اسلام آباد(ویب ڈیسک) چیف جسٹس پاکستان جسٹس ثاقب نثار کا کہنا ہے کہ سندھ طاس معاہدے کے تحت ہمیں پورا پانی نہیں مل رہا۔چیف جسٹس ثاقب نثار نے سپریم کورٹ میں ایک کیس کی سماعت کے دوران ریمارکس دیتے ہوئے کہا کہ ڈیم کی تعمیر سے متعلق حالیہ سیمینار میں وزیراعظم سے کہا تھا کہ ڈیمز کی اشد ضرورت اور تعمیر ناگزیر ہے، پانی کی کمی کو ڈیم تعمیر کرکے ہی پورا کیا جاسکتا ہے۔انہوں نے مزید کہا کہ پاکستان میں ڈیم نہ بننےکی کئی وجوہات ہیں جو میں نہیں بتا سکتا جب کہ سندھ طاس معاہدے کے تحت ہمیں پورا پانی بھی نہیں مل رہا۔چیف جسٹس کا کہنا ہے کہ آئندہ نسلوں کو بچانے کیلئے ڈیم کے سوا کوئی اور راستہ نہیں، ڈیمز تعمیر نہ کرکے مجرمانہ غفلت کا مظاہرہ کیا گیا، 40 سال سے ڈیم کیوں نہیں بنے، اس معاملے کو دیکھنا چاہیے اور عوام کو ڈیم کی تعمیر میں رکاوٹیں ڈالنے والوں کا پتا چلنا چاہیے۔ان کا کہنا تھا کہ جس علاقے میں ڈیم بننا ہے وہاں زمین کے مسائل حل ہو گئے، اوورسیز پاکستانیوں نے دل کھول کر ڈیم فنڈ میں حصہ ڈالا اور ڈیمز کی تعمیر سے متعلق فنڈز کی کمی انشااللہءجلد پوری ہو جائے گی۔انہوں نے کہا کہ عمران خان سے کہا تھا کہ ڈیمز کی تعمیر نہ ہونے کا معاملہ دیکھنا چاہیے، ڈیمز کی تعمیر سے متعلق لگ رہا تھا کہ اس میں 9 سے 10 سال لگیں گے لیکن امید ہے کہ 5 سے7 سال کے دوران ڈیمز کی تعمیر مکمل ہو گی۔

کوئٹہ (ویب ڈیسک)وزیر پیٹرولیم غلام سرور کا کہنا ہے کہ مشترکہ مفادات کونسل نے فیصلہ کیا ہے کہ تمام صوبے گیس کی دریافت کے لیے کمپنیاں بنائیں گے۔وفاقی وزیر پیٹرولیم غلام سرور کا وزیراعلیٰ بلوچستان جام کمال کے ہمراہ میڈیا سے گفتگو کرتے ہوئے کہنا تھا کہ وزیراعظم کی ہدایت پر صوبوں کی قیادت سے ملاقاتیں کر رہا ہوں۔انہوں نے کہا کہ کوشش ہے کہ صوبوں کے معاملات مشاورت سے حل کیے جائیں۔ان کا کہنا تھا کہ بجائے اس کے کہ صوبے وفاق کے پاس آئیں ہم خود جا کر مسائل سنتے ہیں، سندھ کے وزیراعلیٰ سے بھی ملاقات کی اور ان کے مسائل سنے۔غلام سرور کا کہنا تھا کہ صوبائی مسائل پر ورکنگ گروپس اور کمیٹیاں بنائی ہیں، عوام جلد مثبت تبدیلی دیکھیں گے۔انہوں نے کہا کہ وفاقی حکومت اپوزیشن کو ساتھ لے کر چلنا چاہتی ہے، جمہوریت میں بات سنی اور سمجھی جاتی ہے یہی اس کا حسن ہے۔وفاقی وزیر پیٹرولیم کا کہنا تھا کہ مشترکہ مفادات کونسل کا فیصلہ ہے کہ تمام صوبے گیس کی دریادت کے لیے کمپنیاں قائم کریں گے۔ان کا کہنا تھا کہ تمام کمپنیوں کےبورڈ آف ڈائریکٹرز کی ازسرنوتشکیل ہوگی، کمپنیوں کے بورڈ آف ڈائریکٹرز میں تمام صوبوں کی نمائندگی ہونی چاہیے۔انہوں نے کہا کہ صوبوں کی نمائندگی کے لیے ایک حکومتی اور ایک پرائیویٹ سیکٹر سے نمائندہ ہونا چاہیے۔غلام سرور کا کہنا تھا کہ وزارت پیٹرولیم کے تحت کمپنیوں میں بلوچستان کی نمائندگی مناسب نہیں رہی۔

اسلام آباد(ویب ڈیسک) عالمی عدالت انصاف میں بھارتی جاسوس کلبھوشن یادیو کیس کی سماعت 18 سے 21 فروری تک ہوگی جس میں پاکستان کا 5 رکنی وفد جائے گا۔ذرائع کا کہنا ہے کہ عالمی عدالت انصاف میں بھارتی خفیہ ایجنسی ’را‘ کے جاسوس کلبھوشن یادیو کیس کی سماعت 18 سے 21 فروری تک ہوگی، اس حوالےسے پاکستان نے تیاری مکمل کرلی ہے اور سماعت کے موقع پر پاکستان کا 5 رکنی وفد ہیگ جائے گا جس میں اٹارنی جنرل انور منصورخان، ترجمان دفترخارجہ ڈاکٹر فیصل، وکیل خاور قریشی اور دیگر شامل ہیں۔ذرائع کا کہنا ہے کہ سماعت کے موقع پر پہلے روز بھارت کی جانب سے دلائل دیے جائیں گے جب کہ دوسرے روز پاکستان اپنا جواب الجواب دے گا، 20 فروری کو دوبارہ بھارتی دلائل دیے جائیں گے۔بھارتی جاسوس کلبھوشن یادیو کیس میں عالمی عدالت انصاف میں پاکستان اور بھارت کی جانب سے 2،2 جوابات جمع کرائے گئے، پاکستان نے پہلا جواب 13 دسمبر 2017 اور دوسرا جواب 17 جولائی 2018 کو جمع کرایا جس میں پاکستان نے بھارت کے تمام اعتراضات کے جواب دیے۔ بھارت نے 9 مئی 2017 کوعالمی عدالت انصاف میں جاسوس کلبھوشن یادیو کی پھانسی کے خلاف اپیل دائر کی تھی۔واضح رہے کہ بھارتی خفیہ ایجنسی ’را‘ کے جاسوس کلبھوشن یادیو کو مارچ 2016 میں بلوچستان سے گرفتار کیا گیا تھا۔ بھارتی نیوی کے حاضر سروس افسر نے پاکستان میں دہشت گردی کی متعدد کارروائیوں کا اعتراف کیا تھا جس پر فوجی عدالت نے کلبھوشن کو سزائے موت سنائی تھی۔

لاہور(ویب ڈیسک) پاکستان اوربھارت کے شہریوں کا ایک دوسرے کے ممالک میں شادی اورغیر قانونی قیام کا ایک اور واقعہ سامنے آگیا۔پاکستان نے جمعہ کے روزایک 53 سالہ بھارتی شہری کو رہا کیا ہے جس نے 2001 برطانیہ میں مقیم ایک پاکستانی خاتون سے ٹیلی فون پر نکاح کیا اور 2001 میں اس سے ملنے کراچی آگیا تھا۔پاکستان کی طرف سے بھارتی شہری افضل احمد کو واہگہ بارڈر پر بھارتی حکام کے حوالے کیا گیا، افضل احمد کے مطابق وہ دہلی کا رہائشی ہے اور وہاں جوتوں کی ایک بڑی دکان میں کام کرتا تھا ، اس کی برطانیہ میں مقیم ایک پاکستانی خاتون مسرت قریشی سے سوشل میڈیا پردوستی ہوئی جس کے بعد دونوں کا ٹیلی فون پر نکاح ہوگیا۔وہ 8 ستمبر2001 کو دوستی بس کے ذریعے سے دہلی سے لاہور آیا اور یہاں سے کراچی چلا گیا جہاں مسرت قریشی کی فیملی مقیم تھی، افضل کے مطابق مسرت قریشی نے برطانیہ میں بھی ایک شادی کررکھی تھی ، اسے ایک ماہ کا ویزہ ملا تھا ،مگرویزہ ختم ہونے کے بعد وہ واپس بھارت جانے کی بجائے کراچی میں ہی مقیم ہوگیا۔افضل نے بتایا کہ وہ 2014 تک کراچی میں مقیم رہا ، ا س دوران اس کی بیوی صرف چار، پانچ ماہ ہی اس کے پاس رہی اور پھرواپس برطانیہ چلی گئی ، 2015 میں اس نے رابطہ کرنے پر بتایا کہ وہ اب واپس نہیں آئے گی جس کے بعد مایوس ہوکرلاہور آگیا جہاں سے اسے گرفتار کرلیا گیا۔افضل کے مطابق اسے 4 ماہ کی سزاہوئی تھی جو 2 جولائی 2016 میں مکمل ہوگئی مگربھارت کی طرف سے اس کی شہریت کی بروقت تصدیق نہ ہونے کے باعث ا سکی رہائی میں تاخیرہوئی ہے اوراسے اب 11 جنوری کو رہا کیا گیا ہے۔گزشتہ ماہ 26 دسمبرکو بھارت نے بھی کراچی کے رہائشی ایک پاکستانی شہری عمران وارثی کو رہا کیا تھا جو ایک بھارتی خاتون سے شادی کے بعد وہیں مقیم ہوگیا اورپھراسے گرفتارکرلیاگیا تھا،عمران وارثی کو دس سال بعد رہائی نصیب ہوئی تھی ، اس کے بیوی بچے اب بھی بھارت میں ہی مقیم ہیں۔