ماسکو(ویب ڈیسک)ماسکو کانفرنس کا اعلامیہ جاری کردیا گیا ہے جس میں افغانستان سے غیر ملکی افواج کے مکمل انخلا پر اتفاق کرتے ہوئے یقین دلایا گیا کہ افغان سرزمین کسی دوسرے ملک کے خلاف استعمال نہیں کی جائے گی۔روس کے دارالحکومت ماسکو میں مسئلہ افغانستان پر دو روز تک امن مذاکرات ہوئے جن میں افغانستان کی سیاسی جماعتوں، سابق صدر حامد کرزئی سمیت نمایاں سیاست دانوں اور طالبان کے نمائندوں نے شرکت کی تاہم کابل حکومت کا کوئی نمائندہ شریک نہیں ہوا۔کانفرنس کے اختتام پر جاری کردہ اعلامیہ میں افغانستان میں پائیدار امن کے لیے امریکا اور اس کی اتحادی افواج کے مکمل انخلا پر زور دیتے ہوئے کہا گیا کہ دنیا کے تمام ممالک افغانستان کے اندرونی معاملات میں مداخلت سے گریز کریں۔ افغان فریقین نے عالمی برادری کو یقین دہانی کرائی کہ غیر ملکی افواج کے انخلا کے بعد افغان سرزمین کسی دوسرے ملک کے خلاف استعمال نہیں کی جائے گی۔شرکا نے ملک کے لیے اسلامی اصولوں کی روشنی میں افغان خواتین کے حقوق کے تحفظ اور شہریوں کے آزادی اظہار رائے کے حق کو یقینی بنانے پر بھی اتفاق کیا جبکہ افغانستان کی تعمیر نو کے لیے مالی معاونت کی ضرورت پر زور دیا۔اجلاس میں طالبان رہنماﺅں کا نام اقوام متحدہ کی بلیک لسٹ سے نکالنے، قطر میں ان کے باضابطہ سیاسی دفتر کے قیام اور قیدیوں کی رہائی پر بھی اتفاق کیا گیا۔مذاکرات کا اگلا دور قطر کے دارالحکومت دوحہ میں ہوگا۔طالبان نے مذاکرات کو انتہائی کامیاب قرار دیتے ہوئے کہا کہ امریکا اپریل تک افغانستان سے اپنے نصف فوجیوں کو واپس بلا لے گا۔غیر ملکی میڈیا کے مطابق اس غیر معمولی کانفرنس کی خاص بات یہ تھی کہ کل ایک دوسرے کے جانی دشمن آج ایک ساتھ نماز پڑھ رہے تھے اور کھانا کھارہے تھے۔ پھر طالبان رہنما اور سابق صدر حامد کرزئی ایک دوسرے کے ساتھ کندھے سے کندھا ملا کر کھڑے تھے جبکہ حامد کرزئی نے طالبان کو اپنا بھائی کہا اور دونوں نے پائیدار امن پر اتفاق کیا۔مذاکرات میں طالبان وفد کے سربراہ شیر عباس ستانکزئی اور حامد کرزئی نے ایک دوسرے کے ساتھ کھڑے ہوکر مسکراتے ہوئے میڈیا سے مشترکہ بات چیت کی۔تمام فریقین نے امریکا اور طالبان کے درمیان دوحہ میں براہ راست مذاکرات کی حمایت کی۔ روسی دارالحکومت میں وہ مناظر دیکھے گئے جن کا ماضی میں شاید تصور بھی نہ کیا جاسکتا تھا۔مذاکرات میں شریک دو افغان خواتین سیاست دانوں نے طالبان پر کڑی تنقید کی اور ان کی اسلامی تشریحات پر اعتراضات اٹھائے لیکن طالبان نے انہیں سنا اور جواب دے کر اعتراضات دور کرنے کی کوشش کی۔ اس کام کا شاید طالبان دور میں سوچا بھی نہیں جاسکتا تھا۔ماسکو کانفرنس نے نہ صرف طالبان اور ان کے حریف افغان رہنماﺅں و سیاست دانوں کے درمیان نہ صرف غیر معمولی بات چیت کا موقع فراہم کیا بلکہ یہ اس لحاظ سے بھی اہم تھی کہ بعض لوگوں کو شاید پہلی بار طالبان قیادت کو دیکھنے کا موقع ملا جو عموما میڈیا سے دور رہتے ہیں۔ طالبان رہنما میڈیا نمائندوں میں گھرے اور براہ راست نشریات میں اپنا منشور پیش کررہے تھے۔مذاکرات میں انہوں نے وعدہ کیا کہ اقتدار پر اجارہ داری قائم نہیں کریں گے لیکن افغانستان میں حکمرانی کے لیے جامع اسلامی نظام ضرور قائم کریں گے۔

تامل ناڈو(ویب ڈیسک)بے روزگاری اس وقت عالمی مسئلہ بن چکا ہے، ترقی یافتہ سے لے کر ترقی پذیر تک ہر ملک میں اعلیٰ تعلیم یافتہ افراد بھی بے روزگاری کا شکار ہیں۔اس کی ایک مثال خود کو سپر پاور کہلانے والا بھارت بھی ہے۔جہاں انجینئرز اور مارکیٹنگ میں ماسٹرز کیے ہوئے لوگ بھی خاکروب کی نوکری کے لیے درخواستیں دے رہے ہیں۔بھارتی ریاست تامل ناڈو کی اسمبلی سیکرٹریٹ میں سینٹری ورکرز اور خاکروب کی اسامیوں کے لیے اعلیٰ پروفیشنل تعلیم جیسے ایم ٹیک، بی ٹیک اور ایم بی اے کے حامل نوجوان، پوسٹ گریجویٹ اور گریجویٹ کیے ہوئے لوگ بھی درخواستیں دینے پر مجبور ہیں۔حکومت کی جانب سے مقامی اخبار میں سوئپرز کی 10 اسامیوں اور سینیٹری ورکر کی 4 اسامیوں کے اشتہار شائع کیے گئے۔اشتہار میں امیدوار کا جسمانی طور پر صحت مند ہونا واحد اہلیت بتائی گئی تھی۔ امیدوار کی کم سے کم عمر کی حد 18 سال لکھی گئی تھی جب کہ زیادہ سے زیادہ عمر کی مختلف حدیں مقرر تھیں۔اس اشتہار کے جواب میں سیکرٹریٹ کو کل 4607 درخواستیں موصول ہوئیں جس میں ایمپلائمنٹ ایکسچینج سے ملنے والی درخواستیں بھی شامل تھیںکل ملنے والی درخواستوں میں سے 677 درخواستیں مسترد کر دی گئیں جب کہ بقیہ درخواستیں مطلوبہ اہلیت پر پوری اتریں۔قبل ازیں طلبا تنظیموں کے رہنماﺅں کی جانب سے حکومت پر پیش کیے گئے عبوری بجٹ میں ملک میں نوجوانوں کے بے روزگاری کے مسئلے پر خاموش رہنے کا الزام لگایا گیا۔اس ضمن میں طلبا رنماﺅں کے ایک مشترکہ اعلامیے بتایا گیا کہ 7 فروری کو طالب علموں کی طرف سے لال قلعے سے پارلیمنٹ تک مارچ کیا جائے گا۔جواہر لال نہرو یونیورسٹی کی طلبا تنظیم کے صدر این سائی بالاجی کا کہنا ہے کہ وزیر اعظم نریندر مودی نئے انڈیا کے لیے مزید ایک موقع کے لیے ہمارے پاس ضرور آئیں گے لیکن ہم اس دفعہ انھیں موقع نہیں دیں گے۔انھوں نے مزید کہا کہ وزیر اعظم نے ہمارا مستقبل برباد کر دیا ہے۔ہم اپنے اتحاد سے اس بات کو یقینی بنائیں گے کہ تمام خالی سرکاری اسامیوں کو بھرا جائے ، جی ڈی پی کا 10 فی صد تعلیم ، صنفی مساوات اور سماجی انصاف پر خرچ کیا جائے۔

بیروت(ویب ڈیسک) لبنان کی نئی وزیرداخلہ ریاالحسن نے عہدے کا چارج سنبھال لیا ہے جس کے ساتھ ہی انہیں عرب دنیا کی پہلی خاتون وزیرداخلہ بننے کا اعزاز بھی حاصل ہوگیا ہے۔بین الاقوامی میڈیا رپورٹس کے مطابق لبنان کی 30 رکنی نئی کابینہ کے ارکان کو ان کے قلمدان تفویض کردیے گئے، ڈھائی درجن ارکان پر مشتمل کابینہ میں 4 خواتین بھی شامل ہیں جس میں ریاالحسن کو وزارت داخلہ کی اہم ذمہ داری سونپی گئی ہے۔ریا الحسن نے بحیثیت وزیر داخلہ عہدے کا چارج سنبھال لیا ہے جس کے بعد وہ ملک کے ساتھ عرب دنیا کی پہلی خاتون وزیر داخلہ بن گئی ہیں، اس سے قبل وہ لبنان کی پہلی وزیر خزانہ بھی رہ چکی ہیں۔ریاالحسن ملک کی طاقت ور سیکیورٹی ایجنسیوں کی انچارج بھی ہوں گی، عہدے کا چارج سنبھالنے پر وزیر داخلہ کا کہنا تھا کہ وزیراعظم سعد الحریری نےان پر اپنے بھروسہ اور اعتماد کا اظہار کرتے ہوئے بھاری ذمہ داری ان پر عائد کی ہے۔ریاالحسن نے جارج واشنگٹن یونیورسٹی سے ماسٹر ز کی ڈگری حاصل کررکھی ہے اور وہ وزیراعظم سعد الحریری کی جماعت ’فیوچر موومنٹ پارٹی‘ کی رکن ہیں۔