کراچی(ویب ڈیسک) پاکستان کرکٹ ٹیم اور پی ایس ایل کی فرنچائز کوئٹہ گلیڈی ایٹرز کے کپتان سرفراز احمد نے کہا ہے کہ ورلڈ کپ میں پاکستان کی ٹیم بہتر نظر آئے گی، کھلاڑیوں کا پول تیار ہے، پی ایس ایل فور میں فائنل کھیلنے کی بھر پور کوشش کریں گے۔کپتان سرفراز احمد نے ان خیالات کا اظہار کوئٹہ گلیڈی ایٹرز اور اپنے اعزاز میں منعقدہ تقریب میں میڈیا سے گفتگو میں کیا، اس موقع پر کوئٹہ گلیڈی ایٹرز کے مالک ندیم عمر، منیجر اعظم خان اور برانڈ ایمبیسیڈر مایا علی بھی موجود تھیں۔سرفراز احمد نے کہا کہ پی ایس ایل-4 میں عمدہ نتائج دینے کی کوشش کروں گا، فائنل کھیلنا ہماری پہلی ترجیح ہے، پی ایس ایل فور کے میچز کے پاکستان میں انعقاد پر خوشی ہے، اپنے ہوم سٹی میں میچز کھیلنے کا لطف ہی کچھ اور ہوتا ہے، شائقین کی امیدوں پر پورا اترنے کی کوشش کریں گے۔ایک سوال کے جواب میں سرفراز احمد نے کہا کہ ہماری ٹیم میں موجود تمام غیر ملکی کرکٹرز پاکستان آئیں گے اس طرح ہمارا کمبی نیشن متاثر نہیں ہوگا، حالیہ سیریز میں جو غلطی ہوئی جس پر پابندی کی سزا بھی ہوئی وہ اب ماضی کا حصہ بن گیا ہے، میں جو کچھ ہوا میں فراموش کرچکا ہوں۔کپتان سرفراز احمد کا مزید کہنا تھا کہ ورلڈ کپ میں پاکستان کی ٹیم پہلے سے کہیں بہتر نظر آئے گی ،آسٹریلیا کے خلاف سیریز میں ہمارے لیے موقع موجود ہے، جس سے بھرپور فائدہ اُٹھائیں گے۔ایک سوال کے جواب میں کپتان نے بتایا کہ میری طبیعت شروع سے ہی سادہ ہے، میں چشمہ نہیں پہنتا اور تقریبات میں نہیں جاتا ،یہ چیزیں میرے مزاج میں شامل نہیں، میرے کھیل کو نکھارنے میں کوچ اعظم خان کا بہت بڑا کردار ہے۔سرفراز احمد کا مزید کہنا تھا کہ عمران خان میرے پسندیدہ کرکٹر رہے ہیں ان کے پاس اسٹار کھلاڑی تھے اس لیے ان سے موازنہ درست نہیں، 1992 عالمی کپ کی ٹیم بہت زبردست تھی۔اس موقع پر کوئٹہ گلیڈی ایٹرز کے اونر ندیم عمر نے صحافیوں سے گفتگو کرتے ہوئے کہا کہ سرفراز کے ساتھ پرانا رشتہ ہے، مجھے سرفراز احمد کی صلاحیتوں پر مکمل اعتماد ہے اور جب تک سرفراز کھیلتے رہیں گے وہ ہی کوئٹہ کے کپتان رہیں گے۔

لاہور(ویب ڈیسک)پاکستان کرکٹ بورڈ کے 73سالہ سربراہ احسان مانی کو گھر کی تزئین و آرائش کے لئے 22لاکھ روپے کی خطیر رقم پی سی بی کے خزانے سے دی جائیگی۔اس بات کا باقاعدہ اجازت نامہ لاہور میں گورننگ بورڈ کے اجلاس کے دوران دیا گیا۔احسان مانی نے 4 ستمبر 2018ءکو باقاعدہ اپنے عہدے کا چارج لیا تھا، چونکہ احسان مانی 26 سال سے برطانیہ میں رہائش پذیر ہیں، اس لئے ان کے پاس پاکستان میں کوئی گھر نہیں ہے۔کراچی میں گزشتہ سال پریس کانفرنس میں احسان مانی نے صحافی کی جانب سے پی سی بی کی جانب سے گھر دینے کے سوال پر کہا تھا کہ وہ “ داتا دربار” میں تو رہ نہیں سکتے، لہذا پی سی بی نے رہائش کے لئے ان کو لاہور کے ایک پوش علاقے میں دو لاکھ ماہانہ پر ایک فلیٹ کرائے پر لے کر دیا ہے۔اور اب احسان مانی کو پی سی بی کے خزانے سے اس فلیٹ کی تزئین و آرائش کے لئے 22 لاکھ روپے دینے کی باقاعدہ منظوری پی سی بی گورننگ بورڈ کے 52 ویں اجلاس میں دی گئی ہے۔

کراچی(ویب ڈیسک)بوم بوم شاہد آفریدی بنگلہ دیش پریمئَرلیگ میں شرکت کے بعد کراچی پہنچ گئے۔بی پی ایل میں کومیلا وکٹورینز کی نمائندگی کرنے والے قومی ٹٰیم کے سابق کپتان شاہد آفریدی نے وطن واپسی پر ایک ٹوئٹ شیئر کی جس میں انہوں نے نیشنل اسٹیڈیم کراچی کی تزئن و آرائش پر خوشی کا اظہار کیا۔آفریدی کا کہنا ہے کہ نیشنل اسٹیڈیم اب پہلے سے بہت زیادہ خوبصورت لگ رہا ہے، امید ہے کہ سترہ مارچ کو یہاں پر شیڈول پی سی ایل کا فائنل کھیلنے کا موقع ملے گا۔بی پی ایل میں اپنی عمدہ بیٹنگ کے ساتھ 16 وکٹیں لے کر ٹیم کی کامیابی میں اہم کردار اداکرنے والے آفریدی پی سی ایل فور میں ملتان سلطانز کی ٹیم کا حصہ ہیں، وہ کچھ وقت گھر پر گزارانے کے بعد دبئی جا کر شعیب ملک کی قیادت میں کھیلنے والی ملتان سلطانز ٹیم کوجوائن کرلیں گے۔

کراچی / لاہور(ویب ڈیسک) پی ایس ایل 4کیلیے دبئی میں رونقیں بڑھنے لگیں جب کہ کپتان محمد سمیع سمیت اسلام آباد یونائیٹڈ کے ملکی کرکٹرز پہنچ گئے۔پی ایس ایل فور کیلیے اسلام آباد یونائیٹڈ کے ملکی کرکٹرز دبئی پہنچ گئے، کپتان محمد سمیع اور رومان رئیس کراچی دیگر متعلقہ شہروں سے روانہ ہوئے، سمت پٹیل انگلینڈ سے یو اے ای پہنچے، دیگر کی آمد کا سلسلہ بھی جاری تھا۔روانگی سے قبل ذرائع سے بات چیت کرتے ہوئے رومان رئیس نے کہا کہ میں ایک سال کرکٹ سے دور رہا،اب پی ایس ایل فورکیلیے بہت پرجوش ہوں، میں اچھا پرفارم کر کے پاکستان ٹیم میں جگہ بنانے کی کوشش کروں گا۔انھوں نے کہا کہ محمد سمیع کو اسلام آباد یونائیٹڈ کا کپتان بنانا اچھا فیصلہ ہے، میرا ڈومیسٹک ون ڈے کرکٹ میں ڈیبیو بھی انہی کی کپتانی میں ہوا تھا، وہ ایک فائٹر کرکٹر ہیں۔دوسری جانب پشاور زلمی کے پاکستانی کرکٹرز اپنے شہروں سے روانہ ہونے کے بعد دبئی پہنچ گئے، کپتان ڈیرن سیمی کی آمد بھی جمعے کی شب تک شیڈول تھی،کامران اکمل، عمید آصف، ثمین گل ، نبی گل، سمیع اللہ آفریدی،عمر امین ، جمال انور ،خالد عثمان اور ابتسام شیخ کیساتھ ہیڈکوچ محمد اکرم اور منیجر ارشد خان بھی روانہ ہوئے۔لاہور قلندرز کی ٹیم جمعرات کو دبئی پہنچ گئی تھی،قومی ٹیم کے دورئہ جنوبی افریقہ کے بعد حفیظ نے بھی ساتھیوںکو جوائن کرلیا،لاہور قلندرز نے بھرپور مشقوں کا آغاز کردیا ہے۔اس موقع پر میڈیا سے بات چیت کرتے ہوئے محمد حفیظ نے کہا کہ فرنچائز کے ساتھ نئے سفر کا آغاز ہورہا ہے،میری کوشش ہوگی کہ اس بار نتائج ماضی سے مختلف ہوں، انھوں نے کہا کہ ٹیم کا کمبی نیشن اچھا اورامید ہے کہ پرستاروں کو مایوسی نہیں ہوگی۔یاد رہے کہ پی ایس ایل کے چوتھے ایڈیشن کا آغاز 14 فروری کو دبئی میں رنگارنگ تقریب کے ساتھ ہوگا۔