بھی ہو چونکہ جو میرٹ کے فیصلے میرٹ پر ہوتے ہیں اور بیماری دیکھنے کا ایک پروسیجر ہے اور اگر قیدی کو کوئی تکلیف ہو تو اس کے لئے میڈیکل بورڈ کی رائے پر ہی اس کا علاج ہوتاہے۔ کیا لندن کا ہسپتال بھی سب جیل قرار پا سکتا ہے۔
ضیا شاہد نے کہا کہ آصف زرداری نے جو عدالت نے چھوٹ دی تھی کہ ان کے خلاف کوئی جرم ثابت نہیں وہ رہا ہے لہٰذا کوئی ایکشن نہ لیا جائے اور اس فیصلے کے خلاف لاہور ہائی کورٹ کے پنڈی بنچ میں نیب میں اپیل دائر کر دی ہے اور عدالت نے اس پر ایک ماہ بعد یعنی 6 مارچ کو تاریخ بھی دے دی ہے اور نیب کو ہدایت کی ہے کہ ایک ماہ کے اندر تمام متعلقہ ریکارڈ جو ہے اس کو چیک کر کے سارے ثبوت دے کیونکہ نیب کی درخواست تھی کہ یہ سہولت جو دی گئی ہے لیگل نہیں ہے گویا دوسرے لفظوں میں اگر 6 مارچ کو ممکن ہو سکتا ہے کہ اگر کیس جناب آصف زرداری کے خلاف جاتا ہے اور نیب ٹھوس وجوہات کی بنیاد پر جو کوائف جمع کرواتا ہے اس کی بنیاد پر ان کا کیس تبدیل بھی ہو سکتا ہے اور جناب آصف زرداری کو سزا بھی ہو سکتی ہے اور دوبارہ انہیں مجرم سمجھتے ہوئے گرفتاری کا آرڈر بھی ہو سکتا ہے۔ آپ آصف زرداری صاحب کا مستقبل کس طرح سے دیکھتے ہیں۔

گگومنڈی(میاں ذوالفقار) 35سالہ اوباش شخص نے چارسالہ بچی کو اپنی ہوس کانشانہ بنا دیا۔ پولیس نے اعلیٰ حکام کے نوٹس کے ڈر سے زیادتی کو زیادتی کی کوشش میں بدل ڈالا۔ حافظ آبادکالونی کے محنت کش ابوبکر بھٹی کی چارسالہ بیٹی مریم امرود خریدنے باہر نکلی جسے دیہہ ہذا کے ہی نیاز قصائی نے اپنی ہوس کا نشانہ بناڈالا۔ بچی کے رونے کی آواز سن کر موقع پر پہنچی توملزم فرارہوگیا جسے بعدازاں اہل محلہ نے پکڑکرپولیس کے حوالے کردیا۔ بچی کی والدہ بچی کوخون میں لت پت اٹھاکرتھانے پہنچ گئی لیکن پولیس نے زیادتی کی بجائے کوشش کئے جانے کی درخواست لکھواکر ڈاکٹ جاری کر دیا۔ ڈاکٹرکا زیادتی کارزلٹ دینے سے انکار۔ پولیس ڈاکٹ پر زیادتی کی کوشش لکھا ہوا ہے اس لئے ہم زیادتی کا رزلٹ نہیں دے سکتے۔ ڈیوٹی پر موجود ڈسپنسر کا موقف۔ متاثرہ بچی کے والد ابوبکر بھٹی کی خبریںسے گفتگو۔ تفصیلات کے مطابق گزشتہ روزگگومنڈی شہرکی نواحی بستی حافظ آبادکے رہائشی محنت کش ابوبکر بھٹی کی چارسالہ بیٹی مریم دن دو بجے کے قریب امرود لینے کیلئے گھرسے باہر نکلی جسے دیہہ ہذاکا ہی رہائشی اوباش 35سالہ نیاز قصائی ورغلا کراپنے گھرلے گیااور اس سے زیادتی کرنے لگا۔ بچی کے رونے کی آواز سن کر جب اس کی والدہ کلثوم بی بی موقع پر پہنچی تو ملزم بچی کو خون میں لت پت چھوڑکرفرار ہوگیا جسے بعدازاں اہل محلہ نے پکڑکر پولیس کے حوالے کردیا ہے۔ متاثرہ بچی کی والدہ اپنی چار سالہ بیٹی کو اسی حالت میں لے کر تھانے پہنچ گئی لیکن پولیس نے زیادتی کی بجائے زیادتی کی کوشش کاڈاکٹ جاری کردیا۔ ڈاکٹر نے بچی کامیڈیکل جاری کرنے سے انکارکر دیا۔ موقف لینے پرڈیوٹی پر موجود ڈسپنسر چشتی کاکہنا تھاکہ پولیس نے صرف زیادتی کی کوشش کاڈاکٹ جاری کیا ہے اس لئے ہم زیادتی کانتیجہ نہیں دے سکتے۔

لاہور (مانیٹرنگ ڈیسک) کالم نگار رحمت علی رازی نے کہا کہ بیورو کریسی جہاں بھی ہو ہاں میں ہاں ملاتی رہتی ہے۔ حکومت کو چاہئے خود آئی ایم ایف سے رابطہ نہ کرتی۔ چینل فائیو کے پروگرام کالم نگار میں گفتگو کرتے ہوئے انہوں نے کہاکہ گزشتہ حکمران صرف اپنی غربت ختم کرتے رہے جس کے باعث موجودہ حکومت کو کشکول لے کر پھرنا پڑ رہا ہے۔ ہماری خارجہ پالیسی بھی بہتر کرنے کی ضرورت ہے خاص طور پر کشمیر پر پاکستان کو موثر انداز میں اپنا مقدمہ لڑنا چاہئے۔ جس کو بھی پکڑو وہ بیمار بن جاتا ہے۔ جن لوگوں نے پیسہ لوٹا انہیں اب جواب دینا ہو گا‘ احتساب ہو گا تو ہی معیشت مضبوط ہو گی اس کے بغیر ملک پیروں پر نہیں کھڑا ہو سکتا۔
کالم نگار شاہد بھٹی نے کہاکہ وزیراعظم تو پہلے کہتے تھے میں آئی ایم ایف کے پاس نہیں جاﺅں گا وہ خود آئی ایم ایف کے پاس گئے کیا وزراءپر اعتماد نہیں۔ ریاست مدینہ کی بات کرنے والے کہاں ہیں۔ دعوے کرنا بہت آسان عمل مشکل ہے۔ ملک کے لئے پیسہ اکٹھا کرنا مشکل البتہ چندہ جمع کرنا آسان ہے۔ اتنے وزراءکی فوج کرکے آئی ایم ایف کے پاس خود جانا سمجھ سے باہر ہے یوں لگتا ہے تبدیلی نہیں آئی باری آئی ہے۔ سمت کا تعین بہت ضروری ہے۔ اس بات سے متفق ہوں شاہ محمود قریشی نے مسئلہ کشمیر اجاگر کیا۔
کالم نگار میاں افضل نے کہاکہ کونسی ایسی وجوہات ہیں کہ ہمیں پھر آئی ایم ایف کے پاس جانا پڑا جو دعوے کئے گئے تھے وہ تو ہوا ہو گئے۔ انہوں نے کہا پہلے کی طرح اب بھی کشمیر کمیٹی فعال نہیں ہوئی‘ کشمیر کے حوالے سے کوئی واضح پالیسی دکھائی نہیں دی۔ ترجیحات بھی واضح کرنا ہوں گی‘ غریب کو ریلیف ملنا چاہئے تاکہ حقیقی تبدیلی نظر آئے۔ سسٹم کی تبدیلی کے لئے سخت فیصلے کرنا بھی ضروری ہے تاکہ عوام کا اعتماد بھی بحال ہوکہ واقعی کام ہو رہا ہے۔
کالم نگار میاں سیف الرحمان نے کہاکہ اپوزیشن شیڈو حکومت ہوتی ہے۔ عمران خان نے اسد عمر پر زیادہ اعتماد کیا تھا لیکن اب خود ہی آئی ایم ایف کے پاس جانا پڑا۔ انہوں نے کہا کہ افغانستان میں جس طرح امریکہ کو مار پڑی اس سے حقیقت سامنے آ گئی ہے۔ نوازشریف کے حوالے سے انہوں نے کہاکہ میں عدالتوں پر اعتماد کرنا چاہئے۔

اسلام آباد(ویب ڈیسک) وفاقی وزیراطلاعات و نشریات فواد چوہدری کا کہنا ہے کہ لبنانی وزیراعظم سعد الحریری نے شریف خاندان کو معافی دلوانے کی غلطی تسلیم کرتے ہوئے کہا کہ شریف خاندان کو معافی دلوانا بڑی غلطی تھی۔سماجی رابطے کی ویب سائٹ ٹویٹر پر اپنی ٹوئٹ میں وفاقی وزیر اطلاعات فواد چوہدری کا کہنا تھا کہ نواز شریف کو پرویز مشرف سے این آر او دلوانے والے لبنانی وزیراعظم سعد الحریری نے وزیر اعظم عمران خان سے ملاقات کی، اور ملاقات میں سعد الحریری نے شریف خاندان کو معافی دلوانے کی غلطی تسلیم کی۔وفاقی وزیر کا کہنا تھا کہ وزیراعظم عمران خان نے سعدالحریری کو بتایا کہ پاکستان میں پھر نواز شریف کو این آر او کی بازگشت ہے، جس پر لبنانی وزیراعظم نے دونوں ہاتھ اٹھا کر کہا شریف خاندان کو معافی دلوانا بڑی غلطی تھی، شریف خاندان نے ایک بھی وعدہ پورا نہیں کیا جس پر شرمندگی ہوئی۔

اسلام آباد(ویب ڈیسک) ادارہ شماریات کے مطابق ملکی تجارتی خسارے اور درآمدات میں کمی واقع ہوئی ہے جب کہ برآمدات میں اضافہ ہو گیا ہے۔ ادارہ شماریات کے اعلامیے میں بتایا گیا ہے کہ مالی سال 19-2018 کے پہلے 7 ماہ میں تجارتی خسارہ 19 ارب 26 کروڑ 40 لاکھ ڈالر ہو گیا ہے۔ادارہ شماریات کے مطابق جولائی تا جنوری تجارتی خسارہ 9 اعشاریہ 66 فیصد کم ہوا جب کہ 7 ماہ میں برآمدات 13 ارب 23 کروڑ 10 لاکھ ڈالر رہیں۔ ادارہ شماریات کا کہنا ہے کہ گزشتہ سال کے مقابلے میں برآمدات میں 2 اعشاریہ 24 فیصد اضافہ ہوا۔اعلامیے کے مطابق پہلے 7 ماہ میں درآمدات کا حجم 32 ارب 49 کروڑ 50 لاکھ ڈالر رہا اور گزشتہ سال کے مقابلے میں درآمدات میں 5 اعشاریہ 17 فیصد کمی ہوئی۔ادارہ شماریات نے بتایا کہ جنوری 2019 میں تجارتی خسارہ 2 ارب 46 کروڑ 10 لاکھ ڈالر رہا اور جنوری 2018 کے مقابلے میں گزشتہ ماہ میں تجارتی خسارہ 31 اعشاریہ 74 فیصد کم ہوا۔ادارہ شماریات کا کہنا ہے کہ جنوری میں برآمدات 2 ارب ڈالر سے زائد رہیں جب کہ گزشتہ ایک ماہ میں درآمدات 4 ارب 50 کروڑ 40 لاکھ ڈالر رہیں جس میں جنوری 2018 کے مقابلے میں 19 فیصد کمی ہوئی ہے۔ادارہ شماریات کے مطابق جنوری 2019 میں برآمدات میں 4 فیصد اضافہ ہوا ہے۔یاد رہے کہ وزیراعظم کے مشیر برائے تجارت عبدالرزاق داﺅد کا کہنا ہے کہ ہماری پالیسی اور ملکی معیشت کی گاڑی بالکل ٹھیک چل رہی ہے جب کہ روپے کی قدر میں کمی کا فائدہ آئندہ 5 ماہ میں نظر آئےگا۔

راولپنڈی(ویب ڈیسک) وزیراطلاعات و ثقافت پنجاب فیاض الحسن چوہان کا کہنا ہے کہ نوازشریف علاج کے بہانے لندن جانا چاہتے ہیں لیکن یہ کسی بھی صورت ممکن نہیں ہو سکے گا۔راولپنڈی میں میڈیا سے بات کرتے ہوئے صوبائی وزیراطلاعات و ثقافت پنجاب فیاض الحسن چوہان نے کہا ہے کہ حکومت کے پاس نوازشریف کی دل کی بیماری کا علاج موجود ہے مگر ان کے دل کی خواہش پوری نہیں کرسکتے کیونکہ وہ علاج کے بہانے لندن جانا چاہتے ہیں اور اب یہ کسی بھی صورت ممکن نہیں ہو سکے گا۔فیاض الحسن چوہان کا کہنا تھا کہ جیل میں نوازشریف بیماری کے بہانے ہسپتال جانے کا کہتے ہیں اور ہسپتال پہنچ کر ان کو جیل کی یاد ستانا شروع ہو جاتی ہے، نوازشریف خرابی صحت کا بہانہ بنا کر این آر او مانگ رہے ہیں جب کہ ان کے ذاتی معالج ڈاکٹر عدنان ذاتی مفادات کے تحت جھوٹ بول رہے ہیں۔صوبائی وزیر نے کہا کہ انسانی ہمدردی کی بنیاد پر نوازشریف کے دل کے معائنہ کے لئے ایک ماہ میں 4 میڈیکل بورڈ تشکیل دیئے گئے لیکن ان کی تسلی کبھی بھی ممکن نہیں کیونکہ اب ان کے لئے یوم حساب آ چکا ہے اور وہ کسی بھی بہانے سے راہ فرار کی تلاش میں ہیں۔

پشاور(ویب ڈیسک) وزیرخزانہ اسد عمرنے کہا کہ آئی ایم ایف سے معاہدے کے قریب آگئے ہیں اورضرورت اس بات کی ہے کہ اس معاہدے کو آخری بنائیں۔پشاورمیں چیمبر آف کامرس میں اپنے خطاب میں وزیر خزانہ اسد عمرنے دعوی کیا ہے کہ آئی ایم ایف سے معاہدے کے قریب آگئے ہیں، آئی ایم ایف اور پاکستان کے اعدادو شمار کے فرق میں کمی آئی ہے، آئی ایم ایف نے اپنی پوزیشن بدلی ہے، ان سے اچھا معاہدہ ہوگا اورضرورت اس بات کی ہے کہ اس معاہدے کو آخری بنائیں۔اسد عمر نے کہا کہ ٹیکس نیٹ بڑھائے بغیرملک ترقی نہیں کرسکتا، پاکستان کو باہر سے آکر کوئی ٹھیک نہیں کرے گا، ہم ہی اسے ٹھیک کریں گے، ہم بہتر فیصلے کریں گے تو معیشت بہتر ہو گی اور یہ صرف سرمایہ کاری سے ہوگا، باتیں بہت ہوگئیں اب کام شروع کرنا ہے، ٹیکس نیٹ کا دائرہ وسیع کرنا ضروری ہے اس کے بغیرملک آگے نہیں بڑھے گا، ایف بی آرکے چھاپوں اور اور آڈٹ سے ٹیکس نہیں بڑھے گا۔اسد عمر نے کہا کہ حکومت نہ کسی کے ساتھ ڈیل کررہی ہے اور نہ کسی کو ڈھیل دینی ہے اور یہ بات لبنانی وزیراعظم سعد حریری کو بھی بتادی ہے جبکہ سعد حریری نے بھی کہا ہے کہ اس معاملے پر اب کوئی بات نہیں ہوگی۔ پے پیل مجھ سمیت کسی حکومتی ادارے کی ڈیسک پر نہیں رکا ہوا، ہم نے تو اس حوالے سے اقدامات اٹھائے ہیں۔ جو نوجوان گھر بیٹھے کام کرتے ہیں ان کے لیے یہ روزگار کا زبردست ذریعہ ہے، پے پیل یا کوئی اچھا آن لائن پیمنٹ سسٹم نہ ہونے سے انہیں مشکلات ہورہی ہیں۔وزیرخزانہ نے کہا کہ بھارت کے ساتھ تجارت کے ذریعے تعلقات بہتر ہوسکتے ہیں، ایران اورافغانستان کے ساتھ تجارت کو ہر صورت بڑھانا ہے، افغانستان میں امن کے لئے پاکستان جو کچھ کرسکتا ہے اس کو کرنا چاہیے۔انہوں نے کہا کہ خیبرپختونخوا میں مزید بجلی کے منصوبے شروع کرنے کی ضرورت ہے، قبائلی علاقوں میں اصلاحات لارہے ہیں، صوبوں کواس کے حقوق ملنے چاہیں، جس چیمبر میں بھی جاتاہوں وہاں یہ گلہ رہتا ہے کہ یہاں اس سے پہلے کوئی وزیرخزانہ نہیں آیا، ایسے چیمبرز بھی گیا ہوں جہاں سات سال سے وزیرخزانہ نہیں گیا ہے۔اسد عمرنے کہا کہ خیبر پختونخوا میں بجلی اور گیس کی زیادہ پیداوار ہے، وزیراعظم نے ان دو شعبوں پر خصوصی توجہ دینے کی ہدایت کی ہے، تیسرا شعبہ یہاں سیاحت ہے جس کو فروغ دینا ہے، اگر کسی کو ان کے گھر کے پاس نوکری دینی ہے تو وہاں سیاحتی مقامات پر کام کرنا ہوگا، چوتھی خوبی پشاور کی یہ ہے کہ یہ وسطی ایشیاءکا مرکزی خطہ ہے جو ہماری خوش قسمتی ہے۔ اسد عمرنے خیبر پختونخوا میں سیاحت کو فروغ دینے کے ساتھ ہمسایہ ممالک سے تجارت بڑھانے کی ضرورت پربھی زوردیا۔

اسلام آباد(ویب ڈیسک) اصغرخان عملدرآمد کیس میں سپریم کورٹ نے پاک فوج کو ملوث افسران کے خلاف 4 ہفتے میں تحقیقات مکمل کرنے کا حکم دیدیا۔ سپریم کورٹ کے 3 رکنی بینچ نے جسٹس گلزار احمد کی سربراہی میں اصغرخان عملدرآمد کیس کی سماعت کی، اس موقع پر جسٹس گلزار احمد نے ریمارکس دیے کہ فوجی افسران کیخلاف کورٹ مارشل کی کارروائی کیوں شروع نہیں ہوئی، اٹارنی جنرل نے کہا کہ انکوائری میں شواہد سامنے آنے پر کورٹ مارشل ہوگا۔عدالت نے پاک فوج کو ملوث افسران کے خلاف 4 ہفتے میں تحقیقات مکمل کرنے کا حکم دیتے ہوئے کہا کہ انکوائری مکمل کرکے رپورٹ پیش کی جائے جب کہ ایف آئی اے رپورٹ کا جائزہ وزارت دفاع کے جواب کیساتھ لیا جائے گا۔
پس منظر؛
اکتوبر 2012 میں سپریم کورٹ کے چیف جسٹس افتخار محمد چوہدری کی سربراہی میں 3 رکنی بینچ نے ایئرمارشل ریٹائرڈ اصغر خان کی درخواست پر 1990ءکے الیکشن میں دھاندلی سے متعلق کیس کا فیصلہ سنایا۔ عدالت نے 1990ء کے انتخابات میں دھاندلی اور سیاسی عمل کو آلودہ کرنے پر سابق آرمی چیف جنرل اسلم بیگ اور سابق ڈی جی آئی ایس آئی جنرل اسد درانی کے خلاف وفاقی حکومت کو قانونی کارروائی کرنے کا حکم دیا تھا، تاہم اس فیصلے پر عمل درآمد نہیں کیا گیا۔عدالتی فیصلے پر عملدرآمد کےلیے سپریم کورٹ میں درخواست دائر ہوئی جسے اصغر خان عملدرآمد کیس کا نام دیا گیا اور گزشتہ سال مئی میں سابق چیف جسٹس ثاقب نثار نے ان دونوں سابق اعلیٰ فوجی افسران کے خلاف کارروائی کا حکم دیا۔