ملتان (میاں غفار خان) باخبر ذرائع سے معلوم ہوا ہے کہ عمران خان نے نواز شریف کو بیرون ملک بھجوانے کیلئے سعودی عرب کی تجویز قبول کرنے سے انکار کر دیا ہے۔ سعودی سفیر نے تین روز قبل عمران خان سے ان کی رہائش گاہ پر ملاقات کی اور ان تک اپنی حکومت کا پیغام پہنچایا تھا کہ عمران خان کے وزارت عظمیٰ کا حلف اٹھانے سے قبل ہی علاج کی غرض سے نواز شریف کو بیرون ملک بھجوا دیا جائے۔ بعد میں انسانی ہمدردی کے تحت ان کی صاحبزادی مریم نواز کو بھی انسانی ہمدردی کے تحت رہا کرا کے بیرون ملک بھیج دیا جائے لیکن عمران خان نے یہ کہتے ہوئے سعودی تجویز قبول نہیں کی کہ سعودی عرب چند دن کے اندر اپنے شہزادوں سے لوٹ مار کے اربوں، کھربوں ڈالر واپس لے سکتی ہے تو نواز شریف کی لوٹ مار کی رقم کی واپسی میں کیوں رکاوٹ ڈالی جائے حالانکہ نواز شریف کی بیرون ملک بلیک منی ہے جس کیلئے دنیا کے کسی بھی قانون کے تحت وہ رعایت کے مستحق نہیں۔ ذرائع کے مطابق اس سلسلے میں نگران حکومت سے بھی رابطہ کیا گیا مگر اس نے تمام دباﺅ عمران خان کی طرف منتقل کر دیا کہ انہیں چند روز تک اقتدار سنبھالنے ہے لہٰذا فیصلہ بھی وہی کرینگے لیکن عمران خان نے دو ٹوک الفاظ میں پیغام دیا کہ رقم واپس کیے بغیر نوازشریف کو جیل سے رہائی نہیں ملے گی۔ ذرائع کے مطابق نوازشریف کی طرف سے امریکہ میں کام کرنے والی لابنگ فرم نے امریکی حکومتی عہدیداروں کو بھی یہ باور کرایاہے کہ نوازشریف کے ملتان میں سرل المیڈا کے انٹرویو میں عائد کئے گئے الزامات کے بعد ہی ساری مشکلات پیدا ہوئی ہیں اور اگراس موقع پر نوازشریف کی مدد نہیں کی جاتی تو اس خطے میں امریکہ کو سیاسی حمایت کے لئے کوئی بھی سیاستدان نہیں ملے گا۔ یہ بھی کہا جا رہا ہے کہ سعودی عرب نے امریکہ کے کہنے پر ہی رہائی کی تجویز دی تھی۔

اسلام آباد(مانیٹرنگ ڈیسک) تحریکِ انصاف کے چیئرمین عمران خان قومی اسمبلی کی پانچ میں سے چار نشستیں چھوڑ دیں گے۔عمران خان نے عام انتخابات 2018ءمیں قومی اسمبلی کی پانچ نشستوں پر کامیابی حاصل کی تھی لیکن انھیں ان میں سے چار نشستیں چھوڑنا پڑیں گی، اس سلسلے میں انہوں نے اپنے پارٹی رہنماو¿ں سے مشاورت کی ہے۔ ذرائع کا کہنا ہے کہ عمران خان کا اپنے آبائی حلقہ میانوالی کی نشست برقرار رکھنے کا امکان ہے کیونکہ وہ انتخابی مہم کے دوران میانوالی کی نشست پاس رکھنے کا وعدہ بھی کر چکے ہیں۔عمران خان اسلام آباد کے حلقہ این اے 53، لاہور کے حلقہ این اے 131، بنوں کے حلقہ این اے 35 اور کراچی سے این اے 243 کی نشست چھوڑنے کو تیار ہیں۔ذرائع کے مطابق پارٹی کے بعض رہنماو¿ں نے پی ٹی آئی چیئرمین کو لاہور کی سیٹ نہ چھوڑنے کا مشورہ دیا ہے کیونکہ ان کے خیال میں ان کے مخالف امیدوار سے ووٹوں کا فرق کم ہے، ضمنی انتخاب ہوئے تو اسے جیتنا مشکل ہو گا۔

کراچی (ویب ڈیسک)گلستان جوہر کے قریب بھٹائی آباد سے گزشتہ روز بچی کی لاش برآمد ہوئی، جسے زیادتی کے بعد گلا دبا کر قتل کیا گیا۔
سینئر سپرنٹنڈنٹ پولیس (ایس ایس پی) ملیر منیر شیخ نے بتایا کہ میڈیکل رپورٹ کے مطابق بچی سے زیادتی کی گئی اور پھر گلا دبا کر قتل کردیا گیا جبکہ اس کی لاش پر سگریٹ سے جلائے جانے کے نشانات بھی ہیں۔انہوں نے مزید بتایا کہ ایسا لگتا ہے کہ بچی کے ساتھ اس سے پہلے بھی زیادتی کی جاتی رہی ہے۔ایس ایس پی ملیر کے مطابق بچی کے والد نہیں ہیں اور وہ اپنی بہن کے ساتھ رہتی تھی۔ بچی کی لاش گھر سے ہی ملی، جسے اس کے بہنوئی نے اسپتال پہنچایا تھاایس ایس پی ملیر کے مطابق بچی کے بہنوئی اور چچا کو شک کی بنیاد پر حراست میں لے لیا گیا۔

اسلام آباد (آن لائن) نیب حکام نے پولیس کے تین اعلیٰ حکام کے خلاف کرپشن کی تحقیقات شروع کردی ہیں ان پولیس افسران پر الزام ہے کہ انہوں نے شہباز شریف دور حکومت میں کرپشن کے ذریعے لاہور میں کروڑوں روپے کی جائیدادیں خرید رکھی ہیں۔ نیب ذرائع کے مطابق لاہور کے سابق ڈی آئی جی امین واینس‘ سابق ڈی آئی جی پولیس لاہور حیدر اشرف اور کرائم انویسٹی گیشن منیر عمر ورک کے خلاف نیب نے تحقیقات شروع کردی ہیں۔ نیب حکام نے لاہور ڈویلپمنٹ اتھارٹی (ایل ڈی اے) کو ایک مراسلہ بھیجا ہے اور حکم دیا ہے کہ گزشتہ پانچ سالوں میں ان تین پولیس افسران کے نام پر خریدی گئی اور بیچی گئی اور ٹرانسفر کی گئی جائیدادوں کی مکمل تفصیلات فراہم کی جائیں۔ شہباز شریف دور میں پولیس حکام نے کرپشن کے نئے ریکارڈ قائم کئے تھے اور پولیس اہلکاروں کی فلاح و بہبود کے لئے مختص فندز کو ہضم کر گئے۔ جبکہ مجرمانہ سرگرمیوں میں ملوث مجرموں سے بھاری رشوت لینا پولیس افسران کی گھٹی میں شامل ہے لاہور سے ہر ماہ ایک ارب روپے کا بھتہ پولیس افسران وصول کرتے ہیں جس سے پولیس افسران اب ارب پتی بن چکے ہیں ان کی جائیدادیں ان کے ذرائع آمدن سے کئی گنا زیادہ ہیں اس لئے نیب حکام نے تحقیقات کا حکم دیا ہے۔

منچن آباد (تحصیل رپورٹر) درندہ صفت اوباش مولوی کی معصوم بچی کے ساتھ زیادتی لوگوں کے آجانے پر ملزم موقع واردات سے فرار، زیادتی کا نشانہ بننے والی معصوم بچی کو خون میں لت پت ڈسٹرکٹ ہیڈکوارٹر ہسپتال بہاولنگر منتقل کر دیا گیا،پولیس رپورٹ کے مطابق تھیڑی پیرووالی میں 8/9 سالہ بچی گھر کے قریب مسجد میں مولوی محمد رفیق کے پاس صبح سویرے قرآن پاک پڑھنے گئی ، جب واپسی میں تاخیر ہوئی تو اس کے والدنے اپنے دیگر ساتھیوں سمیت اس کا پتہ کیا تو مسجد کو تالا لگا ہوا تھا مزید دریافت پر جب مولوی رفیق کے ملحقہ گھر سے پتہ کرنے پہنچے تو گھر کے اندر سے بچی کی رونے کی آوازیں آرہی تھی، اندر جا کر دیکھا گیا تو مولوی رفیق اپنے کمرے میںمعصوم بچی کے ساتھ زیادتی میں مصروف تھا، لوگوں کو دیکھ کر وہ گھر کی دیوار پھلانگ کر فرار ہوگیا، بچی کو فوری طور پر ہسپتال منتقل کر دیا گیا، منچن آباد پولیس نے بچی کے والد کی مدعیت میںمقدمہ درج کرکے ملزم کو گرفتار کرنے کے لئے چھاپے مارنا شروع کر دیے ہیں،ایس ایچ او منچن آباد فرحان حسین نے میڈیا کو بتایا کہ اس مقدمہ کے ملزم مولوی رفیق کی گرفتاری کے لئے کوئی کسر نہ اٹھا رکھی جائے گی اور اسے 24 گھنٹے کے اند ر پابند سلاسل کیا جائے گا۔

کراچی(ویب ڈیسک)سندھ، بلوچستان اور خیبرپختونخوا میں موسم گرما کی تعطیلات ختم ہونے کے بعد تعلیمی ادارے کھل گئے۔سندھ میں ڈھائی ماہ کی تعطیلات کے بعد آج صوبے بھر کے اسکول کھل گئے تاہم چھٹیوں کے بعد پہلے روز کے باعث اسکولوں میں حاضری معمول سے کم ہے۔محکمہ تعلیم سندھ کی جانب سے موسم گرما کی دو ماہ تعطیلات 15 جولائی کو ختم ہوگئی تھی تاہم انتخابات کے باعث اس میں مزید 15 روز کا اضافہ کیا گیا اور اس طرح صوبے میں ڈھائی ماہ تک اسکول بند رہے۔ بلوچستان کے گرم علاقوں میں بھی موسم گرما کی طویل تعطیلات ختم ہونے کے بعد اسکول کھل گئے، محکمہ تعلیم بلوچستان کا کہنا ہے کہ صوبے کے گرم علاقوں میں 17 اضلاع شامل ہیں جن میں سبی، لسبیلہ، گوادر، تربت، جعفرآباد، نصیرآباد، جھل مگسی سمیت دیگر اضلاع شامل ہیں۔خیبر پختونخوا میں بھی سرکاری اسکول آج سے کھل گئے اور طلبا و طالبات نے اسکولوں کی جانب رخ کیا۔

لاہور (مانیٹرنگ ڈیسک) کالم نگار خالد چودھری نے کہا ہے کہ نواز شریف کی حکومت بنی تب بھی مودی نے مبارکباد کا پیغام دیا تھا۔ نواز شریف بھی مودی کی حلف برداری کی تقریب میں شریک ہوئے تھے۔ چینل ۵ کے پروگرام کالم نگار میں گفتگو کرتے ہوئے انہوں نے کہا کہ جدید تہذیب سے ثابت ہوتا ہے کہ مسائل کے حل جنگوں سے نہیں نکلتا۔ بھارت اور پاکستان کے بجٹ کا کثیر حصہ دفاع پر خرچ ہوتا ہے جس کے باعث غریب لوگوں کی زندگی بہتر نہیں ہو رہی۔ چین اور تائیوان نے لمبی تجارتی پابندیوں کو کم کیا۔ پاک بھارت عوام بھی بہتر تعلقات کے خواہاں ہیں۔ دہشت گردی کے باعث سیاح آنا بند ہو گئے۔ انہوں نے کہا کہ بلاول نے پارلیمنٹ میں جانے کا اشارہ دے کر پختگی کا مظاہرہ کیا۔ کالم نگار خالد فاروقی نے کہا ہے کہ پاکستان میں جو بھی حکومت سنبھالتا ہے بھارت اس کیلئے تعلقات کے لحاظ سے اہم ہوتا ہے۔ اگر ہم غربت کو ایک مسئلہ سمجھیں اور حل نکالیں تو حل ضرور نکلے گا۔ بھارت جب دہشت گردی کو حل کرنے کی بات کرتا ہے تو پھر دیگر مسائل پر بات نہیں ہو پاتی۔ پاکستان کشمیر میں مداخلت نہیں کر رہا اس کے باوجود وہاں تحریک آزادی عروج پر ہے۔ سیاسی غیریقینی کے باعث ڈالر مہنگا ہوا۔ غیریقینی ختم ہونے کے بعد ڈالر نیچے آ رہا ہے اسحاق ڈار نے ملکی معیشت کا بیڑا غرق کر دیا۔ کالم نگار روبینہ ثروت نے کہا کہ الیکشن کے بعد گٹھ جوڑ ہو رہا ہے کہ حکومت کونسا بنائے گا بڑی پارٹیاں سیاسی میدان میں موجود ہیں۔ عمران خان کی وکٹری تقریر سب نے سنی اور دل کھول کر تعریف کی۔ انہوں نے کہا کہ ڈالر کی قیمت مزید نیچے آنی چاہیے۔ انہوں نے کہا کہ آنے والی حکومت کیلئے معیشت سب سے بڑا چیلنج ہو گی کیونکہ موجودہ حالات میں عوام کو بہرحال ریلیف چاہیے۔ پارلیمنٹ مخلص ہوتی تو عمران خان سڑکوں پر احتجاج نہ کرتے۔ کالم نگار ضمیر آفاقی نے کہا کہ ہمسایوں کے ساتھ بہتر تعلقات دونوں کے مفاد میں ہیں بنیادی مسائل کے باعث ہمار اخطہ غربت کا شکار ہے۔ پاک بھارت بنیادی مسائل ایک جیسے ہیں بھارت میں مسلمانوں کی خاصی تعداد رہائش پذیر ہے ۔ تعلقات خراب ہونے پر وہ متاثر ہوتے ہیں۔ انہوں نے کہا کہ ایم کیو ایم کی حکومتوں کو ہمیشہ ضرورت رہی سیاست مفادات کا کھیل ہوتا ہے۔