لاہور( این این آئی ) پنجاب اسمبلی نے مقبوضہ کشمیر میں بھارتی افواج کی بربریت کیخلاف ،کشمیر کے مسئلے کو عالمی فورمز پر اجاگر کرنے اور گندم خریداری کیلئے پالیسی بنانے کے مطالبے پر مبنی قراردادیں منظور کر لیں جبکہ ایوان نے پروڈکشن آڈر کے معاملے پر قائم کمیٹی کی مدت میں ایک ماہ کی توسیع کی تحریک بھی منظور کرلی ،وقفہ سوالات کے دوران بتایا گیا ہے کہ جہیز کے حوالے سے قانون موجود لیکن ابھی تک کوئی مقدمہ درج نہیں ہوا،جنوبی پنجاب میں امن و امان کے قیام کےلئے ملٹری پولیس ڈیوٹی سر انجام دے رہی ہے اور محکمہ داخلہ ملٹری پولیس کے بجٹ کی منظور دیتا ہے۔پنجاب اسمبلی کا اجلاس دوسرے روز بھی پینل آف چیئرمین میاں شفیع محمد کی صدارت میںمقررہ وقت کی بجائے ایک گھنٹہ 20منٹ کی تاخیر سے شروع ہوا۔صوبائی وزیر قانون راجہ بشارت نے محکمہ داخلہ سے متعلق سوالوں کے جوابات دئیے ۔انہوںنے ایوان کو بتایا کہ 1122 کا دائرہ کار تحصیل سطح تک بڑھایا جائے گا، جیسے ہی فنڈز دستیاب ہوں گے لاہور میں ایمبولینسز کی تعداد میں مزید اضافہ کریں گے ۔ضمنی سوال کے جواب میں راجہ بشارت نے کہا کہ جہیز کے حوالے سے 1976کا ایکٹ موجود ہے لیکن ابھی تک جہیز کے حوالے سے کوئی مقدمہ درج نہیں کیا گیا۔(ن) لیگ کے رکن اسمبلی طاہر خلیل سندھو نے نقطہ اعتراض پر بات کرتے کہاکہ سپریم کورٹ کے واضح حکم کے مطابق مری کالج سیالکوٹ اور راولپنڈی کالج کو پرائیویٹ نہیں کیا جا سکتا،البتہ حکومت انتظامات پرائیویٹ سیکٹر کو دے سکتی ہے اوراس حوالے سے پنجاب حکومت نے 2015 میں نوٹیفکیشن بھی جاری کیا ۔وزیر قانون نے کہا کہ سابقہ حکومت نے تین سال اس نوٹیفکیشن پر عملدرآمد نہیں کرایا لیکن ہم اس نوٹیفکیشن پر عمل کریں گے۔(ن) لیگ کے رکن اسمبلی سمیع اللہ خان نے نقطہ اعتراض پر بات کرتے ہوئے کہا کہ شیریں مزاری جب اپوزیشن میں تھیں تو اپنے ٹوئٹ کے ذریعے یہ میسج دیتی تھیں کہ شہزادے شکار پر اور ہنٹنگ ٹرپ پر آئے ہوئے ہیں، آج وہ حکومت میں ہیں اور پنجاب اسمبلی کے ڈپٹی سپیکر نے اس ہنٹنگ ٹرپ کی خاطر پنجاب اسمبلی کے ایوان کے تقدس کو پامال کیا ہے ۔اس کے جواب میں صوبائی وزیر ظہیر الدین نے کہا سمیع اللہ خان پوائنٹ سکورننگ کررہے ہیں ایسی کوئی بات نہیں ۔ڈپٹی سپیکر اپنی مصروفیات کی وجہ سے اسمبلی نہیں آئے ،وہ ولی عہد کے ساتھ شکار نہیں کھیل رہے اور اس موسم میں شکار ہوتا بھی نہیں ۔حکومتی رکن اکبر نوانی نے کہا کہ راجن پور میں گزشتہ ماہ بھی قطر اور عرب ممالک کے شہزادے شکار کھیلنے آئے ہیں ،شکار کا کوئی موسم نہیں ہوتا۔مسلم لیگ (ن) کے رکن ظہیر اقبال نے ایوان میں بات کرتے ہوئے کہا کہ وزیر اعلیٰ عثمان بزدارکاعوام سے تعارف شہباز شریف کا نام استعمال کرکے کرایا جا تا ہے ۔انہوں نے بہاولپور میں کابینہ کا اجلاس نہیں کیا بلکہ سردیوں کی چھٹیاں انجوائے کرنے گئے تھے ۔کابینہ کے اجلاس میں علاقے کے مسائل حل کرنے کی بجائے صرف وزراءکی نئی گاڑیوں کی منظوری دی گئی ۔جس پر چیئر مین میاں شفیع محمد نے ان کو مائیک بند کرادیا اور وہ احتجاجاً ایوان سے واک آﺅٹ کر گے۔اجلاس کے دوران صوبائی وزیر قانون راجہ بشارت نے ایوان کو بتایا کہ پروڈکشن آرڈر کے معاملے پر قائم کمیٹی کی مدت ختم ہوگئی ہے ۔ انہوں نے کمیٹی کی مدت میں ایک ماہ کی توسیع کرنے کی تحریک ایوان میں پیش کی جس کی ایوان نے متفقہ طو رپر منظوری دیدی ۔رکن اسمبلی ساجد خان کی جانب پیش کی جانے والی قرارداد میں کہا گیا کہ پنجاب اسمبلی کا ایوان مقبوضہ کشمیر میں بھارتی افواج کی فائرنگ سے درجنوں نوجوانوں کو شہادت اور سینکڑوںافراد کو زخمی کئے جانے پر انتہائی دکھ اور شدید الفاظ میں مذمت کا اظہارکرتا ہے۔بھارت مقبوضہ کشمیر میں مظالم کی انتہا کرکے انسانی حقوق کی پامالی اور خلاف ورزی کر رہا ہے ۔مقبوضہ کشمیر میں بڑھتی ہوئی قتل و غارت پر عالمی برادری اور اقوام متحدہ کی خاموشی نہایت افسوس ناک اور کشمیریوں کی نسل کشی کے مترادف ہے جسے ہر صورت روکنا ہوگا۔پاکستان کشمیریوں کے مسئلہ کو دنیا کے ہر فورم پر لے کر گیالیکن اقوام متحدہ ،او آئی سی اور دیگر بین الاقوامی تنظیموں نے مسئلہ کشمیر کو سنجیدگی سے نہیں لیا۔یہ ایوان وفاقی حکومت سے مطالبہ کرتا ہے کہ وہ نہ صرف اس مسئلہ کو عالمی فورمز پر اٹھائے بلکہ کشمیریوں کی قتل و غارت گری کو فوری طور پر رکوائے۔مذکورہ قرارداد متفقہ طو رپر منظور کر لی گئی ۔رکن اسمبلی صفدر شاکر کی قرارداد میں مطالبہ کیا گیا کہ صوبائی حکومت آئندہ گندم کی خریداری کےلئے ایسی پالیسی بنائے جس سے زمیندار کوباردانہ کے حصول اور گندم کی فروخت میں کوئی مشکل درپیش نہ ہو۔ ایوان نے اس قرارداد کی بھی منطوری دیدی ۔اپوزیشن کی جانب سے دو مرتبہ کورم کی نشاندہی کی گئی تاہم حکومت نے کورم پورا کر لیا اور ایجنڈا مکمل ہونے پر اجلا س آج بدھ صبح گیارہ بجے تک کیلئے ملتوی کردیاگیا۔

لاہور (مانیٹرنگ ڈیسک) چینل ۵ کے تجزیوں و تبصروں پرمشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ افغانستان کے بارے میں موجودہ حکومت کی پالیسی جس طرح سے عمران خان کی حکومت نے کوشش کی اور جس طرح سے ابوظہبی میں امریکہ سے مذاکرات بھی طالبان سے چل رہے ہیں اس سے ظاہر ہوتاہے کہ معاملات سلجھنے کی طرف چل رہے ہیں اور اب جنگ کا فوری خطرہ نہیں ہے اس پر کور کمانڈرز کانفرنس میں اطمینان کا اظہار کیا گیا ہے۔ میرا خیال ہے جب تک ابوظہبی میں ہونے والے مذاکرات کا کوئی حتمی نتیجہ سامنے نہیں ااتا۔ مذاکرات چل رہے ہیں لیکن کسی قسم کی کوئی چیز ابھی سامنے نہیں آئی۔ نہ تو فریقین کا کوئی طرز عمل سامنے آیا ہے کہ امریکہ نے عدم اطمینان کا اظہار کیا ہو یا طالبان نے کہا ہو کہ ہم نہیں بات کرتے۔ بات چیت چل رہی ہے اس لئے دیکھو اور انتظار کرو والی صورت حال ہے۔ دیکھنا ہے کہ اس کا نتیجہ کیا نکلتا ہے۔ ٹرمپ نے نیٹو فورسز کے سربراہ سے کہا تھا مذاکرات کا نتیجہ کچھ ہو سکتا ہے ہر طرح کی صورتحال کا سامنا کرنے کے لئے تیار رہیں اس کا مطلب ہے کہ مذاکرات ناکامی کی طرف بھی جا سکتے ہیں۔ ضیا شاہد نے کہا کہ یہ ناکام بھی ہو سکتے ہیں چونکہ ابھی ناکامی کی کوئی اطلاع نہیں اس لئے ہم یہی سمجھتے ہیں کہ جاری ہیں۔ مذاکرات جاری رہنا بھی ایک امید والی بات ہوتی ہے۔ کیونکہ مذاکرات کو ختم ہونا ہو تو کسی بھی سٹیج پر ایک فریق جو ہے وہ سخت موقف اختیار کر کے دوسرے فریق کو انکار کر سکتا ہے یا بات چیت بھی جاری رکھنے سے انکار کر سکتا ہے۔ پہلے بھی ایسے معاملات زیر بحث آئے ہیں کہ جس میں خواہ حکومت میں تھے یا حکومت میں نہیں تھے اپوزیشن میں تھے اگر کسی نے اپنی جائیداد چھپائی ہو تو اس کو صادق اور امین کی تعریف سے نکالا جا سکتا ہے اوراگر صادق اور امین کوئی نہیں رہتا یعنی امانت دار نہیں صادق نہیں ہے یعنی سچ نہیں بولتا تو اسکو نااہل کیا جا سکتا ہے اب اعظم سواتی کے بارے میں کیا کہا کہ 101 کنال زمین جو ہے اس کی موجودگی کا انہوں نے کس جگہ اپنے کاغذات میں ذکر نہیں کیا چنانچہ اگر اس بنیاد پر ان کو ٹرائل کیا جائے اور ثابت ہو جائے کہ انہوں نے بغیر کسی وجہ کے چھپایا ہے تو پھر نااہل بھی ہو سکتے تھے اور ان کی سینٹ کی سیٹ بھی ختم ہو سکتی ہے۔ جب انہوں نے استعفیٰ دیا تھا تو تحریک انصاف والوں نے کہا تھا کہ اور ان کی لیڈر شپ کے قریبی حلقوں نے کہا تھا کہ اگر ان کے اوپر کوئی چیز ثابت نہ ہوئی یعنی اگر یہ 101 کنال اراضی والی موجودگی بھی کہ ان کے اثاثے ہیں کہیں ظاہر نہیں کئے گئے تھے اگر یہ نہ ہوتا تو وہ اس کو واپس بھی لے لیتے دوبارہ حکومت میں لے لیتے لیکن معلوم ہوتا ہے کہ 101 کنال زمین جو ہے یہ ان کے حلق میں ہڈی کی طرح پھنس گئی ہے۔ استعفے اکثر بڑی بڑی مدت تک محفوظ رکھے جاتے ہیں جب تک کوئی فائنل فیصلہ نہیں ہو جاتا تھا۔
اسحق ڈار کی وطن واپسی کے حوالے سے بھی ایک کیس کی سماعت ہوئی ہے جس پر چیف جسٹس صاحب نے استفسار کیا ہے کہ لمبا عرصہ گزر جانے کے باوجود اسحق ڈار کو وطن لانے میں کوئی کردار ادا نہیں کیا جا سکا۔ اس کے پیچھے کس کا ہاتھ ہے۔ ضیا شاہد نے کہا کہ عدالت نے یہ الفاظ استفسار کئے ہیں کہ اس میں صرف خط و کتابت کے اور کچھ نہیں ہوا۔ حکومت نے تو خط لکھ دیا اور جواب میں خط آ گیا مگر عدالت اس حوالے سے ٹھوس ثبوت مانگتی ہے۔ حکومت کو اس بارے واضح طور پر بتانا پڑے گا کہ جو باہمی معاہدات ہوئے تھے اس کے باوجود ہم اس کو لانے میں کامیاب نہیں ہوسکے۔ تو پھر یہ عدالت اس مسئلے کو ٹھپ کر سکتی ہے۔ عدالت کا دائرہ اختیار پاکستان کے اندر ہے۔ پاکستان سے باہر برطانیہ میں بیٹھے ہوئے وزیراعظم برطانیہ کو یا وزیر داخلہ برطانیہ کو کس طور پر عدالت مخاطب بھی نہیں کر سکتی۔ پرویز رشید، عطاءالحق قاسمی، اسحق ڈار، فواد حسن فواد کو جو جرمانہ عائد کیا گیا تھا اس کیس کی سماعت ہوئی کہ ان کی جانب سے ایک پیسہ بھی نہیں جمع کرایا گیا۔ کہا جا رہا ہے کہ ان کو دوبارہ سے نوٹس کئے جائیں گے۔ ضیا شاہد نے کہا کہ ان کو دو ماہ کی مہلت دی گئی تھی۔ ان دو ماہ کے دوران تو ان کے خلاف کوئی کارروائی نہیں ہو سکتی تھی۔ عطاءالحق قاسمی نے اینکر کامران خان سے بات کرتے ہوئے کہا تھا کہ میرے پاس تو پیسے نہیں ہیں۔ میں تو پھر جیل ہی جاﺅں گا۔ ہاں البتہ ان کو جو نوٹسدیئے گئے ہیں آج کے جواب میں جو کہیں گے وہ عدالت میں جواب کنسیڈر ہو گا۔ پرویزرشید، عطاءالحق قاسمی کو، اسحاق ڈار اور فواد حسن فواد کو بھی ہوا تھا۔ ان چاروں جرمانوں کے جواب میں اب وہ جو کچھ کہیں گے اس کو عدالت میں جواب تسلیم کر کے عدالت اس پر غور کرے گی۔ میں سمجھتا ہو ںکہ ریکوری کے سسٹم میں ہمیشہ مدت دی جاتی ہے اس مدت کے اندر کوئی کارروائی نہیں ہو سکتی ان کو بھی جو مدت دی گئی تھی اگر مدت گزر چکی ہے تو عدالت دوبارہ نوٹس کر سکتی ہے اور وہ مدت گزر گئی ہے تو عدالت گرفتار بھی کر سکتی ہے۔
تعلیمی اداروں کی بھاری فیسیں پرانا مسئلہ ہے جو پہلے کراچی میں سامنے آیا۔ عدالت نے فیسیں کم کرنے کا کہالیکن نہ کی گئیں۔ اب لاہور میں بھی ایسا ہی نظر آ رہا ہے کہ عدالت کے حکم کے باوجود ادارے فیسیں کم کرنے کو تیار نہیں ہیں۔ عدالت ابھی اس معاملے پر زیادہ زور نہیں دے رہی وگرنہ وہ اپنے حکم پر عملدرآمد نہ کرنے پر گرفتاری کا حکم بھی دے سکتی ہے۔ عدالت اپنے کسی بھی حکم پر عملدراامد کرانے کی طاقت رکھتی ہے۔ وزیر تعلیم شفقت محمود کا کام صرف پی ایم ہاﺅس کو یونیورسٹی بنانا نہیں تھا بلکہ وزیراعظم نے یکساں نظام تعلیم پر جو بار بار زور دیا ہے اس پر بھی کام کرنے کی ضرورت ہے۔ بھارت نے امریکہ کو ٹکا سا جواب دے دیا ہے کہ وہ طالبان سے نہیں لڑ سکتا، امریکی صدر ٹرمپ نے بھی اس جواب پر چپ سادھ لی ہے اور کسی غصے کا اظہار نہیں کیا بلکہ ٹرمپ اور مودی نے آپس میں مزید تعاون بڑھانے پر غور کیا ہے۔ طالبان سے جنگ سے انکار کرنے والا بھارات کشمیر میں نہتے شہریوں پر ظلم و ستم ڈھا رہا ہے اب اطلاع ہے کہ کشمیر میں سبز رنگ بنانے پر بھی پابندی لگا دی گئی ہے کہ اس سے پاکستان کا پرچم بنایا جاتا ہے۔ بھارت سبز رنگ کو کہاں کہاں سے مٹائے گا کہ یہ رنگ تو ہریالی کی صورت پوری دنیا میں پھیلا ہوا ہے۔ وزیراعظم عمران خان نے شروع سے ہی یہ موقف اپنا رکھا ہے کہ کسی پرائی جنگ میں نہیں کودیں گے۔ ابوظہبی میں جاری امریکہ طالبان مذاکرات کو ایک طرح سے عمران خان کی ااشیر باد حاصل ہے۔ تحریک انصاف حکومت نے اپنے اثرورسوخ کا استعمال کر کے طالبان کو مذاکرات پر آمادہ کیا، اب جس فورس کو آپ بات کرنے پر آمادہ کرتے ہیں اس سے خود تو نہیں لڑ سکتے۔ عمران خان نے اچھی پالیسی اپنائی ہے، پاکستان خود افغانستان میں امن چاہتا ہے جو صرف اس صورت ممکن ہے کہ امریکہ نہ صرف طالبان سے مذاکرات کرے بلکہ اسے کسی حتمی نتیجہ تک بھی پہنچائے۔ مذاکرات کا ختم نہ ہونا بتا رہا ہے کہ معاملات آگے بڑھ رہے ہیں۔
پاکستان کی آبادی تیزی سے بڑھ رہی ہے بڑی تعداد میں بچے معذور پیدا ہو رہے ہیں یا پیدائش کے بعد پولیس کا شکار ہو کر معذور ہو رہے ہیں۔ آنے والی نسل کو پولیو سے بچانے کیلئے اس مسئلہ پر خاصی توجہ دینا ہو گی۔ اب بھی پولیو ٹیموں کی بعض علاقوں تک رسائی نہیں اور بعض جگہ والدین بچوں کو قطرے نہیں پلانے دیتے اس وجہ سے بھی یہ بیماری بڑھ رہی ہے۔ سیوریج کے پانی میں پولیو وائرس کا پایا جانا انتہائی تشویشناک ہے جس کا تدارک ضروری ہے۔
دفاعی تجزیہ کار عبداللہ گل نے کہا کہ وزیراعظم اور حکومت نے بھارت کے حوالے سے مناسب پالیسی اپنا رکھی ہے۔ بھارت میں الیکشن جاری ہیں مودی کو 5 صوبوں میں شکست ہوچکی ہے کرپشن کے میگا سکینڈل بھی سامنے آ رہے ہیں اس لئے پاکستان مخالف نعرہ لگانا مودی کے لئے بہت ضروری ہو چکا ہے۔ مودی حکومت سازش کے ذریعے چاہتا ہے کہ پاکستان اسے کوئی ایسا موقع دے جسے بہانہ بنا کر وہ الیکشن جیتنے کی پوزیشن میں آ جائے۔ وزیراعظم عمران خان کا امن کا پیغام اچھا ہے، آرمی چیف نے بھی امن کی بات کی۔ پاکستان ہر قسم کا جواب دینا جانتا ہے تاہم وہ ذمہ دار ایٹمی ریاست ہونے کا ثبوت دے رہا ہے۔ بھارت کو افغانستان میں اپنے کھربوں ڈوبتے نظر آ رہے ہیں کیونکہ امریکہ تو طالبان کے ساتھ مذاکرات کر رہا ہے۔ ایک تقریب میں امریکی اور بھارتی سفیر سے ملاقات ہوئی، ان کی باتوں سے واضح ہو رہا تھا کہ ان کے افغانستان میں دن تھوڑے ہیں ایسا ہونے کی صورت میں پاکستان کی وسط ایشیائی ریاستوں تک رسائی اور تاپی منصوبہ کی باگیں ہاتھ میں آ جائیں گی اور یہی غم بھارت کو کھائے جا رہا ہے۔
دفاعی تجزیہ کار بریگیڈیئر (ر) فاروق حمید نے کہا کہ پاکستان اور برطانیہ میں حالیہ ہونے والا معاہدہ اسحق ڈار کی وطن واپس لانے کی جانب پہلا قدم ہے سپریم کورٹ نے اسحق ڈار کو واپس لانے کا کہا ہے اس لئے حکومت کی ذمہ داری ہے کہ برطانوی حکومت سے بات کرے۔ اسحق ڈار نے برطانیہ میں سیاسی پناہ کی بھی درخواست دے رکھی ہے ان کو واپس لانے میں مسائل تو ہیں تاہم دیکھنا ہے کہ حکومت، وزارت داخلہ اور نیب ڈار کو واپس لانے میں کب کامیاب ہوتے ہیں۔ الطاف حسین، حسن و حسین نواز، علی عمران یہ سب قانون کے بگھوڑے ہیں جنہوں نے برطانیہ میں پناہ لے رکھی ہے، حکومت یقینا ان سب قانون کے مجرموں کو واپسلانے کیلئے اقدامات کر رہی ہو گی۔ آنے والے مہینوں میں حکومت قومی سلامتی کے ادارے اگر اپنا رول ادا کرتے ہیں تو شاید ان سب کو واپسلانے میں کامیاب رہیں گے۔ قومی خزانہ لوٹنے والوں سے ایک ایک پائی کا حساب لینا ہو گا۔ حمزہ شہباز کے خلاف نیب کارروائی کرے گی۔ ایف آئی اے نے ان کی لندن فرار ہونے کی کوشش کو ناکام بنایا۔ قومی خزانے کو لوٹنے والا کوئی شخص بھی اب بیرون ملک فرار نہیں ہو سکتا۔
سابق سفیر عابدہ حسین نے کہا کہ بھارت کی پالیسی ہمیشہ ہی دوغلی رہی ہے، وہ کہتا کچھ اور کرتا کچھ ہے۔ بھارت طالبان کے خلاف کسی قسم کا کوئی ایکشن نہیں لینا چاہتا اور خود کو بے نقاب بھی نہیں ہونے دینا چاہتا۔ سنجیدگی سے دیکھا جائے تو صاف نظر آتا ہے کہ بھارت کا طالبان پر کوئی اثرورسوخ نہیں ہے۔

لاہور (رپورٹنگ ٹیم) وزیر اطلاعات پنجاب فیاض الحسن چوہان نے کہا ہے کہ حکومت اخبارات کو زندہ رکھنا چاہتی ہے۔ پرنٹ اور الیکٹرانک میڈیا کے مسائل حل کریں گے حکومت بڑے اور موثر اخبارات کو میرٹ پر اشتہارات جاری رکھے گی۔ ڈمی اخبارات کو اشتہارات نہیں دئیے جائیں گے۔ اس مقصد کے لئے صوبائی حکومت نے ایک کمیٹی بنا دی گئی جو فہرست تیار کرے گی۔ ڈی جی پی آر پنجاب سے ہفتے میں دو بار ان سے ملاقات ہو گی۔ علاقائی اخبارات کو بھی میرٹ پر اشتہارات جاری کئے جائیں اس سلسلے میں سی پی این ای کا تعاون اور مشاورت درکار ہو گی۔ انہوں نے کہا کہ میں نے جب سے وزارت اطلاعات سنبھالی ہے کرپشن کے خاتمے کے لئے بہت سے اقدامات کئے ہیں اور ثقافت کے شعبے میں جامع اصلاحات کی ہیں۔ بہت سے مستحق فنکاروں کے ماہانہ وظائف لگائے اور اس بات کو یقینی بنایا ہے کہ یہ وظائف ان قومی فنکاروں کو بروقت مل سکیں جبکہ سابق دور میں من پسند فنکاروں کو وظائف دئیے جاتے تھے اور درجنوں فنکار اس سہولت سے فائدہ نہیں اٹھا سکے تھے۔ اسی طرح تھیٹر میں مافیا کا خاتمہ کیا ہے۔ ان اداروں میں تمام تر ٹھیکے نواز حکومت میں بیٹھے افراد کے رشتہ داروں کو دئیے جاتے تھے ہم نے آکر اس ناانصافی کو ختم کر دیا ہے اور ثقافت کے تمام شعبوں میں میرٹ پر فیصلے کر رہے ہیں۔ وزیر اطلاعات پنجاب نے کہا کہ میڈیا کی آزادی حکومت کی آزادی ہے۔ انہوں نے کہا چھوٹے علاقائی اخبارات کے مسائل کے لئے سی پی این ای مدد بھی درکار ہو گی اور تنظیم کی تجاویز پر عملدرآمد بھی کریں گے۔ ان خیالات انہوں نے سی پی این پنجاب کمیٹی کے اجلاس سے خطاب کرتے ہوئے کیا۔ انہوں نے کہاکہ میڈیا ریاست کا اہم ستون ہے اور تحریک انصاف کی حکومت میڈیا کی اہمیت کو تسلیم کرتی ہے۔ پنجاب میں کسی بھی قومی یا ریجنل اخبار کے ساتھ امتیازی سلوک نہیں کیا جا رہا۔ انہوں نے کہاکہ ماضی میں چند ایک اخبارات اور ٹی وی چینلز کو نوازا جاتا تھا اب ایسا نہیں ہے۔ دو ادارے ایسے تھے جو قومی اداروں کے خلاف بولتے تھے انہیں سمجھا دیا گیا ہے۔ انہوں نے کہا کہ قومی اخبارات کو میرٹ پر اشتہارات دیئے جائیں گے جبکہ ریجنل اخبارات کو پالیسی کے مطابق اشتہارات جاری ہوں گے۔ سی پی این ای کے سینئرنائب صدر امتنان شاہد نے خطاب کرتے ہوئے کہا کہ حکومت کو علاقائی اخبارات کا کوٹہ مختص کرنا ہو گا تبھی یہ اخبارات زندہ رہیں گے۔ اجلاس سے خطاب کرتے ہوئے سی پی این ای کے سابق سیکرٹری جنرل اعجاز الحق نے سوال اٹھایا کہ مرکز اور صوبوں میں اخبارات کی روٹیشن میں کئی ریجنل اخبارات کو نظر انداز کیا جاتا ہے۔ روٹیشن صرف میڈیا لسٹ کی بنیاد پر نہیں ہونی چاہئے بلکہ یہ بھی دیکھنا چاہئے کہ کون سے ریجنل اخبارات عملی طور پر مارکیٹ میں موجود ہیں۔ ان کی تجویز پر صوبائی وزیر نے کہا کہ سی پی این ای کا ایک وفد سیکرٹری اطلاعات اور ڈی جی پی آر سے ملاقات کر کے اس معاملے پر بات کرے گا۔ اجلاس کے اختتام پر اعجاز الحق نے انہیں 18 جولائی کو اسلام آباد میں ہونے والے نیشنل میڈیا کنونشن میں شرکت کی دعوت دی اور بتایا کہ اس کنونشن میں اخبارات، ٹی وی چینلز اور سوشل میڈیا سے متعلق شخصیات شریک ہوں گی، اور کنونشن کے آخری سیشن میں وزیراعظم عمران خان کی شرکت بھی متوقع ہے۔اجلاس میںایاز خان، جنرل سیکرٹری سی پی این ای جبار خٹک، اعجاز الحق، رحمت علی رازی، ارشاد عارف، سید انتظار زنجانی، کاظم خان، علی احمد ڈھلوں، محمد ارشد روحانی، اجمل شفیق، ملک لیاقت، اشرف سہیل، اکمل چوہان، ایم اسلم میاں، عبدالودود ربانی، ذوالفقار راحت ، ملک فرزند علی، عثمان غنی، وقاص طارق، زبیر محمود، توفیق شیخ، امتیاز روحانی، بشیر احمد، سردار عابد علیم نے بھی شرکت کی۔