اسلام آباد: (ویب ڈیسک) وزیر اعظم شہباز شریف نے کہا ہے کہ ملک کو ہر لحاظ سے آگے لے کر جانا ہے۔
وزیر اعظم شہباز شریف نے تقریب سے خطاب کرتے ہوئے کہا کہ نوجوانوں کو قابل بنانے کے لیے ہماری کاوشیں جاری ہیں اور جدید دور سے ہم آہنگ ہونے کے لیے اقدامات کر رہے ہیں۔
انہوں نے کہا کہ جدید علوم عصر حاضر کی ضرورت ہے کیونکہ تعلیم، تحقیق اور مباحثے سے ہی قومیں آگے بڑھتی ہیں۔
شہباز شریف نے کہا کہ ملک کو ہر لحاظ سے آگے لے کر جانا ہے اور انوویشن ہب کو ذاتی طور پر پروموٹ کروں گا۔

لاہور: (ویب ڈیسک) وزیر اعظم شہباز شریف سے آرمی چیف جنرل قمر جاوید باجوہ کی ملاقات ہوئی ہے۔
ذرائع کا کہنا ہے کہ ملاقات میں ملکی سیکیورٹی کی صورتحال پر گفتگو ہوئی، ملاقات میں پاک فوج کے پیشہ وارانہ امور پربھی گفتگو کی گئی۔
ملاقات میں وزیراعظم نے آرمی چیف کو سعودی اعلی سول ایوارڈ ملنے پر مبارکباد دی۔

لاہور: (ویب ڈیسک) وفاقی وزیر شیری رحمان کا کہنا ہے کہ برف پگھلنے کی وجہ سے پہاڑی ندی نالوں میں پانی کی سطح میں مسلسل اضافہ ہو رہا ہے، گلگت بلتستان کے بالائی علاقوں میں انتظامیہ الرٹ رہے۔
وزیر موسمیاتی تبدیلی نے گلگت بلتستان میں موسم کی تبدیلی پر انتظامیہ کو الرٹ رہنے کی ہدایت کی ہے۔ شیری رحمان کا کہنا ہے کہ ندی نالوں میں پانی کی سطح میں مسلسل اضافہ ہو رہا ہے۔
انہوں نے ہدایت کی کہ ڈی ڈی ایم اے صورتحال پر نظر رکھے، بروقت ٹیم ورک سے جانوں کے ضیاع کو روکا جاسکتا ہے۔

اسلام آباد: (ویب ڈیسک) یورپ اور امریکہ جانے کا لالچ دے کر لاکھوں روپے بٹورنے والے انسانی سمگلرز گرفتار کر لئے گئے۔
ایف آئی اے پنجاب زون نے انسانی سمگلروں کے خلاف گوجرانوالہ اور گجرات میں بڑی کارروائی کی جس کے دوران 9 انسانی سمگلرز گرفتار اور ریڈ بک میں شامل ملزم بھی پکڑ لیا گیا۔ گرفتارانسانی سمگلروں میں ریاست، شمشاد، نوید ارشد شامل ہیں جبکہ علیبی حسین، حافظ شاہد، محمد آصف، ملک آفتاب کو بھی گرفتار کیا گیا ہے۔ اصغر علی اور ریڈ بک میں شامل وزیر احمد بھی گرفتار کر لیا گیا۔
وزیر احمد ایجنٹ 70 مقدمات میں نامزد ہے۔ تارکین وطن کو زمینی راستوں سے یورپ بھجوانے کا جھانسہ دے کر لاکھوں روپے بٹورے تھے۔ ملزمان شہریوں کی آنکھوں پر پٹی باندھ کر پسنی اور گوادر کے ساحل پر چھوڑ دیتے تھے۔

کولمبو: (ویب ڈیسک) سری لنکا کرکٹ ٹیم کے آل راؤنڈر و سابق کپتان انجیلومیتھیوز بھی کورونا وائرس میں مبتلا ہوگئے۔
سری لنکن کرکٹ بورڈ نے میتھیوز کا کورونا ٹیسٹ مثبت آنے کی تصدیق کرتے ہوئے بتایا کہ کرکٹر کے ریپڈ ٹیسٹ میں کورونا کی تشخیص ہوئی ہے۔
بورڈ کا مزید کہنا ہے کہ انجیلو میتھیوز کا ٹیسٹ طبیعت ناساز ہونے پر کیا گیا اور کورونا مثبت آنے پر انہیں آئسولیٹ کردیا گیا ہے۔
سری لنکا کرکٹ بورڈ کے مطابق اوشادا فرنینڈو کو کوویڈ ری پلیسمنٹ کے طور پر پلیئنگ الیون میں شامل کیا گیا ہے۔

لاہور: (ویب ڈیسک) منی لانڈرنگ ریفرنس میں وزیراعظم شہباز شریف اور حمزہ شہباز کی ایک روزہ حاضری معافی کی درخواست منظور کر لی گئی۔
تفصیلات کے مطابق لاہور کی احتساب عدالت میں وزیراعظم شہباز شریف حمزہ شہباز سمیت دیگر کے خلاف منی لانڈرنگ کیس کی سماعت ہوئی جس میں عدالت نے شہباز شریف اور حمزہ شہباز کی ایک روزہ حاضری معافی کی درخواست منظور کرلی۔
احتساب عدالت نے کیس کی مزید سماعت 26 جولائی تک ملتوی کردی، عدالت نے آئندہ سماعت پر نیب کے گواہوں کو بھی طلب کر لیا۔

اسلام آباد: (ویب ڈیسک) وزیراعلی پنجاب کے انتخاب سے متعلق لاہور ہائیکورٹ کے فیصلے کیخلاف پی ٹی آئی کی اپیل پر سپریم کورٹ کا 3 رکنی بنچ آج دوپہر ڈیڑھ بجے سماعت کرے گا۔
سپریم کورٹ نے تحریک انصاف کی اپیل پر 3 رکنی بنچ تشکیل دے دیا جو چیف جسٹس عمر عطا بندیال کی سربراہی میں جسٹس اعجازالاحسن اور جسٹس جمال خان مندوخیل پر مشتمل ہے۔ تحریک انصاف کی درخواست میں وزیراعلی پنجاب کے انتخاب سے متعلق لاہور ہائیکورٹ کے فیصلے کو غیر قانونی و غیر آئینی قرار دیکر مسترد کرنے کی استدعا کی گئی ہے، درخواست میں موقف اختیار کیا گیا ہے کہ فریقین کو صاف اور شفاف الیکشن کا آئینی حق حاصل ہے، حمزہ شہباز کو عہدے سے ہٹایا جائے تاکہ صاف شفاف الیکشن ہو سکے، درخواست پر فیصلے تک وزیراعلیٰ پنجاب کا انتخاب روکا جائے، وزیراعلیٰ پنجاب کی کامیابی کا نوٹیفکیشن بھی معطل کیا جائے۔

راولپنڈی: (ویب ڈیسک) سربراہ عوامی مسلم لیگ اور سابق وزیر داخلہ شیخ رشید نے کہا ہے کہ یہ ایک ڈمی حکومت ہے جس کا ایجنڈہ صرف اپنے کیس ختم کرنا اورآئی ایم ایف کے اشاروں پر ناچنا ہے، عنقریب ڈمی حکومت کا جنازہ دھوم سے نکلے گا۔
شیخ رشید سماجی رابطے کی ویب سائٹ ٹوئٹر پر پیغام جاری کرتے ہوئے لکھا کہ حکومت کو کوئی غرض نہیں کہ غریب پر کیا بیت رہی ہے، یہ اپنا ملبہ دوسروں پر ڈال کر خود چلے جائیں گے، یہ ملک کو شدید ترین معاشی،سیاسی اور اقتصادی بحران میں ڈال جائیں گے۔
انہوں نے کہا کہ حکمران ضمنی الیکشن چوری کرنے کی کوشش کریں گے، پٹرول میں 15 روپے اور ڈیزل میں 14 روپے اضافے کے بعد جولائی میں مہنگائی کے اور ٹیکے لگیں گے، عوام کو ریلیف نہیں تکلیف ملے گی۔
شیخ رشید نے مزید کہا کہ لوگ گھریلو سامان بیچ کر گزارہ کررہے ہیں اور ابھی بجلی کا بل بھی آنا ہے، ووٹ بیچنے والے کو عہدے اور پارٹی ٹکٹ مل رہے ہیں، عنقریب حکومت کا سیاسی جنازہ دھوم سے نکلے گا۔