اسلام آباد: (ویب ڈیسک) سپریم کورٹ نے تحریک انصاف کے منحرف اراکین اسمبلی کی الیکشن کمیشن کے فیصلے کیخلاف درخواستیں سماعت کیلئے مقررکر دیں۔
درخواستوں پر چیف جسٹس عمر عطا بندیال کی سربراہی میں تین رکنی بنچ پانچ جولائی کو سماعت کرے گا ،بنچ میں جسٹس محمد علی مظہر اورجسٹس امین الدین خان شامل ہیں۔
واضح رہے کہ الیکشن کمیشن نے پنجاب سے تحریک انصاف کے منحرف اراکین کو ڈی سیٹ کیا تھا، منحرف اراکین نے الیکشن کمیشن کے فیصلے کیخلاف سپریم کورٹ سے رجوع کر رکھا ہے۔

چین : (ویب ڈیسک) چین نے بھارت کی جانب سے مقبوضہ کشمیر میں جی ٹوئنٹی اجلاس کرانے کی مخالفت کردی.
چینی وزارت خارجہ کا کہنا ہے کہ مسئلہ کشمیر پر چین کا موقف مستقل اور واضح ہے، مسئلہ کشمیر اقوام متحدہ کی سلامتی کونسل کی قراردادوں کے مطابق حل ہونا چاہیے، متعلقہ فریقین کو مسئلہ پیچیدہ بنانے والے اقدامات سے گریز کرنا چاہیے، علاقائی امن و استحکام کے لیے تنازعات کو بات چیت اور مشاورت سےحل کرنا چاہیے۔
ان کا کہنا تھا کہ تمام بڑی معیشتیں عالمی معاشی نظم و نسق کو بہتر بنانے میں مثبت کردار ادا کریں، چینی ترجمان کے مطابق چین اس اجلاس میں شرکت کرنے کے معاملے کو دیکھے گا۔
پاکستان پہلے ہی مقبوضہ جموں و کشمیر میں جی ٹوئنٹی اجلاس کرانے کی بھارتی کوشش کو مسترد کر چکا ہے۔
خیال رہے کہ بھارت کی جانب سے اگلے سال جی ٹوئنٹی اجلاس جموں و کشمیر میں کرانے کا کہا گیا تھا۔

اسلام آباد: (ویب ڈیسک) امریکی کانگریس رہنما ال گرین کی جانب سے پاکستانی سفیر مسعود خان کی خدمات کا اعتراف کرتے ہوئے خصوصی سرٹیفیکیٹ پیش کیا گیا۔
پاکستانی سفیرکو ال گرین کی جانب سے کانگریس کے خصوصی اعترافی سرٹیفیکیٹ سے نوازا گیا، مسعود خان کو پاک امریکہ معاشی تعلقات اور تجارت کے فروغ کے اعتراف میں سر ٹیفکیٹ دیا گیا۔
کانگریس رہنما کا کہنا تھا کہ معاشی تعلقات اور ٹریڈ پر مبنی سفارت کاری کے حوالے سے آپ کے عزم کو سلوٹ کرتا ہوں، پاکستانی سفیر مسعود خان کی جانب سے بھی کانگریس رہنما ال گرین کا شکریہ ادا کیا گیا۔
پاکستانی سفیر مسعود خان نے کہا کہ پاک امریکہ تعلقات کو مضبوط بنانے میں کانگریس کا کلیدی کردار ہے۔

اسلام آباد: (ویب ڈیسک) تحریک انصاف نے لاہور ہائیکورٹ کے فیصلے کو چیلنج کرنے کیلئے سپریم کورٹ میں درخواست دائر کر دی۔
درخواست میں سپریم کورٹ سے وزیراعلی پنجاب کے انتخاب سے متعلق لاہور لائیکورٹ کے فیصلے کو غیر قانونی و غیر آئینی قرار دیکر مسترد کرنے کی استدعا کی گئی ہے، درخواست میں موقف اختیار کیا گیا ہے کہ فریقین کو صاف اور شفاف الیکشن کا آئینی حق حاصل ہے، پٹیشن کے فیصلے تک وزیرِ اعلیٰ پنجاب کا الیکشن روک دیا جائے۔
سابق وزیراعظم عمران خان نے گذشتہ روز ہی سپریم کورٹ جانے کا اعلان کر دیا تھا، ان کا کہنا تھا کہ حمزہ شریف کس قانون کے تحت وزیر اعلی’ رہ سکتا ہے، ہم اس کی وضاحت لینے سپریم کورٹ جا رہے ہیں اور سپریم کورٹ سے اپیل ہے کہ وہ وزیراعلی الیکشن پر حکم امتناع دے کیونکہ ہمارے 6 ممبر حج ادائیگی کے لیے سعودی عرب گئے ہوئے ہیں۔ حمزہ شہباز کو ہوتے ہوئے الیکشن کیسے شفاف ہوسکتے ہیں، لاہور ہائیکورٹ کے فیصلے نے ثابت کیا کہ حمزہ شہباز غیر آئینی وزہراعلی تھے۔۔
واضح رہے کہ لاہور ہائیکورٹ نے گذشتہ روز وزیراعلی پنجاب کے الیکشن کے خلاف تحریک انصاف کی درخواستیں منظور کر کے منحرف ارکان کے 25 ووٹ نکال کر دوبارہ گنتی کا حکم دیا تھا۔

اسلام آباد: (ویب ڈیسک) مون سون کا سلسلہ رنگ جمانے لگا،لاہور سمیت مختلف شہروں میں بارش سے موسم خوشگوار ہوگیا۔
مون سون سے موسم تبدیل، لاہور، گوجرانوالہ، گجرات اور دیگر علاقوں میں بادل برس پڑے، ٹھنڈی ہواؤں نے موسم خوشگوار بنا دیا۔
اسلام آباد، راولپنڈی میں بھی ابر رحمت برسا، محکمہ موسمیات کےمطابق آج خیبر پختونخوا، سندھ اور بلوچستان کے مختلف علاقوں میں بھی گرج چمک کے ساتھ بارش کا امکان ہے۔
مری اور گلیات میں بھی پری مون بارشوں کا نیا سپل شروع ہو گیا، بارش سے موسم خوشگوار ہونے پر سیاح انجوائے کرنے لگے، ایوبیہ نتھیا گلی چھانگلہ گلی اور باڑیاں میں دھند کے باعث حد نگاہ محدود ہو گئی۔
گہری دھند کے باعث گاڑیاں ڈرائیو کرنے میں مشکلات کا سامنا ہے، بارش کے باعث لینڈ سلائیڈنگ اور درخت گرنے کے واقعات رونما ہو سکتے ہیں۔
این ڈی ایم اے نے بارش میں اتنظامی اداروں کو الرٹ رہنے کے احکامات جاری کردیئے، بارشوں کا سلسلہ ایک ہفتے تک جاری رہ سکتا ہے۔

کراچی: (ویب ڈیسک) کراچی میں پیپلزبس سروس کے دوسرے روٹ کا افتتاح کر دیا گیا، روٹ ٹو پر جدید ترین بسیں نیو کراچی سے کورنگی تک چلیں گی۔
کراچی میں پیپلز بس سروس کے دوسرے روٹ کا افتتاح ڈپٹی کمشنر سینٹرل نے کیا، نیو کراچی سے کورنگی تک 30 بسیں چلیں گی، آج 10 بسوں سے آغاز کر دیا گیا۔روٹ نیو کراچی، ناگن چورنگی، گلشن چورنگی، راشد منہاس روڈ پر مشتمل ہو گا۔ شاہ فیصل کالونی، کورنگی سے ہوتی ہوئی کورنگی انڈس ہسپتال تک جائے گی۔
مذکورہ روٹ 32.9 کلو میٹر پر محیط ہے، کراچی میں مرحلہ وار 7 روٹس پر 240 بسیں چلیں گی۔

لاہور: (ویب ڈیسک) وزیراعلی پنجاب کے انتخاب کے لئے صوبائی اسمبلی کااجلاس آج ہوگا، پنجاب اسمبلی سیکرٹریٹ کی جانب سے شیڈول اورایجنڈا جاری کر دیا گیا۔
پنجاب اسمبلی کا اجلاس آج اسمبلی ہال میں شام 4 بجے ہوگا، اجلاس کی صدارت ڈپٹی اسپیکر سردار دوست مزاری کریں گے، ہائیکورٹ کے حکم کے مطابق 40 واں اجلاس ہوگا، اجلاس میں وزیراعلی کے انتخاب کے عمل کومکمل کیا جائے گا۔
وزیراعلی پنجاب کے لئے مسلم لیگ ن اور اتحادیوں کے امیدوار حمزہ شہباز ہوں گے جبکہ تحریک انصاف اور مسلم لیگ ق کے امیدوار چوہدری پرویزالہی ہوں گے، وزیر اعلیٰ پنجاب کے فری اینڈ فیئر الیکشن کے انعقاد کے لیے اسمبلی سیکرٹریٹ نے ضابطہ اخلاق جاری کردیا، اراکین اسمبلی اور اسمبلی سٹاف کے مہمانوں پر مکمل پابندی ہو گی۔
سیکرٹری اسمبلی کے مطابق سپیکر باکس، آفیسر باکس اور مہمانوں کی گیلریز بند ہوں گی، میڈیا پریس گیلری کے ذریعے وزیر اعلیٰ پنجاب کے الیکشن کی کوریج کریں گے، ایوان میں موبائل فون لے جانے پر پابندی ہو گی۔

لاہور: (ویب ڈیسک) کورونا کی نئی لہر سے کیسز میں اضافہ ہونے لگا، چھ سو چورانوے نئے مریض سامنے آگئے۔
ملک بھر میں کورونا مثبت کیسز کی مجموعی شرح تین اعشاریہ نو تین فیصد تک پہنچ گئی، گزشتہ چوبیس گھنٹے کے دوران 694 نئے مریض رجسٹرڈ ہوئے۔
کورونا کے سترہ ہزار سے زائد ٹیسٹ کئے گئے، موذی مرض سے متاثر ایک سو ایک مریضوں کی حالت تشویشناک ہے۔