سالانہ بنیادوں پر ملکی درآمدات میں 26 فیصد سے زائد کا اضافہ ہوا، حالیہ مالی سال میں تجارتی خسارہ 31 ارب سے تجاوز کر گیا۔ سالانہ بنیادوں پر غزائی اشیاء کی درآمدات میں بھی 54 فیصد کے قریب اضافہ ہو ا ہے۔
ادادہ شماریات نے سالانہ تجزیاتی رپورٹ جاری کر دی جس کے مطابق ملکی درآمدات میں 26.55 فیصد کا اضافہ ہوا۔ مالی سال 2021 میں درآمدات کا حجم 56 ارب 38 کروڑ ڈالر رہا۔ سالانہ بنیادوں پر ہی برآمدات میں 18.28 فیصد کا اضافہ ہوا۔ رپورٹ کے مطابق مالی سال 2021 میں برآمدات کا حجم 25 ارب 30 کروڑ 40 لاکھ ڈالررہا۔ حالیہ مالی سال تجارتی خسارہ 31 ارب 7 کروڑ 60 لاکھ ڈالر رہا جبکہ سالانہ بنیادوں پر غذائی اشیاء کی درآمدات 53.91 فیصد بڑھ گئیں۔
رپورٹ کے مطابق مالی سال 2021 میں 128 کروڑ ڈالر سے زائد کی چینی درآمد کی گئی، خشک میوہ جات کی درآمد میں 128.93 فیصد موبائل فونز کی درآمدات میں 50.75 فیصد کا اضافہ ہوا۔
مالی سال 2021 میں موبائل فونز کی درآمدات 2 ارب 6 کروڑ 50 لاکھ ڈالر رہیں جبکہ پاورپلانٹس کی مشینری کی درآمد میں 39.38 فیصد، کاروں کی درآمدات 134.20، ہیوی وہیکلز گاڑیوں کی درآمد میں 108.36 فیصد اضافہ ہوا جبکہ ایل این جی کی درآمد میں 1.69 فیصد کی کمی اور ٹیکسٹائل درآمدات میں سالانہ بنیادوں پر 52.84 فیصد کا اضافہ ہوا۔
ادارہ شماریات کی رپورٹ کے مطابق مالی سال 2020-21 میں پام آئل کی درآمد میں 44.91 فیصد اضافہ جبکہ صرف مالی سال 2021 میں سویابین 65.97 فیصد زائد درآمد کیا گیا۔
اسی طرح سے مالی سال 2020-21 میں چاول کی برآمدات میں 6.15 فیصد، باسمتی چاول کی برآمدات میں 27.29 فیصد کمی ہوئی۔ رپورٹ کے مطابق شمپنٹ کنٹینرز کی عدم دستیابی سے چاول کی برآمدات پر فرق پڑا۔ بھارت نے صورتحال کافائدہ اٹھاتے ہوئے کم قیمت پر چاول برآمد کئےجبکہ جیوگرافیکل انڈیکینش لاء کی وجہ سے باسمتی چاول کی برآمدمیں بہتری ہوئی۔

ایف آئی اے نے پشاورمیں کارروائی کے دوران انسانی سمگلنگ میں ملوث چار رکنی گروہ کو گرفتار کر لیا، سینکڑوں جعلی مہریں، افغانستان کے جعلی لائسنس اور دیگر دستاویزات برآمد کر لیں۔
ایف آئی اے کے مطابق پشاور کے علاقے قصہ خوانی جھنگی محلہ بازار میں کارروائی کی گئی جس کے دوران 4 ملزموں کو گرفتار کیا گیا، کارروائی کے دوران سینکڑوں جعلی مہریں، افغانستان کے جعلی لائسنس ، جعلی نکاح نامے، وزارت داخلہ کی جعلی مہریں، امیگریشن اور افغان وزارت تعلیم کی جعلی مہروں سمیت دیگر دستاویزات برآمد کی گئیں۔
حکام کے مطابق ملزمان جعلی امیگریشن کاغذات بنانے میں مصروف تھے، جعلی افغان دستاویزات سے سرحد پار کرائی جاتی تھی، گرفتار 3 ملزمان کا تعلق پشاور جبکہ ایک کا افغانستان سے ہے ،ایف آئی اے نے ملزمان کے خلاف مقدمہ درج کرتے ہوئےمزید تحقیقات شروع کردی ہیں۔

مالاکنڈ شہر اور گردونواح میں زلزلے کے جھٹکے محسوس کئے گئے جن کی شدت 5.3 ریکارڈکی گئی۔
بتایا گیا ہےکہ زلزلے کی گہرائی 180 کلو میٹر تھی جبکہ مرکز افغان تاجکستان بارڈر تھا۔ زلزلے سے کسی جانی و مالی نقصان کی اطلاع نہیں ملی۔

ٹانک اور میر علی میں دہشت گردوں کے خلاف آپریشن میں سکیورٹی فورسز کے 4 اہلکار شہید ہو گئے جبکہ آپریشن کے دوران 2 دہشت گرد بھی ہلاک ہوئے۔
پاک فوج کے شعبہ تعلقات عامہ آئی ایس پی آر کے مطابق دہشت گردوں کی موجودگی کی خفیہ اطلاع پر سکیورٹی فورسز نے ٹانک میں آپریشن کیا، آپریشن کے دوران 2 دہشت گرد ہلاک ہوئے جن کی شناخت شاہ زیب عرف ذاکر اور دانیال کے ناموں سے ہوئی۔
آئی ایس پی آر کے طابق آپریشن میں دہشت گردوں کے قبضے سے اسلحہ اور گولہ بارود بھی برآمد کیا گیا۔
شعبہ تعلقات عامہ کے مطابق سکیورٹی فورسز نے دہشت گردوں کی موجودگی کی اطلاع پر شمالی وزیرستان کے علاقے میر علی میں بھی آپریشن کر کے ایک دہشت گرد کو گرفتار کیا، گرفتار دہشت گرد کے قبضے سے اسلحہ اور گولہ بارود بھی تحویل میں لے لیا۔
آئی ایس پی آر کے مطابق دہشت گردوں سے مقابلے کے دوران 4 سکیورٹی اہلکار شہید ہوئے، شہدا میں بہاولنگرسے تعلق رکھنے والے حوالدار منور، لکی مروت کے سپاہی ذکاءاللہ، کوہاٹ سے تعلق رکھنے والے سپاہی فرحان اور ایبٹ آباد کے سپاہی شیراز شامل ہیں۔

ویمن ایکشن فورم نے خواتین اور پختون کلچر سے متعلق  وزیراعظم عمران خان کے اسلامی تعاون تنظیم (او آئی سی)کے اجلاس میں دیے گئے بیان کو دقیانوسی سوچ کا مظہر قرار دے دیا۔

ویمن ایکشن فورم نے کہا کہ ایسے بیان سے خواتین پر تشدد بڑھے گا، وزیراعظم  بیان واپس لیں۔

فورم نے مزید کہا کہ وزیراعظم عمران خان پاکستان اور افغانستان کی تمام خواتین اور پختون عوام سے معافی مانگیں  اور یہ وضاحت کریں کہ کلچر کی آڑ میں غیرت کے نام پر قتل، کارو کاری اور ونی جیسی دقیانوسی رسمیں غیر قانونی ہیں۔

کوئٹہ میں جناح روڈ پر واقع سائنس کالج کے مرکزی دروازے کے قریب دھماکا ہوا ہے، پولیس کے مطابق واقعے میں 3 افراد جاں بحق اور 12 زخمی ہوگئے۔

ریسکیو حکام کا کہنا ہے کہ زخمیوں اور لاشوں کو سول اسپتال منتقل کردیا گیا۔

پولیس اور سیکیورٹی فورسز نے علاقے کو گھیرے میں لے لیا اور غیر متعلقہ افراد کو اس مقام سے دور رکھا جارہا ہے۔ پولیس نے دھماکے کی نوعیت جاننے کیلئے تحقیقات شروع کردیں۔

عالمی مالیاتی ادارے (آئی ایم ایف) کے دباؤ پر پاکستان تحریک انصاف (پی ٹی آئی) کی وفاقی حکومت قومی اسمبلی میں پیش کیے جانے والے منی بجٹ میں کن کن اشیاء پر ٹیکس لگا رہی ہے، تفصیلات سامنے آ گئیں۔
مالیاتی ضمنی بل قومی اسمبلی میں پیش کی جانے والی تفصیلات کے مطابق مہنگائی کے سونامی میں عام شہری سر تک ڈوب گیا، منی بجٹ میں سب کچھ مہنگا ہو گیا، درآمدی کپڑے، جوتے، پرفیومز،جوس، بچوں کا دودھ اور میک اپ کا سامان پہنچ سے باہر ہو گئے، عام آدمی کی سواری بھی جیب پر بھاری ہو گئی، سائیکلوں پر دی گئی ٹیکس چھوٹ ختم کر دی گئی ہے۔ درآمد ی مشینری اور پاور جنریشن پارٹس پر سترہ فیصد سیلز ٹیکس کی تجویز ہے۔
دوسری طرف کھانے پینے کی 59 امپورٹڈ اشیا، بیکری اور برانڈڈ فوڈ آئٹمز پر جی ایس ٹی کی چھوٹ ختم کرنے کی تجویز سامنے آ گئی، ادویات کے خام مال اور 200 ڈالر سے مہنگے امپورٹڈ موبائل فونز اور جیولری پر سترہ فیصدٹیکس لگے گا، آیو ڈین ملے درآمدی نمک، مچھلی، چینی، لال مرچ پر بھی جی ایس ٹی عائد کرنے کی تجویز ہے، گاڑیوں کی رجسٹریشن فیس پر ایڈوانس ٹیکس میں سو فیصد اضافہ ہو گا، ہزار سی سی سے زائد گاڑیوں پر فیڈرل ایکسائز ڈیوٹی بڑھے گی، غیر ملکی ٹی وی ڈراموں پر بھی ٹیکس لگے گا۔
قومی اسمبلی میں پیش کیے جانے والے مالیاتی ضمنی بل کے مطابق قدرتی آفات کی مد میں ملنے والی ریلیف اشیا پر 17 فیصد سیلز ٹیکس دینا پڑے گا، درآمد سلائی مشین، ایکسپورٹ پراسیسنگ زون کی مشینری، درآمدی چکن پر 17 فیصد ڈیوٹی عائد ہو گی، سولر پینل، ونڈ ٹربائن، پرسنل کمپیوٹر اور لیپ ٹاپ بھی مہنگے ہونگے، سفارتخانوں کی جانب سے درآمد کی گئی اشیا پر بھی 17 فیصد سیلز ٹیکس لگانے کی تجویز ہے۔
اُدھر منی بجٹ میں 350 ارب روپے کے ریونیو کیلئے اقدامات تجویز کیے گئے ہیں، تازہ دودھ، گندم اور دالوں پر سیلز ٹیکس نہیں لگے گا، مرغی ، گوشت، گنا اور چینی کا خام مال بھی مستثنٰی ہوں گے، درسی کتب اور سٹیشنری پر بھی چھوٹ اور خصوصی اقتصادی زونز کے پلانٹ اور مشینری پر بھی ٹیکس نہیں لگے گا۔
وفاقی دارالحکومت اسلام آباد میں مختلف خدمات کی فراہمی پر 5 فیصد سیلز ٹیکس عائد کرنے کی تجویز دی گئی ہے، پرسنل کیئر،بیوٹی پارلر، کلینک، ٹور آپریٹر، ٹریول ایجنٹس، آٹو ورکشاپ اور انڈسٹریل مشینری ورکشاپ سروسز شامل ہیں، ہیلتھ کلب، جم،میرج ہال، لانز، شامیانہ اور کیٹرنگ سروسز پر بھی ٹیکس کی سفارش کی گئی ہے۔
دوسری جانب منی بجٹ میں بچوں کے لیے بری خبر ہے، امپورٹڈ اشیا پر سیلز ٹیکس 7 اور 12 سے بڑھا کر 17 فی صد کر دیا گیا ہے، امپورٹڈ چاکلیٹ مہنگی کرنے کی تجویز سامنے آئی ہے، امپورٹڈ ٹافیاں اور لالی پاپ بھی مہنگے کیے جائیں گے، امپورٹڈ مٹھائیاں اور جیلی پر بھی رعایتی سیلز ٹیکس ختم کیے جانے کی تجویز ہے، ان اشیاء پر پر سیلز ٹیکس 17 فیصد کیے جانے کی تجویز ہے، امپورٹڈ بچوں کا دودھ بھی مہنگا ہونے کی تجویز ہے، امپورٹڈ ساسیجز اور کیچ اپ پر بھی سیلز ٹیکس 17 فی صد کیے جانے کی تجویز ہے، امپورٹڈ بسکٹ، کیک اور بیکری آئٹمز پر سیلز ٹیکس 17 فیصد کیے جانے کی تجویز ہے، سائیکلیں بھی مہنگی ہونے کا امکان ہے، امپورٹڈ سائیکل پر سیلز ٹیکس کی رعایت ختم کردی گئی ہے۔

وفاقی حکومت نے ضمنی مالیاتی بل 2021 قومی اسمبلی میں پیش کردیا جس کیخلاف ایوان میں اپوزیشن نے بھرپور احتجاج کیا۔

قومی اسمبلی کا اجلاس جمعے کی صبح 11 بجے تک ملتوی کردیا گیا ہے۔ اجلاس کے بعد پریس کانفرنس کرتے ہوئے وفاقی وزیر خزانہ شوکت ترین نے کہا کہ ضمنی مالیاتی بل سے عوام پر بوجھ بڑھنے کی باتیں بے بنیاد ہیں۔

انہوں نے بتایا کہ مجموعی طور پر 343 ارب روپے کی ٹیکس چھوٹ ختم کی گئی جس میں سے مشینری پر 112 ارب کی ٹیکس چھوٹ ختم کی ہے، فارماسیوٹیکلز پر 160 ارب کی ٹیکس چھوٹ ختم کی ہے، باقی لگژری اشیاء کی درآمد پر 71 ارب روپےکی ٹیکس چھوٹ ختم کی ہے۔ مشینری اور فارما انڈسٹری پر ٹیکس ریفنڈ ہو سکےگا۔

ضمنی مالیاتی بل میں جن اشیاء اور خدمات پر جنرل سیلز ٹیکس (GST) کی شرح میں اضافے کی تجاویز پیش کی گئی ہیں وہ درج ذیل ہیں۔

ان اشیاء پر سیلز  ٹیکس کی شرح بڑھانے کی تجویز ہے

• بیکریوں، ریسٹورنٹ اور فوڈ چین پر سیلز ٹیکس کی شرح 17 فیصد کرنے کی تجویز ہے۔
• کیٹررز، ہوٹلز  اور  بڑے ریسٹورنٹس پر ٹیکس 7.5 فیصد سے بڑھا کر 17 فیصد کرنے کی تجویز ہے۔
• سیب کے علاوہ درآمدی پھلوں، سبزیوں پر 10 فیصد سیلز ٹیکس کی تجویز ہے۔
• پیکنگ میں فروخت ہونے والےدرآمدی مسالوں پر 17 فیصد سیلز ٹیکس کی تجویز ہے۔
• فلار  ملز  پر بھی 10 فیصد سیلز ٹیکس کی تجویز ہے جس سے آٹا بھی مہنگا ہوسکتا ہے۔
• ملٹی میڈیا ٹیکس بھی 10 فیصد سے بڑھا کر 17 فیصدکرنے کی تجویز ہے۔
• بیٹری پر ٹیکس 12 فیصد سے بڑھا کر 17 فیصد کرنے کی تجویز ہے۔
• ڈیوٹی فری شاپس پر بھی 17 فیصد سیلز ٹیکس عائد کرنے کی تجویز ہے۔
• درآمدی الیکٹرک کاروں پر سیلز ٹیکس 5 سے بڑھا کر 17 فیصد کرنے کی تجویز ہے۔
• ڈاک کے ذریعے  پیکٹ ارسال کرنے پر 17 فیصد سیلز ٹیکس کی تجویز ہے۔
• ادویات کےخام مال پر بھی 17 فیصد جنرل سیلز ٹیکس (جی ایس ٹی) لگانے کی تجویز ہے۔

7سالہ کمسن حسنین کے قتل کی لرزہ خیزواردات کا ڈراپ سین ہو گیا اوربچے کا حقیقی ماموں ہی قاتل نکلا۔
سی پی او گوجرانوالہ سید حماد عابد نے پریس کانفرنس کرتے ہوئے بتایا کہ تھانہ سٹی کامونکی کے علاقہ محلہ رسول نگر میں 7سالہ بچہ حسنین گلی میں کرکٹ کھیل رہاتھا کہ گیند ماموں کے گھر گر گئی ،بچہ گیند لینے ماموں کے گھر گیا تو ملزم قیصر نے اپنی بیوی اور ساس کے ساتھ مل کر بچے کو گلہ دبا کر قتل کر دیا اور نعش کو بوری میں بند کرکے کھیتوں میں پھینک دیا ۔
پولیس نے تحقیقات کا آغاز کیا اور ملزم قیصر سے تحقیقات کی تو ملزم نے دوران تفتیش اعتراف جرم کرتے ہوئے بتایا کہ ذاتی رنجش پر اس نے اپنی بیوی شیزہ اور ساس ریاض بی بی کے ساتھ مل کر بچے کوگلہ دبا کر قتل کیا اور نعش کو کھیتوں میں پھینک دیا ۔
سی سی پی او کا کہنا تھا کہ قاتلوں کو 8گھنٹوں کے اندر گرفتار کرنے پر بچے کے والدین نے پولیس کا شکریہ ادا کرتے ہوئے ملزمان کو کیفر کردار تک پہنچانے کا مطالبہ کیا ہے۔