کراچی: جنوری 2024 میں سیمنٹ کی مجموعی فروخت 14.79 فیصد کمی رہی۔

جنوری 2024کے مہینے میں سیمنٹ کی مجموعی فروخت 14.79 فیصد کمی سے 3.414 ملین ٹن رہی جبکہ گزشتہ سال جنوری میں سیمنٹ کی مجموعی فروخت 4.006ملین ٹن رہی تھی۔

آل پاکستان سیمنٹ مینوفیکچررز ایسوسی ایشن کے اعدادوشمار کے مطابق جنوری 2024میں سیمنٹ کی مقامی فروخت 2.967 ملین ٹن رہی جو جنوری 2023 کی فروخت 3.588ملین ٹن سے 17.30 فیصد تک کم رہی۔

جنوری 2024میں سیمنٹ کی ایکسپورٹ 4لاکھ 46 ہزار 595 ٹن رہی جو گزشتہ سال جنوری کی ایکسپورٹ 4 لاکھ 18 ہزار 67ٹن کے مقابلے میں 6.82فیصد زائد رہی۔

پی ٹی آئی رہنما اور سابق وزیراعلیٰ پنجاب چوہدری پرویز الہیٰ کے صاحبزادے مونس الہیٰ کا کہنا ہے کہ کل ہی وطن واپس آنے کو تیار ہوں، لیکن گارنٹی چاہیئے کہ غائب نہیں کیا جائے گا۔عمران خان کی کبھی خواہش نہیں تھی کہ اسٹیبلشمنٹ سے تعلقات خراب ہوں۔

ہسپانوی شہر بارسلونا میں جرمن نشریاتی ادارے کو خصوصی انٹرویو میں انہوں نے سائفر اور توشہ خانہ کیسز کے فیصلوں، آئندہ انتخابات اور دیگر اہم معاملات کے بارے میں بات چیت کی ۔

حالیہ فیصلوں کے تناظرمیں عدلیہ پر اعتماد سے متعلق سوال کے جواب میں مونس الہیٰ کا کہنا تھا کہ جوڈیشری پر اعتماد ضرور ہے لیکن وہ کیا کریں، والد صاحب (پرویز الہیٰ) کے لیس میں انہیں ضمانت دی جاتی ہے اور انہیں پھر گرفتارکرلیا جاتا ہے۔

انہوں نے کہا کہ ، ’عمران خان کی کبھی خواہش نہیں تھی کہ اسٹیبلشمنٹ سے تعلقات خراب ہوں، انہوں نے مجھ سے کہا تھا کہ، ’میری اپنی فوج ہے میں کیوں چاہوں گا کہ ان سے لڑائی ہو۔‘

مونس الہیٰ کے مطابق ، ’فوج سے تعلقات خراب ہوئے تو مصالحت کی کوشش کی تھی، ابھی بھی کوشش کرنے کوتیارہیں ، دونوں جانب اچھے لوگ موجود ہیں جن کی خواہش ہے کہ معاملات سیٹل ہوں اور ملک آگے بڑھے۔ اس وقت پورا نظام اس چیزمیں لگا ہے کہ کسی طرح ن لیگ کی حکومت بنائیں۔‘

انہوں نے کہا کہ 8 فروری کو سارے لوگ باہر نکل کرووٹ کاسٹ کریں،، ووٹ کاسٹ ہوگیا تو کوئی پی ٹی آئی کو نہیں روک سکے گا۔

مقدمات کا سامنا کرنے کے بجائے ملک سے باہر ہونے سے متعلق سوال کے جواب میں مونس الہیٰ نے کہا کہ، ’میں تو کل جانے کو تیار ہوں، صبح، صرف مجھے اتنی گارنٹی مل جائے کہ مجھے غائب نہیں کیا جائے گا۔ مجھے اگر وزیبل (ظاہر) رکھیں۔۔ ایف آئی اے، نیب، پولیس، اینٹی کرپشن ان کا تو کا کوئی مسئلہ نہیں۔‘

انہوں نے کہا کہ مسئلہ گرفتاری کا نہیں ہے، 2011 میں ملک سے باہر تھا تو اس وقت تب مجھ پرکیس بنا،واپس آکر گرفتاری دی اورعدالت سے بری ہوا، مسئلہ یہ ہے کہ یہاں لوگوں کو غائب کردیا جاتا ہے۔

کس سے گارنٹی چاہیئے؟ اس سوال کے جواب میں مونس کا کہنا تھا کہ ’گارنٹی۔۔ جو گارنٹی دینے والے ہوتے ہیں۔‘ انہوں نے کہا کہ حلقے کی سیاست کرنے والے سیاستدان ان تمام معاملات سے واقف ہوتے ہیں۔

مونس الہیٰ کا مزید کہنا تھا کہ خواہش ہے والد صاحب اور چوہدری شجاعت کے درمیان معاملات ٹھیک ہوجائیں، والد صاحب نے اسٹینڈ کیا ہے جو نظریاتی ہے اور وہ اس ہپر قائم ہیں، وہ کہتے ہیں یہ جو مرضہ ہے کرلیں، میں نے عمران خان کا ساتھ نہیں چھوڑنا۔

سائفر اور توشہ کیس کے فیصلوں سے متعلق بات کرتے ہوئے مونس الہیٰ نے کہا کہ سائفر کیسے جیسے چلا ، دنیا میں کہیں ایسا نہیں ہوتا کہ اپنی صفائی پیش کرنے کا موقع ہی نہ دیا جائے، توشلہ خانہ میں بھی جس اسپیڈ سے فیصلے سنائے گئے ، یہی ظاہرہوتا ہے کہ ان سب کو اتنا ڈر لگا ہوا ہے کہ اگر یہ فیصلے نہ آئے تو 8 فروری کو پتہ نہیں کیاہوگا،

انہوں نے کہا کہ عمران خان نے توشہ خانہ سے چیزیں لینےکے تمام تقاضے پورے کیے تھے، جیولری خان صاحب کی ملکیت بن گئی تو ان کی مرضی ہے کہ وہ رکھیں یا سمندر میں پھینک دیں، اس میں کسی کو حق نہیں پہنچتا۔ دوسری جانب نواز شریف اور مریم نے توشہ خانہ سے بیشمار تحائف اٹھائے لیکن ان سے کسی نے نہیں پوچھا، یہ کیسے ہوسکتا ہے کہ ایک قانون عمران خان اور بشریٰ بی بی پر لاگو ہوسکتا ہے لیکن اور کسی پر لاگو نہیں ہوگا۔

کراچی: ایم کیو ایم پاکستان رہنما خواجہ اظہار الحسن نے کہا ہے کہ اگر شہر گولیاں چل رہی ہیں تو شہر میں اسلحہ موجود ہے۔

ایم کیو ایم پاکستان کے رہنما اورامیدوار قومی اسمبلی حلقہ این اے 247 خواجہ اظہارالحسن نے کہا ہے کہ شہر میں انتخابی مہم شروع ہوتے ہی ہمارے سات کارکان شہید کر دیئے گئے تاہم اگر شہر گولیاں چل رہی ہیں تو شہر میں اسلحہ موجود ہے۔

ایم کیو ایم پاکستان کے رہنما اورامیدوار قومی اسمبلی حلقہ این اے 247 خواجہ اظہارالحسن نے دیگر امیدواران کے ہمراہ پریس کانفرنس کرتے ہوئے کہا کہ عمومی طور تو پورے صوبے سکھر، حیدرآباد اور میرپور خاص سے یہ شکایات موصول ہو رہی ہیں کہ شرپسند دہشت گرد پیپلزپارٹی کا پرچم لیکرہمارے پرچم اتارکراپنے پرچم لگا رہے ہیں ہمارے امیدواروں کی جانب سے شکایات الیکشن کمیشن کوبھیجی جا رہی ہیں۔

انھوں نے کہا کہ آج بھی نیوکراچی سیکٹر الیون جی میں ہماری کارنر میٹنگ پہلے سے شیڈیول تھی اورہماری میٹنگ سے قبل پیپلز پارٹی کے کارکان نے آکر ہمارے پرچم اتارنا شروع کر دیے جس پرہمارے ایک ہمدرد نے انہیں روکنے کی کوشش کی تواسے دھمکی دی گئیں اس سے تلخ کلامی کی گئی جس پرہمارے صوبائی امیدوارعبدالباسط ہمارے ہمدرد شاہد کولیکرنیو کراچی تھانے پہنچ گئے تاکہ شکایات درج کرائیں جائے۔

خواجہ اظہار نے کہا کہ ہمارے امیدوارعبدالباسط بھانپ گئے تھے کہ ہماری میٹنگ سے قبل وہاں کوئی شرپسندی ہونے والی ہے اس لیے قانون نافذ کرنے والے اداروں کا سہارا لیا جائے جس طرح ایک پرامن شہری لیتا ہے ابھی تھانے میں شکایت درج کرائی ہی جا رہی تھی کہ تھانے اطلاع موصول ہوئی کہ نیو کراچی میں فائرنگ ہوگئی ہے فائرنگ سے 11 سالہ بچہ عبدالرحمن شدید زخمی ہوا جو اس وقت کومے میں ہے اورایک اورنوجوان زخمی ہوا، پولیس نے ہمارے امیدوار کی شکایت کوایک طرف رکھا اور سب اس معاملے کے لیے تھانے سے نکل پڑے۔

انھوں نے کہا کہ فائرنگ سے زخمی ہونے والا بچہ کسی سیاسی جماعت کا کارکن نہیں سب سے پہلے اپنے والدین کا لخت جگر ہے اوراس کے بعد اس شہر کا بیٹا ہے کسی جماعت کا کارکن ہونا واجب القتل نہیں ہوتا۔

خواجہ اظہار نے کہا کہ شہر میں انتخابی مہم شروع ہوتے ہی ہمارے سات کارکان شہید کر دیئے گئے ہمارے کارکان پہلے شہر بیٹے اور بعد میں ہمارے کارکن تھے،زخمی بچے کے والدین نے بیان دیا ہےکہ ان کا بیٹا کسی جماعت کا کارکن نہیں ہے زخمی بچہ ہمارا کارکن نہیں ہمدرد تھا۔

انھوں نے کہا کہ پورے واقعے کی عینی شاہد جو کہ شکایت درج کرانے تھانے گئے اسے ہی تھانے میں بند کردیا گیا، یہ کون سی پولیس اور کونسا کلچر ہے یہ اندرون سندھ کی راج دھانی نہیں جو تماری شکایت کرنے جائے اس کا پانی بند کردو، اس کی فصلیں اجاڑدو جس طرح پورے سندھ میں کرتے ہو، یہ کراچی شہر ہے۔

رہنما ایم کیو ایم کا کہنا تھا کہ پولیس کے رویے پر بہت افسوس ہے جوشکایت کرنے لگا اسے ہی بند کردیا گیا ابھی فائرنگ نہیں ہوئی تھی اس کا کیا مطلب ہے کہ آئندہ پولیس کو کوئی شکایات نہ کی جائے آئندہ پولیس افسران سے توقع نہ کی جائے ؟ ہم یہ سوچ لیں کہ کراچی پولیس کسی ایک جماعت کی ملازم ہوچکی ہے یقیناً اعلیٰ عہدوں پر بیٹھے پولیس افسران اس بات کی حساسیت کو سمجھ رہے ہوں گے اپنی وردی کا پاس رکھتے ہوئے قاتلوں کو عبرت کا نشان بنائیں۔

انھوں نے کہا کہ الیکشن کمیشن کی آئینی ذمہ داری ہے کہ اگر اسے پولیس متنازع نظر آتی ہے تو پولیس میں ٹرانسفر کرے ،ہٹا دیں ایسے افسران کو جو کسی سیاسی جماعت کی غلامی کر رہے ہیں ، انھوں نے کہا رینجرز یا فوج کو بلانا ہے تو انہیں بلائے، انھوں نے کہا کہ ایم کیو ایم کے کارکان عدم تشدد پرگامزن ہیں اور شہید بھی وہ ہی ہو رہے ہیں اور پولیس کہتی ہے اسلحہ بھی نہیں ہے، اگر گولیاں چل رہی ہیں تو شہر میں اسلحہ موجود ہے شہرمیں مسلح جھتے اسلحہ لیکرایم کیو ایم کے کارکان کا قتل کر رہے ہیں۔

انھوں نے کہا میں پاکستان رینجرز ، ریاستی ادارے اورآئی جی سندھ سے پوچھنا چاہتا ہوں کہ شہرمیں اسلحہ موجود ہے آپ کو سبوت بھی مل گیا ہے ایم کیو ایم کے سات کارکان شہید ہے یعینی گولی صرف ایک طرف سے چل رہی ہے ہمارے طرف تو ڈنڈا بھی نہیں چل رہا، ایم کیو ایم عدم تشدد اورعدم تصادم کی پالیسی جاری رکھیں گے لیکن ہمارے امن پسند پالیسی کو ہماری کمزوری نہ سمجھا جائے یہ پیغام دیا گیا کہ پاکستان پیپلز پارٹی کے خلاف کوئی بھی شکایت درج کرائے گا اسے اندر کردیا جائے گا۔

کراچی: پاکستان پیپلزپارٹی کے رہنما سعید غنی نے ایم کیوایم رہنماؤں کی پریس کانفرنس درعمل دیتے ہوئے کہا ہے کہ ڈسٹرکٹ سینڑل میں نیوکراچی کے مقام پرایک افسوسناک واقعہ ہوا ہے جس کی عدالتی تحقیقات کرائی جائے۔

پاکستان پیپلزپارٹی کے رہنما سعید غنی نے ایم کیوایم رہنماؤں کی پریس کانفرنس درعمل دیتے ہوئے ایک ویڈیو بیان میں کہا کہ ڈسٹرکٹ سینڑل میں نیوکراچی کے مقام پرایک افسوسناک واقعہ ہوا ہے پیپلز پارٹی کے قومی اسمبلی این اے 247 کے امیدوار اپنی کارنر میٹینگ کر رہے تھے تواچانک منتظمین کی جانب انہیں بتایا کہ آپ فوراً یہاں سے چلے جائیں کیوں کہ انھوں نے کچھ ایسی موومنٹ دیکھی تھی کہ کچھ خطرہ ہے امیدوارکو میٹنگ سے نکال کرگاڑی میں بیٹھایا گیا اورامیدوار کچھے فاصلے تک پہ پہنچے تھے کہ انہیں اطلاع موصول ہوئی کہ کارنرمیٹنگ کے مقام پر فائرنگ ہوئی ہے جس کے نتیجے میں 11 سالہ بچہ عبدالرحمن جو کہ میٹنگ میں اپنی فیملی کے ساتھ موجود تھا ایک اور شخص جن کا نام بھی عبدالرحمن وہ بھی زخمی ہوا۔

سعید غنی کا کہنا ہے کہ یہ افسوسناک واقعہ ان واقعات کا تسلسل ہے جو گزشتہ کئی روز سے ڈسٹرکٹ سینٹرل میں ہو رہے ہیں پاکستان پیپلز پارٹی پردفتر پر حملہ ہوکارکان کو حراساں کرنا ہو، پیپلز پارٹی کے جھنڈے اور بینرز اتارنے کی بات ہویہ تسلسل کے ساتھ واقعات ہو رہے ہیں انھوں نے کہا کہ چند روز قبل ناظم آباد میں ایک واقعہ ہوا جس میں ایم کیو ایم کا ایک کارکن ہلاک ہوا اور تین پیپلز پارٹی کے کارکن زخمی ہوئے اس واقعے کا بھی ہم نے مطالبہ کیا تھا کہ عدالتی تحقیقات کرائی جائے ہائیکورٹ کے جج سے تحقیقات کرائی جائے لیکن اس پر کچھ نہ ہوا۔

انھوں نے کہا کہ پاکستان پیپلز پارٹی کے تین کارکان زخمی ہوئے ہمارے امیدوار کی دو گاڑیاں جلیں اس کی ایف آئی آر آج تک پولیس نے نہیں کاٹی اور اب ایک اورواقعہ ہو گیا ہے انھوں نے کہا کہ میں یہ سمجھا ہوں کہ پولیس ان واقعات پر بروقت ایکشن لے لیتی تو شاید ہم ان واقعات سے بچ سکتے تھے ملوث افراد کے خلاف پولیس کارروائی کر لیتی شاید ان واقعات سے بچا جاسکتا تھا۔

سعید غنی نے کہا کہ شہر میں جو صورتحال پیدا ہو رہی ہے وہ شہر کے امن امان کے لیے بہتر نہیں ہے پرامن انتخابات بنانے کے راستے میں یہ سب سے بڑی رکاوٹ بن رہے ہیں انھوں نے کہا کہ ہمیں شہر سے اور بھی ایسی اطلاعات موصول ہو رہی ہیں کہ ہماری کارنر میٹنگز اور انتخابی سرگرمیوں کے راستے میں رکاوٹیں ڈالی جا رہی ہیں ہماری کارکان پرتشدد کیا جا رہا ہے اورانہیں الیکشن مہم چلانے سے روکا جا رہا ہے۔

انھوں نے کہا کہ وہ الیکشن کمیشن آف پاکستان، نگراں حکومت اور قانون نافذ کرنے والے اداروں سے یہ مطالبہ کرنا چاہتا ہوں کہ ان واقعات کو روکیں اور ان واقعات میں ملوث افراد کے خلاف سخت قانونی کارروائی کریں اگر یہ سلسلہ اسی طرح چلتا رہا تو مجھے ڈر ہے کہ یہ آگ پورے شہر میں نہ پھیل جائے کسی بھی طور سیاسی عمل کے لیے بہتر ہوگا نہ ہی انتخابات کو پر امن بنانے کی کوششوں کے لیے بہتر ہو گا۔

پی پی رہنما نے کہا کہ جو صورتحال پیدا کی جا رہی ہے اس سے ان طاقتوں کو فائدہ ہوگا جنہیں انتخابات میں اپنی شکست نظر آرہی ہے جو یہ چاہتے ہیں کہ انتخابات متنازع ہوجائیں، انھوں نے کہا کہ ایک مرتبہ پھر اپیل کروں گا کہ شہر میں امن امان برقرار رکھنے کے لیے ملوث افراد کے خلاف کارروائی کی جائے اور خاص کر ناظم آباد واقعے کی تمام ویڈیوز کو دیکھا جائے اور ہائیکورٹ کے جج سے تحقیقات کرائی جائے۔

ملک کے مختلف شہروں میں غیرقانونی طور پر مقیم افغان باشندوں کی وطن واپسی کا سلسلہ بدستور جاری ہے۔

سرکاری اعداد وشمار کے مطابق 30 جنوری سے 2 فروری تک مزید 2 ہزار 956 غیر قانونی افغان باشندے اپنے ملک چلے گئے۔

وطن واپس جانے والے افغان شہریوں میں 865 مرد، 793 خواتین اور 1298 سے زائد بچے شامل ہیں۔

افغانستان روانگی کے لیے 121 گاڑیوں میں 148 خاندانوں کی اپنے وطن واپسی عمل میں لائی گئی ہے۔

یاد رہے کہ حکومت پاکستان کے اعلان سے قبل بھی غیر قانونی افغان باشندوں کی کثیر تعداد گرفتاری کے ڈر سے پاکستان سے واپس افغانستان جاتی رہی ہے تاہم 2 فروری کو سرکاری اعداد وشمار کے مطابق مجموعی طور پر 4 لاکھ 81 ہزار سے زائد افغان باشندے ملک واپس لوٹ گئے ہیں۔

واضح رہے کہ ملک بھر کی طرح کراچی میں بھی غیر قانونی طور پر مقیم افراد کی بڑی تعداد موجود تھی، غیر قانونی غیر ملکیوں کی وجہ سے کراچی میں اسمگلنگ اور بھتہ خوری بہت عام تھی تاہم قابل اطمینان امر یہ ہے کہ حکومت پاکستان اور عسکری قیادت کی مشترکہ کاوشوں سے ملک سے غیر قانونی افراد کا انخلاء جاری ہے۔