لاہور(وقائع نگار)سنی اتحاد کونسل پاکستان کے چیئرمین اور نظام مصطفے متحدہ محاذ کے سیکریٹری جنرل صاحبزادہ حامد رضا نے کہا ہے کہ 25 جولائی فائیو سٹار چوروں کا یوم حساب ثابت ہو گا۔ نواز شریف پاکستان مخالف عالمی کھیل کا حصہ بن چکا ہے۔ پاکستان میں موجود امریکی و بھارتی لابی نواز شریف کے ساتھ کھڑی ہے۔ ن لیگ انتخابات میں منظم دھاندلی کی ماہر ہے لیکن اس بار دھاندلی نہیں ہونے دیں گے۔ ن لیگ نے ہر بار پٹواریوں اور آراوز کے سہارے الیکشن جیتا۔ پاکستان کے دشمن عید کے بعد خطرناک کھیل شروع کرنا چاہتے ہیں۔ پاکستان دشمن اور ان کے اندرونی گماشتے 71 جیسے حالات پیدا کرنے کی کوشش کر رہے ہیں۔ لبرل فاشسٹ آزادی اظہار کی آڑ میں غیر ملکی ایجنڈے کی تکمیل چاہتے ہیں۔ ملک دشمن عناصر کا قلع قمع کرنا ریاستی اداروں کا فرض ہے۔ ان خیالات کا اظہار انھوں نے سنی اتحاد کونسل کے مرکزی و صوبائی عہدیداران کے اجلاس سے خطاب کرتے ہوئے کیا۔ صاحبزادہ حامد رضا نے مزید کہا کہ سوشل میڈیا پر پاک فوج کی کردارکشی کرنے والوں کے خلاف کریک ڈا¶ن کیا جائے۔ قیام پاکستان سے اب تک برسراقتدار رہنے والے تمام افراد کے کڑے احتساب کی ضرورت ہے۔ اب کرپشن اور پاکستان ایک ساتھ نہیں چل سکتے۔ قوم کے 54 ارب روپے لوٹنے والی کمپنیوں کے مالکان کا بےرحم احتساب کیا جائے۔ ن لیگ انتخابی شکست کو یقینی سمجھ کر انتخابات کی ساکھ کو مجروح کرنے کے درپے ہے۔ قوم نے ن لیگ کا فوج و عدلیہ کے خلاف منفی پروپیگنڈہ مسترد کر دیا ہے۔ شریف خاندان تیس سال سے قومی وسائل کو شیر مادر کی طرح ہضم کر رہا ہے۔ این اے 110 اور این اے 106 سے الیکشن لڑنے کا فیصلہ اٹل ہے۔ ہمارے کارکنان اور سپورٹرز تاریخی معرکہ آرائی کے لئے تیار ہیں۔ مخالفین کی عقل ٹھکانے لگا دیں گے۔

کراچی(این این آئی) پاکستان ریلوے نے مسافروں کو سستی سفری سہولیات فراہم کرنے کے پیش نظر سمر ویکیشن اسپیشل ٹرینیں چلانے کا اعلان کیا ہے۔ترجمان پاکستان ریلوے کے مطابق سمر ویکیشن اسپیشل ٹرین عید الفطر کے بعد کراچی اور راولپنڈی کے درمیان چلائی جائے گی۔سمر ویکیشن اسپیشل ٹرینیں راولپنڈی سے 18، 22، 26 اور 30 جون کی دوپہر اڑھائی بجے کراچی کے لئے روانہ ہوں گی۔ جبکہ کراچی سے 20، 24 اور 28 جون کو سمر ویکیشن اسپیشل ٹرینیں رات 8 بجے راولپنڈی کے لئے روانہ ہوں گی۔سمر ویکیشن اسپیشل ٹرینیں حیدر آباد، روہڑی، خانپور بہاولپور، خانیوال، ساہیوال، اوکاڑہ، رائے ونڈ، لاہور، گوجرانوالہ، وزیر آباد، گجرات، لالہ موسی اور جہلم اسٹاپ کریں گی۔پاکستان ریلوے کی جانب سے اعلان کردہ خصوصی ٹرینوں میں اے سی بزنس، اے سی سٹینڈرڈ اور اکانومی کلاس شامل ہوگی۔

فیصل آبا د (سٹاف رپورٹر) شادی سے انکاری کرنے پر نوجوان نے بس ہوسٹس کو فائرنگ کر کے موت کے گھاٹ اتار دیا۔ قاتل گرفتار، بتایا گیا ہے کہ مرضی پورہ کی رہائشی 23سالہ مہوش گزشتہ روز ملتان سے فیصل آباد پہنچی تو موقع پا کر نوجوان عمر دراز نے اس پر گولیاں برسا دیں۔ جن کی زد میں آ کر بس ہوسٹس شدید زخمی ہو گئی۔ اسے تشویشناک حالت میں الائیڈ ہسپتال منتقل کیا گیا مگر وہ زخموں کی تاب نہ لاتے ہوئے دم توڑ گئی، پولیس ذرائع کے مطابق کہ مہوش اور عمر دراز ایک ٹرانسپورٹ کمپنی میں اکٹھے کام کرتے تھے۔

لاہور (آن لائن) پاکستان مسلم لیگ ن کے سینئر رہنماءاور سابق وفاقی وزیر ریلوے خواجہ سعد رفیق نے کہا کہ میں آج بروز پیر قومی اسمبلی کے دو حلقوں این اے 131 اور این اے 129 سے کاغذات نامزدگی جمع کروانگا۔ ان خیالات کا اظہار انہوں نے گزشتہ روز ماڈل ٹاﺅن میں میڈیا سے گفتگو کرتے ہوئے کیا انہوں نے کہا کہ بڑے افسوس کے ساتھ کہنا پڑتا ہے کہ الیکشن کمیشن کی جانب سے حلقہ بندی کے بنیادی اصولوں سے مکمل طور پر انحراف کیا گیا ہے جو قابل افسوسناک امر ہے انہوں نے کہا کہ الیکشن کمیشن نے تحریک انصاف کو فائدہ پہنچانے کےلئے میر ے سابقہ حلقے کے تین ٹکڑے کئے گئے انہوں نے کہا کہ میرے سابقہ حلقے این اے 125 کے تین ٹکڑے کرکے اسے این اے 131 ،این اے 129 اور این اے 132 میں تقسیم کر دیا گیا ہے انہوں نے کہا کہ الیکشن کمیشن کے اس ا قدام کی ہر پرزور الفاظ میں مذمت کرتے ہیں انہوں نے کہا کہ مخالفین ہوشیار رہیں کیونکہ ہم اپنے کاموں کو لیکر عوام کی خدمت میں جا رہے ہیں اور انشاءاللہ اس بار بھی شکست تحریک انصاف کا مقدر بنے گی۔

احمدیار (این این آئی) پاکستان سمیت دنیا بھر میں والد کی عظمت کا عالمی دن 17جون کو منایا جائے گا ۔اس سلسلہ میں احمدیار سمیت ملک بھر میں تقریبات انعقادپذیر ہوںگی جس کا مقصد اولاد کےلئے باپ کی قربانیوں شفقتوں کے بارے میں شعور و آگاہی پیدا کرنا اور باپ کی عظمت کو اجاگر کر نا ہے ۔والد کی عظمت کا دن ہرسال جون کے تیسرے اتوار کو منایا جاتا ہے الیکٹرانک میڈیا پروگرامز نشراورپرنٹ میڈیافیچر شائع کریں گے۔

لاہور (آن لائن) صوبائی دارالحکومت لاہور میں عیدالفطر کی آمد نزدیک آتے ہی لاہوریوں کی کثیر تعداد شاپنگ مالز اور بازاروں میں امڈ آئی شہریوں نے عید کی خصوصی شاپنگ کیلئے مختلف مالز کے ساتھ ساتھ بازاروں میں کا رخ کر لیا اور اپنی پسند کی ڈھیر ساری شاپنگ کی بازاروں میں شہریوں کے رش کے باعث دکانداروں نے بھی موقع سے خوب فائدہ اٹھایا اور شہریوں سے من مانگی قیمتیں وصول کیں جبکہ اس موقع پر شہریوں کا کہنا تھا کہ عیدالفطر کے موقع پر مختلف دکانوں پر دکانداروں نے غیر معیاری اشیاءکی فروخت شروع کر دی ہے اور وہ ان غیر معیاری اشیاءجن میں جعلی میک اپ کا سامان سمیت کاسمٹیکس ،جوتے اوردیگر اشیاءشامل ہیں شہریوں سے منہ مانگے داموں وصول کررہے ہیں شہریوں نے حکومت سے مطالبہ کیا کہ وہ مارکیٹوں کمیٹیوں کوفوری طور پر تمام مارکیٹوں کادورہ کرنے کا حکم جاری کرے تاکہ بازار میں فروخت ہونے والی غیر معیاری کپڑے اور جوتے و دیگر اشیاءکی فروخت کو روکا جا سکے۔