اسلام آباد(ویب ڈیسک) ن لیگ کے رہنما نہال ہاشمی نے کہا ہے کہ ن لیگ کے بکھرنے کا کوئی امکان نہیں، ہم نے تو ہر جگہ احترام ملحوظ خاطر رکھا، جو بھی جس کا دائرہ ہے اس کے اندر اس کو عزت دی اور احترام دیا، ہوا یہ ہے کہ ہمارے دائرے گورننس، پارلیمنٹ اور سیاسی کلچر کے اندر مداخلت کی گئی ہے، مسلم لیگ (ن) کے بکھرنے کا یقیناکوئی امکان نہیں ہے، نواز شریف کی جلاوطنی کے باوجود بھی پارٹی نہ منتشر ہوئی اور نہ ہی بکھری۔۔ نہال ہاشمی نے کہا کہ عمران خان کا یہ بیان کہ 2013 کا الیکشن نواز شریف نے جنرل کیانی کی مدد سے جیتا نواز شریف کے خلاف نہیں، انھوں نے یہ بیان فوج کے ادارے اور اس وقت کے سپہ سالار کے خلاف دیا ہے، انھوں نے ایک بریگیڈیئر کا ذکر کیا، فرد واحد توکوئی چیز نہیں کرتا، انھوں نے فوج کے ادارے کو بدنام کرنے کی کوشش کی، یہ پوری دنیا میں ہمارے ادارے کو بدنام کر رہے ہیں اور اس کا سختی سے نوٹس لینا چاہیے۔

اسلام آباد (خصوصی رپورٹ) سابق وفاقی وزیرداخلہ چودھری نثار خان نے پنجاب ہاﺅس چھوڑ دیا اور اپنے دوست کے گھر سیاسی ڈیرہ بنالیا، انہوں نے پنجاب ہاﺅس چھوڑنے سے قبل اپنے مکمل واجبات ادا کیے، رپورٹ کے مطابق چودھری نثار بطور وزیرداخلہ بھی وزارت میں یبٹھنے کی بجائے پنجاب ہاﺅس میں بیٹھنے کو ترجیح دیتے تھے، دفتری امور، سیاسی ملاقاتیں، سفیروں کے ساتھ ملاقات، اپنے حلقہ انتخاب کے لوگوں کے ساتھ میٹنگز کا اہتمام پنجاب ہاﺅس میں کرتے تھے، مہمانوں کے لیے کھانا ، چائے اور خاطر تواضح کے دیگر لوازمات کے اخراجات اپنی جیب سے ادا کر رہے تھے۔ گزشتہ روز انہوں نے اپنے دوست راجہ ناصر کے گھر پریس کانفرنس کی جو برطانیہ میں رہائش پذیر ہیں۔ نواز شریف اور چودھری نثار کے درمیان تعلقات تین دہائیوں سے زائد پر مشتمل ہیں جس میں اب بریک آ چکی ہے اور شاید کوئی بریک تھرو نہ ہوسکے کیونکہ دونوں یانیہ کے حوالے سے مخالف سمت کھڑے ہیں انہیں قریب لانے میں شہباز شریف کردار ادا کرسکتے تھے، تاہم اب تک وہ بھی بے بس ہی نظرآئے ہیں ، آف دی ریکارڈ ملاقاتوں میں وہ چودھری نثار کے موقف کے حامی ہیں جس کا اظہار انہوں نے کئی مرتبہ میڈیا اور اپنے خطاب کے دوران بھی کیا لیکن شہباز شریف بڑے بھائی اور پارٹی قائدنواز شریف سے بغاوت نہیں کرسکتے، چاروناچار وہ نوازشریف کے ساتھ ہی کھڑے نظر آئیں گے، نتیجہ خواہ کچھ بھی نکلے شہباز شریف کے اس طرز عمل نے چودھری نثار کو مایوس کیا ہے، صرف شہباز شریف ہی نہیں پارٹی کے دیگر سینئر رہنما بھی چودھری نثار کے موقف کے حامی ہیں لیکن وہ نواز شریف کے سامنے کھڑے ہونے یا اختلاف کرنے سے گریزاں ہیں۔

ملتان (ویب ڈیسک)کانگو وائرس سے متاثرایک اور مریض نشتر ہسپتال میں دم توڑ گیا جس کے بعد رواں ماہ کانگو وائرس سے جاں بحق افراد کی تعداد3 ہو گئی۔تفصیلات کے مطابق کانگو وائرس سے متاثر 6مریضوں کو نشتر ہسپتال لایا گیا تھا جن میں سے ایک اور مریض آج دم توڑ گیا جس کے بعد ہلاکتوں کی تعداد 3 ہو گئی ،ہسپتال ذرائع کے مطابق وائرس سے متاثر 2 مریض تاحال زیرعلاج ہیں۔

سری نگر( ویب ڈیسک) بھارتی فورسز کے مظالم کے خلاف حریت قیادت کی کال پر آج مقبوضہ وادی میں مکمل ہڑتال کی جارہی ہے۔مقبوضہ کشمیر میں بھارتی فورسز کی جانب سے بڑھتے مظالم اور نوجوانوں کو جعلی مقابلوں میں شہید کیے جانے کے خلاف حریت رہنما سید علی گیلانی، میر واعظ عمر فاروق اور یاسین ملک کی جانب سے ہڑتال کی کال دی گئی۔شٹرڈاو¿ن ہڑتال کے باعث سری نگر سمیت مختلف شہروں میں بازار مکمل طور پر بند ہیں اور ٹریفک بھی معمول سے کم ہے۔ بھارتی فورسز نے گزشتہ روز 4 کشمیریوں کو شہید کردیا تھا جس کے خلاف حریت قیادت کی جانب سے ہڑتال کی کال دی گئی۔

سندھ (ویب ڈیسک )سندھ میں گرمی کی شدت میں اضافے سے بچے، بڑے سب ہی پریشان ہیں اور ماہ رمضان کی آمد بھی ہے تاہم محکمہ تعلیم نے اسکولوں میں گرمیوں کی چھٹیاں قبل از وقت کرنے کی سفارش کردی ہے۔محکمہ تعلیم سندھ کے مطابق موسم گرما کی تعطیلات جلد کرنے کے لیے سمری وزیراعلیٰ ہاوس بھجوا دی گئی ہے جس کے منظور ہونے کی صورت میں تعطیلات کا شیڈول تبدیل کردیا جائے گاصوبائی محکمہ تعلیم کی جانب سے سمری میں موسم گرما کی تعطیلات 14 مئی سے 15 جولائی تک کرنے کی سفارش کی گئی ہے۔ محکمہ تعلیم کے مطابق چھٹیوں کا اطلاق تمام نجی اور سرکاری اسکولوں پر ہوگا۔

سکھر (ویب ڈیسک ) پیپلز پارٹی کے سنئیر رہنما خورشید شاہ کا کہنا ہے الیکشن پاکستان کے ہوں یا دنیا کے خلائی مخلوق کا کردار تو ہوتا ہی ہے۔ سکھر میں ایک تقریب سے خطاب کرتے ہوئے قائد حزب اختلاف خورشید شاہ کا کہنا تھا کہ ہمارے پاس لیڈر شپ نہیں اس لیے دنیا باتیں کررہی ہے تاہم جلد ہمیں بلاول بھٹو کی شکل میں لیڈر شپ مل جائے گی۔ ان کا کہنا تھا کہ خلائی مخلوق تو ہے یہ تو سائنسدان بھی کہتے ہیں، خلائی مخلوق آسمانوں پر رہتی ہے دکھائی نہیں دیتی جب کہ پاکستان کے الیکشن ہوں یا دنیا کے الیکشن ہوں خلائی مخلوق کا کردار تو ہوتا ہی ہے۔خورشید شاہ نے کہا کہ15 یا 16 مئی تک نگراں وزیراعظم کے لیے نام آجائیں گے جب کہ سیاست میں کوئی آخری دشمن نہیں ہوتا اور نہ کوئی دوست۔ ایم کیو ایم پاکستان کے سربراہ فاروق ستار کے حوالے سے ان کا کہنا تھا کہ فاروق ستار اس وقت بوکھلاہٹ کا شکار ہیں، انہیں خود ان کی پارٹی قبول نہیں کررہی ہے۔