آرکیالوجیکل سروے آف انڈیا نے ایک رپورٹ میں دعویٰ کیا ہے کہ اتر پردیش کے شہر متھرا میں جہاں اس وقت شاہی عیدگاہ قائم ہے وہاں ایک مندر تھا۔ یہ رپورٹ انتہا پسند ہندوؤں کی طرف سے دائر کی جانے والی ایک درخواست کے جواب میں جاری کی گئی ہے۔

ہندو تنظیم شری کرشنا جنم بھومی مکتی نیاس کے سربراہ نے کہا ہے کہ وہ الٰہ آباد ہائی کورٹ اور سپریم کورٹ میں ثبوت فراہم کریں گے کہ یہ مسجد مندر کو توڑ کر بنائی گئی تھی۔

ہندوؤں کے عقیدے کے مطابق متھرا میں وشنو کے اوتار کرشنا کی پیدائش ہوئی تھی۔ ہندوؤں کی قدیم داستانوں میں درج ہے کہ شری کرشنا کے پڑ پوتوں ورج اور ورج نبھا نے پانچ ہزار سال قبل متھرا میں مندر تعمیر کیا تھا۔

شری کرشنا جنم بھومی مکتی نیاس کے سربراہ کا دعویٰ ہے کہ مغل شہنشاہ اورنگ زیب عالمگیر نے 1670 میں متھرا کا مشہورِ زمانہ مندر گرانے کا حکم دیا تھا جس کے بعد وہاں شاہی عیدگاہ تعمیر کی گئی۔

واضح رہے کہ متھرا کی عیدگاہ کی تاریخی حیثیت کے تعین سے متعلق مقدمے کی سماعت 22 فروری کو ہونی ہے۔

بیونس آئرس: ارجنٹائن نے اسرائیل میں اپنے ملک کے سفارت خانے کو تل ابیب سے یروشلم منتقل کرنے کا فیصلہ کرلیا۔

عالمی خبر رساں ادارے کے مطابق ارجنٹائن کے صدر جیویر ملے غزہ جنگ میں حمایت کا یقین دلانے کے لیے اسرائیل کے دورے پر پہنچ گئے جہاں وہ وزیراعظم نیتن یاہو سے ملاقات کریں گے۔

ارجنٹائن کے صدر نے اسرائیل پہنچنے پر اعلان کیا کہ انھوں نے ملکی سفارت خانہ تل ابیب سے یروشلم منتقل کرنے کا فیصلہ کیا ہے۔

اگر ایسا ہوجاتا ہے تو اس کا مطلب یہ ہوگا کہ ارجنٹائن نے امریکا کی طرح اسرائیل کے یروشلم کے دارالحکومت ہونے کے متنازع دعوے کو تسلیم کرلیا۔

خیال رہے کہ اسرائیل یروشلم کو اپنا دارالحکومت کہتا آیا ہے تاہم عالمی سطح پر یہ ایک متنازع معاملہ ہے اسی لیے تمام ممالک نے اپنے سفارت خانے یروشلم کے بجائے تل ابیب میں کھولے ہوئے ہیں۔

سابق امریکی صدر ڈونلڈ ٹرمپ نے پہلی بار باضابطہ طور پر یروشلم کو اسرائیل کا دارالحکومت تسلیم کرکے امریکی سفارت خانہ تل ابیب سے یروشلم منتقل کیا تھا جس کی پیروی میں چند ایک ممالک نے بھی ایسا ہی کیا۔

تاہم اب بھی ممالک کی اکثریت تل ابیب کو ہی اسرائیل کا دارالحکومت مانتی ہے اور اپنے سفارت خانوں کی تل ابیب سے یروشلم منتقلی کے حق میں نہیں ہیں۔

یاد رہے کہ گزشتہ برس نومبر میں ارجنٹائن کی وزیر خارجہ ڈیانا مونڈینو نے کہا تھا کہ ان کا ملک اپنا سفارت خانہ تل ابیب سے یروشلم منتقل کر سکتا ہے تاہم اس پر عمل درآمد میں سیکیورٹی وجوہات کی بنا پر تاخیر ہوسکتی ہے۔

واشنگٹن: امریکا میں بھارتی نژاد طالب علم 23 سالہ سمیر ایک پارک میں پُراسرار طور پر مردہ حالت میں پایا گیا۔

عالمی خبر رساں ادارے کے مطابق امریکا کی وارین کاؤنٹی کورونر کے دفتر سے جاری بیان میں تصدیق کی گئی ہے کہ انڈیانا کی پرڈیو یونیورسٹی سے پی ایچ ڈی کرنے والا بھارتی طالب علم کی لاش نیچر ریزرو پارک سے ملی ہے۔

بیان میں کہا گیا ہے کہ بھارتی نژاد 23 سالہ سمیر کامتھ نے اگست 2023 میں مکینیکل انجینئرنگ میں ماسٹر ڈگری مکمل کی تھی اور 2025 میں اپنا ڈاکٹریٹ پروگرام مکمل کرنے والا تھا۔

امریکی حکام کا کہنا ہے کہ لاش کو پوسٹ مارٹم کے لیے فرانزک لیب بھیجا گیا ہے جس کی رپورٹ کی روشنی میں تفتیش کو آگے بڑھایا جائے گا۔

یہ واقعہ پرڈیو یونیورسٹی میں ہی زیر تعلیم بھارتی نژاد ایک اور طالب علم انیل اچاریہ کے مردہ پائے جانے کے چند دن بعد پیش آیا ہے۔ انیل اچاریہ کی لاش کیمپس گراؤنڈ سے ملی تھی۔

اسی طرح پچھلے ہفتے ہی ایک اور بھارتی طالب علم 19 سالہ شریاس ریڈی ریاست اوہائیو میں پُراسرار حالت میں مردہ پایا گیا تھا۔

ایک اور واقعے میں ریاست جارجیا کی لیتھونیا یونی ورسٹی سے ایم بی اے کرنے والے بھارتی طالب علم وویک سینی 16 جنوری کو ایک بے گھر شخص کے حملے میں ہلاک ہوگئے تھے۔

اسی طرح ایک اور بھارتی طالب علم اکول دھون گزشتہ ماہ جنوری میں یونیورسٹی آف الینوائے اربانا کے باہر مردہ پایا گیا تھا۔

یاد رہے کہ امریکا میں 30 لاکھ سے زائد بھارتی طلبا موجود ہیں۔ ماہرین کا کہنا ہے کہ ذہنی تناؤ، تنہائی اور نشہ آور اشیاء کا استعمال بہت سے واقعات میں جان لیوا ثابت ہوتا ہے۔