قرآن پاک قیامت تک رہنمائی کا وسیلہ بنا کر بھیجا گیا ،علامہ ضیااللہ بخاری قرآن پاک کے علاوہ کوئی بھی آسمانی کتاب اصل حالت میں محفوظ نہیں ،قاری احمد صدیقی چینل ۵کے پروگرام ”مرحبا رمضان “میں علماکرام کی گفتگو حنا نصراللہ نے ہدیہ نعت پیش کیا

لاہور (مانیٹرنگ ڈیسک) قرآن مجید کی اتنی صدیوں سے حفاظت ایک زندہ معجزہ ہے چینل ۵ کے پروگرام مرحبا رمضان“ میں علامہ سید ضیاءاللہ بخاری نے گفتگو کرتے ہوئے کہا کہ اللہ تعالیٰ نے قرآن مجید میں فرمایا بے شک توریت، زبور، انجیل کو ہم نے نازل کیا لیکن اسلام کا نزول آخری کتاب قرآن مجید پر مکمل کیا۔ قرآن مجید کی تدوین کےلئے مختلف صحابہ اکرام نے کاتبین کا کردار ادا کیا۔ اس طرح 23 سال میں اس عظیم کتاب کا نزول مکمل ہوا۔ یہ کتاب تمام انسانوں اور قیامت تک کےلئے ہدایت اور رہنمائی کا وسلیہ بنا کر بھیجی گئی ہے۔ اس میں ہر زمانے کے لیے ہدایت موجود ہے اور ہمیشہ محفوظ رہے گی کیونکہ اس کی حفاظت کا ذمہ اللہ پاک نے خود لیا ہے۔ اس کتاب کو حفظ کرنے کا تحفہ ذہانت کی صورت میں اللہ تعالیٰ نے صرف امت محمدی کو بخشا ہے۔ جس کا ذکر اللہ نے موسیٰؑ سے کیا تھا۔ بے شک حافظ قرآن بے شمار دنیا میں موجود ہیں اور انہیں ایک لفظ بھی نہیں بھولتا۔ یہ قرآن مجید کو اجاگر رکھنے کی نشانیاں ہیں۔ جب بھی قرآن مجید کی کوئی آیت نازل ہوتی اسے لکھ لیا جاتا اور نبی اکرم خود ترتیب دیتے۔ حضرت جبرئیلؑ نے قرآن مجید کے ایک ایک حرف کو نبی اکرم کے دل میں اتار دیا تھا۔ جو آیت سالوں بعد بھی نازل ہوتی آپ کو اس سورہ مبارک کا یاد ہوتا اور ترتیب دے دیتے۔ صاحبزادہ قاری احمد صدیقی نے کہا ہے کہ قرآن مجید اللہ تعالیٰ کا اپنی امت کو بہت خوبصورت تحفہ ہے۔ حضرت محمد پر نازل فرما کر آپ نے ان سے اپنی محبت کا بھی اظہار کیا کہ نبی اکرم کو اللہ پاک نے کتنی فضیلت عطا کی ہے قرآن اور صاحب قرآن مجید کا آپس میں بہت گہرا تعلق ہے۔ رمضان کریم کی رحمتوں کو بھی نزول قرآن مجید کی وجہ سے بڑھا دیا گیا۔ اللہ تعالیٰ نے واضح قرآن مجید میں فرمایا کہ ”اس کتاب کا ذمہ میں نے خود لیا ہے اور اس کے خلاف سازش کرنے والا خود نیست و نابود ہو جائے گا“۔ اور بھی کتابیں اور صحیفے نازل کیے گئے لیکن کوئی بھی اصلی حالت میں موجود نہیں ہے۔ واحد قرآن مجید ہے جس کے زیر، زبر اور پیش میں بھی تبدیلی نہیں کی گئی۔ قرآن مجید کے ایک حرف کو پڑھنے سے دس نیکیوں کے ثواب کا حکم دیا گیا ہے اور رمضان المبارک میں یہی ثواب ستر گنا بڑھا دیا گیا۔ قرآن کریم میں ہر طرح کے مسئلے کا حل موجود ہے اور یہ کتاب صرف مسلمانوں کے لئے نہیں بلکہ تمام انسانوں کے لیے نازل کی گئی ہے۔ حنا نصراللہ نے اپنی خوبصورت آواز میں نبی اکرم کی خدمت اقدس میں نعت مقبول کا ہدیہ پیش کیا اور ایمان کو تازہ کیا:
یارسول اللہ تیرے در کی فضاﺅں کو سلام
گنبد خضری کی ٹھنڈی ٹھنڈی چھاﺅں کو سلام
انہوں نے کہا کہ نبی اکرم کے ذکر سے دل کو سکون ملتا ہے رمضان المبارک کا پھر سے زندگی میں آنا بہت بڑی خوش قسمتی ہے۔