ایران کے سرکاری میڈیا کے مطابق حکومت مخالف مظاہروں کا سلسلہ چھٹے روز بھی جاری رہا جس کے دوران سکیورٹی فورسز اور مظاہرین کے درمیان ہونے والی چھڑپوں میں مزید نو افراد ہلاک ہو گئے ہیں۔اطلاعات کے مطابق ایرانی دارالحکومت تہران میں احتجاجی مظاہروں کے بعد سے 450 افراد کو گرفتار کیا گیا ہے۔مرکزی اصفہان کے علاقے میں پیر کی شب ہونے والے پرتشدد واقعات میں تازہ ہلاکتوں کے بعد ہلاک ہونے والے افراد کی تعداد بڑھ کر کم از کم 22 ہو گئی ہے۔اطلاعات کے مطابق چھ مظاہرین بظاہر پولیس سٹیشن سے اسلحہ قبضے میں لینے کی کوشش میں ہلاک ہوئے۔ ہلاک ہونے والوں میں ایک پولیس اہلکار بھی شامل ہے۔اس کے علاوہ دیگر علاقوں میں اطلاعات کے مطابق پاسدارنِ انقلاب کے محافظوں کے ساتھ جھڑپوں کے دوران ایک 11 سالہ بچہ اور ایک شخص ہلاک ہوا۔یاد رہے کہ ایران میں جاری مظاہروں کے دوران سکیورٹی فورسز کو سنہ 2009 کے بعد پہلی مرتبہ شدید مزاحمت کا سامنا ہے۔ان مظاہروں کا آغاز جمعرات کو ایران کے دوسرے بڑے شہر مشہد سے ہوا تھا۔ایرانی صدر حسن روحانی کا کہنا ہے کہ ’احتجاج ایک موقع ہے نہ کہ خطرہ‘۔ انھوں نے مزید کہا کہ ایرانی قوم ‘قانون توڑنے والی اقلیت’ سے نمٹ لے گی۔دوسری جانب خبر رساں ادارے اے ایف پی نے مقامی میڈیا کے حوالے سے بتایا ہے کہ ایرانی دارالحکومت میں گذشتہ تین دنوں سے جاری مظاہروں کے دوران گرفتار ہونے والے افراد کی تعداد بڑھ کر 450 ہو گئی ہےاس سے قبل گذشتہ رات مظاہرین نے ایک پولیس سٹیشن پر بھی حملہ کیا۔ سوشل میڈیا پر سامنے آنے والی ویڈیوز میں دیکھا جا سکتا ہے کہ مظاہرین پولیس سٹشین پر قبضہ کرنے کی کوشش کر رہے ہیں۔ عمارت کے ایک حصے کو آگ بھی لگائی گئی۔ایران میں عوام کے گرتے ہوئے معیارِ زندگی اور کرپشن کے خلاف ہونے والا یہ احتجاج سنہ 2009 میں اصلاحات کے حق میں ہونے والی ریلی کے بعد سب سے بڑا عوامی احتجاج ہے۔ان مظاہروں کے آغاز پر امریکی صدر ڈونلڈ ٹرمپ نے ٹویٹ کی تھی کہ ایرانی عوام میں بالآخر عقل آ رہی ہے کہ کیسے ان کی دولت کو لوٹا جا رہا ہے اور دہشت گردی پر خرچ کی جا رہی ہے۔

واشنگٹن (آئی این پی)امریکی اداروں کی رپورٹس نے ٹرمپ کا جھوٹ بے نقاب کر دیا، امریکی صدر کے اعداد و شمار ہی غلط نکلے، پاکستان کو صرف 19 ارب ڈالر امداد ملی جبکہ 14 ارب ڈالر سے زائد رقم دہشت گردی کے خلاف جنگی اخراجات کی مد میں امریکا پر واجب الادا تھی۔امریکی صدر ڈونلڈ ٹرمپ جو منہ میں آئے بول دیتے ہیں، پاکستان کو 33 ارب ڈالر کی امداد دینے کے غلط اعداد و شمار دینے سے پہلے اگر اپنے ہی ادارے کانگریشنل ریسرچ سروس کی جاری رپورٹ پر نظر مار لیتے تو شاید دنیا کے سامنے شرمندگی سے بچ جاتے۔رپورٹ کے مطابق امریکہ نے پاکستان کو 2002 سے اب تک صرف 19 ارب ڈالر امداد دی ہے جبکہ 14 ارب 50 کروڑ ڈالر وہ رقم ہے کہ جو دہشت گردی کے خلاف جنگی اخراجات کی مد میں ادا کیے گئے ہیں۔ یہ وہ اخراجات ہیں کہ جن کی ادائیگی کرنا امریکہ کا فرض ہے اور یہ کوئی امداد نہیں ہے۔

نئی دہلی(خصوصی رپورٹ)بھارت کی ریاست آندھرا پردیش میں مسجد کے موذن کو قتل کرکے قرآن کی بے حرمتی کیے جانے اور مسجد میں توڑ پھوڑ کیے جانے کا واقعہ پیش آیا ہے۔ واقعہ کو 3 دن گزرجانے کے باوجود بھارت کی مودی حکومت نے معاملے کا نوٹس نہیں لیا، اور نہ ہی ریاستی حکومت نے واقعہ کی اعلی سطح تحقیقات کے لیے کوئی احکامات جاری کیے ہیں۔ واقعہ گزشتہ ہفتے 29 دسمبر کو پیش آیا۔ بھارتی لوک سبھا کے رکن اسدالدین اویسی نے ٹو یٹ کیا کہ آندھرا پردیش کے شہر لالاچیرووو راجمندھری کی اے پی نورانی مسجد کے پیش امام کو قتل کردیا گیا۔ اسدالدین اویسی نے مزید لکھا کہ موذن محمد فاروق کو قتل کرکے، قرآن شریف کی بے حرمتی کی گئی، جب کہ مسجد کو بھی نقصان پہنچایا گیا، رکن پارلیمنٹ کا کہنا تھا کہ انہوں نے اس معاملے پر متعلقہ پولیس افسر سے بات بھی کی، ساتھ ہی انہوں نے ریاست آندھرا پردیش کے وزیر اعلی این چندرا بڈو نیڈو کو مخاطب ہوتے ہوئے کہا کہ واقعہ میں ملوث ملزمان کو گرفتار ہونا چاہیے۔ بھارتی اخبار نے لکھا ہے کہ مسجد میں قتل کیے گئے موذن کا تعلق بھارت کی ریاست بہار سے تھا، وہ چند ماہ قبل ہی مسجد میں بطور موذن مقرر ہوئے تھے۔