ماسکو(سی پی پی)روس کا شہر کازان مسلمان فٹبال شائقین کیلئے بہترین جگہ ہے، ورلڈ کپ کے میچ دیکھنے جانے والوں کو یہاں نہ صرف حلال کھانا دستیاب ہے بلکہ عبادت کی جگہ بھی آسانی سے مل جائے گی۔تفصیلات کے مطابقروس میں جہاں فٹبال ورلڈ کپ کا میلہ سج گیا ہے وہاں روسی شہر کازان مسلمانوں کیلئے بہترین مقام ہے۔ یہاں مختلف مذاہب اور ثقافتیں موجود ہیں۔ میگا ایونٹ کے میچ دیکھنے روس جانے والے مسلم شائقین کو یہاں روزے کی حالت میں مشکل کا سامنا نہیں ہو گا، کسی بھی ریسٹورنٹ میں با آسانی حلال کھانا دستیاب ہے۔عبادت کیلئے بھی شہر میں کئی مساجد موجود ہیں، مسلمان فٹبال لورز بغیر روک ٹوک اپنی نمازیں اور دیگر عبادات کی ادائیگی کر سکتے ہیں۔

ماسکو(آئی این پی)2026فٹبال ورلڈ کپ کی میزبانی امریکا، میکسیکو اور کینیڈا نے مشترکہ طور پر جیت لی جب کہ فیفا کانگریس میں ووٹنگ کے عمل میں مراکش پیچھے رہ گیا۔ امریکا، میکسیکو اور کینیڈا نے مشترکہ طور پر فٹبال ورلڈ کپ 2026کی میزبانی جیت لی ہے جب کہ فیفا کانگریس میں ووٹنگ کے عمل میں مراکش پیچھے رہ گیا، فیفا کے 203ممبران نے شمالی امریکن بڈ کو شرف قبولیت بخش دیا، ان کی مشترکہ بڈ کو 134ووٹ ملے،65ممبران نے مراکش کے حق میں رائے دی۔فٹبال شو پیس ایونٹ 24برس بعد شمالی امریکا واپس آرہا ہے، اس سے قبل 1994میں امریکا نے تن تنہا ورلڈ کپ کی میزبانی کے فرائض نبھائے تھے،کانگریس میں شریک ڈیلیگیٹس کو ووٹنگ میں واضح چوائس حاصل تھی، 8 برس بعد شیڈول ایونٹ میں ٹیموں کی تعداد 32سے بڑھاکر 48کیے جانے کا پہلے ہی اعلان کیا جاچکا ہے۔اس سے قبل فیفا انسپکٹرز نے نارتھ افریقن ملک مراکش کے اسٹیڈیمز، رہائشی سہولیات اور ٹرانسپورٹ نظام کو ہائی رسک سمجھتے ہوئے کلاسیفائیڈ قرار دیا تھا، انھوں نے اپنی جائزہ رپورٹ میں 5 میں سے مراکش کو 2.7 پوائنٹس ایوارڈ کیے تھے اس کے برعکس مشترکہ بڈ کو فیفا انسپکٹرز نے انھیں 5 میں سے 4 نمبر دیے تھے۔واضح رہے کہ 2022کے ایڈیشن کی میزبانی قطر کو پہلے ہی سونپی جاچکی ہے۔

ماسکو (اے پی پی) روس کے صدر ویلادیمیر پیوتن نے کہا ہے کہ حالیہ ناقص فارم اور کارکردگی کے باوجود ٹیم ورلڈ کپ فٹ بال ٹورنامنٹ میں مخالف ٹیموں کے خلاف آخر دم تک بھرپور فائٹ کرے گی۔ میزبان ہونے کی وجہ سے روسی ٹیم نے براہ راست میگا ایونٹ میں شرکت کرنے کا اعزاز حاصل کیا تھا اور وہ میگا ایونٹ میں شریک 32 ٹیموں میں سب سے لوئسٹ رینکڈ ٹیم ہو گی، روسی ٹیم اس وقت عالمی درجہ بندی میں 70ویں نمبر پر موجود ہے اور وہ (آج) جمعرات کو ایونٹ کے افتتاحی میچ میں سعودی عرب کے خلاف میچ سے مہم کا آغاز کرے گی۔

پیوتن نے اپنے بیان میں کہا کہ رواں سال اب تک ٹیم کی کارکردگی مایوس کن رہی لیکن اس کے باوجود شائقین کو ٹیم سے بہت توقعات ہیں، امید ہے کہ ٹیم میگا ٹورنامنٹ کے دوران اپنی کارکردگی کو بہتر بنا کر بہترین نتائج دے گی، کھلاڑیوں کو فتوحات کیلئے آخر دم تک مقابلہ کرنا ہو گا۔

زیورخ(آئی این پی)فٹبال کی عالمی گورننگ باڈی فیفا ورلڈ کپ 2018میں متنازع فیصلوں سے بچنے اور منصفانہ نتائج کے لیے ریفری کی معاونت کے لیے نیا ٹیکنالوجی سسٹم متعارف کرا دیا ہے۔ورلڈکپ 2018کے میچز میں منصفانہ نتائج اور میچز میں تنازعوں سے بچنے کیلئے جدید ترین ٹیکنولوجی پر مبنی ویڈیو اسسٹنٹ ریفری سسٹم(وی اے آر)متعارف کروا دیا گیا۔اس سسٹم کا اس سے قبل انگلش پریمیئر لیگ کے ساتھ ساتھ جرمنی اور انگلینڈ کی فٹبال لیگز میں بھی تجربہ کیا جا چکا ہے جہاں یہ انتہائی کامیاب اور مقبول ثابت ہوا۔رواں سال مارچ میں زیورخ میں منعقدہ اجلاس میں ٹیکنالوجی کے استعمال کی باقاعدہ منظوری لی گئی جہاں تمام اراکین نے اس کو مستقل بنیادوں پر فٹبال میں استعمال کرنے کا مشورہ دیا۔یہ پہلا موقع ہو گا کہ فٹبال ورلڈ کپ میں ویڈیو ٹیکنالوجی کا استعمال کیا جائیگا جہاں اس سے قبل 2014میں برازیل میں منعقدہ عالمی کپ میں گول لائن ٹیکنالوجی استعمال کی گئی تھی۔
یہ ویڈیو اسسٹنٹ ریفری سسٹم روس کے دارلحکومت ماسکو میں انٹرنیشنل براڈ کاسٹنگ سینٹر میں نصب کیا گیا ہے جو روس کے تمام 11 شہروں کے 12 اسٹیڈیمز سے منسلک ہوگا۔وی اے آر سسٹم میں ایک ویڈیو اسسٹنٹ ریفری ہو گا اور اس کے 3اسسٹنٹ ہوں گے جو میچ پر کڑی نظر رکھیں گے۔اس کے علاوہ چار ری پلے آپریٹرز بھی ہوں گے جو کسی بھی ریویو لینے کیلئے ہر طرح سے تیار اور ویڈیو ریفری کو بہترین اینگل فراہم کریں گے جس سے باآسانی نتیجہ اخذ کیا جاسکے گا۔وی اے آر روم میں فیفا کا رکن بھی موجود ہو گا جو میچ ریفریز کی گفتگو سن سکے گا اور وہ آفیشلز ویب سائٹ پر پوسٹ کرے گا۔گرانڈ میں موجود ریفری کسی بھی وقت کسی بھی مشکل فیصلے کو جانچنے اور مدد کے لیے وی اے آر سے رابطہ کرے گا اور یوں فیصلوں اور میچ کے نتیجوں کو شفاف طریقے سے سرانجام دیا جا سکے گا تاہم اس ٹیکنالوجی کا استعمال محدود ہو گا اور اسے صرف 4 اہم کاموں کے لیے استعمال کیا جائے گا جس میں گول، پینالٹیز، براہ راست ریڈ کارڈ اور کھلاڑی کی غلط شناخت شامل ہے ،اس ٹیکنالوجی کو 4 شعبوں تک محدود کرنے کا مقصد کھیل کو مستقل خلل سے پاک اور شائقین کی دلچسپی کو برقرار رکھنے کے لیے میچ کے تسلسل کو برقرار رکھنا ہے۔اس ٹیکنالوجی کی مدد سے کھیل کو غلط آف سائیڈ یا غیرمنصفانہ گول سے پاک کرنے میں بہت مدد ملے گی جہاں ماضی میں اہم میچوں میں ریفری کے متنازع فیصلوں اور سب سے سے بڑے عالمی مقابلے میں ٹیکنالوجی نہ ہونے کو کافی تنقید کا نشانہ بنایا گیا تھا۔ماضی قریب میں اس سلسلے میں سب سے بڑا واقعہ 2010 ورلڈ کپ میں رونما ہوا تھا جب انگلینڈ اور جرمنی کے درمیان پری کوارٹر فائنل مقابلوں میچ میں فرینک لیمپرڈ کی گیند گول کے اندر سے باہر آ گئی تھی اور ریفری نے اسے گول دینے سے انکار کردیا۔اس فیصلے کو عالمی سطح پر کافی تنقید کا نشانہ بنایا تھا گیا تھا کیونکہ یہ انگلینڈ کے عالمی کپ سے اخراج کا اہم سبب بنا تھا لیکن اس متنازع فیصلے کے بعد گول لائن سمیت دیگر ٹیکنالوجی کے فٹبال میں استعمال کی راہ ہموار ہو گئی تھی۔

لاہور (سوشل میڈےا) فرانس کے دارالحکومت پیرس میں سالانہ داڑھی مونچھوں کی چیمپئن شپ منعقد کی گئی جس میں کئی ممالک سے تقریباً 60 شرکا نے شرکت کی۔15کیٹیگریز پر مشتمل اس چیمپئن شپ میں مکمل قدرتی اور فری سٹائل کے مقابلوں میں شامل شرکا نے مختلف انداز سے آراستہ اور ڈائی کی ہوئی داڑھی مونچھوں کی نمائش کی جنہیں کئی ججوں پر مشتمل ٹیم کی جانب سے نمبرز دئیے گئے۔

لندن(آئی این پی) پاکستان کرکٹ ٹیم کے فیلڈنگ کوچ اسٹیو رکسن کی دو سالہ مدت ملازمت مکمل ہونے پر پی سی بی نے نئے فیلڈنگ کوچ کی تلاش شروع کردی۔قومی کرکٹ ٹیم کے فیلڈنگ کوچ اسٹیو رکسن کی مدت ملازمت مکمل ہوگئی ہے اور انہوں نے اسکاٹ لینڈ کے خلاف ایڈن برگ میں کھیلے گئے ٹی ٹوئنٹی میچ میں آخری مرتبہ ذمہ داریاں نبھائیں ۔اسٹیو رکسن نے فیلڈنگ کوچ کی حیثیت سے مزید کام کرنے سے معذرت کر لی تھی جس کے پیش نظر پی سی بی نے نئے کوچ کی تلاش کے لیے اخبارات میں اشتہارات جاری کردیے۔قومی ٹیم کے نئے فیلڈنگ کوچ کے لیے لیول تھری کورس اور 5سالہ تجربہ لازمی قرار دیا گیا ہے۔یاد رہے کہ اسٹیو رکسن کے حوالے سے میڈیا رپوٹس سامنے آئی تھیں کہ انہوں نے انڈین پریمیئر لیگ کی ایک اہم ٹیم سے پرکشش معاہدہ کرلیا ہے جس کے باعث انہوں نے قومی ٹیم کے ساتھ مزید کام کرنے سے معذرت کرلی تھی۔