راولپنڈی (این این آئی) عمران خان کے قریبی دوست زلفی بخاری کا نام ایگزٹ کنٹرول لسٹ سے نکال دیا گیا جس کے بعد وہ چیئرمین پی ٹی آئی کے ہمراہ عمرے پر روانہ ہوگئے۔میڈیا رپورٹ کے مطابق پیر کو زلفی بخاری نے چارٹرڈ طیارے کے ذریعے عمران خان اور اہلخانہ کے ہمراہ عمرے کی ادائیگی کےلئے سعودی عرب روانا ہونا تھا لیکن ایف آئی حکام نے انہیں نام ای سی ایل میں ہونے کے باعث روک دیاجس کے بعد کافی تگ ودو کے بعد وہ اپنا نام ای سی ایل سے نکلوانے میں کامیاب ہوگئے اور عمرے کی ادائیگی کیلئے روانہ ہوگئے ۔ ذرائع کے مطابق وزارت داخلہ نے زلفی بخاری کا نام ای سی ایل سے نکالنے کے بعد امیگریشن حکام کو احکامات جاری کئے جس کے بعد انہیں سعودی عرب جانے کی اجازت دی گئی جس کے بعد وہ 4 بج کر 12 منٹ پر عمران خان ان کی اہلیہ اور عون چودھری کے ہمراہ سعودی عرب روانہ ہوگئے ۔

اسلام آباد (مانیٹرنگ ڈیسک) پیپلزپارٹی کے سینئر رہنما اور قانونی ماہر اعتزاز احسن نے کہا ہے کہ خواجہ حارث نے وہی کیا جو ان کے کلائنٹ نے ان سے کہا۔ نوازشریف فرار کا راستہ ڈھونڈ رہے ہیں جس طرح کی نام نہاد پریس کانفرنس کرتے ہیں میڈیا والوں کو ان کا بائیکاٹ کرنا چاہیے۔ نواز خاندان کیخلاف کیسز بھی بڑے شاہانہ انداز میں چل رہے ہیں ایک ایک گواہ ہے ۔ 20، 20دن جرح کی جارہی ہے ایسی رعایت کی مثال پاکستان میں تو کیا برصغیر میں بھی نہیں مل سکتی۔ نجی ٹی وی سے گفتگو کرتے ہوئے انہوں نے کہا کہ پہلے ان سے کہ رہا ہوں کہ عدالتیں ان کے ساتھ نرم رویہ اختیار کئے ہوئے ہیں۔ پھر بھی کہتے پھرتے ہیں کہ دفاع کا حق نہیں دیا جارہا۔ 2سال میں منی ٹریل کی ایک دستاویز بھی جمع نہ کراسکے پھر دفاعی لائن ہی بول دی اور قطری خط اور کیلبری فونٹ لے آئے جو دونوں جعلی تھے نوازشریف کے سامنے لندن جانے میں مفرور بیٹوں کے پاس انہیں متنازع فلیٹس میں ٹھہرتے ہیں کہیں کسی عدالت یا نیب جج نے اس بارے نوازشریف سے سوال نہیں کیا کہ آپ اپنے بیٹوں سے کیوں نہیں پوچھتے کہ پیر کہاں سے آیا۔ نوازشریف پریس کانفرنس میں چھوٹا سا منہ بنا کر کہتے ہیں۔ کہ میرے خلاف ثبوت تو کیا الزام بھی نہیں ہے۔ میڈیا کو سوالات کرنے کی اجازت تک نہیں دی جاتی میڈیا کو ایسی پریس کانفرنسز کا بائیکاٹ کرنا چاہیے۔ اب خواجہ حارث کو کہہ کر درخواست دلوا دی ہے وکیلوں کو تو بڑے کشت اٹھانے پڑتے ہیں۔ یہ تو صرف ہفتہ اتوار کی پیشی پر ہی بھاگ گئے۔ میں خود بی بی شہید اور آصف زرداری کے کیسز لڑتا رہا تو صبح لاہور دوپہر کراچی اور رات اسلام آباد میں ہوتا تھا یوسف رضا گیلانی کیس میں 9گھنٹے تک سپریم کورٹ میں کھڑا دلائل دیتا رہا جس دوران میرے پاﺅں سوج گئے۔

اسلام آباد (صباح نیوز) سابق وفاقی وزیر سیدہ عابدہ حسین نے اصغر خان کیس میں اپنا جواب سپریم کورٹ میں جمع کروا دیا۔ عابدہ حسین نے سابق ڈی جی آئی ایس آئی اسد درانی سے پیسے لینے کی تردید کر دی ہے۔ جواب میں کہا گیا ہے کہ کسی سے کوئی رقم نہیں لی۔ اسد درانی کا بیان حلفی درست نہیں۔ 1990ءکے الیکشن میں پیسے لینے کا الزام غلط ہے۔

اسلام آباد (این این آئی، مانیٹرنگ ڈیسک) قومی احتساب بیورو (نیب )نے ایک بار پھر ایون فیلڈ ریفرنس میں نواز شریف ، مریم نواز ، کیپٹن صفدر ، حسن اور حسین نواز کانام ای سی ایل میں ڈالنے کےلئے وزارت داخلہ کو خط لکھ دیا ہے ۔پیر کو میڈیا رپورٹ کے مطابق نیب کی جانب سے وزارت داخلہ کو لکھے گئے خط میں کہا گیا ہے کہ نیب ریفرنسز میں ملزموںکے خلاف جلد ٹرائل کورٹ کا فیصلہ متوقع ہے ¾اس لئے خدشہ ہے کہ ملزمان بیرون ملک جا سکتے ہیں۔ خط میں سفارش کی گئی ہے کہ ایون فیلڈ ریفرنس میں نواز شریف ، مریم نواز اور کیپٹن صفدر کے نام ای سی ایل ڈالنے کے حوالے سے ازسر نو جائزہ لیا جائے کیونکہ ریفرنس کا فیصلہ قریب ہے جس کی وجہ سے ملزمان بیرون ملک فرار ہو سکتے ہیں۔ نیب نے حسن نواز اور حسین نواز کانام بھی ای سی ایل میں ڈالنے کی سفارش کی ہے ۔ یاد رہے کہ ایک روز قبل سپریم کورٹ نے نواز شریف اورمریم نواز کو بیگم کلثوم نواز کی عیادت کے لئے بیرون ملک جانے کی اجازت دی تھی اور اب اگر نیب کی سفارش پر وزارت داخلہ کی جانب سے ان کا نام ای سی ایل میں ڈالا گیا تو ان کا لندن جانے کا پروگرام کھٹائی میںپڑ سکتا ہے ۔ یاد رہے کہ اس سے قبل پاکستان مسلم لیگ (ن)کی حکومت کے دور ان بھی نیب نے سابق وزیراعظم اور ان کے بچوں کا نام ای سی ایل میں ڈالنے کےلئے خط لکھا تھا۔

راولپنڈی (این این آئی) آرمی چیف جنرل قمر جاوید باجوہ سے آذر بائیجان کے سفیر نے ملاقات کی جس میں باہمی دلچسپی اور علاقائی امن واستحکام سے متعلق امور پر تبادلہ خیال کیا گیا ۔ آئی ایس پی آر کے مطابق آذر بائیجان کے سفیر نے چیف آف آرمی سٹال جنرل قمر جاوید باجوہ سے پیر کو ملاقات کی ۔ ملاقات کے دوران باہمی دلچسپی اور علاقائی امن و استحکام سے متعلق امور پرتبادلہ خیال کیا گیا۔آذربائیجان کے سفیر نے علاقائی امن و استحکام کےلئے پاک فوج کے کردار کو سراہا اور خطے میں اپنے ملک کے کردار ادا کرنے کی خواہشات کا اظہار کی۔

اسلام آباد(مانیٹرنگ ڈیسک) پاکستان تحریکِ انصاف نے قومی اسمبلی میں اقلیتوں امیدواروں کی نشستوں کی فہرست جاری کر دی۔ چئیرمین تحریکِ انصاف عمران خان کی منظوری کے بعد باضابطہ نوٹیفکیشن جاری کر دیا گیا۔قومی اسمبلی میں اقلیتوں کی نشستوں پر 9 کھلاڑیوں کے نام شامل ہیں۔ اس ضمن میں باضابطہ نوٹیفکیشن بھی جاری کر دیا گیا ہے۔ نوٹیفیکیشن پر چئیرمین تحریکِ انصاف عمران خان کے دستخط موجود ہیں۔قومی اسمبلی میں اقلیتی نشستوں پر لال چند ملہی، شنیلا رتھ، رمیش کمار، جے پرکاش اور جمشید تھومس تحریکِ انصاف کی ترجیحی فہرست میں شامل ہیں۔ ہریش کمار، جارج کلیمنٹ، سیمسن اعجاز اور بابر شہزاد کے نام بھی قومی اسمبلی کی اقلیتی نشستوں کی فہرست میں شامل ہیں۔

لاڑکانہ (آئی این پی) پاکستان پیپلز پارٹی کے چیئرمین بلاول بھٹو زرداری نے کہا ہے کہ عمران خان نے کہا تھا کہ وہ موروثی سیاست کا خاتمہ کریں گے، انہوں نے پارٹی ٹکٹ تقسیم میں اپنے موقف سے یوٹرن لے لیا، پیپلز پارٹی کی نیت صاف ہے، جے ڈی اے والوں سے پوچھیں ان کے پیچھے کون ہے، سب کہہ رہے ہیں کہ الیکشن وقت پر ہوں گے، امید ہے وقت پر ہی ہوں گے۔ پیر کو میڈیا سے گفتگو کرتے ہوئے بلاول بھٹو نے کہا کہ نواز شریف کیس کا فیصلہ عدالت کرے گی میں بھی دیگر کی طرح انتظار میں ہوں، ایسا پاکستان چاہتے ہیں جہاں معاشی انصاف ہو، الیکشن میں سرپرائز ملے گا، پیپلز پارٹی پہلے سے بہتر نتائج دے گی، میں کارکن اور امیدوار سب مل کر الیکشن لڑ رہے ہیں، سب کہہ رہے ہیں کہ الیکشن وقت پر ہوں گے، امید ہے وقت پر ہی ہوں گے، عمران خان نے کہا تھا کہ وہ موروثی سیاست کا خاتمہ کریں گے، عمران خان نے پارٹی ٹکٹ تقسیم میں اپنے موقف سے یوٹرن لے لیا، پیپلز پارٹی کی نیت صاف ہے، جے ڈی اے والوں سے پوچھیں ان کے پیچھے کون ہے، چوہدری نثار کے پاس کچھ ہے تو انہیں کہنا چاہیے۔

لاہور ( این این آئی) پاکستان تحریک انصاف کے چیئرمین عمران خان نے کہا ہے کہ میں جان بوجھ کر کبھی بھی اپنے کسی دیرینہ اور وفادار کارکن سے ناانصافی نہیں کروں گا، ٹکٹوں کی تقسیم پر کارکنان اپنی شکایات بھیجیں میں بذات خود ہر درخواست کا جائزہ لوں گا ۔ انہوں نے سماجی رابطے کی ویب سائٹ ٹویٹر پر اپنے پیغام میں کہا کہ تحریک انصاف کے دیرینہ کارکنان کیلئے میرا پیغام ہے کہ اگر آپ میں سے کوئی سمجھتا ہے کہ پارٹی ٹکٹوں کی تقسیم کے دوران اسے نظر انداز کیا گیا یا اس سے ناانصافی کی گئی تو وہ تحریک انصاف کے مرکزی دفتر کے پتے پر ایڈیشنل سیکرٹری جنرل ارشد داد کو اپنی درخواست بھیجے۔عمران خان نے کہا کہ کارکنان اپنی شکایات بھیجیں میں بذات خود ہر درخواست کا جائزہ لوں گا اور اس کے مطابق کارروائی کروں گا، میں جان بوجھ کر کبھی بھی اپنے دیرینہ اور وفادار کارکنان میں سے کسی سے ناانصافی نہیں کروں گا۔