لاہور(ویب ڈیسک) پاکستان فٹبال فیڈریشن نے فیفا اور اے ایف سی سے ملنے والے 75 فیصد فنڈز کو کھلاڑیوں پر خرچ کرنے کا اعلان دیا۔صدر پی ایف ایف مخدوم فیصل صالح حیات کا کہنا ہے کہ فٹبال کی دونوں انٹرنیشنل تنظیموں نے پاکستان سمیت ممبرز ممالک کے لئے گرانٹ دوگنا کردی ہے، مجھے یہ بتاتے ہوئے بڑی خوشی ہو رہی ہے کہ ہم اس رقم کا تیسرا حصہ کھلاڑیوں اور کوچز کی فلاح وبہبود پر خرچ کریں گے۔مخدوم فیصل صالح حیات نے کہا کہ اگر ترقی کے سفر کو روکا نہ جاتا تو ہم بھارت سے عالمی رینکنگ میں بہتر ہوتے، 2014ء میں گرین شرٹس نے بلیو شرٹس کو بھارت میں ہی شکست دی، بعد ازاں سوچے سمجھے منصوبے کے تحت فیفا ہاﺅس پر قبضہ کر لیا گیا جس کی وجہ سے ہم تین سال میں بہت پیچھے چلے گئے، آج بھارت عالمی رینکنگ میں اٹھانوے اور ہم ایک سو اٹھانوے نمبرز پر ہیں۔صدر پی ایف ایف کے مطابق انڈر 15 فٹبال چیمپیئن شپ میں ٹیم نے ملک کا نام روشن کیا، 13سال کے طویل عرصہ کے بعد پاکستان سینئر ٹیم بھی تیسری پوزیشن حاصل کرنے میں کامیاب رہی تھی۔ انہوں نے کہا کہ گزشتہ 7 ماہ میں ہم نے 21 ملکی اور غیر ملکی کھیلوں کی سرگرمیاں کروائی ہیں جو ایک ریکارڈ ہے۔

دبئی (ویب ڈیسک)آل راﺅنڈرمحمد حفیظ کا کہنا ہے لوگوں کی رائے کو کارکردگی سے غلط ثابت کیا، جو رویہ اختیار کیا جا رہا تھا وہ قابل قبول نہیں تھا۔ محمد حفیظ نے کہا کہ پاکستان کی فتوحات میں اہم کردار ادا کرنے پر خوش ہوں،فارم کے ساتھ اعتماد کا بحال ہونا بھی ضروری ہے،کئی معاملات کیریئر پر اثر انداز ہوتے ہیں،کم بیک کو آخری موقع سمجھ کر سخت محنت کی اور صلہ پایا،اس طرح کی صورتحال کا ماضی میں بھی کئی بار سامنا کرچکا ہوں،ہمیشہ اپنی کارکردگی سے رائے تبدیل کرنے کی کوشش کرتا ہوں،اس بار بھی ایسا ہی کیا، میری ترجیح پاکستان کیلیے کھیلنا تھی اور رہے گی۔دلبرداشتہ ہوکر ریٹائرمنٹ کی باتیں کرنے کے سوال پر انھوں نے کہا کہ میں سمجھتا ہوں کہ میرے ساتھ جو رویہ رکھا گیا، قابل قبول نہیں تھا، مشکل وقت میں فیملی اور دوستوں نے ہمت بندھائی،خود کو سنبھالا اورمتحرک کیا، محنت کرتا رہا، اللہ تعالیٰ نے میرے لیے آسانیاں پیدا کیں،کارکردگی سے رائے تبدیل کرنے کا عزم کیا اور آج ملک کیلیے پرفارم کررہا ہوں، اب ماضی کی باتوں کو بھول کر مستقبل کے بارے میں سوچنے اور اپنی اہلیت منوانے کا وقت ہے۔ شعیب ملک کی طرح ریٹائرمنٹ پلان کے سوال پر محمد حفیظ نے کہا کہ یہ موقع ہر کھلاڑی کی زندگی میں آتا ہے، چاہتا ہوں کہ عزت کیساتھ جاﺅں،جب تک لڑنے کی طاقت اور قومی ٹیم کے معیار پر پورا اترنے کی ہمت ہو ملک کیلیے کھیلنا چاہتا ہوں،جگہ لینے کیلیے کوئی نوجوان کرکٹر ہو تو چلا جاو¿ں گا۔اگر میری جگہ ہے تو محنت اور فٹنس کیساتھ اس کو برقرار رکھنے کی کوشش کروں گا،تینوں طرز کی کرکٹ کا دباو¿محسوس کرنے کے سوال پر آل راو¿نڈر نے کہا کہ اگر میں کسی بھی فارمیٹ کیلیے موزوں ہوں تو کھیلوں گا،سوچ رہا ہوں کہ اپنے اوپر دباﺅ تھوڑا کم کروں،اس کیلیے مناسب وقت کا انتظارکررہا ہوں، کسی بھی فارمیٹ میں اپنے سے بہتر متبادل نوجوان کرکٹر نظر آئے تو فیصلہ کرنے میں آسانی اور خوشی محسوس کروں گا۔ ایک سوال پر انھوں نے کہا کہ کپتان سرفرازاحمد مجھ سے میدان میں مشورے کرتے اور نوجوانوں سے بات کرنے کی اجازت بھی دیتے ہیں،ضروری ہے کہ اپنا تجربہ دوسروں تک منتقل کیا جائے،نوجوان کرکٹرز سے بات کرتے ہوئے ان کی تکنیک یا مہارت سے چھیڑ چھاڑ نہیں کرتا بلکہ صرف صورتحال کے مطابق حوصلہ جوان رکھنے کی کوشش کرتا ہوں۔
ایکشن میں تبدیلی،پہلے جیسا بولر نہیں رہا
محمد حفیظ نے کہا کہ ایکشن کی اصلاح کے بعد بولنگ مہارت میں کمی آگئی، پٹھوں کونئے زاویے کا عادی بنانا مشکل کام ہے، کئی چیزوں میں محدود ہوگیا، پہلے جیسا بولرنہیں ہوں، پابندی ختم کروانے کیلیے 8 ماہ سخت محنت کی،اب بھی اپنے بولنگ کوچ اور بائیو مکینک ایکسپرٹ کیساتھ رابطے میں رہتا ہوں،خود بھی اپنے ایکشن کا جائزہ لیتا رہتا ہوں،چاہتا ہوں کہ بطور آل راﺅنڈر کھیلوں اور جب بھی ٹیم کو ضرورت ہو بولنگ کروں، ظاہر سی بات ہے کہ مسلز کو نئے ایکشن کا عادی بنانے کے بعد پہلے جیسا بولر نہیں،کئی چیزوں میں محدود ہونا پڑا،اس کے باوجود خود کو ذہنی طور پر تیار کیا، محنت کی،تجربہ بھی استعمال کررہا ہوں لیکن ظاہر ہے کہ اسکلز میں کمی آئی ہے۔
تجربے سے دیگر کو مستفید کرتاہوں اسی لیے ساتھی پروفیسرکہتے ہیں
پروفیسر پکارے جانے کے سوال پر محمد حفیظ نے کہا کہ کرکٹ کی معلومات کوبہتر سمجھتا اور دوسروں کو بتاتا رہتا ہوں، بہتری کیلیے اپنا تجزیہ بھی کرتا رہتا ہوں کہ کس طرح کے حالات میں کیا کرنا بہتر ہوگا، میچ کی صورتحال کو بھی اسی انداز میں دیکھتے ہوئے اپنی سوچ سے ساتھی کھلاڑیوں کو آگاہ کرتا ہوں، شاید اسی لیے پروفیسر کہتے ہیں۔
ٹیسٹ کرکٹ میں تفریحی عنصرشامل کیا جائے، تجاویز ذہن میں ہیں
محمد حفیظ نے ٹیسٹ کرکٹ کو تبدیل کرتے ہوئے اس میں تفریحی عنصر شامل کرنے کی تجویز پیش کردی،ان کا کہنا ہے کہ ٹی ٹوئنٹی میچز کو شائقین پسند کرتے اوراسپانسرز بھی اسی کی جانب راغب ہوتے ہیں، پرفارمنس پر ملنے والی پذیرائی کرکٹرز کا بھی حوصلہ بڑھاتی ہے،ایک، دوملکوں کے سوا شائقین ٹیسٹ کرکٹ دیکھنے اسٹیڈیم میں نہیں آتے جبکہ ٹی ٹوئنٹی میں میدان بھر جاتے ہیں،میرے خیال میں ٹیسٹ کرکٹ کو بدلنا اور اس میں تفریحی عنصر لانا چاہیے،اس حوالے سے تجاویز کے سوال پر انھوں نے کہا بہت سی چیزیں ذہن میں ہیں، وقت آنے پر بتاﺅں گا۔
پاک بھارت مقابلے دنیائے کرکٹ کیلیے بھی سودمند ہیں، آل راﺅنڈر
محمد حفیظ نے پاک بھارت مقابلوں کو دنیائے کرکٹ کے لیے بھی سودمند قرار دیتے ہوئے کہا کہ کھیل کو سیاست سے الگ رکھنا چاہیے، جو مزا روایتی حریفوں کا میچ کھیلنے اور دیکھنے میں آتا ہے، وہ کسی اور مقابلے کا خاصا نہیں، ہم بھارت کھیلنے جائیں، وہ سیریز کے لیے پاکستان آئیں تونہ صرف دونوں ملکوں بلکہ دنیائے کرکٹ کے بھی مفاد میں ہے۔
بیٹا ہی میرا کوچ اور ناقد ہے
محمد حفیظ نے بیٹے کو ہی اپنا کوچ قرار دیدیا، آل راﺅنڈر نے کہا کہ کھیلوں کے معاملے میں اپنے بچوں کی بھرپور حوصلہ افزائی کرتا ہوں، میرا بیٹا تمام کرکٹرز کے بارے میں جانتا ہے، وہی میرا کوچ اور سب سے بڑا ناقد ہے، آﺅٹ ہونے کے بعد جاﺅں تو پوچھتا ہے کہ بابا کس طرح کی شاٹ کھیلی ہے آپ نے۔اس کی باتیں سن کر کبھی حوصلہ شکنی نہیں کرتا، بچوں کو جسمانی اور ذہنی طور پر مضبوط بنانے کی بھرپور کوشش کرنا چاہیے۔

لاہور(ویب ڈیسک)بھارتیوں نے قومی ٹیم کے بلے باز بابراعظم کی کارکردگی کو آٹے میں نمک کے برابر قرار دے دیا۔نوجوان پاکستانی بیٹسمین بابر اعظم نے 26ویں ٹی ٹوئنٹی میچ میں ایک ہزار رنز کا سنگ میل عبور کرتے ہوئے بھارتی کپتان ویرات کوہلی کو پیچھے چھوڑا تو سوشل میڈیا پر پاکستانی اور بھارتی صارفین کے درمیان لفظی جنگ چھڑ گئی، پاکستانیوں نے دل کھول کر بابراعظم کے ٹیلنٹ کو سراہا اور انہیں قومی ٹیم کی بیٹنگ کا اہم ستون قرار دیا۔صارفین نے اپنے پیغامات میں بھارتی کپتان کا ریکارڈ چھن جانے کا خاص طور پر ذکر کیا، جواب میں بھارتی صارفین میں سے چند غیر متعصب تو بابراعظم کی صلاحیتوں کا اعتراف کرتے رہے، بیشتر نے کہا کہ پاکستانی بیٹسمین کے کیریئر کا سفر تو ابھی شروع ہوا ہے، ویرات کوہلی نے ون ڈے کرکٹ میں 10 ہزار رنز بنا رکھے ہیں، ٹیسٹ کرکٹ میں بھی ان کا کوئی ثانی نہیں، بابراعظم کی کارکردگی آٹے میں نمک کے برابر ہے۔یاد رہے کہ ویرات کوہلی کی صرف ٹی ٹوئنٹی کرکٹ میں اوسط 50 سے کم ہے، بابر اعظم نے ون ڈے اور ٹی ٹوئنٹی میچز میں تو 50 سے زائد کی اوسط سے رنز بنائے ہیں لیکن ٹیسٹ کرکٹ میں یکسر مختلف بیٹسمین نظر آتے ہیں، انہوں نے 9.29 کی اوسط سے 747 رنز بنائے ہیں۔

لاہور(ویب ڈیسک) ایم ڈی ٹی ٹین لیگ سعد اللہ خان کا کہنا ہے کہ خواہش ہے کہ ٹی ٹین لیگ کا کچھ حصہ پاکستان میں ہو۔ٹی ٹین لیگ کے ایم ڈی اور مینجنگ پارٹنر سعد اللہ خان کا کہنا ہے کہ خواہش ہے کہ ٹی ٹین لیگ کا کچھ حصہ پاکستان میں ہو، سیمی فائنلز اور فائنل پاکستان میں کرانا چاہتے ہیں وقت کی کمی کے باعث اس برس ممکن نہیں ہو سکا آئندہ برس کے لیے ابھی سے تیاری شروع کر دی ہے میچز کا ریونیو پاکستان سے شئیر بھی کریں گے۔ٹی ٹین لیگ کے ایم ڈی سعد اللہ خان کا کہنا تھا کہ پی سی بی نے 12 کھلاڑیوں کو این او سی جاری کر دیے ہیں باقی نیشنل ڈیوٹی پر ہیں اس لیے زبردستی نہیں کی جاسکتی، دیکھتے ہیں 22 میں سے کتنے پاکستانی کرکٹرز شریک ہوتے ہیں، چیئرمین احسان مانی اور پی سی بی نے ٹی ٹین لیگ کے لیے بہت تعاون کیا ہے۔

دبئی(ویب ڈیسک)کیویزکے خلاف ون ڈے سیریز کھیلنے کے لیے جنید خان، امام الحق اور حارث سہیل یو اے ای پہنچ گئے۔ٹی ٹوئنٹی سیریز مکمل ہونے کے بعد صاحبزادہ فرحان، وقاص مقصود اور حسین طلعت وطن واپسی کے لیے رخت سفر باندھ چکے اور آج رات وہاں سے روانہ ہو جائیں گے۔ ون ڈے اسپیشلسٹ تینوں کھلاڑیوں میں سے گزشتہ روز جنید خان اسلام آباد، حارث سہیل سیالکوٹ سے روانہ ہوئے تھے، امام الحق نے پیر کی صبح لاہور سے اڑان بھرتے ہوئے اسکواڈ کو جوائن کرلیا۔اوپنر نے گزشتہ روز قذافی اسٹیڈیم میں حبیب بینک کی طرف سے قائداعظم ٹرافی ون ڈے کپ کا فائنل میچ بھی کھیلا تھا، اوپنر بڑی اننگز تو نہیں کھیل سکے لیکن ان کی ٹیم واپڈا کو ہراکرچیمپئن بن گئی۔ پاکستان اور نیوزی لینڈ کے مابین ون ڈے سیریز کا پہلا میچ 7 نومبر کو ابوظہبی میں کھیلا جائے گا۔