اسلام آباد(ویب ڈیسک) پاکستان تحریک انصاف (پی ٹی آئی) نے قومی اسمبلی میں قائد حزب اختلاف شہباز شریف سے پبلک اکاﺅنٹس کمیٹی (پی اے سی) کی چیئرمین شپ سے دستبردار ہونے کا مطالبہ کردیا۔ حکمران جماعت پاکستان تحریک انصاف کی سینیئر قیادت کا اجلاس وزیراعظم عمران خان کی زیر صدارت ہوا جس میں ملکی سیاسی صورتحال اور عبدالعلیم خان کی گرفتاری کا جائزہ لیا گیا۔ اجلاس کے بعد اپنے ویڈیو بیان میں وفاقی وزیراطلاعات فواد چوہدری کا کہنا تھا کہ عمران خان نے کرپشن کے خلاف 22 سال جدوجہد کی ہے اور یہ عمران خان کی ذاتی لڑائی نہیں بلکہ پاکستان کے لوگوں کی لڑائی ہے۔انہوں نے کہا کہ یہ کہنا کہ کسی کو این آر اوملے گا، یہ ناممکن ہے کیوں کہ عمران خان کی حکومت میں کسی کو این آر او نہیں ملے گا، واضح کردیں نہ ڈیل ہوگی، نہ ڈھیل ہوگی،کرپشن کے مقدمات کو منطقی انجام تک پہنچائیں گے۔ان کا کہنا تھا کہ پی ٹی آئی کی سینیئر قیادت نے پبلک اکاﺅنٹس کمیٹی میں شہباز شریف کے کردار پر تشویش کا اظہار کیا ہے، شہباز شریف نے پی اے سی کا چیئرمین بننے کے بعد نیب کے لوگوں کو طلب کیا اور ان پر دباﺅ ڈالا، جس سے واضح ہوگیا ہے کہ مسلم لیگ (ن) اور شہباز شریف پی اے سی کو بدعنوانی کے خلاف مقدمات میں ڈھال کے طور پر استعمال کررہے ہیں۔فواد چوہدری کا کہنا تھا کہ ن لیگ کا پبلک اکاﺅنٹس کمیٹی کو ڈھال کے طور پر استعمال کرنا ناقابل قبول ہے، اب سعد رفیق کو کہا جارہا ہے کہ وہ بھی پبلک اکاﺅنٹس کمیٹی میں آئیں تاکہ ان کو بھی ڈھال میسر آسکے۔انہوں نے کہا کہ آج نیب نے علیم خان کو گرفتار کیا جس پر انہوں نے اپنے عہدے سے استعفیٰ دے دیا اور علیم خان کے استعفے کے بعد ثابت ہوا کہ پی ٹی آئی اور دیگر جماعتوں کے سیاسی کلچر میں فرق ہے۔وزیر اطلاعات نے کہا کہ علیم خان نے استعفیٰ دے کر شاندار روایت کا آغاز کیا ہے اور ا±ن جیسی سوچ شہبازشریف کی بھی ہونی چاہیے۔وفاقی وزیر اطلاعات نے مطالبہ کیا کہ شہباز شریف پبلک اکاﺅنٹس کمیٹی کی چیئرمین شپ سے علیحدہ ہوجائیں اور بدعنوانی کے مقدمات کا سامنا کریں۔ان کا کہنا تھا کہ شفاف غیرجانبدارانہ احتساب ملک کی ضرورت ہے اور احتساب کیلئے ہم اداروں کے پیچھے کھڑے ہیں، احتساب کی کارروائی سے یہ نہیں لگنا چاہیےکہ بیلنس کارروائی ہورہی ہے بلکہ میرٹ اور شفاف احتساب ہوتا ہوا نظر آنا چاہیے۔یاد رہے کہ قومی احتساب بیورو (نیب) نے علیم خان کو آمدن سے زائد اثاثے بنانے کے الزام میں گرفتار کرلیا جس کے بعد انہوں نے سینیئر صوبائی وزیر بلدیات کے عہدے سے استعفیٰ دے دیا ہے۔واضح رہے کہ موجودہ قومی اسمبلی کے قیام کے بعد سے 3 ماہ تک حکومت اور حزب اختلاف میں چیئرمین پبلک اکاﺅنٹس کمیٹی کی چیئرمین شپ کے معاملے پر ڈیڈلاک تھا۔ گزشتہ سال 13 دسمبر کو حکومت نے اپوزیشن کا مطالبہ تسلیم کرتے ہوئے قائد حزب اختلاف شہباز شریف کو پی اے سی کا چیئرمین بنانے پر رضامندی کا اظہار کیا تھا جس کے بعد وہ پہلے ہی اجلاس میں بلامقابلہ کمیٹی چیئرمین منتخب ہوئے تھے۔

اسلام آباد (ویب ڈیسک ) علیم خان کی گرفتاری کے بعد شیخ رشید کی پیشن گوئی نے تحریک انصاف کو پریشان کردیا، 30 مارچ تک جھاڑو پھرنے اور حکمران جماعت کے مزید لوگوں کے زیر عتاب آنے کی پیشن گوئی۔ تفصیلات کے مطابق وفاقی وزیر ریلوے شیخ رشید کی جانب سے پنجاب کے سینئر وزیر اور تحریک انصاف کے رہنما علیم خان کی گرفتاری پر ردعمل دیا گیا ہے۔وزیر ریلوے شیخ رشید کی جانب سے کہا گیا ہے کہ 30 مارچ تک جھاڑو پھر جائے گا، وہ اپنی کہی ہوئی بات پر آج بھی قائم ہیں۔ وزیر ریلوے شیخ رشید نے اس مرتبہ حکمراں جماعت تحریک انصاف کیلئے بھی خطرے کی گھنٹی بجا دی ہے۔ وزیر ریلوے شیخ رشید کا کہنا ہے کہ علیم خان کی گرفتاری شروعات ہے، آنے والے دنوں میں حکومت کے مزید لوگ زیر عتاب آئیں گے۔اس مرتبہ سب کا احتساب ہوگا، احتساب سے کوئی بھی نہیں بچ پائے گا۔

لاہور (ویب ڈیسک)پنجاب حکومت نے فیصلہ کیا ہے کہ عبد العلیم خان کی گرفتاری کے معاملے پر سیاسی بیان نہیں دیا جائے گا۔تفصیل کے مطابق عبد العلیم خان کی گرفتاری کے بعد پیدا ہونے والی صورتحال پر وزیر اعلیٰ پنجاب عثمان بزدار اور گورنر پنجاب چوہدری سرور کی زیر صدارت اجلاس ہوا جس میں فیصلہ کیا گیا کہ عبد العلیم خان کے معاملے پر سیاست نہیں کی جائے گی۔اس موقع پر عبد العلیم خان کے مستعفی ہونے کے فیصلے اور ان کی خدمات کو سراہا گیا۔اجلاس میں کہا گیا کہ سابق دور میں اداروں پر تنقید کر کے ان کا تشخص مجروح کیا گیا ،ماضی کی طرح اب کسی ادارے پر کوئی دباﺅ نہیں ہے۔دوسری جانب اس معاملے پر گورنر پنجاب اور وزیر اعلیٰ پنجاب نے عبد العلیم خان کے معاملے پر ون آن ون ملاقات بھی کی جس میں عبد العلیم خان کی گرفتاری اور آئندہ کی حکمت عملی پر تبادلہ خیال کیا گیا ،دونوں رہنماﺅں نے عبد العلیم خان کے اہل خانہ سے بھی معلومات لینے کا فیصلہ کیا۔

اسلام آباد(ویب ڈیسک) وفاقی وزیر پیٹرولیم غلام سرور خان کا کہنا ہے کہ پاکستان میں بھاری سرمایہ کاری کے لیے روسی کمپنی سے معاہدہ ہوگیا ہے۔اسلام آباد میں پریس کانفرنس کرتے ہوئے غلام سرور خان نے کہا کہ روسی کمپنی پاکستان میں 10ارب ڈالر کی سرمایہ کاری کرےگی، انٹراسٹیٹ گیس سسٹم اور گازپروم کمپنی میں معاہدہ ہوگیا۔غلام سرور خان نے بتایا کہ روسی کمپنی پاکستان میں تیل وگیس کے شعبے میں سرمایہ کاری کرے گی، یہ معاہدہ پاکستان روس باہمی تعاون کی روشن مثال ہے۔

اسلام آباد(ویب ڈیسک) وفاقی وزیر اطلاعات فواد چوہدری نے کہا ہے کہ علیم خان کی گرفتاری کے بعد اپوزیشن اب کیا بہانہ بنائے گی۔اسلام آباد میں میڈیا سے گفتگو کرتے ہوئے وفاقی وزیر اطلاعات فواد چوہدری نے کہا کہ جیسے ہی علیم خان کی گرفتاری کا کہا گیا تو انہوں نے وزیراعلی پنجاب عثمان بزدار کو اپنا استعفیٰ بھیج دیا، جس طرح علیم خان نے فوری استعفیٰ دیا اس سے کلچر کا واضح فرق نظر آتا ہے اب پتہ چلتا ہے کہ پاکستان تحریک انصاف میں کیا کلچر ہے اور باقی جماعتوں میں کیا ہے۔فواد چوہدری نے کہا کہ علیم خان کی گرفتاری کے بعد سمجھ نہیں آتا اپوزیشن اب کیا بہانہ بنائے گی، ہم احتساب کے عمل کی مکمل حمایت کرتے ہیں اور اداروں کے ساتھ کھڑے ہیں، اداروں کا مضبوط ہونا پاکستان کے لیے مضبوطی کا باعث ہے۔قبل ازیں ایک تقریب سے خطاب کرتے ہوئے وزیراطلاعات کا کہنا تھا کہ اخبارات کی بندش کی وجہ معیشت نہیں بلکہ ٹیکنالوجی ہے، ٹیکنالوجی میں بہت زیادہ جدت آ رہی ہے، اب میڈیا کو جدید ٹیکنالوجی پر انحصار کرنا ہو گا اور مستقبل کیلئے ریسرچ کرنا ہو گی۔ان کا مزید کہنا تھا کہ گزشتہ حکومت نے میڈیا بجٹ کو بہت زیادہ بڑھا دیا تھا جب کہ اخبارات کی بندش کے باعث بے روزگاری کا مسئلہ پیدا ہو رہا ہے۔

اسلام آباد(ویب ڈیسک) سپریم کورٹ نے فیض آباد دھرنا کیس کا فیصلہ جاری کردیا۔سپریم کورٹ نے فیض آباد دھرنا کیس کا فیصلہ سنادیا ہے۔ 43 صفحات پر مشتمل فیصلہ سینیئر جج جسٹس قاضی فائز عیسی نے تحریر کیا جس میں انہوں نے قائداعظم کے تین فرمان کا بھی تذکرہ کیا۔ قائد اعظم نے کہا کہ میں مسلمانوں کو خبردار کرتا ہوں کہ اپنے غصے پر قابو رکھیں، رد عمل سے ریاست کو خطرات میں نہیں ڈالنا چاہیے، پاکستان میں قانون کی عملداری ضروری ہے ورنہ لا قانونیت ملک کی بنیادیں ہلا دے گی۔سپریم کورٹ نے فیصلے میں 12 مئی واقعے، 2014 میں پی ٹی آئی اور عوامی تحریک کے دھرنے اور فیض آباد دھرنا تینوں واقعات کا جائزہ لیتے ہوئے کہا کہ 12 مئی 2007 کے ذمہ داران کو کوئی سزا نہیں دی گئی اس عمل سے تحریک لبیک کو شہ ملی۔فیصلے میں وفاقی و صوبائی حکومتوں کو نفرت، انتہا پسندی، دہشت گردی پھیلانے والوں کی نگرانی کا حکم دیتے ہوئے کہا گیا کہ 12 مئی 2007 کے واقعہ نے تشدد کو ہوا دی، اس دن کراچی میں قتل عام کے ذمہ دار اعلی حکومتی شخصیات تھیں، سڑکیں بلاک کرنے والے مظاہرین کے خلاف قانون کے تحت کارروائی ضروری ہے۔فیصلے کے مطابق سیاسی جماعت بنانا اوراحتجاج آئینی حق ہے، مگر احتجاج کے حق سے دوسرے کے بنیادی حقوق متاثرنہیں ہونے چاہیے، ہرسیاسی جماعت فنڈنگ کے ذرائع بتانے کی پابند ہے اور الیکشن کمیشن قانون کے خلاف ورزی کرنے والی سیاسی جماعت کے خلاف کارروائی کرے، آئین میں احتجاج کا حق نہیں بلکہ جمہوریت میں احتجاج کا حق ہے۔فیصلہ میں کہا گیا کہ تمام حساس ادارے اپنی حدود سے تجاوزنہ کریں اور ان کی حدود طے کرنے کے لئے قانون سازی کی جائے، آئین پاک فوج کو سیاسی سرگرمیوں کا حصہ بننے سے روکتا ہے اور فوج کسی سیاسی جماعت یا شخصیت کی حمایت نہیں کر سکتی، وزارت دفاع اور تینوں مسلح افواج کے سربراہان حلف کی خلاف ورزی کرنے والوں کے خلاف کارروائی کریں۔سپریم کورٹ کے فیصلے کے مطابق فیض آباد دھرنے کے دوران ریاست شہریوں کے بنیادی حقوق کو تحفظ دینے میں مکمل ناکام رہی، اداروں کے درمیان تعاون کا فقدان تھا، حکومت اور قانون نافذ کرنے والے اداروں کے پاس کوئی حکمت عملی نہیں تھی، وفاقی یا صوبائی حکومت کے خلاف نفرت انگیزی بغاوت کے زمرے میں آتی ہے جس کی سزا عمر قید ہے، کسی کے خلاف فتوی دینے والوں کا ٹرائل انسداد دہشت گردی قانون کے تحت ہونا چاہیے۔فیصلے میں کہا گیا کہ تحریک لبیک نے قانون کی زبان میں غلطی درست کرنے کے باوجود دھرنا جاری رکھا جس سے جڑواں شہر مفلوج ہو گئے اور سپریم کورٹ سمیت تمام سرکاری، غیرسرکاری اداروں کا کام متاثر ہوا، ختم نبوت ﷺ کے معاملے پر تصحیح کے باوجود تحریک لبیک نے مسلمانوں کے جذبات سے کھیلا اور دھرنا قائدین نے دھمکیوں اور گالیوں کے ساتھ نفرت پھیلائی، 16 کروڑ 39 لاکھ 52 ہزار کی املاک کو نقصان پہنچایا گیا اور ملک میں معاشی سرگرمیوں کو روک دیا گیا، قانون شکنی پر سزا نہیں ہوگی تو قانون شکنوں کا حوصلہ بڑھے گا۔فیصلہ میں کہا کیا کہ از خود نوٹس اختیار شہریوں کے بنیادی حقوق کے تحفظ کے لئے استعمال کیا جاتا ہے، سپریم کورٹ از خود نوٹس اختیارات کے تحت اس قسم کے معاملات میں عوامی مفاد میں دخل دے سکتی ہے۔الیکشن کمیشن کے مطابق تحریک لبیک بیرون ملک مقیم پاکستانی کے نام پر رجسٹرڈ ہے، ایسی جماعت جس کے فنڈ کا کچھ حصہ بیرون ملک سے آتا ہو وہ غیر ملکی امداد لینے والی پارٹی کے زمرے میں آئے گی، ایسی پارٹی اگر ملکی سالمیت کے خلاف کام کرے تو الیکشن کمیشن ریفرنس دائر کر سکتا ہے، اگر حکومت اس ریفرنس پر نوٹیفکیشن جاری کرکے سپریم کورٹ کو بھجواتی ہے اور سپریم کورٹ نوٹیفکیشن برقرار رکھے تو سیاسی جماعت ختم ہو جاتی ہے۔فیصلے کے کاپی حکومت پاکستان، سیکرٹری دفاع، سیکرٹری داخلہ کو آئی ایس آئی ،آئی بی اور فوج کے سربراہ کو بجھوانے کی ہدایت کی گئی ہے۔واضح رہے کہ الیکشن ایکٹ کی منظوری کے دوران ختم نبوت حلف نامے میں تبدیلی پرتحریک لبیک یارسول اللہ ﷺ نے فیض آباد انٹر چینج پر دھرنا دیا تھا، دھرنے کے خاتمے کے لئے عدالت نے حکم بھی جاری کیا تھا تاہم طاقت کے استعمال پرکئی انسانی جانوں کا ضیاع ہوا تھا اورملک بھرمیں دھرنے دیئے گئے۔

اسلام آباد(ویب ڈیسک ) نیب راولپنڈی نے ایل این جی کیس میں سابق وزیراعظم شاہد خاقان عباسی کو طلب کر لیا۔قومی احتساب بیوریو (نیب) راولپنڈی نے سابق وزیراعظم شاہد خاقان عباسی کو طلب کرلیا، شاہد خاقان عباسی کو ایل این جی کیس میں تفتیش کے لیے طلب کیا گیا ہے، نیب نے شاہد خاقان عباسی کو جمعہ کی صبح 11 بجے راولپنڈی آفس میں پیش ہونے کا حکم دیا ہے۔
واضح رہے کہ گزشتہ سال چیئرمین نیب جاوید اقبال کی زیر صدارت اجلاس ہوا جس میں سابق وزرائے اعظم نواز شریف اور شاہد خاقان عباسی کے خلاف بدعنوانی اور اختیارات کے ناجائز استعمال کے الزامات کی تحقیقات کی منظوری دی گئی۔
نیب کے مطابق شاہد خاقان عباسی کے خلاف ایل این جی ٹرمینل کا ٹھیکہ قواعد و ضوابط کے خلاف دینے کے الزام میں تحقیقات شروع کردی گئی ہیں، شاہد خاقان نے من پسند کمپنی کو 15 سال کا ٹھیکہ خلاف ضابطہ دیا جس سے قومی خزانے کو مبینہ طور پر اربوں روپے کا نقصان پہنچا