لاہور(خصوصی رپورٹر) سانحہ ساہیوال میں بچ جانے والے عینی شاہد 8 سالہ عمیر خلیل نے جے آئی ٹی کو تحریری بیان جمع کرا دیا جس میں انتہائی دردناک انکشافات کرتے ہوئے 8 سالہ عمیر خلیل نے بتایا ہے کہ نقاب پوش اہلکاروں نے فائرنگ کرکے انکل ذیشان کو مار دیا، فون پر بات کرنے کے بعد انہوں نے گاڑی پر دوبارہ فائرنگ کی،پاپا نے منیبہ کو اور ماما نے مجھے اور ہادیہ کو چھپالیا تھا،مجھے اور بہن کو گولی لگی، ایک انکل نے ہمیں ویرانے سے پمپ پر چھوڑا،ہماری گاڑی سے دہشت گردی کا کوئی سامان نہیں ملا،مقتول خلیل کے بھائیوں کے بیانات بھی قلم بند۔ تفصیلات کے مطابق سانحہ ساہیوال کے متاثرین نے جے آئی ٹی کو بیان قلم بند کرا دیا ہے، بیان دینے والوں میں جاں بحق خلیل کا عینی شاہد بیٹا 8 سالہ عمیر خلیل بھی شامل ہے جس کا بیان تحریری طور پر لکھ کر جے آئی ٹی کو دیا گیا ہے۔بچے عمیر خلیل نے بتایا کہ ہم لوگ ماں نبیلہ، پاپا خلیل، بڑی بہن اریبہ، چھوٹی بہنیں منیبہ اور ہادیہ 8 بجے گھر سے نکلے، گاڑی قادر آباد پہنچی تو پیچھے سے کسی نے گاڑی پر فائر کیا، گاڑی فٹ پاتھ سے ٹکرا کر رک گئی، پولیس کے دو ڈالے تیزی سے گاڑی کے پاس آ کر رکے، نقاب پوش اہلکاروں نے فائرنگ کر کے انکل ذیشان کو مار دیا۔ بچے نے بتایا کہ ذیشان کو مارنے کے بعد پولیس اہلکاروں نے فائرنگ روک دی اور فون پر کسی سے بات چیت شروع کر دی، ابو نے کہا جو چاہے لے لو لیکن ہمیں نہ مارو، معاف کردو، فون بند ہونے کے بعد اہلکار نے ساتھیوں کو اشارہ کیا جس پر انہوں نے دوبارہ فائرنگ شروع کر دی۔تحریری بیان کے مطابق عمیر نے کہا کہ فائرنگ سے ابو ، ماما اور بہن جاں بحق ہو گئے، فائرنگ کے دوران پاپا نے مرنے سے پہلے منیبہ کو اور ماما نے مجھے اور ہادیہ کو اپنے گھٹنوں میں چھپالیا تھا، فائرنگ کے بعد پولیس اہلکاروں نے مجھے اور دونوں بہنوں کو نکال کر دوبارہ گاڑی پر فائرنگ کی، پولیس والے ہم تینوں کو ڈالے میں ڈال کر لے گئے اور ویرانے میں پھینک کر چلے گئے۔بچے عمیر خلیل نے جے آئی ٹی کو بتایا کہ میں اور منیبہ گولی لگنے کی وجہ سے درد سے کراہتے رہے، ایک انکل نے ہمیں اٹھا کر پٹرول پمپ پر چھوڑ دیا، پولیس والے واپس آئے ہمیں اپنی گاڑی میں بٹھایا اور ہسپتال چھوڑ دیا، گاڑی کے اندر سے یا پھر موٹر سائیکل پر سے فائرنگ نہیں ہوئی، پولیس جھوٹ کہتی ہے۔ تحریری بیان کے مطابق عمیر نے مزید کہا کہ یہ بھی جھوٹ ہے کہ گاڑی میں سے کوئی دہشت گردی کا سامان برآمد ہوا، میرے نہتے بابا، ماما اور بہن کو مار کر پولیس والوں نے زیادتی کی ہے۔دریں اثنا مشترکہ تحقیقاتی ٹیم نے خلیل کے 2 بھائیوں جلیل، جمیل اور رشتہ داروں سعید اور افضال کے بیانات بھی قلم بند کیے۔ جلیل نے بتایا کہ خلیل کی گاڑی پر فائرنگ کی اطلاع ساہیوال پولیس اور امدادی عملے کی جانب سے ملی، خلیل کے بچے نہ ملے تو مددگار 15 پولیس کے ساتھ تلخی ہوئی۔ بڑی دیر بعد 1122 والوں نے اطلاع دی کے 3 بچے ساہیوال ہسپتال میں ہیں۔

نیویارک (مانیٹرنگ ڈیسک) امریکا کے شہر نیویارک میں بروکلین کی معروف شاہراہ کے ایک حصہ کو بانی پاکستان قائداعظم محمد علی جناح کے نام سے منسوب کیا گیا ہے۔ قائداعظم محمد علی جناح ایونیو کا افتتاح پروقار تقریب میں پاکستان زندہ باد کے نعروں میں کیا گیا جس میں لوگوں کی بڑی تعداد نے شرکت کی۔ کونی آئس لینڈ کی شاہراہ کو بانی پاکستان کے نام سے منسوب کرنے کی قرارداد قائداعظم کے یوم پیدائش کے حوالے سے 26 دسمبر 2018ءکو نیویارک سٹی کونسل نے منظور کی تھی تاکہ بانی پاکستان کی خدمات کو خراج تحسین پیش کیا جاسکے۔ تقریب میں نیویارک میں پاکستان کے قونصل جنرل نعیم اقبال چیمہ نے بطور مہمان خصوصی شرکت کی جبکہ اس موقع پر پاکستانیوں اور امریکیوں کی بڑی تعداد بھی موجود تھی۔ نعیم اقبال چیمہ نے تقریب سے خطاب کرتے ہوئے کہا کہ آج کی تقریب سے نیویارک سٹی کونسل اور پاکستانیوں کی گہری دوسری اور رابطوں کی عکاسی ہوتی ہے۔ انہوں نے امریکا میں پاکستان کے تشخص کو اجاگر کرنے کو سراہا اور کہا کہ شاہراہ کو قائداعظم کے نام سے منسوب کرنے کا فیصلہ ان کی لازوال خدمات کا اعتراف ہے۔ تقریب میں سمندر پار مقیم پاکستانیوں کی مختلف نمائندہ تنظیموں کے رہنما بھی موجود تھے جنہوں نے اس فیصلے کو سراہا۔

اسلام آباد (ملک منظور احمد )پاکستان الیکٹرانک میڈیاریگولیٹری اتھارٹی کے سابق سربراہان نے موجودہ حکومت کی طرف سے مجوزہ پاکستان میڈیا ریگولیٹری اتھارٹی میں پیمرا کو ضم کرنے کی تجویز کو مسترد کرتے ہوئے کہا ہے کہ پاکستان میں الیکٹرانک اور پرنٹ میڈیا کے لیے الگ الگ اتھارٹیز ہونی چاہیے ۔تمام ریگولیٹری باڈیز کو کابینہ ڈویژن کے ما تحت ہونا چاہیے اور اس کا سربراہ وزیر اعظم پاکستان کو ہونا چاہیے ۔الیکٹرانک اور پرنٹ میڈیا کو ایک اتھارٹی کے ماتحت کرنے کا تجربہ بری طرح ناکام ہو گا حکومت بغیر کسی مشاورت کے نئی اتھارٹی قائم کرنا چاہتی ہے اس کا مقصد میڈیا کو کمزور کرنا اور کنٹرول کرنا ہے ۔پیمرا کو ختم کرنے کی بجائے اس کو مضبوط بنانے کی ضرورت ہے پیمرا کے سابق چیرمین افتخار رشید نے خبریں سے خصوصی گفتگو کرتے ہوئے کہا کہ موجودہ حکومت کی طرف سے نئی اتھارٹی کا قیام ایک ڈیزاسٹر ثابت ہوگا وزارت اطلاعات و نشریات کا کام پالیسی سازی ہے پیمرا ایک آزاد اور خودمختار ادارہ ہے پیمرا کا انتظامی کنٹرول کابینہ ڈویژن کے پا س ہونا چاہیے وزارت اطلاعات کا کام پیمرا کو کنٹرول کرنا نہیں ہے نئی اتھارٹی کا مقصد جو نظر آرہا ہے وہ میڈیا کو کنٹرول کرنا ہے پیمرا کو ختم کرنے کا کوئی جواز نہیں ہے ،پیمرا کے سابق چیرمین ابصار عالم نے خبریں سے گفتگو کرتے ہوئے کہا ہے کہ نئی اتھارٹی کاقیام اٹھارویں ترمیم کی روح کے خلاف ہے پیمرا نے ڈی ٹی ایچ کے لا ئسنسوں کے اجرا کے لیے بہت کامیاب نیلامی دی تھی یہ تین لا ئسنس پندرہ ارب روپے میں فروخت کیے گئے تھے اب حکومت کی نظریں پیمرا کے اربوں روپے کے ریونیو پر ہے پیمرا کو پندرہ ارب کا ریونیو آنے پر ہزاروں صحافیوں کو روزگار کے مواقع مل سکتے ہیں انھوں نے کہا کہ پا کستان کا میڈیا ونٹی لیٹر پر ہے حکومت کو یہ پندرہ ارب کا خطیر ریونیو ہضم نہیں ہورہا بغیر مشاورت کے زمینی حقائق کو دیکھے بغیر حکومت پیمرا اور پریس کونسل کو ختم کرکے ایک نئی اتھارٹی کا قیام راتوں رات عمل میں لانا چاہتی ہے ایسا تو دور آمریت میں بھی نہیں ہوتا موجودہ حکومت پا کستان کے میڈیا کو شمالی کوریا کا میڈیا بنانا چاہتی ہے میڈیا کو کنٹرول کرنا جمہوریت کے منافی ہے ڈی ٹی ایچ کی کامیاب نیلامی کے بعد پیمرا مالی طور پر ایک انتہائی مستحکم ادارہ بن گیا ہے سرکار سے پیمرا کو ریونیو کی کوئی ضرورت نہیں رہے گی یہ برطانیہ کی مثالیں دیتے ہیں وہاں قوانین مختلف ہیں ہم وہ نظام نہیں بنا رہے جو برطانیہ اور دیگر ممالک نے بنایا برطانیہ میں اخبارات اور ٹی وی لا ئسنس کا حصول بہت آسان ہے جبکہ پاکستان میں کئی کئی سال لائسنس کے حصول میں لگ جاتے ہیں بجائے پیمرا کو ختم کرنے کے اس ادارے کو مزید اختیارات دینے کی ضرورت ہے سابق چیر مین پیمرا مشتاق ملک نے خبریں سے خصوصی گفتگو کرتے ہوئے کہا کہ پیمرا کے معا ملات میں وزارت اطلا عات اور نشریات کا کوئی دخل نہیں ہونا چاہیے تمام ریگولیٹری باڈیز اازاد اور خود مختار ہوتیں ہیں جو ادارے پہلے سے بنے ہوئے ہیں ان کو ختم کرنے کی کیا ضرورت ہے پیمرا کا انتظامی کنٹرول کابینہ ڈویژن کے پاس ہوناچاہیے اور اس کا سربراہ ملک کے وزیر اعظم کو ہونا چاہیے ۔پیمرا کے بورڈ آف دائریکٹر میں پا کستان براڈ کاسٹر ایسوسی ایشن کا نمائندہ شامل ہونا چاہیے اور پیمرا کو خود اپنا بورڈ آف ڈائریکٹر بنانا چاہیے ،الیکٹرانک اور پرنٹ میڈیا کو ایک ہی اتھارٹی کے ماتحت کرنے کا تجربہ کا میاب نہیں ہو سکتا ۔ادارہ بڑی مشکل سے بنائے جاتے ہیں اور اداروں کو ختم کرنے کی بجائے ان کی تنظیم نو کی جانی چاہیے ۔سابق چیرمین پیمرا ڈاکٹر عبدل جبار نے ایک سوال کے جواب میں کہا کہ حکومت کو چاہئے کہ وہ تمام فریقین کو اس اہم معاملہ پر آن بورڈ کرے اور تعمیری مشاورت کے بعد کوئی فیصلہ کیا جائے دنیا بھر میں ایسے تجربے کیے جارہے ہیں اور اگر اتفاق رائے سے فیصلہ کیا جائے تو بہتر رہے گا ۔