ڈیرہ دون(بی این پی ) بنگلہ دیشی روبیل حسین بھی ڈی میرٹ پوائنٹ حاصل کرنےوالوں کی فہرست میں آگئے۔ افغانستان کیخلاف دوسرے ٹی ٹوئنٹی میں سمیع اللہ شنواری کیخلاف ایل بی ڈبلیو کی ناکام اپیل پر وہ فیلڈ امپائر سے الجھ پڑے تھے جس پر آئی سی سی نے روبیل حسین کو ایک ڈی میرٹ پوائنٹ دے دیا۔

پیرس (اے پی پی) رومانیہ کی سیموناہالپ نے فرنچ اوپن ویمنزسنگلز فائنل کےلئے کوالیفائی کرلیا۔سیمی فائنل میں رومانین پلیئر نے سپین کی گربائن مگوروزا کو 6-1اور6-4 سے مات دی،دفاعی چیمپئن اور عالمی نمبر ایک رافیل نڈال فتوحات برقرار رکھتے ہوئے 11ویں مرتبہ فرنچ اوپن ٹینس ٹورنامنٹ مینز سنگلز سیمی فائنل میں پہنچ گئے، نڈال نے کوارٹر فائنل میں حریف ارجنٹائنی کھلاڑی ڈائیگو کو شکست دی۔ فرانس میں جاری سال کے دوسرے گرینڈسلام ٹورنامنٹ کے سلسلے میں کھیلے گئے ویمنزسنگلز سیمی فائنل میں رومانیہ کی سیموناہالپ نے سپین کی گربائن مگوروزاکیخلاف عمدہ کھیل کامظاہرہ کیا اوراپنی دھاک بٹھائی،رومانین پلیئرنے پہلا سیٹ باآسانی 6-1سے اپنے نام کیا۔دوسرے سیٹ میں بھی سیموناکاپلڑابھاری رہا اورانہوں نے مگوروزاکیخلاف اپنی برتری ثابت کی اور 6-4سے سیٹ اورمیچ نام کرلیا اورفائنل کےلئے کوالیفائی کرلیا۔ مینز سنگلز کوارٹر فائنل میں ہسپانوی سٹار اور 16 مرتبہ کے گرینڈسلام چیمپئن رافیل نڈال نے عمدہ کارکردگی کا مظاہرہ کرتے ہوئے حریف ارجنٹائنی کھلاڑی ڈائیگو کو زبردست مقابلے کے بعد 4-6، 6-3، 6-2 اور 6-2 سے ہرا کر سیمی فائنل میں پہنچنے کا اعزاز حاصل کیا۔

ریو ڈی جنیرو (آئی این پی) لیجنڈ برازیلین فٹ بالر پیلے نے کہا ہے کہ ہماری ٹیم سٹار فٹ بالر نیمار کی موجودگی میں اور بھی مضبوط ہوگئی ہے اور اب اس کے پاس عالمی کپ فٹ بال ٹورنامنٹ جیتنے کو اچھا موقع ہے ۔ سماجی رابطوں کی ویب سائٹ ٹویٹر پر جاری اپنے بیان میں پیلے نے کہا کہ کچھ دن قبل نیمار کے انجرڈ ہونے کی خبریں چل رہیں تھی، انہوں نے کہا کہ نیمار کا زخمی ہونا 1962 میں منعقدہ ورلڈ کپ میں چیکو سلواکیہ کے خلاف کھیلے گئے میچ میں میرے زخمی ہونے جیسا ہے، فٹنس مسائل کے باعث میں ورلڈ کپ سے باہر ہو گیا تھا لیکن اب نیمار کے فٹ ہونے کے بعد ٹیم میں شمولیت سے برازیل ٹیم مزید مضبوط ہوگئی ہے اور ٹیم رواں میگا ایونٹ جیت سکتی ہے ۔انہوں نے کہا کہ میرے خیال میں نیمار کی موجودگی برازیل کے حق میں مثبت ثابت ہو گی تاہم ٹیم کو عالمی چیمپئن بننے کیلئے مربوط حکمت عملی اختیار کرنا ہو گی۔ واضح رہے کہ برازیل ٹیم میگا ایونٹ میں اپنی مہم کا آغاز 17 جون کو سوئٹزرلینڈ کے خلاف میچ سے کریگی ۔ برازیل کی ٹیم کو گروپ ای میں سوئٹزرلینڈ، کوسٹاریکا اور سربیا کے ساتھ رکھا گیا ہے۔

زیورخ(اے پی پی)دفاعی چیمپئن جرمنی کی ٹیم فٹ بال کی عالمی تنظیم (فیفا) کی تازہ ترین عالمی درجہ بندی میں بدستور ٹاپ پوزیشن پر براجمان ہے، میزبان روس کی ٹیم آئندہ ہفتے شروع ہونے والے ورلڈ کپ میں لوئسٹ رینکڈ ٹیم کے طور پر انٹر ہو گی۔ ورلڈ کپ کا آغاز 14 جون سے ہو رہا ہے۔ جمعرات کو فیفا نے تازہ ترین رینکنگ جاری کر دی ہے جس کے تحت ابتدائی سات پوزیشنز میں کوئی تبدیلی نہیں ہوئی، جرمنی پہلے، برازیل دوسرے، بیلجیئم تیسرے، پرتگال چوتھے، ارجنٹائن پانچویں، سوئٹزرلینڈ چھٹے اور فرانس ساتویں نمبر پر موجود ہے، پولینڈ کی ٹیم دو درجے ترقی پا کر آٹھویں نمبر پر آ گئی، سابق عالمی چیمپئن سپین کی ٹیم دو درجے تنزلی کے بعد دسویں نمبر پر چلی گئی، انگلینڈ ایک اور یوروگوئے تین سیڑھیاں چڑھ کر 12ویں اور 14ویں نمبر پر آ گئے، ہالینڈ دو درجے ترقی کے ساتھ 17ویں نمبر پر آ گیا۔، ویلز تین درجے ترقی پا کر ٹاپ ٹونٹی میں شامل، 18ویں پوزیشن سنبھال لی، کروشیا 2 اور تیونیسیا 7 درجے تنزلی کے بعد ٹاپ ٹونٹی سے باہر ہو گئیں، روس کی 4 درجے تنزلی ہوئی ہے جس کے بعد وہ لوئسٹ رینکڈ ٹیم کے طور پر ورلڈ کپ میں انٹری کرے گی۔

اسلام آباد(آئی این پی)پاکستان میں فٹبال کے کھیل پر چھائی بے یقینی پر مردوں کے ساتھ ساتھ خواتین کھلاڑی بھی سخت مایوسی کا شکار ہیں۔پاکستان کی صف اول کی خاتون فٹبالر ہاجرہ خان نے کہا ہے کہ برائے نام مواقع ملنے سے پاکستان کی خواتین فٹبالرز کیسے ترقی کر سکتی ہیں، خواتین فٹبالرز کو سال میں صرف ایک قومی چیمپیئن شپ کھیلنے کو ملتی ہے جبکہ دو سال میں ملک سے باہر کھیلنے کا صرف ایک موقع ملتا ہے تو ایسے میں یہ بہتری کی توقع رکھنا درست نہیں۔اگر آپ سال میں ایک چیمپیئن شپ کرائیں گے اور دو سال میں ایک بار لڑکیوں کو باہر بھیجیں گے تو مجھے نہیں لگتا کہ کوئی بھی ترقی ہو گی بےشک خواتین کو فٹبال کھیلتے ہوئے دس سال ہو جائیں۔ہاجرہ خان کے خیال میں فیفا کی جانب سے پاکستان فٹبال فیڈریشن کو معطل کیے جانے کا زیادہ نقصان مرد کھلاڑیوں کو ہوا ہے۔مرد کھلاڑیوں کو زیادہ نقصان ہوا ہے کیونکہ ان کا کھیل زیادہ تھا ان کی لیگز بھی زیادہ ہو رہی تھیں، ان کی چیمپیئن شپ زیادہ کھیلی جا رہی تھیں لیکن ان نوجوان خواتین فٹبالرز کو بھی سخت مایوسی کا سامنا ہے جنھیں کوئی میچ کھیلنے کو نہیں مل رہا ہے۔ ہم سب امید کرتے ہیں کہ پاکستان میں خواتین فٹبال بھی جلد سے جلد دوبارہ شروع ہو گی۔ہاجرہ خان نے پاکستان سپورٹس کے کرتا دھرتاں کی حب الوطنی پر بھی سوال اٹھایا ہے۔مجھے ایسا دکھائی دیتا ہے کہ پاکستان میں جو لوگ سپورٹس چلارہے ہیں ان میں جذبہ حب الوطنی کی کچھ کمی ہے۔ کھلاڑیوں میں بے پناہ ٹیلنٹ ہے ہم صرف اس لیے مار کھا رہے ہیں کیونکہ نوجوان کھلاڑیوں کو صحیح سمت نہیں مل رہی ہے۔ہاجرہ خان کا کہنا ہے کہ خواتین فٹبال پر بہت زیادہ توجہ کی ضرورت ہے۔خواتین کی کوئی لیگ نہیں ہوئی ہے نہ ہی انٹر کلب چیمپیئن شپ ہوئی ہے۔ ملک میں کھیلوں کا ڈھانچہ خواتین کے لیے موافق نہیں ہے۔ سہولیات نہیں ہیں۔ ایسا کوئی پلیٹ فارم نہیں جہاں خواتین کھلاڑی خود کو اجاگر کر سکیں۔ نچلی سطح سے لے کر سینئر ٹیم تک بہت زیادہ توجہ کی ضرورت ہے۔ہاجرہ خان کا کہنا ہے کہ تمام تر مشکلات کے باوجود پاکستان میں نوجوان کھلاڑیوں میں فٹبال کا جنون کی حد تک شوق ہے۔لڑکیوں میں فٹبال کا شوق بہت بڑھ گیا ہے۔ گذشتہ دنوں چیمپئنز لیگ کے فائنل میں لڑکوں کے ساتھ ساتھ لڑکیوں نے بھی دلچسپی لی۔ میسی، رونالڈو اور محمد صلاح خواتین کھلاڑیوں کے رول ماڈل ہیں جن کے میچ وہ باقاعدگی سے دیکھ رہی ہیں۔ لڑکیوں کو پریمیئر لیگ اور لا لیگا کا پتہ ہے انھیں ویمنز فٹبال کی بھی کافی معلومات ہیں۔

ایڈنبرا( آن لائن ) اسکاٹ لینڈ کی ناتجربہ کاری کا امتحان لینے پاکستان ٹیم ایڈنبرا پہنچ گئی۔کپتان سرفراز احمد، فخر زمان، حارث سہیل، فہیم اشرف، شاداب خان، محمد عامر، حسن علی اور راحت علی لیڈز سے براستہ مانچسٹر ایڈنبرا پہنچ گئے، پاکستان سے روانہ ہونے والے ٹی ٹوئنٹی اسپیشلسٹ احمد شہزاد،آصف علی،حسین طلعت،محمد نواز،عثمان شنواری اور شاہین آفریدی کے ساتھ انگلینڈ میں پہلے سے موجود شعیب ملک کی شمولیت سے مکمل ہونے والا پاکستانی اسکواڈ ممکنہ طور پر آج ایڈنبرا میں تیاریوں کا آغاز کرے گا، یوں پاکستان سے پہنچنے والے کرکٹرز کو مقامی کنڈیشنز سے ہم آہنگ ہونے کا موقع ملے گا۔اسکاٹ لینڈ کے خلاف پہلا میچ 12 اور دوسرا میچ 13 جون کو شیڈول ہے۔ یاد رہے کہ دونوں ٹیموں کے مابین ابھی تک صرف ایک ٹی ٹوئنٹی میچ ورلڈکپ 2007میں کھیلا گیا تھا جس میں گرین شرٹس نے 51رنز سے فتح حاصل کی، فاتح ٹیم نے پہلے بیٹنگ کرتے ہوئے یونس خان(41)، مصباح الحق(23)اور شاہد آفریدی (22) کی بدولت 9 وکٹ پر171رنز بنائے،کریگ وائٹ نے 3شکار کیے۔جواب میں اسکاٹ لینڈ کے اوپنر فریزر واٹس(46)کے سوا کوئی مزاحمت نہ کرپایا اور پوری ٹیم 120پر ڈھیر ہوگئی،مین آف دی میچ شاہد آفریدی اور عمرگل نے 4،4وکٹیں حاصل کیں، تینوں باہمی ون ڈے مقابلوں میں بھی پاکستان ٹیم سرخرو ہوئی ہے۔۔#/s#

کوالالمپور (اے پی پی) متھالی راج ٹی ٹونٹی انٹرنیشنل کرکٹ میں 2 ہزار رنز مکمل کرنے والی بھارت کی پہلی کرکٹر بن گئیں۔ انہوں نے جمعرات کو ملائیشیا میں جاری ویمنز ٹی ٹونٹی ایشیا کپ میں سری لنکا ویمن کے خلاف کھیلے گئے میچ میں 33 رنز کی اننگز کھیل کر یہ سنگ میل عبور کیا، متھالی ویمنز ٹی ٹونٹی انٹرنیشنل کرکٹ کی تاریخ میں 2 ہزار رنز کا ہندسہ عبور کرنے والی مجموعی طور پر ساتویں کھلاڑی ہیں، انگلینڈ ویمن ٹیم کی سابق کپتان شارلوٹی ایڈورڈز کو زیادہ رنز بنانے کا عالمی اعزاز حاصل ہے انہوں نے 2605 رنز بنا رکھے ہیں۔

لاہور ( نیوز ایجنسیاں) نجم سیٹھی کے بیرون ملک دورے پی سی بی کی جیب پر بھاری پڑنے لگے۔ چیئرمین نجم سیٹھی 11 جون کو انگلینڈ سے وطن واپس آرہے ہیں، ان کے 31 روزہ بے مقصد دورہ انگلینڈ پر بورڈ نے تقریبا 45 لاکھ روپے خرچ کر ڈالے۔یوں تو چیئرمین پی سی بی کی تنخواہ روپیہ بھی نہیں۔ پھر بھی نجم سیٹھی نے لاکھوں تنخواہ کی پرکشش نوکری چھوڑ کر پی سی بی چیئرمین کا عہدہ سنبھالا۔ بغیر تنخواہ بھی اس عہدے میں کتنے فائدے ہیں یہ سمجھنا عام آدمی کے بس کی بات نہیں۔قومی ٹیم آئرلینڈ پہنچی تو نجم سیٹھی نے بھی وہیں ڈیرے ڈال لیے۔ انگلینڈ کے خلاف ٹیسٹ سیریز ختم بھی ہوگئی، کھلاڑی لوٹ آئے مگر نجم سیٹھی تاحال وہیں موجود ہیں۔ چیئرمین پی سی بی کے بیرون ملک دورے پر ایک دن کا خرچ کتنا ہے اب ذرا یہ بھی سن لیجئے۔ان کی ڈیلی 7500 ہزار ہوٹل کمرے کا خرچ 45000 گاڑی روزانا دو سو پونڈ یعنی 31 ہزار روپے نجم سیٹھی نے 31 روز آئر لینڈ اور انگلینڈ میں گزارے جس پر بورڈ سے 45 لاکھ روپے وصول کیے۔ پی سی بی کا کہنا ہے کہ آئرلینڈ کا دورہ میزبان بورڈ کی دعوت پر کیا۔ انگلینڈ کیوں گئے؟ اس پر بورڈ خاموش ہے۔ سرکاری خرچ پر چیئرمین کے غیر ملکی دورے کی روایت صرف پاکستان میں ہے، دیگر بورڈز میں اسے غیر مناسب سمجھا جاتا ہے۔