لاہور(نیوزایجنسیاں) آسٹریلیا کے ڈیرن بیری کو قومی ٹیم کا فیلڈنگ کوچ مقرر کیے جانے کا امکان ہے۔ذرائع کے مطابق آسٹریلیا کے اسٹیو رکسن کی جانب سے اپنے کنٹریکٹ میں توسیع نہ لینے کے بعد ان کے جانشین کے طورپرآسٹریلوی کوچ پرہی اعتماد کیا گیا ہے، ڈیرن بیری معاہدہ طے پا جانے پر دو سالہ کنٹریکٹ کے تحت ایشیا کپ سے قبل قومی ٹیم کو جوائن کر لیں گے۔ وہ بگ بیش لیگ فرنچائز ایڈیلیڈسٹرائیکرزکی کوچنگ سمیت پی ایس ایل تھری میں اسلام آباد یونائیٹڈ کے اسسٹنٹ کوچ کے طور پر کام کر چکے ہیں۔واضح رہے کہ پاکستان ٹیم کی فیلڈنگ کو بہتر بنانے کیلئے کچھ عرصے سے غیرملکی کوچز کی خدمات حاصل کی جا رہی ہیں اور قومی ٹیم کی فیلڈنگ میں نمایاں بہتری بھی دیکھنے میں آئی ہے۔ پاکستان کے آخری مقامی فیلڈنگ کوچ اعجاز احمد تھے۔

لاہور(آئی این پی) پاکستان کرکٹ ٹیم کے سابق کپتان عامر سہیل نے عمر اکمل اور احمد شہزاد کا مزاج درست کرنے کیلیے بحالی پروگرام میں شریک کرنے کا مشورہ دیا ہے۔ایک انٹرویو میں انہوں نے کہا کہ عمر اکمل اور احمد شہزاد کو بحالی پروگرام میں شامل کرتے ہوئے بتانا چاہیے کہ ان سے کس قسم کی توقعات وابستہ ہیں، احمد شہزاد کو نوجوانوں کیلئے ایک رول ماڈل کے طور پر اپنی ذمہ داری قبول کرنی ہو گی، عمر اکمل اپنا کیریئر بچانے کیلئے کھیل پر دھیان دیں اور تنازعات سے دور رہیں۔سرفراز احمد ٹیسٹ کرکٹ میں کپتان کی حیثیت سے جدوجہد کرتے نظر آ رہے ہیں، ان کو تبدیل کرنے کی بجائے مزید موقع دینا چاہیے۔ محمد عامر کو کسی ایک فارمیٹ سے بالکل الگ کرنے کی بجائے منیجمنٹ کو ان کا سمجھداری سے استعمال کرنا چاہیے۔

لاہور(آئی این پی )قومی کرکٹ ٹیم کے سابق کپتان شعیب ملک نے کہا ہے کہ ورلڈ کپ 2019 میرے ون ڈے کیریئر کا آخری ایونٹ ہوگا ، کیریئر کی آخری خواہش ورلڈ کپ جیتنا ہے ، ورلڈ کپ تک کرکٹ کھیلنا چاہتا ہوں، ٹیسٹ کرکٹ سے جلد ریٹائرمنٹ کے فیصلے پر افسوس نہیں، ٹیسٹ ٹیم کو ابھی مزید وقت دینا ہوگا۔لاہور میں میڈیا سے گفتگو میں شعیب ملک کا کہنا تھا کہ ورلڈ کپ 2019میرے ون ڈے کیریئر کا آخری ایونٹ ہوگا، ورلڈ کپ تک ون ڈے کرکٹ کھیلنا چاہتا ہوں، کیریئر کا آخری ورلڈ کپ جیتنا خواہش ہے، میگا ایونٹ میں بہترین کارکردگی کا مظاہرہ کروں گا۔ انہوں نے کہا کہ ٹیسٹ کرکٹ سے جلد ریٹائرمنٹ کے فیصلے پر افسوس نہیں، ٹیسٹ ٹیم کو ابھی مزید وقت دینا ہوگا، اگلے ایک دو سال میں بہتری ہو سکتی ہے، نئے لڑکے مستقل پرفارم کررہے ہیں۔سابق کپتان نے کہا کہ سینئر اگر جونیئر کو نہیں سکھاتا تو اسے ٹیم میں نہیں ہونا چاہیے کیونکہ سینئرز کی سپورٹ کے بغیر جونیئرز پرفارم نہیں کر سکتے، کھلاڑیوں میں کسی بھی ٹیم کو ہرانے کی صلاحیت ہے، ہم چیمپئنز ٹرافی اور ورلڈ ٹی 20تو جیت چکے ہیں ۔، ٹیسٹ ٹیم میں نوجوان مسلسل پرفارمنس دے رہے ہیں ، کھلاڑیوں کو امید ہے کہ وہ کوئی بھی ایونٹ جیت سکتے ہیں ۔ انہوں نے کہا کہ فٹبال ورلڈ کپ میں برازیل کو سپورٹ کر رہا ہوں، انجری ٹائم میں ان کے گول پر بہت خوشی ہوئی، اگر گول نہ ہوتا تو میں ڈپریشن کا شکار ہو جاتا۔

سمارا(نیوزایجنسیاں)فٹ بال ورلڈ کے گروپ اے کے میچ میں یوروگوائے نے یک طرفہ مقابلے کے بعد روس کو 0-3 سے شکست دے دی۔یوروگوائے نے گروپ میں پہلی پوزیشن حاصل کرلی ہے جبکہ میزبان روس دوسری پوزیشن پر براجمان ہے۔یوروگوائے کی جانب سے لوئس سواریز نے کھیل شروع ہونے کے 10 منٹ بعد فری کک پر پہلا گول اسکور کیا۔بعدازاں روس کے ڈینس چیری شیو نے اپنے ہی جال میں گیند کو پھینک کر یوروگوائے کی سبقت دوگنی کردی۔36ویں منٹ میں روسی کھلاڑی آئگر سمولنیکو کو دوسرے یلو کارڈ پر ریفری نے گراو¿نڈ بدر کردیا۔یوروگوائے کے ایڈنسن کوانی نے میچ کے اختتام پر اپنی ٹیم کے لیے تیسرا گول اسکور کرکے جیت یقینی بنادی۔ ایک اور میچ میں سعودی عرب نے مصر کو ایک کے مقابلے میں دو گول سے شکست دے دی۔یہ سعودی عرب کی میگا ایونٹ میں24سال بعدپہلی کامیابی ہے۔پری کوارٹرفائنل میں یوروگوئے کی ٹیم30جون کو سوچی کے فشٹ سٹیڈیم میں ایکشن میں نظرآئے گی۔میزبان روس کامیچ یکم جولائی کو ماسکو کے لزنیکی سٹیڈیم میں ہوگا۔ایک ماہ تک جاری رہنے والے میگا ایونٹ میں 32 ٹاپ ٹیمیں شرکت کر رہی ہیں جنھیں 8 مختلف گروپس میں تقسیم کیا گیا ہے ۔ گروپ اے میں میزبان روس، سعودی عرب، مصر اور یوروگوئے شامل ہیں، گروپ بی میں پرتگال، سپین، مراکش اور ایران شامل ہیںِ، گروپ سی میں فرانس، آسٹریلیا، پیرو اور ڈنمارک شامل ہیں، گروپ ڈی میں ارجنٹائن، آئس لینڈ، کروشیا اور نائیجریا شامل ہی، گروپ ای میں برازیل، سوئٹزرلینڈ، کوسٹاریکا اور سربیا شامل ہیں، گروپ ایف میں دفاعی چیمپئن جرمنی، میکسیکو، سویڈن اور کوریا شامل ہیں، گروپ جی میں بیلجیئم، پانامہ، تیونس اور انگلینڈ شامل ہیں جبکہ گروپ ایچ میں پولینڈ، سینیگال، کولمبیا اور جاپان شامل ہیں۔

لاہور(مانیٹرنگ ڈیسک) ٹیسٹ کرکٹر عثمان صلاح الدین نے کہا ہے کہ میں شکر اداکرتا ہوں کہ میں ایک ٹیسٹ کرکٹر بنا، میں چاہتا ہوں پاکستان کیلئے کم از کم 100ٹیسٹ میچ کھیلوں، چینل ۵ کے پروگرام ”گگلی“ میں گفتگو کرتے ہوئے انہوں نے کہا کہ بابر اعظم زخمی ہوئے تو کوچ نے مجھے کھیلے کو کہا جس پر میں بے حد خوش ہوا ، میں نے ٹیم میں آنے کیلئے بہت کوشش کی تھی، مجھے اپنا خواب پورا ہوتا نظر آرہا تھا، جب پہلی مرتبہ گراو¿نڈ میں آنے لگا تو میرے جذبات بہت عروج پر تے ، کافی دباو¿ بھی تھالیکن میں نے دباو¿ کا سامنا کیا اور پرعزم رہا اور اپنے اعتماد کو بحال رکھا۔کوشش ہے اپنی عمدہ پرفارمنس کاتسلسل برقراررکھتے ہوئے ٹیم کامستقل حصہ بنوں۔

لاہور(آئی این پی)نئی آئی سی سی ون ڈے رینکنگ میں انگلینڈ کیخلاف حالیہ ون ڈے سیریز میں آسٹریلیا کو شرمناک شکست کا فائدہ پاکستان کو مل گیا ، قومی ٹیم کے نوجوان بلے باز بابر اعظم اور فاسٹ بالر حسن علی کو بھی بڑی ترقی مل گئی ۔پاکستان کے بابر اعظم 2درجے ترقی پاکر بلے بازوں کی رینکنگ میں دوسرے نمبر جبکہ باﺅلنگ رینکنگ میںحسن علی ایک درجے ترقی پاکر تیسرے نمبرپر آگئے ہیں،برطانوی اوپنر جونی بیئر سٹو 4درجے ترقی کرکے 11ویں نمبر پر آئے ہیں ،کینگروز کیخلاف سیریز میں275رنز بنانے والے جوز بٹلر 2درجے ترقی کے ساتھ 16ویں نمبر پر پہنچ گئے ،جیسن روئے نے بھی 3سیڑھیاں پھلانگ کر 20ویں پوزیشن پر آگئے۔ایلکس ہیلز23سے 22اور کپتان این مورگن25سے24ترقی پانے والے دیگر برطانوی بلے باز ہیں،،آسٹریلیا کے ٹریوس ہیڈ انگلینڈ کے خلاف194رنز سکور کرکے 22ویں سے19ویں پوزیشن پر آگئے ہیں۔ آسٹریلیا کیخلاف ون ڈ ے سیریز میں 12،12وکٹیں لینے والے برطانوی سپن بالرز معین علی اور عادل رشید کو نئی رینکنگ میں ترقی ملی ہے ، لیگ سپنر عادل رشید 3درجے ترقی پاکر8ویں پوزیشن پر پہنچے ہیںجب کہ معین علی 13سیڑھیاں چڑھ کر 12ویں نمبر پر آگئے ہیں ۔دوسر ی طرف انگلینڈ کیخلاف سیریز میں وائٹ واش شکست کے بعد آسٹریلین ٹیم کو 4پوائنٹس کو کٹوتی کا سامنا کرنا پڑا اور اب کینگروز 100پوائنٹس کے ساتھ پاکستان (102) سے نیچے چھٹے نمبر پر آگئے ہیں۔رینکنگ میں انگلینڈ (126) پہلے، ، بھارت (122)دوسرے ،جنوبی افریقہ(113)تیسرے،نیوزی لینڈ(112) چوتھے،، بنگلہ دیش(93)ساتویں، سری لنکا (77) آٹھویں ، ویسٹ انڈیز(69)نویںاور افغانستان(63)دسویں نمبر پر موجود ہیں۔بلے بازوں کی رینکنگ میں ویرات کوہلی کا پہلا نمبر ہے جبکہ پاکستان کے بابر اعظم 2درجے ترقی پاکر دوسرے نمبر پر آگئے ہیں ،آسٹریلیا کے ڈیوڈ وارنر تیسرے، روہت شرما چوتھے،،روس ٹیلر پانچویں ،جوروٹ چھٹے،کوئنٹن ڈی کوک ساتویں،فاف ڈوپلیسی آٹھویں،کین ولیمسن نوویں اور شیکھر دھون دسویں نمبر پر موجود ہیں ۔بالر ز کی رینکنگ میں بھارت کے جسپریت بمراہ کا پہلا نمبر ہے ،،افغانستان کے راشد خان دوسرے نمبر پر ہیں جبکہ پاکستان کے حسن علی ایک درجے ترقی پاکر تیسرے نمبر پر آگئے ہیں، آل رانڈرز کی فہرست میں بنگلہ دیش کے شکیب الحسن کا پہلا نمبر ہے جب کہ پاکستان کے محمد حفیظ دوسرے نمبر پر موجود ہیں ۔

کراچی(ویب ڈیسک) آج سے چھ روز قبل پاکستان کرکٹ بورڈ (پی سی بی) نے اپنے سوشل میڈیا اکاو¿نٹ پر پیغام چھوڑا ’ایک کھلاری کا ڈوپ ٹیسٹ مثبت آیا ہے، البتہ قواعد و ضوابط کے مطابق اس کر کٹر کا نام ظاہر نہیں کیا جاسکتا۔‘ تاہم اب واضح ہے کہ وہ کھلاڑی کوئی اور نہیں 26 سالہ احمد شہزاد ہیں۔اطلاعات کے مطابق رواں سال مئی میں جب احمد شہزاد فیصل آباد میں پاکستان کپ ون ڈے ٹورنامنٹ میں بلوچستان کے کپتان تھے،تب ان کا ڈوپ ٹیسٹ لیا گیا تھا،جس کا نتیجہ اوپنر کے لئے مشکلات کا سبب بنا رہا ہے۔پی سی بی ذرائع کے مطابق احمد شہزاد سے اس حوالے سے وضاحت طلب کی گئی ہے تاہم فی الحال دائیں ہاتھ کے بیٹس مین نے کوئی جواب داخل نہیں کروایا۔پاکستان کے لئے انٹرنینشل کرکٹ میں دس سِنچریاں بنانے والے احمد شہزاد کے بارے میں کیا ڈوپ ٹیسٹ کے معاملے میں سست روی سے کارروائی آگے بڑھائی جا رہی ہے، یا پھر احمد شہزاد کو بچا نے کی کوشش کی جا رہی ہے؟۔ان دونوں باتوں کا جواب نفی میں ہوگا،سیدھا مطلب ڈوپ ٹیسٹ کے قوانین اور قواعد ہیں جسے پاکستان کرکٹ بورڈ اپنا رہا ہے۔ اس معاملے میں پی سی بی نے احمد شہزاد کے ڈوپ ٹیسٹ کی رپورٹ کے حوالے سے اس لیبارٹری سے مزید کچھ تفصیلات بھی مانگی ہیں جہاں احمد شہزاد کے ڈوپ ٹیسٹ کی رپورٹ مثبت قرار دی گئی ہے۔کیس میں تمام متعلقہ دستاویزی ثبوت آنے کے بعد احمد شہزاد کا جواب اہم ہوگا، جو ابھی خاموشی اختیار کئے ہوئے ہیں۔اگر ٹیسٹ اوپنر اس کیس میں اپنی غلطی مان لیتے ہیں تو ان کو اطلاعات کے مطابق کم ازکم تین سے چھ ماہ کی سزا کا سامنا ہوگا۔بصورت دیگر اگر احمد شہزاد ڈوپ ٹیسٹ کیس میں خود کا دفاع کرتے ہیں اور وہ غلط ثابت ہو جاتے ہیں تو پھر انہیں دو سے چار سال کی سخت سزا کا سامنا کر نا پڑ سکتا ہے۔

کراچی(ویب ڈیسک) اسپاٹ فکسنگ کی پیشکش سے متعلق ٹیسٹ کرکٹر عمر اکمل سے پاکستان کرکٹ بورڈ کے اینٹی کرپشن یونٹ نے تحقیقات شروع کردیں۔عمر اکمل کی لاہور میں پی سی بی اینٹی کرپشن یونٹ کے سربراہ کرنل ریٹائرڈ اعظم کے سامنے پیش ہوئے۔ذرائع کے مطابق کرنل ریٹائرڈ اعظم نے دو سے ڈھائی گھنٹے تک عمر اکمل سے سوال جواب کیے۔اس حوالے سے پاکستان کرکٹ بورڈ کی جانب سے جاری بیان میں کہا گیا ہے کہ عمر اکمل اینٹی کرپشن یونٹ کے سامنے پیش ہوئے۔پی سی بی کے مطابق عمر اکمل کو 27 جون کو اینٹی کرپشن یونٹ کے سامنے پیش ہونے کی ہدایت کی گئی تھی تاہم کرکٹر نے درخواست کی کہ مصروفیات کی وجہ سے 27 جون کی بجائے وہ آج ہی پیش ہونا چاہتے ہیں۔پی سی بی کے مطابق عمر اکمل کی درخواست پر عمل کرتے ہوئے ان کا انٹرویوآج ہی منعقد کیا گیا۔بورڈ کا کہنا ہے کہ عمر اکمل کے بیان کا معاملہ فی الحال زیر غور ہے اور جلد اس حوالے سے مزید تفصیلات جاری کی جائیں گی۔خیال رہے کہ میچ فکسنگ کی پیشکش کے حوالے سے بیان دینے پر پی سی بی نے عمر اکمل کو شوکاز نوٹس جاری کیا ہوا ہے اور انہیں 27 جون کو بھی اینٹی کرپشن یونٹ کے سامنے پیش ہونے کا کہا گیا ہے۔ذرائع کا کہنا ہے کہ عمر اکمل کو اپنے بیان پر پچتاوا ہے اور انہوں نے سینئر ساتھیوں اور قانون دانوں سے مشورے شروع کردیے ہیں۔پاک بھارت ورلڈ کپ میچ میں فکسنگ کی پیشکش، عمر اکمل نے پنڈورا بکس کھول دیا۔عمر اکمل نے اپنے ایک انٹرویو میں انکشاف کیا ہے کہ انہیں 2015 کے ورلڈ کپ میں میچ فکس کرنے کی پیشکش ہوئی تھی۔ایک نجی ٹی وی کو انٹر ویو دیتے ہوئے عمر اکمل نے کہا تھا کہ ورلڈ کپ میں دو گیندیں نہ کھیلنے پر دو لاکھ ڈالرز کی پیشکش ہوئی تھی۔انہوں نے کہا کہ جب بھی میں پاکستان کی جانب سے بھارت کے خلاف کھیلتا مجھے پیشکش کی جاتی تھی کہ میچ نہ کھیلوں اس کے عوض مجھے پیسوں کی پیشکش کی جاتی تھی لیکن میرا سٹے بازوں کو ہمیشہ یہی جواب ہوتا ہے کہ میں اپنے ملک کے لیے کھیلنا چاہتا ہوں۔تاہم عمر اکمل نے یہ نہیں بتایا کہ انہوں نے ان پیشکشوں کی اطلاع ٹیم انتظامیہ کو دی تھی یا نہیں۔ اآئی سی سی قوانین کے تحت اگر کسی کھلاڑی کو سٹے باز کی جانب سے پیشکش ہوتی ہے تو اسے اس کی اطلاع ٹیم انتظامیہ کو کرنا ہوتی ہے۔ٹیسٹ کرکٹر عمر اکمل ایک سال سے زائد عرصے سے پاکستانی ٹیم کا حصہ نہیں ہیں۔ وہ کرکٹ کھیلیں یا نہیں ہمیشہ خبروں میں رہتے ہیں۔خیال رہے کہ گزشتہ برس آئی سی سی چیمپیئنز ٹرافی سے عمر اکمل ان فٹ قرار دے کر واپس بھیج دیا گیا تھا جس کے بعد عمر اکمل پاکستانی ٹیم میں واپسی کے لیے غیر معمولی کارکردگی دکھانے میں ناکام رہے ہیں۔پاکستان سپر لیگ میں بھی لاہور قلندرز کی جانب سے وہ مسلسل ناکام رہنے کے بعد ٹیم سے ڈراپ ہوگئے تھے۔