لاہور: (ویب ڈیسک) وزیراعلیٰ پنجاب میاں محمد حمزہ شہباز نے کہا ہے کہ عدالت نے کہا ضمنی الیکشن کے بعد 22 جولائی کو دوبارہ الیکشن ہو گا، 17 جولائی کو جس کے حق میں فیصلہ ہو اس کو قائد ایوان منتخب ہونا چاہیے، 17 جولائی کے دن دودھ کا دودھ اورپانی کا پانی ہوجائے گا، 22جولائی کا الیکشن (ن) لیگ جیتے گی۔
سپریم کورٹ کے فیصلے کے بعد میڈیا سے گفتگوکرتے ہوئے وزیراعلیٰ پنجاب نے کہا کہ پنجاب پچھلے کئی ماہ سے آئینی بحران در آئینی بحران کا شکاررہا، کبھی الیکشن ملتوی اور کبھی حلف کا معاملہ التوا کا شکاررہا، کبھی گورنر آ رہا ہے اور جا رہا ہے، کبھی صدر سمری مسترد کر دیتے تھے، گنیزآف بک میں پنجاب کے آئینی بحران کونمبرون ترجیح دی جائے گی۔
انہوں نے کہا کہ کابینہ نہ ہونے کے باوجود ہم نے پنجاب کی عوام کو 200 ارب کی سبسڈی دی، ہم نے 10کلوآٹے کے تھیلے کو سستا کیا۔ پنجاب کے تمام اضلاع میں ڈی ایچ کیو، ٹی ایچ کیو میں کینسر سمیت تمام ادویات مفت ملنے جا رہی ہے، میں نے عمران نیازی کی طرح نہیں کہا مجھے تین ماہ دیدیں تو دودھ کی نہریں بہادوں گا، صوبے کی عوام کوریلیف دینے کے لیے دن رات کام کیا، امیدواراور پی ٹی آئی کا عدالت میں موقف الگ تھا، ان کی آپس میں بھی سوچ کا ربط نہیں تھا۔
حمزہ شہباز نے کہا کہ عدالت میں کہا میرے پاس نمبرپورے ہیں، عدالت میں کہا جو بھی فیصلہ کریں گے قبول کروں گا، عدالت نے کہا ضمنی الیکشن کے بعد 22 جولائی کو دوبارہ الیکشن ہو گا، 17 جولائی کو جس کے حق میں فیصلہ ہواس کوقائد ایوان منتخب ہونا چاہیے، مجھے نہیں معلوم کتنے دن ہوں جب تک ہوں صوبے کے عوام کی خدمت کروں گا۔ عدالت میں کہا جوبھی رزلٹ آئے گا قبول کریں گے، اللہ کے فضل سے پنجاب کی عوام نواز شریف، شہباز شریف پر اعتماد کرتی ہے۔
انہوں نے کہا کہ پی ٹی آئی چیئر مین نے کہا آئی ایم ایف نہ جانا بڑی غلطی تھی، عمران خان نے آئی ایم ایف نہ جا کر 6 ماہ ضائع کیے، عمران خان نے آئی ایم ایف سے معاہدہ کیا اوردوسری طرف عوام کوسستا پٹرول دیا، دل پرپتھررکھ کرپٹرول کی قیمتیں بڑھائئ گئیں، اگرہم سخت فیصلے نہ کرتے تو ایٹمی قوت دیوالیہ ہوجاتا، مشکلات کے باوجود ہم عوام کوریلیف فراہم کررہے ہیں، پٹرول کی قیمت حکومت بچانے کے لیے نہیں بڑھائی، یہ بوجھ ہے جوہم نے اٹھایا ہے،
ان کا مزید کہنا تھا کہ ڈپٹی سپیکر پر اسمبلی میں جان لیوا حملہ کیا گیا تھا، عمران نیازی نے ہمیں انتقام کا نشانہ بنایا کس منہ سے ہراساں کرنے کی باتیں کرتے ہیں، سوشل میڈیا پرعسکری اداروں کے خلاف زہراگلا جارہا ہے، اس سازش کے پیچھے توشہ خانہ کی چوریاں چھپانا تھا، اس آدمی نے اپنی انا کی خاطرآئین وقانون کو توڑا، 17 جولائی کا دن دودھ کا دودھ اورپانی کا پانی ہوجائے گا،22جولائی کا الیکشن(ن)لیگ جیتے گی، دل پرپتھررکھ کرفیصلے کررہے ہیں، سخت فیصلوں کے بعد عوام کے لیے آسانیاں پیدا کریں گے، مسلم لیگ (ن) نے ہمیشہ ملک کو مشکل حالات سے نکالا، ن لیگ نے ملکی مفاد کے لیے سخت فیصلوں کا سیاسی بوجھ اٹھایا، انشااللہ17جولائی کوعوام ایک بارپھر(ن)لیگ کی قیادت پراعتماد کا اظہارکرینگے۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے کہا ہے کہ جو کہتے ہیں ہم نیوٹرلز ہو کر پیچھے ہو گئے ہیں کیا یہ انکا پاکستان نہیں؟ معیشت نیچے جائے گی تو کیا نیوٹرلز کے لئے نقصان نہیں ہوگا؟۔
اسلام آباد پالیسی انسٹی ٹیوٹ سے خطاب کرتے ہوئے عمران خان نے کہا کہ اس وقت یہ بحث جاری ہے کہ اس ملک کے ساتھ ہوا کیا ہے، اکنامک سروے کے مطابق ہمارے دور میں معیشت بہتر ہورہی تھی، تحریک انصاف کے دور میں زراعت انڈسٹری اور دیگر شعبوں میں بہتری آرہی تھی، کونسی ایسی قیامت آگئی تھی کہ ہماری حکومت کو بیرونی سازش کے تحت ہٹایا گیا۔
انہوں نے مزید کہا کہ ہمیں بتایا گیا کہ ہماری حکومت مہنگائی کنٹرول کرنے کی اہل نہیں، اب دو مہینے میں اتنی مہنگائی ہو گئی ہے جتنی ہمارے ساڑھے تین سال میں نہیں تھی، جو قیمت اسوقت قوم مہنگائی اور لوڈشیڈنگ کی صورت میں ادا کر رہی ہے اسکا ذمہ دار کون ہے؟ سب کو خوف ہے کہ ہماری معیشت سری لنکا کے حالات کی طرف جارہی ہے، اگر ایسا ہوا تو سب سے بڑا مسئلہ نیشنل سکیورٹی کے لئے ہوگا۔
چیئرمین پی ٹی آئی کا کہنا تھا کہ ملٹری سکیورٹی ایک طرف ہے، معاشی سکیورٹی اتنی ہی اہم ہے، جو چور ڈاکو ہم پر مسلط کیے گئے انکے 1100 ارب معاف کیے گئے، امریکا چاہتا ہے کہ پاکستان میں بیسز مل جائیں اور پاکستان کو اپنے فائدے کے لئے استعمال کریں، کیا ہمارے ملک میں لوگوں کو خوف نہیں؟ جن لوگوں کو ہم پر مسلط کیا گیا انکا پاکستان میں کیا انٹرسٹ ہے؟۔
سابق وزیراعظم نے کہا کہ کرپشن کر کے باہر بھاگنے والے این آر او لے کر واپس آنا چاہتے ہیں، رجیم چینج کا نقصان صرف پاکستان کو ہے، آج ہمیں غلام بنایا جا رہا ہے، ان لوگوں کو ہم پر مسلط کیا جا رہا ہے جنکا پاکستان میں کوئی مفاد نہیں، جیسا ابھی چل رہا ہے ویسا چلتا رہا تو پاکستان کا کوئی مستقبل نہیں۔

کراچی: (ویب ڈیسک) سندھ میں بلدیاتی انتخابات کا دوسرامرحلہ ملتوی کرنے کیلئے ایم کیوایم نے الیکشن کمیشن کو خط لکھ دیا۔
بلدیاتی انتخابات سے متعلق متحدہ قومی موومنٹ نے الیکشن کمیشن کو خط لکھ دیا۔ جس میں کہا گیا ہے کہ سندھ میں بلدیاتی انتخابات کا دوسرامرحلہ ملتوی کیا جائے۔ کورونا کیسز میں اچانک اضافہ ہو رہا ہے ۔ خط میں مزید کہا گیا کہ سندھ میں حلقہ بندیاں بھی قانونی طور پر ٹھیک نہیں ہیں۔ اسلئے بلدیاتی انتخابات ملتوی کئے جائیں ۔کہا الیکشن ووٹر لسٹوں کی حتمی فہرست اور کورونا کیسز میں کمی تک سندھ بلدیاتی انتخابات موخر کیے جائیں ۔

لاہور: (ویب ڈیسک) اسپیکر پنجاب اسمبلی پرویز الہٰی نے کہا ہے کہ وزیراعلیٰ کا انتخاب صرف پنجاب اسمبلی میں ہو گا، مجھے ہدایت کی گئی ہے سب کچھ قوانین کے مطابق ہونا چاہئے۔
سپریم کورٹ رجسٹری میں گفتگو کرتے ہوئے انہوں نے کہا کہ آج بہت ہی اچھا فیصلہ ہوا، چیف جسٹس نے بھی کہا بڑا اچھا اجتماعی فیصلہ ہوا ہے۔
انہوں نے کہا کہ یہ جمہوریت کی بھی جیت ہے، انصاف کی بھی ، اللہ کو منظور ہو گا تو وزیراعلیٰ بنیں گے،حمزہ شہباز نے یقین دہانی کرائی ہے کہ الیکشن شفاف ہوں گے۔
ان کا کہنا تھا کہ کسی کیخلاف کوئی انتقامی کارروائی نہیں ہو گی، وزیراعلیٰ پنجاب کا انتخاب 22 جولائی کو ہو گا۔

اسلام آباد: (ویب ڈیسک) پاکستان تحریک انصاف (پی ٹی آئی) کے رہنما اور سابق وفاقی وزیر اسد عمر نے کہا ہے کہ سپریم کورٹ نے پی ٹی آئی کے مؤقف کو درست قرار دے دیا۔
پی ٹی آئی رہنما اسد عمر نے فواد چودھری اور بابر اعوان کے ہمراہ میڈیا سے گفتگو کرتے ہوئے کہا کہ حمزہ شہباز کبھی بھی منتخب وزیر اعلیٰ تھے ہی نہیں اور ضمنی انتخابات کے بعد ہاؤس مکمل ہو گا۔ پاکستان میں لوٹوں کی سیاست کو ہمیشہ کے لیے دفن کر دیا گیا ہے۔
انہوں نے کہا کہ عوام میں عمران خان کی مقبولیت میں اضافہ ہو رہا ہے اور آج سپریم کورٹ پر پورے پنجاب کی نظر جمی تھی۔ ہمارا پہلے دن سے مؤقف تھا کہ پنجاب میں بننے والی حکومت غیر قانونی ہے اور پہلے لاہور ہائیکورٹ پھر آج سپریم کورٹ نے بھی ہمارے مؤقف کی تائید کر دی۔ ایسے افسران کو لگایا جا رہا ہے جو ٹھیک نہیں ہیں۔
سابق وفاقی وزیر اطلاعات فواد چودھری نے کہا کہ قومی اسمبلی میں جو کچھ ہو رہا ہے وہ سب کے سامنے ہے اور حمزہ شہباز محدود اختیارات کے تحت 22 جولائی تک وزیر اعلیٰ ہوں گے۔
انہوں نے کہا کہ عدالت نے سیاسی معاملات کو آپس میں مل کر حل کرنے کا کہا ہے اور تحریک انصاف کے مؤقف کی جیت ہوئی ہے۔ حمزہ شہباز منتخب نہیں بلکہ سلیکٹڈ وزیراعلیٰ ہیں۔
پی ٹی آئی رہنما بابر اعوان نے کہا کہ میرے مطابق حمزہ شہباز غیر آئینی مشکوک وزیراعلیٰ ہیں۔

لاہور: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ امپورٹڈ حکومت مسلسل عوام پر ناقابل برداشت بوجھ ڈال رہی ہے۔
سماجی رابطے کی ویب سائٹ ٹویٹر پر اپنے ایک بیان میں انہوں نے کہا کہ روس سے سستا تیل خریدنے کے بجائے امریکا کی حکومت تبدیل کرنے کی سازش کے نتیجے میں اقتدار میں آنے والی امپورٹڈ حکومت مسلسل عوام پر ناقابل برداشت بوجھ ڈال رہی ہے۔
پی ٹی آئی چیئر مین نے کہا کہ امپورٹڈ حکومت نے خود کو 1100 ارب روپے کا این آر او 2 دے دیا ہے۔ مجموعی طورپر پٹرول کی قیمت میں 99 روپے، ڈیزل کی قیمت میں 133 روپے اضافہ ہوا۔عوام اس کے خلاف کل ہمارے احتجاج میں شرکت کریں۔
اپنے ایک اور ٹویٹ میں انہوں نے لکھا کہ تیل کی بڑھتی ہوئی قیمتوں، بدترین لوڈ شیڈنگ کیخلاف انشاء اللہ ہفتے کو امپور ٹڈ حکومت کیخلاف پریڈ گراؤنڈ میں تاریخی جلسہ ہو گا، میں پنڈی سے پریڈ گراؤنڈ تک ریلی کی قیادت کروں گا۔