اسلام آباد: (ویب ڈیسک) وزیراعظم شہبازشریف سے چینی سرکاری کمپنی نورینکو کے وفد نے ملاقات کی، چینی وفد کی قیادت نورینکو انٹرنیشنل کے نائب صدر مسٹر وانگ شیاؤ بنگ اور سی ای او نورینکو انٹرنیشنل (پاکستان) مسٹر لی چن نے کی۔
وزیراعظم سے چینی سرکاری کمپنی نورینکو کے وفد نے ملاقات کی، ملاقات میں وفاقی وزراء خواجہ سعد رفیق، سید نوید قمر، چودھری سالک حسین، مشیر وزیراعظم احد چیمہ موجود تھے،وزیراعظم نے دونوں دوست ممالک کے باہمی فائدے اور ترقی کے لیے سی پیک کی اہمیت کو اجاگر کیا۔
اعلامیہ نے مطابق وزیراعظم نے چینی کمپنیوں کو پاکستان میں قابل تجدید توانائی بالخصوص شمسی توانائی کے وسیع امکانات میں سرمایہ کاری کرنے کی دعوت دی۔
وزیراعظم ہاؤس کے اعلامیے کے مطابق نورینکو کمپنی پاکستان میں بجلی اور قابل تجدید توانائی، انفراسٹرکچر، ٹیلی کام، کان کنی اور آئی ٹی کے شعبوں میں سرمایہ کاری کی خواہشمند ہے۔
شہباز شریف نے کہا کہ چین پاکستان اقتصادی تعاون کو مضبوط کرنا پاکستان کی سماجی و اقتصادی ترقی کے لیے اہم ہے، لاہور اورنج لائن میٹرو ٹرین منصوبے میں کمپنی کے کردار کو سراہتے ہیں، اورنج لائن ٹرین لاہور میں روزانہ کی بنیاد پر لاکھوں مسافروں کو سہولت فراہم کر رہی یہ پہلی بار تھا کہ جی ٹو جی پروجیکٹ یعنی لاہور اورنج لائن میں کھلی بولی لگائی گئی،سب سے کم بولی دینے والی کمپنی کے ساتھ مزید مذاکرات سے 600 ملین ڈالر کی بچت ہوئی۔
وفد نے پاکستان کو موجودہ معاشی بحران سے نکالنے کے لیے وزیراعظم شہباز شریف کی انتھک کوششوں کی تعریف کی۔
چینی وفد نے گفتگو کرتے ہوئے کہا کہ وزیراعظم شہبازشریف کی کاروباری دوست پالیسیوں نے اقتصادی تعاون کو مضبوط کیا اور ملک میں براہ راست غیر ملکی سرمایہ کاری کو آسان بنایا۔
نورینکو کے وفد نے پاکستان میں قابل تجدید توانائی کے منصوبوں کے وسیع میدان میں سرمایہ کاری کرنے میں گہری دلچسپی ظاہرکی۔

لاہور: (ویب ڈیسک) اسپیکر پنجاب اسمبلی پرویز الہیٰ نے کہا ہے کہ ہمارے 11 اراکین حج پر اور 7 ملک سے باہر ہیں، وزیر اعلیٰ پنجاب کا انتخاب عید کے بعد کرائے جائیں۔
اسپیکر پنجاب اسمبلی پرویز الہیٰ نے لاہور ہائی کورٹ کے فیصلے کے بعد میڈیا سے گفتگو میں کہا کہ پہلے ہاؤس مکمل کریں پھر گنتی کرائی جائے۔ ہمارے 11 ارکان اسمبلی حج پر چلے گئے ہیں اور 7 اراکین اسمبلی ملک سے باہر ہیں۔
انہوں نے کہا کہ سمجھ نہیں آ رہا 12 گھنٹے دیئے گئے ہیں، کوئی نہیں پہنچ سکتا کیونکہ کسی کو راجن پور اور کسی کو بہاولپور سے پہنچنا ہے۔
یہ بھی پڑھیں: وزارت اعلیٰ کا انتخاب: 25 ووٹ فارغ، دوبارہ گنتی، کوئی نہ جیتے تو پھر الیکشن، عدالت کا حکم
پرویز الہٰی نے کہا کہ لاہور ہائی کورٹ کے فیصلے کے خلاف سپریم کورٹ جا رہے ہیں۔ اراکین پنجاب اسمبلی کی گنتی کا عمل عید کے بعد کیا جائے۔
انہوں نے کہا کہ سب کی مشاورت سے اجتماعی فیصلہ ہو گا اور شریفوں نے ہمیشہ ہر کام الٹا کیا ہے۔

لاہور: (ویب ڈیسک) مسلم لیگ ن کی نائب صدر مریم نواز نے کہا ہے کہ پنجاب کے خلاف عمران خان کے جرائم کی فہرست طویل ہے۔
مسلم لیگ ن کی نائب صدر مریم نواز نے سماجی رابطے کی ویب سائٹ ٹوئٹر پر لکھا کہ منی گالہ گینگ کے ذریعے پنجاب کے پیسہ کے وسائل پر ڈاکہ ڈالا گیا۔
انہوں نے کہا کہ پنجاب کے عوام کو ان کے حق سے محروم کر کے مشکلات پیدا کی گئیں۔ پنجاب کے خلاف عمران خان کے جرائم کی فہرست طویل ہے۔ پنجاب کے عوام کو ان کا حق نہیں لینے دیا گیا۔

کوئٹہ: (ویب ڈیسک) قائم مقام سپپکر بابر موسیٰ خیل نے ارکان اسمبلی کے اعتراض کے بعد آج محکمہ صحت میں ہونے والے انٹرویو روک دینے کی رولنگ دیتے ہوئے بجٹ کے گوشوارے ایوان کی میز پر رکھنے کے بعد اجلاس غیر معینہ مدت تک ملتوی کردیا۔
بلوچستان اسمبلی کا اجلاس قائم مقام سپیکر سردار بابر موسیٰ خیل کی صدارت میں منعقد ہوا، ایوان میں وزیر خزانہ سردار عبدالرحمٰن کھتران نے اخراجات کے مصدقہ گوشوارے ایوان کی میز پر رکھے، دوران اجلاس اپوزیشن رکن نصراللہ زیرے نےنقطہ اعتراض پر کہا کہ انہوں نے اپنے حلقہ انتخاب میں 9 بنیادی مراکز صحت قائم کئے تھے جہاں اسامیوں کیلئے مقامی افراد کی درخواستیں جمع کرائیں لیکن محکمہ صحت کے اہلکار من پسند افراد کو تعنیات کررہے ہیں۔ رکن اسمبلی نصراللہ زیرے نے بطور احتجاج سپیکر کی کرسی کے سامنے علامتی دھرنا دیا۔
قائم مقام سپیکر بابر موسیٰ خیل نے محکمہ صحت کے انٹرویو روک دینے کی رولنگ دیتے ہوئے سیکرٹری صحت کو اپنے چمبر میں وضاحت کیلئے طلب کرلیا، ایوان میں اظہار خیال کرتے ہوئے رکن اسمبلی سلیم کھوسہ نے کہا کہ پٹ فیڈر سیمت کسی کینال میں پانی دستیاب نہیں، پانی نہ ہونے سے نصیر آباد کی بیس لاکھ آبادی متاثر ہورہی ہے جس پر قائم مقام سپیکر بابر موسیٰ خیل نے کہا کہ پانی کا مسئلہ دو صوبوں کے درمیان ہے، وزیر اعلی نے اس معاملے کو اٹھایا ہے، بعدازاں بلوچستان اسمبلی کا اجلاس غیر معینہ مدت کیلئے ملتوی کردیا گیا۔

پشاور: (ویب ڈیسک) خیبرپختونخوا کے صوبائی وزیرشوکت یوسفزئی نے کہا ہے کہ توشہ خانہ کیس عوام کی آنکھوں میں دھول جھونکنے کے لئے اچھالا جا رہا ہے، امپورٹڈ حکومت آئی ایم ایف کے آگے لیٹ گئی ہے۔
پاکستان تحریک انصاف کے ترجمان اور صوبائی وزیر شوکت یوسفزئی کا مریم اورنگزیب کے بیان پررد عمل میں کہنا تھا کہ توشہ خانہ کیس عوام کی آنکھوں میں دھول جھونکنےکےلئےاچھالاجا رہا ہے، وزیراعظم ، وفاقی وزراء مہنگائی میں اضافے کا دفاع نہیں کر پا رہے، امپورٹڈ حکمران آج بھی اپنے اثاثوں کا منی ٹریل نہیں دے رہے، امپورٹڈ حکومت آئی ایم ایف کے آگے لیٹ گئی ہے، پٹرولیم لیوی میں 50 روپے اضافے سے مہنگائی کا نیا طوفان آئے گا، عوام 2 جولائی کو عمران خان کی کال پر حکومت کے خلاف نکلیں۔
انہوں نے کہا کہ کنسٹرکشن کاروبار پر 10 فیصد سپر ٹیکس لگا کر عوام سے روزگار چھینا گیا۔ کھاد پر سپر ٹیکس سے کسان متاثر ہوں گے، خیبر پختونخوا سب سے زیادہ بجلی پیدا کرنے والا صوبہ ہے، اس صوبے میں پندرہ سو میگا واٹ بجلی کا شارٹ فال افسوسناک ہے۔
شوکت یوسفزئی نے مزید کہا کہ عوام دو جولائی کو عمران خان کی کال پر حکومت کے خلاف نکلیں، امپورٹڈ حکمران عوام کے مسائل حل کرنے میں ناکام ہوگئے ہیں۔

نیویارک: (ویب ڈیسک) عالمی ادارہ صحت (ڈبلیو ایچ او) کے ڈائریکٹر جنرل ڈاکٹر ٹیڈروس گیبرئیس نے کہا ہے کہ دنیا میں کورونا وائرس نے مختلف شکلوں میں پھر سر اٹھا لیا ہے۔
غیر ملکی خبر رساں ایجنسی کے مطابق ڈاکٹر ٹیڈروس گیبرئیس نے انکشاف کیا کہ دنیا کے 6 میں سے 3 خطوں میں کورونا کی وجہ سے اموات کی تعداد میں اضافہ ہوا ہے۔ 110 ممالک میں کورونا وائرس کے کیسز میں اضافہ ہو رہا ہے، جو وائرس کی بی اے فور اور بی اے فائیو مختلف شکلوں سے چل رہے ہیں۔
ڈبلیو ایچ او کے ڈائریکٹر جنرل، ڈاکٹر ٹیڈروس گیبریئس نے جنیوا میں ایجنسی کے ہیڈ کوارٹر میں اس کا انکشاف کیا کہ مختلف حالتوں میں مجموعی طور پر 20 فیصد اضافہ ہوا ہے۔ دنیا کے 6 میں سے 3 خطوں میں اموات کی تعداد میں اضافہ ہوا ہے۔
انہوں نے کہا کہ کسی کو بھی اس شک میں نہیں رہنا چاہیے کہ کورونا وائرس ختم ہو گیا ہے یا ہونے والا ہے بلکہ یہ وبائی بیماری میں بدل رہی ہے ختم نہیں ہو رہی۔
ڈائریکٹر ڈبلیو ایچ او نے کہا کہ صرف حکومتوں، بین الاقوامی ایجنسیوں اور پرائیویٹ سیکٹر کے ٹھوس اقدامات سے ہی ہم بدلتے ہوئے چیلنجوں کو حل کر سکتے ہیں۔ وائرس کو ٹریک کرنے کی ہماری صلاحیت خطرے میں ہے کیونکہ رپورٹنگ اور جینومک سیکونسز کم ہو رہے ہیں۔
انہوں نے کہا کہ دنیا بھر میں 12 ارب سے زیادہ ویکسین تقسیم کی جا چکی ہیں اور دنیا کے 75 فیصد ہیلتھ ورکرز اور 60 سال سے زائد عمر کے افراد کو ویکسین لگائی جا چکی ہے۔

کراچی: (ویب ڈیسک) وزیر اعلیٰ سندھ مراد علی شاہ کو وزیر توانائی امتیاز شیخ نے خط میں لکھا ہے کہ این ٹی ڈی سی کو 200 میگاواٹ بجلی اضافی دینے کیلئے وزیراعظم سے گزارش کریں۔
وزیرتوانائی سندھ امتیاز شیخ نے خط میں وزیر اعلیٰ سندھ کو کے الیکٹرک کے اجلاس کی تفصیلات سے آگاہ کیا ہے۔ کے الیکٹرک افسران ، سندھ حکومت اور اراکین اسمبلی کے اجلاس کی تحریری رپورٹ وزیراعلی سندھ کو پیش کی گئی۔ خط میں وزیر توانائی سندھ امتیاز شیخ نے کہا کہ این ٹی ڈی سی کو 200 میگاواٹ بجلی اضافی دینے کیلئے وزیراعظم سے گزارش کی جائے، سوئی سدرن کو کراچی کیلئے رات کے وقت گیس پریشر بڑھانے کی ہدایت کی جائے، سوئی سدرن گیس سپلائی پریشر 40 ایم ایم بی ٹی یو مزید بڑھائے۔
امتیاز شیخ نے کہا کہ کے الیکٹرک اور سوئی سدرن کے مابین واجبات ادائیگی کا بھی مسئلہ ہے۔ مسئلے کے حل کے لئے وزیر اعظم اور وفاقی حکومت اقدامات کریں۔

لاہور: (ویب ڈیسک) پاکستان مسلم لیگ ن نے وزیراعلی پنجاب کے دوبارہ انتخاب میں عددی اکثریت کی برتری کا دعویٰ کردیا اور کہا ہے کہ کل حمزہ شہباز بآسانی دوبارہ وزیراعلیٰ منتخب ہوجائیں گے۔
مسلم لیگ (ن) کے رہنما عطا تارڑ نے دیگر لیگی رہنماؤں کے ہمراہ عدالت کے باہر میڈیا سے گفتگو میں کہا کہ لاہور ہائی کورٹ نے آج کا یہ فیصلہ سپریم کورٹ کے آرٹیکل 63 اے کی تشریح کے تناظر میں دیا جس کے تحت انہوں نے یہ حکم دیا کہ پارٹی کی ڈائریکشن کے خلاف ووٹ شمار نہیں ہوگا۔
انہوں نے دعویٰ کیا کہ ہائی کورٹ نے نہ الیکشن کو کالعدم قرار دیا ہے اور نہ ہی نئے انتخاب کی ہدایت دی ہے، صرف 25 ارکان کے ووٹ مائنس کر کے دوبارہ انتخاب کا حکم دیا گیا ہے۔
عطا تارڑ ںے کہا کہ آئین میں یہ بات درج ہے کہ وزیراعلیٰ کے انتخاب میں 146 کی سادہ اکثریت حاصل نہیں کرسکے گا تو انتخاب دوبارہ ہوگا، فیصلے میں یہ بھی درج ہے کہ حمزہ کل شام تک وزیراعلیٰ رہیں گے اور کل شام نیا انتخاب ہوگا۔
انہوں نے مزید کہا کہ ہمارے ووٹوں میں سے 25 مائنس کردیں لیکن ہماری تعداد 177 ہے جب کہ تحریک انصاف اور ق لیگ کے اتحاد کی تعداد 168 ہے اور ہم اس وقت 9 ووٹ کی برتری کے ساتھ ہیں، کسی بھی صورت انتخاب کو کالعدم قرار دیا گیا ہے اور نہ حمزہ شہباز کو ہٹایا گیا ہے، صرف ووٹوں کی دوبارہ گنتی کی ہدایت دی گئی ہے، حمزہ شہباز اور ان کی کابینہ کے سارے فیصلے اپنی جگہ برقرار رہیں گے انہیں غیر موثر نہیں کیا گیا۔
انہوں نے کہا کہ نئے وزیراعلیٰ کے انتخاب تک حمزہ شہباز ہی وزیراعلیٰ رہیں گے اور کل یہ انتخاب ہم جیتیں گے، آدھے لوگ خوش ہیں اور آدھے لوگ افسردہ ہیں انہیں سمجھ ہی نہیں آرہا کہ فیصلہ کیا آیا ہے۔
عطا تارڑ نے کہا کہ عدالتی حکم میں درج ہے کہ کل کے انتخاب میں کسی بھی غیرقانونی اقدام اور رکاوٹ ڈالنے والے کے خلاف کارروائی کی جائے گی، چھ ماہ کی قید سنائی جائے گی، ہم یقین دلاتے ہیں کہ اٹھنے والے ہاتھ اور بڑھنے والے قدم کے خلاف توہین عدالت کے لیے رجوع کریں گے۔
ن لیگی رہنما نے کہا کہ ڈپٹی اسپیکر یہ اجلاس چلائیں گے کیوں کہ اسپیکر پرویز الہی خود وزیراعلیٰ کے امیدوار ہیں، آج تحریک انصاف والے خوشی بھی منارہے ہیں اور فیصلے کے خلاف اپیل میں جانے کا بھی کہہ رہے ہیں، عدالتی فیصلے نے تعداد واضح کردی ہے کہ اب کوئی رکن ٹوٹ کر دوسری پارٹی میں نہیں جاسکتا، کاغذات میں جو تعداد درج ہے اسی پر کل انتخاب ہوگا اور اس میں ہمیں نو ووٹ کی واضح برتری حاصل ہے۔

راولپنڈی: (ویب ڈیسک) سابق وزیر داخلہ شیخ رشید احمد کا کہنا ہے کہ جولائی میں الیکشن کا اعلان کرنا ہوگا، اگر ایسا نہیں کریں گے تو جھاڑو پھر جائے گا۔
شیخ رشید نے کہا کہ میں نے پہلے کہا تھا کہ حمزہ شہباز کا فیصلہ بہت اہم تھا، ملک کو اس بحران سے نکالیں اور انتخابات کروائیں، ملک میں بحران در بحران ہے۔ دونوں باپ بیٹے نے منحوس وقت میں حلف اٹھایا ہے، جب سے باپ بیٹے نے حلف اٹھایا ہے نہ یہ لوگ سکون میں ہیں نہ ملک سکون میں ہے۔
یہ اسحاق ڈار کے بجائے بل گیٹس کو بلالیں معیشت ان سے نہیں سنبھلے گی، عمران خان 3 سالوں سے کہتا رہا کہ یہ لوگ کرپٹ ہیں، غریب کے پاس مردے دفنانے کے پیسے نہیں بچے ہیں، غریب باہر نکلے گا تو ملک میں مزید بحران پیدا ہوگا، ملک تباہی کی طرف جارہا ہے، ملک کو بچانا ہے تو انتخابات کا اعلان کیا جائے۔
انہوں نے کہا کہ پنجاب سے زیادہ مرکز کی فکر ہے، مرکز بھی ان کے ہاتھ سے نکلتا جارہی ہے، موجودہ حالات کو اور کتنے دن دیکھتے رہیں گے۔