احمدیار(صباح نیوز ) سابق گورنر، نامور طبیب مصنف اور سماجی رہنماءحکیم محمد سعید کا 99واںیوم پیدائش آج 9 جنوری بروز بدھ کو منایا جائے گا۔ اس سلسلہ میں احمدیار سمیت ملک بھر میں تقریبات انعقاد پذیر ہوں گی حکیم محمد سعید9 جنوری1920 کو دہلی میں پیداہوئے تھے وہ پاکستان کے ایک مایہ ناز طبیب تھے شعبہ حکمت میں ان کی خدمات ناقابل فراموش ہیں طب و حکمت ،عالمی ادب کے تراجم ،اسلام اوردیگر موضوعات پرا نہوںنے 200سے زائد کتب تصنیف کیں ان کی شاندار خدمات کے صلہ میں1966میں ستارہ امتیاز اور2000میں نشان امتیاز سے بھی نوازا گیاحکیم محمد سعید صدر پاکستان کے طبی مشیر اور صوبہ سندھ کے گورنر کے عہدے پر بھی فائز رہے ۔ انہیں بچوں سے بے پناہ محبت تھی وہ بچوں کے رسالے نونہال سے اپنی شہادت تک منسلک رہے حکیم محمد سعید17 اکتوبر1998 کو کراچی میں فائرنگ سے شہید ہوگئے تھے ۔

لاہور (خبرنگار) پنجاب حکومت نے صوبے کے ہر ضلع میں سڑکوں پر سونے والے افراد کیلئے پناہ گاہیں بنانے کا فیصلہ کیا ہے۔ وزیراعلیٰ پنجاب عثمان بزدار نے کہا ہے کہ مرحلہ وار پروگرام کے تحت ہر ضلع میں پناہ گاہیں تعمیر کی جائیں گی اور ان پناہ گاہوں کی تعمیر سے بے گھر افراد کو شدےد سردی مےں کھلے آسمان تلے نہیں سونا پڑے گا۔ انہوں نے کہا کہ سڑکوں پر سونے والے افراد کو چھت اور کھانا فراہم کرکے ریاست اپنی ذمہ داری پوری کر رہی ہے اور انسانیت کی فلاح و خیر خواہی کےلئے خدمات سرانجام دینا ہماری حکومت کی ترجیحات میں اولین ہے اور وزیر اعظم عمران خان ہمہ وقت معاشرے کے عام طبقے کی فلاح اور بھلائی کیلئے اقدامات کر رہے ہیں۔ انہوں نے کہا کہتحریک انصاف عام آدمی کی فلاح و بہبود کی پالیسی پر عمل پیرا ہے۔ معاشرے کے پسے ہوئے افراد کا خیال رکھنا ہماری ذمہ داری بھی ہے اور فرض بھی اور ایسے افراد سے حسن سلوک اور صلہ رحمی کا درس دین اسلام بھی دیتا ہے۔ تحریک انصاف کی حکومت صلہ رحمی کو فروغ دینے کیلئے اقدامات کر رہی ہے اور پناہ گاہ جیسے فلاحی منصوبے بنانا اسی سلسلے کی کڑی ہے۔ وزیراعلیٰ نے کہا کہ معاشرے کے پسے ہوئے افراد کی مدد کرنا ہی صلہ رحمی ہے۔ صلہ رحمی اور حسن سلوک معاشرے میں محبت اور بھائی چارے کو فروغ دینے کا موثر ذریعہ ہے اور اس سے انسانی زندگیوں میں آسانیاں پیدا ہوتی ہیں۔ وزیراعلیٰ عثمان بزدار نے کہا کہ وزیراعظم عمران خان کی ہدایت پر لاہور اور راولپنڈی میں سڑکو ںپر سونے والے افراد کیلئے پناہ گاہوں کی تعمیر کا کام تیزی سے جاری ہے اور میں ذاتی طور پر پناہ گاہوں کے تعمیر کے منصوبے کی نگرانی کر رہا ہوں۔لاہور میں پناہ گاہوں کا منصوبہ جلد مکمل ہوگا اور میں نے اس ضمن میں خود دورہ کرکے متعلقہ حکام کو ہدایات جاری کی ہیں۔پناہ گاہوں کی تعمیر کا مقصد سڑکوں پر سونے والے افراد کو موسم کی سختیوں سے بچا کر چھت اور کھانا فراہم کرنا ہے۔ پائلٹ پراجیکٹ کے تحت لاہور میں تعمیر ہونے والی پناہ گاہیں سٹیٹ آف دی آرٹ ہوں گی۔ انہوں نے کہا کہ حکومت نے عارضی پناہ گاہوں کا انتظام کرکے سڑکوں پر سوئے افراد کو چھت کی سہولت فراہم کر دی ہے جبکہ پناہ گاہوں مےں قیام کرنے والے افراد کو بروقت رات کا کھانا اورناشتہ فراہم کےا جا تا ہے ۔عارضی پناہ گاہوں میں مفت علاج کی سہولت بھی مہیا کی گئی ہے جبکہ سڑکوں پر سوئے افراد کو عارضی پناہ گاہوں میں لانے کیلئے ٹرانسپورٹ بھی شروع کی گئی ہے۔انہو ںنے کہا کہ وزیر اعظم عمران خان کی انقلابی سوچ سے رہنمائی لیتے ہو ئے عوام کی تقدیر بدلیں گے اور معاشرے کے پسے ہوئے افراد کو ان کا حق لوٹائیں گے۔ وزیر اعلیٰ پنجاب عثمان بزدار سے وائس چیئرپرسن اوور سیز پاکستانیز کمیشن (او پی سی) پنجاب وسیم اختر نے وزیر اعلیٰ آفس میں ملاقات کی۔وسیم اختر نے وزیر اعلیٰ پنجاب عثمان بزدار کو اوور سیز پاکستانیوں کی فلاح وبہبو د کےلئے اٹھائے جانے والے اقدامات خصوصاً او پی سی ایکٹ میں مجوزہ ترامیم کے متعلق آگاہ کیا۔ انہوں نے بتایا کہ اوور سیز پاکستانیوں کی شکایات کے ازالے کےلئے بھرپور کوششیں بروئے کار لائی جا رہی ہیں۔ عثمان بزدار نے اوورسیز پاکستانیوں کو ریلیف فراہم کرنے پر او پی سی کی کاوشوں کی تعریف کی۔

لاہور (مانیٹرنگ ڈیسک) زعیم قادری کی اہلیہ نے اپنے شوہر کی نون لیگ میں واپسی کا اشارہ دے دیا۔ قائد پاکستان مسلم لیگ ن شہباز شریف اگر آصف علی زرداری کے ساتھ بیٹھ سکتے ہیں تو زعیم کے ساتھ کیوں نہیں۔ نجی ٹی وی کو خصوصی انٹرویو میں عظمی قادری کا کہنا تھا کہ اگر جوتے پالش کرنے ہوتے تو آج یہ نوبت نہیں آتی، اگر ان کے شوہر کو پارٹی میں ان کے وقار کے مطابق مقام نہیں دیا جاتا تو کوئی ان کے گھر آنے کی کوشش نہ کرے۔ اہلیہ زعیم قادری نے کہا کلثوم نواز کے جنازے کے موقع پر نواز شریف زعیم کو فیملی ایریا میں لے گئے اور کہا آپ اپنی والدہ کو لحد میں اتاریں۔ انہوں نے بتایا کہ نواز شریف نے فون کیا، جبکہ شہباز شریف بھی گھر آنا چاہتے تھے، شہباز شریف نے مجھے اسمبلی رکنیت کا حلف لینے کا بھی کہا۔ انہوں نے کہا کہ اسمبلی رکنیت کسی کا احسان نہیں، ہماری قربانیاں بہت زیادہ ہیں، 14ماہ کے بچے کو لے کر پارٹی کے لیے جدوجہد کرتی رہی۔ عظمی قادری کا کہنا تھا کہ حمزہ شہباز کو بڑے بھائی زعیم قادری کی عزت کرنی چاہیئے، عزت کرنی ہے تو ٹھیک، نہیں تو کوئی ہمارے گھرنہ آئے۔ اہلیہ زعیم قادری نے بتایا مریم نواز نے فون کر کے کہا کہ امی ابو پریشان ہیں۔ واضح رہے کہ شہباز شریف کے دور میں پنجاب حکومت کی ترجمانی کرنے والے زعیم قادری دو ہزار اٹھارہ کے انتخابات میں نون لیگ سے علیحدہ ہوگئے تھے۔

لاہور (اے این این) وفاقی تحقیقاتی ادارے (ایف آئی اے) نے اپنی رپورٹ میں کہا ہے کہ نجی اسکولوں کی جانب سے طلبہ سے 9 سے 45 ہزار روپے تک فیس وصول کی جارہی ہے۔ ایف آئی اے نے لاہور میں نجی اسکولوں کی فیسوں کے حوالے سے تحقیقات مکمل کرلیں۔ ایف آئی اے نے عدالت میں رپورٹ جمع کراتے ہوئے بتایا کہ نجی اسکول اور اکیڈمیاں 9 ہزار سے لیکر 45 ہزار روپے تک فیس وصول کرتے ہیں۔ذرائع کے مطابق سپریم کورٹ کے حکم پر ایف آئی اے سائبر کرائم ونگ نے لاکاس، بیکن ہاوس، لاہور گرائمر، امریکن اسکول، روٹس اسکول سسٹم، ریسورسز اکیڈمی، الائنس ریسورس سمیت دیگر نجی اسکولوں اور اکیڈمیوں کی فیسوں کے حوالے سے تحقیقات مکمل کرلیں۔نجی اسکولوں کی کم سے کم فیس نو ہزار اور زیادہ سے زیادہ فیس 45 ہزار روپے وصول کی جارہی ہے۔ بعض اسکول اور اکیڈمیاں ماہانہ جبکہ کچھ تعلیمی ادارے دو ماہ کی فیس ایک ساتھ وصول کرتے ہیں۔ والدین سے پندرہ ہزار سے لیکر تیس ہزار روپے تک فی طالب علم ایڈمیشن فیس بھی وصول کی جاتی ہے۔ کچھ ایسے اسکول بھی ہیں جہاں بنیادی طور پر سہولیات نہ ہونے کے برابر ہیں۔تمام نجی اسکولوں نے ایف آئی اے کو تحریری طور پر اپنی فیس 20 فیصد تک کم کر نے سے آگاہ کردیا ہے۔ ایف آئی اے رپورٹ کی روشنی میں عدالت جو فیصلہ کرے گی تمام نجی اسکولوں کو اس پر عمل درآمد کرنا ہوگا۔

لاہور (مانیٹرنگ ڈیسک) چینل فائیو کے پروگرام ”نیوز ایٹ 7“ میں گفتگو کرتے ہوئے پیپلزپارٹی کے سینئر رہنما سردار لطیف کھوسہ نے کہا ہے کہ تحریک انصاف کا اعلیٰ عدلیہ کے کندھوں پر بندوق رکھ کے سیاسی کھیل کھیلنا ایک بھول ہے حکومت نے 172لوگوں کے نام ای سی ایل میں ڈال کر ہیجانی کیفیت برپا کردیا ہے دنیا میں کہیں ایسا نہیں ہوا۔ تحریک انصاف جمع خاطر رکھے اس کی بھی اسی طرح باری آئے گی یہ بھی قابو آئینگے یہ جتنے دودھ کے دھولے ہیں سب جانتے ہیں۔ سابق گورنر محمد زبیر نے کہا کہ تحریک انصاف نے 22سال جدوجہد اسی لئے کی کہ چوہان اور فواد چودھری کو آگے لانا ہے۔ فواد چودھری سے اس لئے اختلاف رکھتا ہوں کہ جھوٹ بولتے ہیں بڑے بڑے ایشوز پر ایک دن ایک بات دوسرے دن دوسری بات کرتے ہیں بچگانہ رویہ اپنا رکھا ہے۔ سابق پراسیکیوٹر نیب راجہ عامر عباس نے کہا کہ نوازشریف کی ضمانت کیخلاف کیس سپریم کورٹ میں ہے اگر اسلام آباد ہائی کورٹ کا فیصلہ برقرار رکھا گیا تو دوسرے کیس میں بھی ضمانت ہوجائے گی اگر کالعدم قرار دیا گیا تو ضمانت نہیں ملے گی العزیزیہ کا کیس زیادہ مضبوط نظر آتا ہے۔ نوازشریف کے تینوں کیسز میں سزائیں ساتھ چلیں گی۔ آج تک حکومت ن لیگ اور پیپلزپارٹی نے کی ہے اس لئے احتساب تو انہی کا ہونا ہے۔ دفاعی تجزیہ کار جنرل (ر) امجد شعیب نے کہا کہ پاک بھارت تعلقات میں بہتری کا چانس نظر نہیں آتا۔ بھارت میں الیکشن قریب ہیں اور بدقسمتی سے وہاں بھی پاکستان دشمنی پر ووٹ لیا جاتا ہے اس لئے مذاکرات نہیں ہونگے۔ وزیراعظم عمران خان نے کشمیر کے مسئلہ پر واضح موقف دیا ہے بھارتی قیادت میں دور اندیشی نظر نہیں آتی۔ ان میں چند دور اندیشی لیڈر ہیں جو مودی حکومت کو کررہے ہیں کہ آپ کشمیر کو کھو رہے ہیں باقی زیادہ تر لیڈروں نے آنکھیں بند رکھی ہیں۔

لاہور (مانیٹرنگ ڈیسک) چینل فائیو کے تجزیوں‘ تبصروں پر مشتمل پروگرام ”کالم نگار“ میں گفتگو کرتے ہوئے سینئر صحافی خالد چودھری نے کہا ہے کہ پاکستان جیسے زرعی ملک میں کاٹن کا درآمد کیا جانا ایک المیہ ہے۔ پاکستان کی انڈسٹریل سٹیٹ کے بجائے کنزیومر سٹیٹ بنایا جا رہا ہے۔ گنے کی فصل کو بہت زادہ پانی درکار ہوتا ہے۔ یہاں صرف سیاسی اہلیت کی شوگر ملز چلانے کیلئے اس کی کاشت بڑھائی جا رہی ہے۔ اعظم سواتی نے جو کچھ کہا ابتک تو اسے جیل میں ہونا چاہئے تھا۔ چھوٹی بڑی سیاسی مچھلیاں تو پکڑی جا رہی ہیں تاہم مگرمچھ پر ہاتھ نہیں ڈالا جا رہا۔ نواز اور زرداری بھی محض بڑی مچھلی ہیں۔ اسحاق ڈار کو واپس ضرور لایا جائے تاہم یہ بھی بتایا جائے کہ مشرف کو کون واپس لائے گا۔ جعلی اکاﺅنٹس کیس میں پی پی کو کوئی ریلیف نہیں ملا۔ امریکہ طالبان مذاکرات جو یو اے ای میں ہوئے اس میں تین چار فریق شامل تھے اب قطر میں صرف دو فریق بیٹھیں گے ایسے نہیں چل سکتا۔ خطے کے سٹیک ہولڈرز کو ساتھ بٹھانا چاہئے۔
سینئر تجزیہ کار علامہ صدیق اظہر نے کہاکہ زراعت کی حالت بہت خراب ہے‘ کپاس کی درآمد میں بھی بلیک منی استعمال ہوتی ہے۔ کسی بھی ملک میں امپورٹر اگر ایکسپورٹر سے زیادہ مضبوط ہو تو اس کی وہی حالت ہو گی جو اس وقت پاکستان کی ہے۔ سٹیل ملز کسی بھی ملک میں انڈسٹری کی بنیاد ہے نواز خاندان نے جان بوجھ کر پاکستان سٹیل ملز کو تباہ کیا۔ قرض نادہندگان سے ریکوری ہوتی ہے تو اس کے استعمال کے فیصلے کا اختیار پارلیمنٹ کو ہونا چاہئے۔ امریکہ اور طالبان کے مذاکرات اس بار سعودی عرب میں ہونا تھے تاہم طالبان نے انکار کر دیا کہ قطر میں ہو رہے ہیں۔ مذاکرات میں اگر زیادہ فریق شامل کئے گئے تو بات نہیں بنے گی۔
سینئر صحافی ضمیر آفاقی نے کہاکہ کپاس کا درآمد کرنا بدقسمتی ہے‘ کسانوں کو سہولت دینا ہو گی۔ زیادہ تر قرض نادہندگان کوڑیوں کی جائیداد دکھاکر اربوں کے قرضے لیتے ہیں۔ پیسے کیسے ریکور ہونگے اگر قرض کی رقم مل جاتی ہے تو اسے استعمال کرنے کا اختیار پارلیمنٹ کو دینا چاہئے۔ ملک کے اداروں کو مظلوم کے ساتھ کھڑا ہونا چاہئے۔ اعظم سواتی کیس حکومت کیلئے ٹیسٹ کیس ہے۔ اسحاق ڈار کو واپس لانا چاہئے۔ بھارت کی فلم انڈسٹری بڑی مضبوط ہے ہمارے یہاں بھی اچھی فلمیں بننی چاہئیں۔ امریکہ طالبان مذاکرات اگر کامیاب ہوتے ہیں تو اچھی پیشرفت ہو گی۔
کالم نگار آغا باقر نے کہاکہ کپاس کی درآمدسے ڈیوٹی ختم کرنے کی تجویز سمجھ سے باہر ہے۔ پاکستان میں اس وقت 410سٹیل فرنسز بند پڑی ہیں۔ صنعت کیسے ترقی کرے گی۔ اعظم سواتی کیس میں چیف جسٹس نے بڑے سخت ریمارکس دئیے۔ امریکہ اور طالبان میں مذاکرات کا دوسرا دور آج قطر میں شروع ہو رہا ہے۔ بڑے شہروں کے بعد تمام اضلاع میں بھی بڑی سڑکوں پر مسافرخانے بنانے کی تجویز دی گئی جو خوش آئند ہے۔ حکومت کی خارجہ پالیسی پر خاصی فوکس کرنا چاہئے۔

لاہور (شعیب بھٹی) لاہور پولیس پیدل ہوگئی، افسران کی عدم توجہ یا فنڈز کی کمی سے ”سٹی ڈویژن“ کے تھانے پیٹرول کی فراہمی سے گزشتہ 4روز سے محروم، گشت پر جانے والی گاڑیاں تھانوں میں کھڑی کر دی گئی ہیں جبکہ جو گاڑیاں شہر کی سڑکوں پر پٹرولنگ کرتے ہوئے دکھائی دیتی ہیں عام شہریوں کی جیبوں پر بوجھ بن چکی ہیں۔ واضح رہے کہ رولز کے مطابق ایک گا ڑی کو ایک دن کا 10سے 14لیٹر پیٹرول مہیا کیا جا تا ہے۔ تفصیلات کے مطابق صوبائی دار الحکومت میں 6ڈویژن پر مشتمل 37سرکلز ہیں جس میں 85تھانہ واقعہ ہیں۔ شہر میں آبادی کے لحاظ اور تھانوں کی حدود میں سے بڑی ”ڈویژن“ سٹی ڈویژن ہے جس میں22تھانے جو 10 سرکلز پر مشتمل ہیں اور مذکورہ ڈویژن کا شمار شہر میں سب سے بڑی ڈویژن میں ہوتا ہے۔ معلوم ہواہے کہ اس ڈویژن میں اسلام پورہ سرکل میں تھانہ اسلام پورہ، تھانہ نیو انارکلی، لوئر مال سرکل میں، تھانہ لوئر مال، تھانہ داتا دربار، تھانہ بھاٹی گیٹ، ٹبی سٹی سرکل میں تھانہ ٹبی سٹی، تھانہ مستی گیٹ، تھانہ یکی گیٹ، رنگ محل سرکل، تھانہ رنگ محل، تھانہ لوہاری گیٹ، نولکھا سرکل میں تھانہ نولکھا، تھانہ اکبری گیٹ، شفیق آباد سرکل میں تھانہ شفیق آباد، تھانہ راوی روڈ، گوالمنڈی سرکل میں تھانہ گوالمنڈی، تھانہ موچی گیٹ، شاہدرہ سرکل میں تھانہ شاہدرہ، تھانہ شاہدرہ ٹاﺅن، بادامی باغ سرکل میں تھانہ بادامی باغ، تھانہ لاری اڈا، مصری شاہ سرکل میں تھانہ مصری شاہ، تھانہ شاد باغ شامل ہیں۔ ذرائع کا دعوی ہے کہ مذکورہ تمام تھانوں کو گزشتہ چار روز پیٹرول کی فراہمی معطل ہے، جس کی وجہ پی ایس او کو عدم ادائیگی بتائی جارہی ہے۔ اس وقت صورتحال یہ ہے کہ سٹی ڈویژن پر مشتمل گشت پر جانے والی گاڑیاں تھانوں میں کھڑی کر دی گئی ہیں جبکہ جو گاڑیاں شہر کی سڑکوں پر پٹرولنگ کرتے ہوئے دکھائی دیتی ہیں عام شہریوں کی جیبوں پر بوجھ بنی ہوئی ہیں۔ ذرائع کا مزید کہنا ہے سٹی ڈویژن کے حدود کے لحا ظ سے بڑے تھانوں میں مکمل گشت نہ ہونے کی وجہ سے جرائم بڑھ رہا ہے اور چوروں ڈاکوﺅں کو شہریوں کو لوٹنے کی کھلی چھٹی مل گئی ہے۔ دوسری جانب ایس پی ہیڈ کواٹر سیدکرار شاہ سے رابطہ کیا گیا تو انہوں نے بتاےا کہ میرے علم میں نہیں ہے کہ سٹی ڈویژن کو پیٹرول مہیا کیوں نہیں کیا جا رہا ہے، مزید میں انکوائر ی کر لیتا ہوں۔