حکومت نے ایوان بالا یعنی سینیٹ سے صحافیوں کے تحفظ سمیت متعدد بلز اپوزیشن کے شور شرابے میں منظور کروا لیے۔

وفاقی وزیر برائے انسانی حقوق شیری مزاری کی جانب سے صحافیوں کے تحفظ کا بل سینیٹ میں پیش کیا گیا، صحافیوں سے متعلق بل کے حق میں 35 اور مخالفت میں 29 ووٹ آئے۔

صحافیوں کے تحفظ کا بل سینیٹ میں پیش کرنے کی تحریک پر دلاور خان گروپ نے بھی حکومت کے حق میں ووٹ دیا۔

حکومت کی جانب سے صحافیوں کے تحفظ کے بل کو اضافی ایجنڈے کے طور پر پیش کیا گیا جس پر اپوزیشن کی جانب سے شدید احتجاج کیا گیا اور ربڑ اسٹیمپ پارلیمنٹ نامنظور کے نعرے لگائے گئے۔

وزیراعظم عمران خان نے بابا گرو نانک کے 552 ویں جنم دن پر دنیا بھر کی سکھ کمیونٹی کو مبارکباد دی۔ وزیراعظم عمران خان نے سماجی رابطے کی ویب سائٹ پر ٹویٹ کرتے ہوئے کہا کہ اس مبارک موقع پر ہم ہزاروں سکھوں کو پاکستان میں ان کے مذہبی مقامات کا دورہ کرنے کے لیے خوش آمدید کہتے ہیں، مذہبی رسومات کی ادائیگی میں حکومت انہیں سہولت فراہم کرتی رہے گی۔ دوسری جانب وزیراعلیٰ پنجاب عثمان بزدار نے سکھ برادری کو باباگرونانک جی کے 552 ویں جنم دن پر مبارکباد دیتے ہوئے کہا کہ بابا گورونانک کا جنم دن سکھ برادری کے لئے خوشیوں بھرا تہوار ہے، سکھ برادری کو پنجاب آمد پر جی آیاں نوں کہتے ہیں، ہر سال سکھ برادری کی مہمان نوازی کر کے دلی خوشی ہوتی ہے۔ عثمان بزدار کا کہنا تھا کہ پنجاب حکومت نے سکھ برادری کو بابا گو رونانک کے جنم دن کی تقریبات میں شرکت اور مذہبی رسومات کی ادائیگی کیلئے بہترین سہولیات فراہم کی ہیں، ایک دوسرے کی خوشیوں میں شریک ہونے سے بھائی چارے، یگانگت اور یکجہتی کو فروغ ملتا ہے، بابا گورونانک نے امن و آتشی، اخوت، بھائی چارے اور محبت کا پیغام دیا۔ وزیراعلیٰ پنجاب نے کہا کہ بابا گرو نانک مذہبی رواداری اور بین المذاہب ہم آہنگی کی بہترین مثال تھے، کرتار پور رہداری کا قیام پاکستان تحریک انصاف کی حکومت کا تاریخی کارنامہ اور سکھ برادری کیلئے تحفہ ہے، کرتار پور راہداری بننے سے سکھ برادری کی خوشیاں دوبالا ہوگئی ہیں، پنجاب سمیت پاکستان میں سکھ برادری کے مقدس مقامات موجود ہیں۔ عثمان بزدار نے مزید کہا کہ سکھ برادری کو اپنے عقائد کے مطابق زندگی بسر کرنے کی مکمل آزادی ہے، سکھ برادری کے گوردواروں کی دیکھ بھال، تزئین و آرائش اور سکیورٹی پر خصوصی توجہ دی گئی ہے، سکھ برادری سمیت اقلیتوں کی فلاح و بہبود حکومت کی ترجیحات میں شامل ہے، اقلیتوں کو بنیادی حقوق کی فراہمی اور ان کے جان و مال کا تحفظ ریاست کی ذمہ داری ہے، پاکستان تحریک انصاف کی حکومت نے اقلیتوں کے حقوق کے تحفظ کو یقینی بنایا ہے

پاکستان مسلم لیگ (ن) اور جماعت اسلامی نے حکومت پر کڑی نکتہ چینی کرتے ہوئے کہا ہے کہ گزشتہ روز جمہوریت کی روح کو مجروح کیا گیا کیونکہ حکمران خود کو قانون سے بالاتر سمجھتے ہیں۔
پاکستان مسلم لیگ (ن) کے مرکزی صدر میاں شہباز شریف نے کہا کہ گزشتہ روز ہونے والا پارلیمنٹ کا مشترکہ اجلاس ملکی تاریخ کا بدتر تصور کیا جائے گا۔
قومی اسمبلی میں قائد حزب اختلاف میاں شہباز شریف نے کہا کہ حکومتی طرز عمل سے جمہوریت کی روح کو مجروح کیا گیا۔
انہوں نے استفسار کیا کہ کیا حکومت دھاندلی کے نظام کی کوشش کر کے خود کو عوام کے غضب سے بچا سکے گی؟
امیر جماعت اسلامی پاکستان سراج الحق نے بھی ارباب اقتدار پر کڑی نکتہ چینی کرتے ہوئے کہا کہ حکمران اپنے آپ کو قانون سے بالاتر سمجھتے ہیں۔ انہوں نے کہا کہ مشترکہ اجلاس میں حکومت نے 7/8 ووٹوں کی اکثریت سے پورا نظام بلڈوز کردیا۔
انہوں نے کہا کہ پی ٹی آئی نے کبھی بھی اپوزیشن سے مشاورت نہیں کی اور بڑی اپوزیشن جماعتوں نے ہرمعاملے میں پی ٹی آئی کا ساتھ دیا۔
امیر جماعت اسلامی پاکستان سراج الحق نے کہا کہ ایوان میں مفادات پر لڑائی ہوتی ہے اور عوام کی کسی کو فکر نہیں ہے۔ ان کا کہنا تھا کہ پی ٹی آئی، ن لیگ اور پیپلزپارٹی کا مقصد ذاتی مفادات کا تحفظ ہے

تحریک لبیک پاکستان کے ساتھ معاہدے کے معاملے پر حکومت پنجاب نے معاہدے کے تمام نکات پر عمل کردیا۔
سیٹئرنگ کمیٹی کے آج رات کے اجلاس میں حکومت پنجاب حتمی رپورٹ پیش کرے گی، معاہدے کے تحت تحریک لبیک کانام کالعدم تنظیم کی لسٹ سے نکالاگیا، تحریک لبیک پاکستان کے سربراہ سعد رضوی کو رہا کیا گیا۔ معاہدے کے تحت تحریک لبیک کے رہنماوں اورکارکنوں کے نام فورتھ شیڈول سے نکالے گئے۔
صوبائی وزیر قانون راجہ بشارت کا کہنا ہے کہ حکومت پنجاب نے گرفتار افراد کو معاہدے کے تحت رہا کیا، معاہدے کے تمام نکات پر عمل کر دیا ہے ، یہ اقدامات ملک کے وسیع تر مفاد عوام کے جان و مال کے تحفظ کے لئے کئے گئے، امید ہے حکومت پنجاب کے ان اقدامات کومثبت انداز میں لیاجائے گا، دوسری جانب سے ایک ذمہ دارانہ طرزعمل سامنے آئے گا

الیکٹرانک ووٹنگ مشین کے استعمال سے متعلق قانون کی منظوری کے باوجود الیکشن کمیشن آئندہ عام انتخابات میں اس کے استعمال سے متعلق کنفیوژن کا شکار ہے۔
پارلیمنٹ ہاؤس اسلام آباد میں قومی اسمبلی کی قائمہ کمیٹی قانون و انصاف کا اجلاس ہوا جس میں سیکرٹری الیکشن کمیشن عمر حمید خان بھی شریک ہوئے۔ اجلاس کے دوران اراکین نے الیکشن کمیشن حکام سے آئندہ عام انتخابات میں الیکٹرانک ووٹنگ مشین کی استعمال سے متعلق سوالات کیے۔
اپوزیشن رکن اسمبلی عالیہ کامران نے سوال اٹھایا کہ بلوچستان میں حلقہ بندیاں کسے ہوں گی؟ بلوچستان کے عوام مشکل سے ووٹ کاسٹ کر پاتے ہیں، جہاں انٹرنیٹ نہیں ہے وہاں ای وی ایم مشین کیسے استعمال ہو گی؟، حکومتی اراکین پارلیمنٹ نے کہا کہ پارلیمنٹ سپریم ہے، الیکشن کمیشن کو بلا تاخیر قانون پر عمل درآمد کی تیاری کرنی چاہیے۔
سیکریٹری الیکشن کمیشن عمر حمید خان نے کہا الیکٹرانک ووٹنگ مشین کا استعمال آئندہ عام انتخابات میں ہوگا یا نہیں، ابھی کچھ نہیں کہہ سکتے، ای وی ایم کے استعمال میں چیلنجز درپیش ہیں، آئندہ عام انتخابات میں ای وی ایم کے استعمال سے پہلے مشین کی خریداری اور عملہ کی ٹریننگ سمیت 14 مراحل سے گزرنا ہوگا، ای وی ایم کے استعمال سے متعلق مزید 3 سے 4 پائلٹ پراجیکٹ کرنا پڑیں گے، ایک پولنگ اسٹیشن پر کتنی الیکٹرانک ووٹنگ مشینیں ہوں گی، اس کا تخمینہ لگانا بھی باقی ہے۔

اسلام آباد میں بلاول بھٹو زرداری سے پیپلز پارٹی خیبرپختونخوا کی صوبائی قیادت نے ملاقات کی۔ اس موقع پر خیبر پختونخوا کی سیاسی صورت حال اور بلدیاتی انتخابات کے حوالے سے تبادلہ خیال کیا گیا، صوبائی قیادت نے بلاول بھٹو زرداری کو نومبر کو نوشہرہ اور 30 نومبر کو پشاور میں ہونے والے جلسوں کی تفصیلات سے آگاہ کیا۔ پیپلز پارٹی کی صوبائی قیادت نے بلاول بھٹو زرداری کو بتایا کہ انتظامیہ نے پشاور میں جلسے کی اجازت نہیں دی جب کہ نوشہرہ میں جلسے کے حوالے سے رکاوٹیں کھڑی کی جارہی ہیں۔
بلاول بھٹو زرداری نے کہا کہ پاکستان پیپلزپارٹی کی حکومت مخالف مہم سے حواس باختہ ہوکر پی ٹی آئی ہمارے جلسے روکنے کی کوشش کررہی ہے، پی ٹی آئی کو جو کرنا ہے کرلے، پشاور اور نوشہرہ میں جلسے ہر صورت میں ہوں گے، اگر خیبرپختونخوا میں حکومتی جماعت کے جلسے ہوسکتے ہیں تو پاکستان پیپلزپارٹی کے جلسے کیوں نہیں ہوسکتے،
چیئرمین پیپلز پارٹی نے صوبائی قیادت کو ہدایت کی کہ انتظامیہ کی جانب سے اجازت ملے یا نہ ملے، تمام رکاوٹوں کے باوجود نوشہرہ اور پشاور میں جلسے منعقد کریں، جلسوں پر پابندی کی آڑ میں عوام اور جیالوں کو ہراساں کرنے کی کوشش کی گئی تو دمادم مست قلندر ہوگا، بلدیاتی انتخابات کے حوالے سے بھی عوامی رابطہ مہم کو مزید تیز کیا جائے۔

ترجمان دفترخارجہ کا کہنا ہے کہ مقبوضہ کشمیرمیں بھارتی اقدامات یکطرفہ اورغیرقانونی ہیں۔
ترجمان دفترخارجہ عاصم افتخارکا ہفتہ وارمیڈیا بریفنگ میں کہنا تھا کہ پاکستان مقبوضہ کشمیرمیں بھارتی رویے کومستردکرتا ہے۔مقبوضہ وادی میں بھارتی اقدامات یکطرفہ اورغیرقانونی ہیں۔ بھارت نے گزشتہ2روزمیں 9کشمیریوں کوشہید کیا۔
ترجمان کاکہنا تھا کہ امریکی مذہبی آزادیوں کے کمیشن کی رپورٹ میں امریکی اسٹیٹ ڈیپارٹمنٹ نے بھارت میں مذہبی آزادیوں اور اقلیتوں کی حالت زار کو نظر انداز کیا ۔ بھارت میں آر ایس ایس اور بی جے پی حکومت کے ساتھ مل کر مذہبی آزادی سلب کر رہے ہیں۔
ترجمان کا کہنا تھا کہ بھارت خطے کوملٹرائزڈ کررہا ہے۔ روس کی جانب سے بھارت کو مہیا کیے جانے والے 5 میں سے پہلے ایس 400 میزائل سسٹم کی فراہمی کی رپورٹس دیکھی ہیں۔
بھارت کی جانب سے افغانستان کو گندم بھجوانے پروزیر اعظم آفس کا بیان واضح ہے۔پاکستان اس معاملے کوانسانی ہمدردی کی بنیاد پردیکھ رہا ہے۔
ترجمان دفترخارجہ کا کہنا تھا کہ کرتار پور راہداری کھولنے کے حوالے سے تمام دباؤ بھارت پر تھا
یہی وجہ ہے کہ آخری لمحات میں بھارت نے پاکستان کو کرتار پور راہداری کھولنے سے مطلع کیا۔پاکستان نے قلیل مدت کے نوٹس پرگزشتہ روز کرتارپورراہداری کھولی۔
ترجمان نے مزید کہا کہ امریکا کے ساتھ ائیر لائنز آف کمیونیکیشن کا معاہدہ مختلف صورتحال میں کیا گیا تھا تاہم اب زمینی صورتحال و حقائق تبدیل ہو چکے ہیں۔
ایتھوپیا میں 200 کے قریب پاکستانی مقیم ہیں وہاں کی صورتحال کوقریب سے دیکھ رہے ہیں۔ ہمارے مشن اور سفارت خانہ ان سے رابطہ میں ہے۔سفارت خانے نے اس حوالے سے ایک رابطہ ٹیلی فون نمبر بھی جاری کیا ہے۔