لاہور (جنرل رپورٹر ) لاہور میں سموگ کے وار جاری، آلودگی نے شہر لاہور کو آلودہ ترین شہر بنا دیا، ایئر کوالٹی انڈیکس نے تمام ریکارڈ توڑ دئیے، شہر میں ایئر کوالٹی اندیکس 419 ریکارڈ کیا گیا۔پاکستان کے آلودہ شروں میں فیصل آباد 360 اے کیو آئی لیول کے ساتھ دوسرے نمبر پر ،اے کیو آئی لیول کیساتھ ساہیوال کا تیسرا اور کراچی کا دسواں نمبر ہے۔ بارشیں نہ ہونے کی وجہ سے لاہور کی فضا آلودہ ترین ہوگئی۔ گاڑیوں اور فیکٹریوں کے دھویں نے فضا میں سلفر، نائٹروجن اور کاربن ڈائی آکسائیڈ کی مقدار بڑھا دی ہے، جس سے شہریوں کیلئے کھلی فضا میں سانس لینا بھی دشوار ہوچکا ہے۔حکومت پنجاب نے اسموگ کو آفت قرار دے دیا ہے۔ ترجمان پنجاب حکومت حسان خاور نے اسموگ کو آفت قرار دیتے ہوئے کہا کہ اینٹی اسموگ اسکواڈ قائم کر دیا گیا ہے۔ انہوں نے کہا کہ صنعتی آلودگی پر بھی کبھی کوئی پالیسی نہیں بنائی گئی لیکن ہماری حکومت اس معاملے پر کام کر رہی ہے۔سموگ سکول کے بچوں پر بھی اثرانداز ہورہی ہے، بچے آنکھوں، سانس اور جلد کی بیماریوں میں مبتلا ہو رہے ہیں۔ اساتذہ نے سکولوں میں صبح کے وقت اوقات کار تبدیل کرنے کا مطالبہ کیا ہے۔ طلباکا کہنا ہے صبح کے وقت گلے میں خراش اور سانس لینے میں مشکل ہوتی ہے اور سموگ سے آنکھوں میں بھی ہر وقت خراش رہتی ہے۔دوسری جانب طبی ماہرین نے بھی خطرے کی گھنٹی بجا دی ہے۔ ای این ٹی سپیشلسٹ پروفیسر راشد ضیا کا کہنا ہے کہ سموگ کا مسئلہ وقت کیساتھ ساتھ سنگین ہوتا جا رہا ہے۔ شہری احتیاتی تدبیر پر عمل کریں۔ سموگ کے دوران شہری بے جا گھروں سے نکلنے سے گریز کریں۔

پاکستان نے دنیا بھر سے سکھ یاتریوں کو بابا گرونانک کے یوم پیدائش پر ہونے والی تقریبات میں شرکت کی خصوصی اجازت دے دی ہے۔
تفصیلات کے مطابق بابا گرو نانک کا 552 واں یوم پیدائش 17 سے 26 نومبر تک منایا جا رہا ہے، پاکستان نے دنیا بھر سے سکھ یاتریوں کو تقریبات میں شرکت کی خصوصی اجازت دے دی ہے، بھارت، امریکا، برطانیہ، افغانستان اور کینیڈا اور دیگر ممالک سے سکھ یاتری تقریبات میں شرکت کریں گے۔
افغانستان سے سکھ طورخم بارڈر کے راستے پاکستان پہنچے ہیں، دس سکھ یاتری طورخم کے رستے پاکستان میں داخل ہوئے، سکھ یاتریوں میں 4 مرد اور 6 خواتین شامل ہیں، سکھ یاتریوں کا پاکستانی حکومت کا شکریہ ادا کرتے ہوئے کہا کہ پاکستان نے ہمیشہ سکھ برادری کے مذہبی جذبات کا خیال رکھا، سکھ برادری کو ہمیشہ مذہبی رسومات ادار کرنے کی اجازت دی گئی۔
دوسری طرف بھارتی سکھ یاتری 17 نومبر کو واہگہ بارڈر کے راستے پاکستان پہنچیں گے، تقریبات کے دوران سکھ یاتری دربار کرتارپور صاحب بھی جائیں گے۔

وزیراعظم عمران خان نے کہا ہے کہ پاکستان کا ہر شہری عاشقِ رسول ﷺ ہے، عشقِ رسول کا سب سے بڑا ثبوت نبی ﷺکی سیرت پر عمل کرنا ہے۔
وزیراعظم عمران خان کی زیر صدارت رحمتہ اللعالمین اتھارٹی کا جائزہ اجلاس ہوا، اجلاس میں اتھارٹی کے قیام پر پیش رفت سے آگاہ کیا گیا۔
بریفنگ کے دوران بتایا گیا کہ اتھارٹی کیلئے جامع میڈیا پلان آئندہ ہفتے پیش کر دیا جائے گا، جدید طریقہ کار سے نوجوانوں اور بچوں کی سیرتِ طیبہ ﷺ کی روشنی میں کردار سازی پر توجہ مرکوز کی جائے گی، بین الاقوامی سطح پر سیرت کے حوالے سے شعور اجاگر کرنے اور اسلاموفوبیا کا سدِ باب کرنے کیلئے سفارتخانوں کو آن بورڈ لیا جائے گا، یونیورسٹیز اور سکولز کے نصاب میں بھی سیرتِ طیبہ کی روشنی میں اخلاقیات کی تدریس شامل کی جائے گی، اسلام اور سائنس میں ہم آہنگی کو اجاگر کرنے کیلئے تحقیق اور اقدامات بھی اتھارٹی کے مقاصد میں شامل ہیں۔
اس موقع پر وزیراعظم کا کہنا تھا کہ ریاستِ مدینہ اصول پسندی اور اخلاقیات کا عملی نمونہ تھی، میثاقِ مدینہ انسانی حقوق کا محافظ تھا، اسلامی معاشرہ اپنے دور کا سب سے جدت پسند معاشرہ تھا، صوفیاء کرام نے سیرت کی روشنی میں مقامی لوگوں کو ان کی زبان میں دین کی تعلیمات فراہم کیں۔
عمران خان نے کہا کہ مذہبی تہواروں کو کردار سازی کا ذریعہ بنانے پر زور دیا جائے گا، جامعات میں تحقیق اور غورو فکر سے سیرت کے اہم پہلوؤں کو اجاگر کیا جائے گا، پاکستان کا ہر شہری عاشقِ رسول ﷺ ہے، عشقِ رسول کا سب سے بڑا ثبوت نبی ﷺکی سیرت پر عمل کرنا ہے۔

اسلام آباد: سابق چیف جسٹس آف پاکستان میاں ثاقب نثار پر الزامات کے بعد اٹارنی جنرل خالد جاوید خان نے غیر ملکی دورہ منسوخ کر دیا۔

تفصیلات کے مطابق گلگت بلتستان کے سابق چیف جج رانا شمیم کی جانب سے سابق چیف جسٹس ثاقب نثار پر الزامات سامنے آنے کے بعد وزیر اعظم عمران خان کی ہدایت پر اٹارنی جنرل خالد جاوید خان نے اپنا غیر ملکی دورہ منسوخ کر دیا ہے۔

اٹارنی جنرل نے بتایا کہ اس معاملے کی حساسیت کو دیکھتے ہوئے وزیر اعظم کی ہدایت پر دورہ منسوخ کر لیا ہے۔

اٹارنی جنرل خالد جاوید کل اسلام آباد ہائی کورٹ میں پیش ہوں گے، انھیں اس کیس کے سلسلے میں عدالت نے ذاتی حیثیت میں پیش ہونے کی ہدایت کی ہے۔

خالد جاوید خان کو آج رات سرکاری دورے پر بیرون ملک روانہ ہونا تھا، اٹارنی جنرل نے بین الاقوامی قانونی معاہدے کے لیے بیرون ملک جانا تھا۔

واضح رہے کہ جسٹس ریٹائرڈ رانا شمیم نے ایک حلف نامہ دیا ہے کہ اُس وقت کے چیف جسٹس ثاقب نثار نے ہائی کورٹ کے جج کو فون پر کہا تھا کہ 2018 کے انتخابات تک نواز شریف اور مریم نواز کو جیل میں رہنا چاہیے۔

دوسری جانب رانا شمیم کا یہ بیان حلفی نوٹرائز کرنے والے برطانیہ کے چارلس ڈراسٹن نے اے آر وائی نیوز سے گفتگو کرتے ہوئے کہا کہ میرا وہی کام ہے جو کسی نوٹری پبلک کا ہوتاہے، رانا شمیم نے جو کہا وہ بیان نوٹرائز کیا، رانا شمیم کا حلف نامہ سچ ہے یا جھوٹ، ہمارا کام نہیں۔

اسلام آباد ہائی کورٹ نے اس پر رانا شمیم کو توہین عدالت کا نوٹس جاری کرتے ہوئے تمام فریقین کو کل 10 بجے ذاتی حیثیت میں طلب کر لیا ہے۔

اسلام آباد ہائی کورٹ نے اٹارنی جنرل خالد جاوید خان سمیت چیف ایڈیٹر میر شکیل الرحمان اور دی نیوز کے ایڈیٹر عامر غوری اور انصار عباسی کو بھی نوٹسز جاری کر دیے۔

وفاقی وزیر منصوبہ بندی و ترقی اسدعمر نے کہا ہے کہ عمران خان اورحکومت پرجیسی تنقیدہوتی ہے دنیا میں ‏ایسا کہیں نہیں ہوتا ہمیں آزاد میڈیا اور اپوزیشن سےکوئی ڈر نہیں ہے۔

قومی اسمبلی میں اظہارِ خیال کرتے ہوئے اسدعمر نے کہا کہ ہمیں ہاتھ اٹھانےکی ضرورت نہیں ہے اپوزیشن کو ‏سیاسی مار خود پڑ رہی ہے میڈیامیں پی ڈی ایم کےسہولت کار بیٹھےہیں جن کاعوم کوپتہ ہے، 2023 کا انتظار ‏کریں دوسرے راستوں کو اختیار نہ کریں۔

انہوں نے کہا کہ مولانافضل الرحمان دھرنا لےکر آئےدعوےکیےاور پھر ناکام لوٹے دوسرے دھرنےکے وقت کارکنان ‏پوچھتے رہ گئےہمارا لیڈر کہاں ہے؟ کارکنان نےکہا سانوں نہروالے پل تے بلا کے سونڑا ماہی کتھے رہ گیا، سونڑا ‏ماہی اسلام آباد میں کارکنان کو بلاکرخودکراچی میں بیٹھارہا۔

اسدعمر نے کہا کہ ہمارےہاں نئی بیماری آئی ہےسردی میں پی ڈی ایم آتی ہےپھرچلی جاتی ہے، خواجہ آصف نے ‏مطالبہ کیاکہ سیاستدانوں کو ایک دوسرےکا خیال رکھناچاہیے ماضی میں باریاں لگی ہوئی تھیں،کہاجاتاتھامنہ نہ ‏کھلوائیں کتنی چوری کی ایک دوسرےکیخلاف تقریرکی جاتی تھی اورچوریاں چھپائی جاتی تھیں۔

ان کا کہنا تھا کہ عمران خان اسی مک مکےکو ختم کرنےکیلئےآیا اور اب مک مکا نہیں ہوگا وہ وقت بھی یاد ‏ہےجب ججز فون کر کے پوچھتے تھےمیاں صاحب کیافیصلہ لکھو۔

اسلام آباد: سابق چیف جسٹس گلگت بلتستان سپریم کورٹ رانا شمیم نے ٹیلیفونک گفتگو کرتے ہوئے کہا کہ صحافی انصار عباسی سے کی گئی تمام باتوں پر قائم ہوں، حلف نامہ کب اور کس کو دیا یہ ابھی نہیں بتا سکتا۔ اس واقعے کے وقت سابق چیف جسٹس ثاقب نثار گلگت میں میرے مہمان تھے میں نے ان کے آنے پر کوئی سرکاری خرچ نہیں کیا تھا۔

رانا شمیم نے کہا کہ ثاقب نثار کون ہوتے ہیں مجھے ایکسٹینشن دینے والے، مجھے توسیع مانگنے کی کوئی ضرورت محسوس ہی نہیں ہوئی، ان کے پاس قانون کے مطابق مجھے ایکسٹینشن دینے کا اختیار ہی نہیں، کیونکہ گلگت بلتستان اور آزاد کشمیر کی سپریم کورٹس میں چیف جسٹس کو ایکسٹینشن دینا وزیراعظم کا اختیار ہے، گلگت بلتستان اور آزاد کشمیر کی سپریم کورٹس سپریم کورٹ آف پاکستان کے ماتحت نہیں۔

واضح رہے کہ ایک معروف صحافی نے خبر دی ہے کہ گلگت بلتستان کے سابق چیف جسٹس رانا ایم شمیم نے حلف نامہ جمع کرایا ہے کہ چیف جسٹس پاکستان ثاقب نثار نے ہائی کورٹ کے ایک جج کو حکم دیا تھا کہ 2018ء کے عام انتخابات سے قبل نواز شریف اور مریم نواز کو ضمانت پر رہا نہ کیا جائے۔

گلگت بلتستان کے سینئر ترین جج کا پاکستان کے سینئر ترین جج کے حوالے سے حلفیہ بیان کا متن سامنے آگیا۔

نوٹرائزڈ حلف نامے پر سابق چیف جسٹس گلگت بلتستان کے دستخط اور ان کے شناختی کارڈ کی نقل منسلک ہے۔ دستاویز کے مطابق، شمیم نے یہ بیان اوتھ کمشنر کے روبرو 10 نومبر 2021ء کو دیا ہے۔

اپنے حلفیہ بیان میں لکھا ہے کہ ”میاں محمد نواز شریف اور مریم نواز شریف عام انتخابات کے انعقاد تک جیل میں رہنے چاہئیں۔ جب دوسری جانب سے یقین دہانی ملی تو وہ (ثاقب نثار) پرسکون ہو گئے اور ایک اور چائے کا کپ طلب کیا“۔