اسلام آباد: (ویب ڈیسک) حکومت نے بجلی بحران سے نمٹنے کے لیے ایل این جی کارگوز کی درآمد کے لیے ٹینڈرز جاری کردیے۔
پاکستان پیٹرولیم لمیٹڈ کے مطابق 10 ایل این جی کارگوز کی درآمد کے لیے ٹینڈرز جاری کیے گئے ہیں جو جولائی،اگست اور ستمبر کے لیے ہیں۔
جولائی کے لیے 2، اگست کے لیے 5 اور ستمبر کے لیے 3 کارگوز منگوانے کے لیے بولیاں طلب کی گئی ہیں جب کہ بولیوں کی آخری تاریخ 7 جولائی ہے۔

کراچی : (ویب ڈیسک) پولیس اور رینجرز نے مشترکہ کارروائی کرتے ہوئے ٹارگٹ کلر کو گرفتار کرلیا۔
ترجمان رینجرز کے مطابق کراچی کے علاقے گارڈن سے گرفتار ملزم کاشف نے 30 مئی 2022 کو کے ایم سی کے انسپکٹر محمد علی کو ساتھیوں کے ساتھ مل کر قتل کیا تھا،قتل کی واردات اینٹی انکروچمنٹ لینڈ ڈیپارٹمنٹ کے آفس میں کی گئی تھی۔
ترجمان کے مطابق ملزم کاشف کے ساتھی محمد شاکر عرف ڈھیلا کو 12جون کو گرفتارکیا جا چکا ہے جب کہ ملزم کاشف کے قبضے سے تین پستول، گولیاں اور ایک موٹرسائیکل بھی برآمد کی گئی ہے۔

فیصل آباد : (ویب ڈیسک) سابق وزیراعظم عمران خان کی اہلیہ بشریٰ بی بی کی دوست فرح گوگی کو فیصل آباد اکنامک زون میں 10 ایکڑ انڈسٹریل پلاٹ کی غیرقانونی الاٹمنٹ کے معاملے پر اینٹی کرپشن نے 2 افراد کو گرفتار کرلیا۔
اینٹی کرپشن حکام کا کہنا ہے کہ فیڈمک کے سابق سی ای او رانا یوسف اور سیکرٹری اسپیشل اکنامک زون کمیٹی مقصود احمد کو گرفتار کیا گیا ہے،ملزمان پر فرح گوگی اور ان کی والدہ کی کمپنی کو غیرقانونی طور پر انڈسٹریل پلاٹ دینے کا الزام ہے۔حکام کے مطابق ملزمان نے فیصل آباد اسپیشل اکنامک زون میں قیمتی انڈسٹریل پلاٹ کوڑیوں کے بھاؤ الاٹ کیا، 60 کروڑ مالیت کا پلاٹ صرف 8 کروڑ 30 لاکھ روپےجعلی کمپنی بناکر الاٹ کروایا گیا۔
اینٹی کرپشن حکام کا کہنا ہے کہ انڈسٹریل پلاٹ لینے کے لیے کمپنی کی ویلیو 2 ارب روپے ہونی چاہیے تھی، فرح گوگی کے شوہر احسن جمیل گجر نے 2 ارب روپے کی جعلی گارنٹی دی۔
حکام کےمطابق اینٹی کرپشن فرح گوگی اور احسن جمیل گجر کے اثاثوں کی چھان بین بھی کر رہی ہے، گرفتار دونوں ملزمان کے خلاف اینٹی کرپشن فیصل آباد میں مقدمہ درج کیا گیا ہے۔

رحیم یار خان : (ویب ڈیسک) رحیم یار خان میں موٹروے پر ٹریفک حادثے کے نتیجے میں 2 افراد جاں بحق ہوگئے۔
ریسکیو حکام کے مطابق رحیم یار خان میں موٹر وے فائیوپر ظاہر پیر انٹر چینج کے قریب تیز رفتار وین ٹریلر سے ٹکرا گئی جس کے نتیجے میں 2 افراد جاں بحق اور 4 زخمی ہوگئے۔
حکام کا کہنا ہےکہ واقعے کی اطلاع ملتے ہی ریسکیو اہلکاروں نے زخمیوں اور لاشوں کو قریبی اسپتال منتقل کردیا جہاں زخمیوں کو طبی امداد دی جارہی ہے۔
حکام نے بتایا کہ وین کراچی سے لاہور جارہی تھی اور حادثہ تیز رفتاری کے باعث پیش آیا۔

کراچی: (ویب ڈیسک) محکمہ موسمیات نے شہر میں آئندہ 24 گھنٹوں کے دوران گرج چمک کے ساتھ بارش کا امکان ظاہر کیا ہے۔
محکمہ موسمیات کے مطابق کراچی میں مون سون کا پہلا اسپیل آج شام یا رات سےشروع ہوسکتا ہے جس دوران شہر میں گرج چمک کے ساتھ بارش کا امکان ہے جب کہ 3 اور 4 جولائی کو شہر میں شدید بارش ہوسکتی ہے۔
محکمہ موسمیات کا بتانا ہےکہ بارش سے قبل آندھی کا امکان ہے اور اس دوران 81 کلو میٹر فی گھنٹہ کی رفتار سے ہوائیں چل سکتی ہیں۔
محکمہ موسمیات کے مطابق 7 جولائی دوران مون سون سسٹم ملک پر اثر انداز ہوگا۔

اسلام آباد: (ویب ڈیسک) اسلام آباد کے پمز اسپتال میں ڈاکٹر کی لیڈی ڈاکٹر سے مبینہ زیادتی کے واقعے کا مقدمہ درج کرلیا گیا۔
ذرائع کا کہنا ہے کہ متاثرہ لیڈی ڈاکٹر کی مدعیت میں مقدمہ درج کیاگیا۔
ایف آئی آر کے مطابق ملزم ڈاکٹر نے شادی کا لالچ دے کر متعدد بار زیادتی کی، دوسری جانب پولیس نے واقعے کی تحقیقات شروع کردی ہیں۔

جنوبی وزیرستان: (ویب ڈیسک) جنوبی وزیرستان میں دہشت گردوں کی پولیس پر فائرنگ سے کاؤنٹر ٹیررازم ڈپارٹمنٹ (سی ٹی ڈی) کا افسر شہید ہوگیا۔
رپورٹس کے مطابق جنوبی وزیرستان کے علاقے تھانہ اعظم ورسک کے قریب دہشت گردوں نے پولیس پر فائرنگ کردی جس کے نتیجے میں سی ٹی ڈی کا افسر شہید جبکہ ایک اہلکار زخمی ہوگیا۔
ذرائع کا کہنا ہے کہ پولیس کی جوابی فائرنگ سے ایک دہشت گردہلاک ہوا جبکہ ایک زخمی دہشت گرد فرار ہونے میں کامیاب ہوگیا۔
سکیورٹی اہلکاروں کے مطابق علاقے کی ناکہ بندی کردی گئی ہے۔

راولپنڈی: (ویب ڈیسک) سابق وزیر داخلہ شیخ رشید احمد نے کہا ہے کہ راولپنڈی کے حالات جان بوجھ کر خراب کیے جا رہے ہیں۔
عوامی مسلم لیگ کے سربراہ اور سابق وزیر داخلہ شیخ رشید احمد نے میڈیا سے گفتگو میں کہا کہ راولپنڈی کے حالات خراب ہونے کی صورت میں ذمہ دار حکومت اور انتظامیہ ہو گی۔
انہوں نے کہا کہ رات کو 3 بجے ملزمان نے عمران خان کے پوسٹرز اور بینرز اتارے اور اسی جگہ پر عمران خان کے خلاف اخلاق سے گرے پوسٹرز اور اسکرینیں لگائیں۔ صبح 5 بجے ہم نے ان پوسٹرز کو اتارا اور 3 افراد کو پکڑ کر پولیس کے حوالے کیا۔
شیخ رشید احمد نے کہا کہ راولپنڈی میں 50 سال سے سیاست کر رہے ہیں ایسا کبھی نہیں ہوا، راولپنڈی کے حالات جان بوجھ کر خراب کیے جا رہے ہیں۔ انتظامیہ اور پولیس ان کے ساتھ ملی ہوئی ہے۔
انہوں نے کہا کہ مقتدر حلقوں سے کہتا ہوں یہ لڑائی کرنا چاہتے ہیں اور عمران خان کے بارے میں پوسٹرز بانٹنے کی تحقیقات کی جائے کیونکہ یہ جو کچھ ہو رہا ہے وہ منظم منصوبے کے تحت ہو رہا ہے۔
پی ٹی آئی کے جلسے میں شرکت کے حوالے سے انہوں نے کہا کہ لال حویلی سے راشد شفیق کے ہمراہ ریلی کے ساتھ اسلام آباد پہنچنا ہے۔

کراچی: (ویب ڈیسک) عدالت نے کراچی سے مہدی کاظمی کی لاہور جا کر شادی کرنے والی دعا زہرا کے کیس کا تفتیشی افسرتبدیل کرنے کی درخواست عدالت نے مسترد کردی۔
کراچی کی عدالت نےتفتیشی افسر کی تبدیلی کے لیے دعا کے والد مہدی کاظمی کی درخواست پرفیصلہ سنایا۔
دوران سماعت جوڈیشل مجسٹریٹ نے کہا کہ پولیس کےجمع کرائے گئے چالان پر تاحال کوئی فیصلہ نہیں کیا ، اگر کیس کا چالان منظور ہو بھی جائے تو درخواست گزار کے پاس اپیل کا حق ہے۔
عدالت کے مطابق دعا زہرا کی عمر کا تنازع تاحال میڈیکل بورڈ کے پاس زیر التواء ہے۔