اسلام آباد: (ویب ڈیسک) سابق چیف جج گلگت بلتستان رانا شمیم نے فرد جرم چیلنج کر دی۔ رانا شمیم کی جانب سے فرد جرم کیخلاف انٹرا کورٹ اپیل اسلام آباد ہائیکورٹ میں دائر کی گئی۔
رانا شمیم کی جانب سے دائر انٹرا کورٹ اپیل میں موقف اپنایا گیا کہ جنہوں نے بیان حلفی چھاپا انہیں چھوڑکر مجھ پر فرد جرم لگانا غیر قانونی ہے، فرد جرم عائد کرنے کا حکم نامہ کالعدم قرار دے کر کیس ختم کیا جائے، کچھ ریکارڈ پر نہیں کہ میں نے کسی کو بیان حلفی چھاپنے کیلئے دیا۔

لاہور: (ویب ڈیسک) وزیراعلیٰ عثمان بزدار نے کہا ہے کہ وزیراعظم عمران خان نے مہنگائی کے خلاف ‘لانگ مارچ’ کا اعلان کر کے عوام کے دل جیت لئے، یہ ہے وہ تبدیلی جو کپتان لا رہا ہے۔
وزیراعلی پنجاب عثمان بزدار نے اپنے بیان میں کہا کہ پٹرول، ڈیزل اور بجلی سستی کر کے عوام کو حقیقی ریلیف دیا گیا ہے، پاکستان کی تاریخ میں پہلی بار پٹرول، ڈیزل اور بجلی کی قیمتوں میں ریکارڈ کمی کا اعزاز پی ٹی آئی حکومت کو حاصل ہوا ہے، پٹرول، ڈیزل اور بجلی سستی ہونے سے دیگر اشیاء ضروریہ بھی سستی ہوں گی۔
عثمان بزدار کا کہنا تھا کہ وزیراعظم عمران خان کی قیادت میں عوام کو مزید خوشخبریاں دیں گے، وزیراعظم کا خطاب عوام کے احساس کا آئینہ دار ہے، عمران خان ہی حقیقی عوامی لیڈر ہیں، وزیراعظم نے عوام کو ریلیف دینے کیلئے عملی اقدام کا اعلان کیا۔

لاہور: (ویب ڈیسک) محکمہ موسمیات کے مطابق آج بلوچستان اور پنجاب کے مختلف علاقوں میں بارش کا امکان ہے۔ گلگت بلتستان، کشمیر میں بھی ہلکی بارش اور پہاڑوں پر برفباری کی توقع ہے۔
موسم کا حال بتانے والوں نے آج پنجاب میں لاہور، سیالکوٹ مری، گلیات اور جنوبی پنجاب میں بارش کی پیشگوئی کی ہے۔ چترال، دیر، سوات میں بھی ہلکی بارش اور برف باری کا امکان ہے۔ کوئٹہ، ژوب، بارکھان میں بادل برسنے کی توقع ہے۔

اسلام آباد: (ویب ڈیسک) کورونا کی پانچویں لہر کے وار کم ہونے لگے۔ ملک میں چوبیس گھنٹے کے دوران مثبت کیسز کی شرح دو اعشاریہ دو نو فیصد ریکارڈ کی گئی۔ کورونا وائرس سے 18 افراد جاں بحق ہوگئے، جس کے بعد اموات کی تعداد 30 ہزار 196 ہوگئی۔ پاکستان میں کورونا کے تصدیق شدہ کیسز کی تعداد 15 لاکھ 10 ہزار 221 ہوگئی۔
نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 861 نئے کیسز رپورٹ ہوئے، پنجاب میں 5 لاکھ ایک ہزار 544، سندھ میں 5 لاکھ 68 ہزار 277، خیبرپختونخوا میں 2 لاکھ 16 ہزار 174، بلوچستان میں 35 ہزار 345، گلگت بلتستان میں 11 ہزار 499، اسلام آباد میں ایک لاکھ 34 ہزار 404 جبکہ آزاد کشمیر میں 42 ہزار 978 کیسز رپورٹ ہوئے۔
ملک بھر میں اب تک 2 کروڑ 65 لاکھ 2 ہزار 84 افراد کے ٹیسٹ کئے گئے، گذشتہ 24 گھنٹوں کے دوران 37 ہزار 566 نئے ٹیسٹ کئے گئے، اب تک 14 لاکھ 42 ہزار 938 مریض صحتیاب ہوچکے ہیں جبکہ 988 مریضوں کی حالت تشویشناک ہے۔
پاکستان میں کورونا سے ایک دن میں 18 افراد جاں بحق ہوئے، جس کے بعد وائرس سے مرنے والوں کی تعداد 30 ہزار 196 ہوگئی۔ پنجاب میں 13 ہزار 500، سندھ میں 8 ہزار 70، خیبرپختونخوا میں 6 ہزار 260، اسلام آباد میں ایک ہزار 13، بلوچستان میں 375، گلگت بلتستان میں 190 اور آزاد کشمیر میں 788 مریض جان سے ہاتھ دھو بیٹھے۔