لاہور (مہران اجمل خان سے )جناح ہسپتال میں نئے تعینات ہونے والے میڈیکل سپرنٹنڈنٹ نے گزشتہ دنوں خبریں اور چینل ۵ کی نشاندہی پر محکمہ اینٹی کرپشن پنجاب کے تعاون سے پکڑی جانے والی کروڑوں روپے مالیت کی ہیپاٹائٹس بی اور سی کی زائد المعیاد ادویات پر ایکشن لیتے ہوئے نئی کمیٹی تشکیل دے دی۔ جو اس بات کا فیصلہ کرے گی کہ ہیپاٹائٹس بی اور سی کی ادویات کس نے خرید یں اور کس کے کہنے پر خریدیں گئیں۔ اتنی بڑی مقدار میں ہیپاٹائٹس کی دوائی کی ڈیمانڈ کس نے کی اور اتنی بڑی مقدار میںدوائی کیوں منگوائی گئی۔ بھاری مقدار میں ادویات زائد المعیاد ہونے کے باوجود میڈیسن سٹور کو واپس کیوں نہیں کی جاسکی۔ کیا ہیپاٹائٹس کلینک والوں نے متعلقہ ڈیپارٹمنٹ والوں کو ہیپاٹائٹس بی اور سی کی زائد المعیاد ادویات بارے آگاہ کیا تھا یا نہیں اور مستقبل میں ادویات کو زائد المعیاد ہونے سے بچانے کےلئے تین رکنی کمیٹی اپنی سفارشات بھی مرتب کرے گی۔ ایم ایس جناح ہسپتال کی جانب سے جاری ہونے والے لیٹر کے مطابق تین رکنی کمیٹی کے چیئرمین ایسوسی ایٹ پروفیسر ڈاکٹر در محمد بنائے گئے ہیں جبکہ فوزیہ حسنین ڈپٹی ڈرگ کنٹرولر اور ڈاکٹر خالد مقصود ڈی ایم ایس کمیٹی کے ممبر ہوں گے۔محکمہ صحت ذرائع کے مطابق کوئی بھی سرکاری ہسپتال جب کسی کمپنی سے ادویات خریدتا ہے تو میڈیسن کمپنی اس بات کی پابند ہوتی ہے کہ زائدالمعیاد ادویات وہ واپس لے گی اور اس کے بدلے میں نئی ادویات دے گی مگر جناح ہسپتال میں کروڑوں روپے کی ادویات زائد المعیاد ہونے کے باوجود نہ توکمپنی کو واپس کی گئیں اور نہ ہی محکمہ صحت کے اعلیٰ افسران کو اس بارے آگاہ کیا گیا۔ یاد رہے کہ چند روز قبل خبریں اور چینل ۵ نے جناح ہسپتال میں میگا کرپشن اسکینڈل بے نقاب کیا تھا جس میں محکمہ اینٹی کرپشن نے کاروائی کرتے ہوئے جناح ہسپتال ہیپاٹائٹس کلینک میں چھاپے کے دوران کروڑوں مالیت کی ”کویرا 0.5ملی گرام ، ریبیجن 4سو ملی گرام “ لاکھوں زائد المیعاد گولیاں موقع سے برآمد کی تھیں۔ہیپاٹائٹس کلینک میں موجود ڈاکٹرز مختلف نجی کمپنیوں سے مک مکا کر کے ان کی ادویات مریضوں کو لکھ کر د ے رہے تھے۔ قائمقام میڈیکل سپرنٹنڈ نٹ جناح ہسپتال ڈاکٹر افتخار نے خبریں سے گفتگو کرتے ہوئے کہا کہ وزیر اعظم پاکستان عمران خان کے ویڑن کے مطابق کرپشن کو ملک سے ختم کرنا ہے۔ خبریں اور چینل ۵ کی جانب سے ہیپاٹائٹس ادویات کی نشاندہی کرنے پر ان کے مشکور ہیں۔ انہوں نے کہا کہ صوبائی وزیر صحت پنجاب یاسمین راشد کی جانب سے انہیں مینڈیٹ دیا گیا ہے جس پر وہ مکمل طور پر پورا اتریں گے۔

لاہور(مانیٹرنگ ڈیسک) لیگل ایڈوائزرآغا باقر نے کہا ہے کہ لودھراں میں پولیس نے ماموں ممتاز اور اعجاز کے ساتھ صلح نہ کرنے والے غریب رکشہ ڈرائیور شفیق کو نقص امن کے کیس میں جیل بھیج دیا شفیق کے معصوم بچے جو پہلے ہی ماں سے محروم ہیں پولیس کو بالکل ترس نہ آیا اس نے پولیس میں درخواست دے رکھی تھی کہ ماموں چاہتے تھے میں اپنی بیوی کو طلاق دے دو ں نہ دینے پر میری بیوی کو زہریلا دودھ پلا کر مار دیا صلح نہ کرنے پر پولیس نے الٹا شفیق کو ہی پکڑ لیا ماموں ممتاز کی ضمانت ہو گئی شفیق کے پاس وکیل کے پیسے نہ تھے لہذا وہ جیل چلا گیا۔چینل فائیو کے پروگرام ہیومین رائٹس واچ میں گفتگو کرتے ہوئے انہوں نے کہا کہ پولیس کا فرض تھا شفیق کے ماموں کو گرفتار کرتی لیکن ایسا نہیں کیا۔جس میں پولیس کی بدنیتی صاف ظاہر ہے حالانکہ ادارے پابند ہیں عوام کو ان کا حق دلائیں۔شفیق کے پاس وکیل کرنے کی استطاعت نہیں تھی تو حکومت وکیل مہیا کرتی تھانے میں درخواست پر پولیس کا فرض تھا کارروائی کرتی ستم یہ ہے ممتاز اور اعجاز کی ضمانت ہو گئی لیکن شفیق بے چارہ جیل چلا گیا کسی کو بغیر سنے سزا نہیں دی جا سکتی ہر ایک کو مرضی کا وکیل کرنے کا حق ہے پولیس بھی اگر شفیق کو چاہتی تو اس کی ضمانت ہو سکتی تھی شفیق بے چارے کو تو وکیل ہی نہیں ملا۔شفیق کے چھوٹے چھوٹے بچے ہیں۔ازل سے انسان میں لالچ بھی ہے ایسے واقعات ختم تو نہیں ہو سکتے لیکن اگر ادارے کام کریں توکم ضرور ہو سکتے ہیں۔ لائیو الر کی کال پر انہوں نے بتایا کہ کوئی غیر قانونی طور پر اگر کسی کی جائیداد پر قبضہ کر لے تو ایس ایچ او واگزار کرانے کا ذمہ دارہے۔جس کی جائیداد پر قبضہ ہو وہ پوری تفصیل بتایا کرے۔بہرحال ہمارا پینل مظلوموں کی مدد کے لئے تیار ہے۔فری وکیل مہیا کرنے والی تنظیمیں موجود ہیں لیکن جیسے عوام کے لئے کام کرنا چاہئے نہیں کرتے۔۔لوگوں کی آواز سنی جائے تو مسائل حل ہوں گے۔ حل نہ ہو تولوگ مایوس ہو کر خود کشی کر لیتے ہیں۔کھلی کچہری میں بھی یکطرفہ دستخط ہوتے تھے۔درمیان کا سسٹم فیل ہونے سے درخواست وزیراعظم کو چلی جائے تو دستخط ہونے کی صورت میں یکطرفہ کارروائی ہو جاتی ہے۔حالانکہ کہ ادارے مضبوط ہوں تو نوٹس لینے کی ضرورت ہی نہیں۔پولیس پر لوگوں کا اعتماد نہیں۔ ہیومین رائٹس واچ میں آنے والے کیسز پر کام ہوا اور بڑے اچھے نتائج برآمد ہوئے ہیں۔سوئے ہوئے اداروں نے اپنا کام کیا۔سینئر صحافی ضیائ شاہد نے کہا ہے کہ ایک زمانے میں پنچایت سسٹم بڑا موثر ہوتا تھا دیہات میں تو نوے فیصد فیصلے پنچایت ہی کرتی تھی۔عزیز قریبی رشتے دار مل بیٹھ کر معاملات حل کر لیتے تھے۔شفیق کے کیس میں ماموں بھانجے کی لڑائی ہوئی تو پولیس نے دونوں کو اندر کر دیا۔ایسے مسائل کے حل کے لئے بلدیاتی اداروں کو فعال کرنا چاہئے یہ بہت سے چھوٹے کیسز نمٹا لیتے تھے۔یہ دعوی تو کیا جاتا ہے پاکستان میں جمہوریت آئی ہے لیکن پاکستان میں جمہوریت نہیں آئی بیوروکریسی کی حکومت ہے،ڈی سی اوز اور ڈی پی اوز نے ہی سارے اختیارات استعمال کرنے ہیں تو پھرمنتخب لوگوں کا کیا فائدہ۔فی الحال کوئی امید بھی نہیں کیونکہ حکومت کہہ چکی اگلے بلدیاتی الیکشن کرانے کی پوزیشن میں نہیں۔بلدیاتی ادارے جب تک نہیں بنیں گے تب تک چھوٹے چھوٹے مسائل کا حل نہیں نکلے گا۔ہمارے نمائندے تحقیق کر کے بتایا کریں کس الزام میں پولیس نے پکڑا۔شہری کا حق ہے پولیس سے پوچھے گرفتاری کیوں کی گئی۔ یہ درست ہے کہ کچھ لوگ مالی طور پر اس قابل نہیں ہوتے کہ وکلائ کی خدمات حاصل کر سکیں۔ہماری بار کونسلز ہماری ڈسٹرکٹ بار ایسوسی ایشنز اور ہمارے ہائیکورٹ باراور سپریم کورٹ بار ان اداروں نے جو انسانی حقوق کی تنظیمیں بنائی ہوئی ہیں اور ایسے لوگ جن کے پاس وکیل نہیں ہوتا انہیں بغیر فیس وکیل مہیا کرتے ہیں میرے خیال میں اس پر زیادہ توجہ دینی چاہئے۔سب کی ذمہ داری ہے مسائل اجاگر کرنے کے لئے اپنا کردار ادا کرے۔ایک شخص نے مجھ سے کہا کہ میری بیوی بھاگ گئی ہے وزیر خارجہ سے سفارش کرائیں میری بیوی واپس مل جائے۔لوگ سمجھتے ہیں بڑے عہدے والے کو پکڑ و اور کام کرا?۔کبھی کہتے ہیں گورنر سے کام کرا دو ایسی ایسی مثالیں موجود ہیں۔نواز شریف دور میں کہا گیا کہ جس کو شکایت ہے درخواست دے میں نے اس بارے اپنی کتاب میں بھی لکھا تھا میں نے اس کی مخالفت بھی کی تھی۔ایسی درخواستوں پر بغیر دوسرے شخص کا موقف سنے فیصلہ کر دیا جاتا ہے یکطرفہ کارروائی نہیں ہونی چاہئے۔کوئی چیز اپنی جگہ پر نہیں بجائے اپنی جگہ ہونے کے کہیں اور ہے۔رکشتہ ڈرائیور شفیق نے بتایا اس کی شادی شمیم نامی خاتون سے ہوئی تھی میرے ماموں ممتاز اور اعجاز چاہتے تھے میں اپنی بیوی کو طلاق دوں میں نے کہا میرے بچے ہیں میں طلاق نہیں دوں گا جس پر میرے دو بچوں کو اغواکر کے انہوں نے کمرے میں بند کر دیا پولیس نے بچوں کو برآمد کئے تاہم ملزمان کو نہیں پکڑا ڈی پی او اور ایس ایچ او کو درخواست دی لیکن کوئی ایکشن نہ لیا گیا۔ماموں ممتاز نے دودھ میں پارا ملا کر بیوی اور بچے کو پلا دیا بیوی چند روز زیر علاج رہنے کے بعد ہلاک ہو گئی۔پولیس کو کارروائی کے لئے درخواست دی لیکن کوئی کارروائی نہ کی الٹا پولیس نے کارروائی نہ کی۔ لائیو کالر نوید نے ساہیوال سے بتایا کہ رشتے داروں نے ہماری زمین پر قبضہ کر رکھا ہے ہماری مدد کی جائے۔عامر نے فیصل آباد سے کہا چینل فائیو کا پروگرام بہت اچھا ہے یہ کریڈٹ خبریں اور ضیائ شاہد کو جاتا ہے کہ عوامی مسائل اجاگر کرتے ہیں۔چنیوٹ سے سجاد نے کہا ہماری زمین پر قبضہ ہو گیا ہے چھڑوایا جائے۔