لاہور (مانیٹرنگ ڈیسک) چینل ۵ کے تجزیوں و تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ خوشی ہے نوازشریف نے صحیح راستہ اختیار کیا۔ ورنہ گزشتہ دنوں جس طرح ان کے اہل خاندان نے اعلان کیا تھا کہ وہ نیب کی عدالت میں پیش نہیں ہوں گے۔ مریم نواز بھی انتخابی مہم کے دوران سپریم کورٹ پر عدم اعتماد کا اظہار کرتی رہیں، اس سے لگتا تھا کہ یہ عدالتوں کا بائیکاٹ ہی کریں گے۔ انہوں نے نوازشریف کو مشورہ دیتے ہوئے کہا کہ جس طرح عدال میں پیشی کا سلسلہ شروع کیا ہے، براہ کرم عدالتوں کے وقار کا بھی خیال کریں اور اتنا پروٹوکول لانے کی ضرورت نہیں۔ اس کی وجہ سے میڈیا کیلئے بھی مشکلات پیدا ہوتی ہیں اور پھر آپ کے سکیورٹی گارڈز کا میڈیا والوں پر تشدد جیسی خبروں سے کوئی اچھا تاثر نہیں ملتا۔ آپ ملزم کی طرح عدالت میں پیش ہوتے ہیں، فوج اس طرح لے کر جاتے ہیں جیسے عدالت کو فتح کرنے جا رہے یہ طرز عمل درست نہیں۔ انہوں نے کہا کہ سعد رفیق نے ”عاشق و معشوق“ والا بیان دے کر اپنے لیڈر یا اپنے دیرینہ دوست کی کوئی عزت افزائی نہیں کی ہے۔ سابق وزیراعظم کی نااہلی کے بعد کئی نون لیگی رہنماﺅں کی ہوش اڑ گئی ہے۔ نوازشریف بھی شاید ابھی ”مجھے کیوں نکالا“ والے جملے کے سحر سے نہیں نکل سکے۔ انہوں نے کہا کہ عدلیہ کے معتبر ارکان کو پیپلزپارٹی کے الزامات پر غور کرنا چاہئے۔ وہ کہتے ہیں کہ یوسف رضا گیلانی نے نااہلی کے بعد نوازشریف جیسا رویہ اختیار نہیں کیا تھا، ماضی میں سپریم کورٹ پر حملہ ہوا تھا، ایسے الزامات میں سچائی موجود ہے۔ انہوں نے مزید کہا کہ جب بے نظیر کو غلام اسحاق خان نے کرپشن کے الزام پر ہٹا دیا تو وہ سپریم کورٹ گئیں لیکن ان کی درخواست منظور نہیں کی گئی لیکن جب غلام اسحاق نے ہی نوازشریف کو بھی فارغ کر دیا لیکن سپریم کورٹ نے بحال کر دیا۔ عدالتوں کی طرف سے نرم گوشہ بھی ان کے لئے ہے، پروٹوکول بھی ان کے لئے ہے اور وہ نااہلی کے بعد بھی پنجاب ہاﺅس میں سرکاری رہائش گاہ میں پریس کانفرنس بھی کرتے ہیں۔ نوازشریف کو نیک نیتی سے مشورہ دیتا ہوں کہ کسی ہوٹل میں پریس کانفرنس کریں اور شہبازشریف کو چاہئے کہ پارٹی نہ بنیں۔ آپ نے سگے بھائی کیلئے تمام دروازے کھول رکھے ہیں، حکومت ان کی غلامی کر رہی ہے، آپ کو اس کی وضاحت اپنے اصول، فیچر، تاریخ اور آئین و قانون کو دینی پڑے گی۔ نااہل سابق وزیراعظم کیلئے کس خوشی میں پنجاب ہاﺅس کے دروازے کھولے ہوئے ہیں۔ اگر صرف شیر سمجھ کر یہاں جانورستان ہی بنانا ہے تو پھر آپ کی مرضی ہے۔ شہباز شریف کو انصاف و قانون سے کام لینا چاہئے۔ اس طرح کسی معاشرے کو بے انصافی سے نہیں چلایا جا سکتا۔ نااہل نوامشریف کو سرکاری سہولیات دینا بند کریں۔ یقین دلاتا ہوں کہ تاریخ بہت بڑا فیصلہ کرنے والی ہے۔ انہوں نے کہا کہ مشاہد اللہ خان، نوازشریف کے نانثار ہیں۔ پی آئی اے کی ایک تنظیم کے سربراہ تھے آج سنیٹر ہیں۔ وفاقی وزیر بھی تھے اگر فوج آنکھیں نہ دکھاتی تو فارغ نہ ہوتے۔ ان کے بھائی آج کل پاکستان سے باہر 2 ٹاپ کے شہروں میں پی آئی اے کے جنرل منیجر ہیں۔ ان کے خاندان کو اتنا نوازا گیا ہے کہ وہ تو جانثاری ہی کریں گے۔ جب کسی چھوٹے آدمی کو اٹھا کر بڑے عہدے پر بٹھا دیا جاتا ہے تو ظاہر ہے وہ تو ہر ڈیمانڈ پوری کرے گا۔ ملاقات کے دوران فضل الرحمن کا نوازشریف کو شعر سنانے کے حوالے سے انہوں نے کہا کہ سابق وزیراعظم کو فلمی گانوں سے لگاﺅ ہے، شعرو شاعری میںکوئی دلچسپی نہیں۔ فضل الرحمن ذہین آدمی ہیں، ہر دور میں حکومت میں رہتے ہیں۔ وہ سمجھتے ہیں کہ جو بھی شخص امیرالمومنین ہو اس کا حکم ماننا اسلام کی روح ہے۔ انہوں نے کہا کہ بطور اخبار نویس پہلے سے معلوم تھا کہ جس طرح نوازشریف پر سنگین مقدمات چل رہے ہیں ان کو متوازن کرنے کیلئے عمران خان پر بھی مقدمات درج کرائے جائیں گے تا کہ عوام سمجھیں کہ دونوں طرف معاملہ گرم ہے۔ بہت سارے نجومیوں کی پیش گوئی ہے کہ ”عمران خان بھی نااہل ہو جائیں گے اور پھر تاج شاہ محمود قریشی کے سر پر ہو گا۔ پیپلزپارٹی بی اپنا پرانا بچہ سمجھتے ہوئے قریشی کے وزیراعظم بننے کی حمایت کر دے گی۔ آصف کرمانی کو چاہئے کہ تھوڑا سا پیسہ نجومیوں پر بھی خرچ کر دیں۔ انہوں نے مزید کہا کہ شیخ رشید کو داد دیتا ہوں کہ سراج الحق و عمران خان کو چھوڑ کر ان کی رٹ پر عدالت نے فیصلہ سنایا، انہوں نے کوئی بڑا وکیل بھی نہیں کیا۔ عدلیہ کو کریڈٹ دینا چاہئے جس ہمت و حوصلے سے وہ توہین آمیز گفتگو برداشت کر رہی ہے لیکن کوئی توہین عدالت کا نوٹس نہیں لیا۔ نون لیگی رہنما الزامات کی بارش کر رہے ہیں لیکن عدلیہ مضبوط قوت برداشت کا مظاہرہ کر رہی ہے۔ انہوں نے مزید کہا کہ عمران خان کو مکمل ریکارڈ پیش کرن چاہئے۔ ان کے وکیل نعیم بخاری نے عجیب بات کہہ دی کہ اس مسئلے کا منی ٹریل ہمارے پاس نہیں۔ وہ عمران خان کے حق میں ہیں یا ان کے خلاف مقدمہ لڑ رہے ہیں۔ انہوں نے کہا کہ جمائما ایک اچھی عورت ہے۔ ہمارے معاشرے میں طلاق کے بعد ایک دوسرے کی شکل دیکھنا پسند نہیں کرتے لیکن وہ ابھی بھی نہ صرف عمران خان سے ملتی ہیں بلکہ سیاست میں ان کی مدد بھی کرتی ہیں۔ چیئرمین پی ٹی آئی کی پہلی بیٹی کے حوالے سے ن لیگی رہنما منصوبے بناتے رہتے ہیں کہ کسی طرح اس کو واپس لا کر اس بنیاد پر عمران خان کو بھی نااہل کروائیں۔ بلکہ جمائما لندن میں اس کے تمام احراجات برداشت کر رہی ہے اور اس کا مکمل خیال رکھتی ہے۔

اسلام آباد(مانیڑنگ ڈیسک) سابق وزیر اعظم نوازشریف کی اہلیہ بیگم کلثوم نواز کی طبعیت پھر بگڑ گئی جس پر انہیں ایمرجنسی میں داخل کیا گیا۔بیگم کلثوم نواز کو ڈاکٹروں نے کینسر تشخیص کیا ہے اور ان کا علاج لندن میں جاری ہے جہاں ان کے بچے ان کی تیمارداری کے لیے موجود ہیں۔بیگم کلثوم نواز کی گزشتہ روز طبیعت بگڑ گئی تھی اور ان کی حالت زیادہ خراب ہونے پر انہیں لندن کے پرنس گریس اسپتال لے جایا گیا جہاں ڈاکٹروںنے انہیں ایمرجنسی میں منتقل کیا۔بیگم کلثوم نواز کو گھر سے ایمبولینس کے ذریعے اسپتال لے جایا گیا جہاں ڈاکٹران کی حالت بہتر کرنے کی کوشش کررہے ہیںڈاکٹروں نے بیگم کلثوم نواز کی حالت بگڑنے کی تصدیق کرتے ہوئے کہا ہے کہ انہیں ممکنہ طور پر آج بھی ایمرجنسی میں رکھا جاسکتا ہے۔بیگم کلثوم نواز کو مریم، حسن اور حسین نواز نے اسپتال منتقل کیا جب کہ میاں نوازشریف کو بھی ان کی طبعیت کے بارے میں آگاہ کردیا گیا ہےدوسری جانب ان کی صاحبزادی مریم نواز نے بھی ٹوئٹر کے ذریعے اپنی والدہ کی طبیعت بگڑنے کی تصدیق کی انہوں نے اپنی والدہ کے لیے دعا کی بھی اپیل کی۔دریں اثنا سابق وزیر اعظم نواز شریف لندن میں زیر علاج اپنی اہلیہ بیگم کلثوم نواز کی تیمار داری کیلئے کل لندن روانہ ہوں گے۔ تفصیلات کے مطابق سابق وزیراعظم نوازشریف اپنی اہلیہ کی تیمارداری کیلئے کل لندن روانہ ہوں گے۔ نواز شریف کی اہلیہ کلثوم نواز لندن میں زیر علاج ہیں۔واضح رہے کہ کلثوم نواز گلے کے کینسر میں مبتلا ہیں اور لندن کے نجی اسپتال میں زیرعلاج ہیں۔ سابق وزیراعظم پہلے سے اپنی اہلیہ کی تیمارداری کیلئے لندن میں موجود تھے اور نیب کی پیشی کیلئے وطن واپس آئے تھے۔

اسلام آباد (آن لائن) پاکستان پیپلزپارٹی کے رہنماءسینیٹر اعتزاز احسن نے کہا ہے کہ نواز شریف بڑا دلچسپ کھیل کھیل رہے ہیں، نواز شریف ہوا میں مکے چلا کر یہ ثابت کرنا چاہتے ہیں کہ مجھے مارا جارہا ہے۔ جو عناصر نواز شریف کے خلاف کے خلاف سازش کررہے ہیں ان کے نام کیوں نہیں لیتے۔ منگل کے روز نواز شریف کی پریس کانفرنس کے ردعمل دیتے ہوئے پیپلزپارٹی کے سینیئر رہنماءسینیٹر اعتزاز احسن نے کہا ہے کہ نواز شریف نے 90 ءکے الیکشن میں پیسے لے کر دھاندلی کرائی۔ ماضی میں بے نظیر بھٹو کو سزا، جائیداد ضبطی کا حکم سپریم کورٹ نے نواز شریف کے دباﺅ میں آکر دیا چونکہ نواز شریف نے ہی سپریم کورٹ پر حملہ کرایا تھا ۔ سپریم کورٹ پر حملے کے الزام میں مسلم لیگ (ن) کے تین ایم پی ایز کو سزائیں بھی مل چکی ہیں۔ ہر بار نواز شریف سے متعلق عدالتوں کا رویہ نرم ہوتا ہے۔ انہوں نے کہا کہ ایس ای سی پی کے سابق چیئرمین ظفر حجازی سے ریکارڈ میں ٹمپرنگ نواز شریف کی ہدایت پر ہی کی ہے۔ ظفر حجازی کے کیس کا حکم آیا تو نواز شریف کو کچھ نہیں کہا گیا ۔ ظفر حجازی کے کیس میں نواز شریف کو بھی شامل تفتیش کرنا چاہیے۔ انہوں نے مزید کہا کہ وفاقی حکومت اور پنجاب حکومت مسلم لیگ ن کی ہی ہے اور تمام ادارے بھی ان کے ماتحت ہیں۔ پھر بھی مسلم لی گن والے حکومت میں رہتے ہوئے بھی اپوزیشن کا کردار ادا کررہے ہیں نواز شریف ہوا میں مکے چلا رہے ہیں۔ دیکھیں مجھے مارا جارہا ہے نواز شریف ان عناصر کو بے نقاب کریں جو ان کے خلاف سازشیوں میں ملوث ہیں۔سینٹ میں قائد حزب اختلاف اعتزاز احسن نے کہا ہے کہ عدالت میں اسلحہ کسی صورت نہیں لایا جا سکتا، نوازشریف کو پروٹوکول کا عدالت میں اسلحہ لانا ایک خطرناک عمل ہے۔ نوازشریف بڑی چالاکی سے کھیل رہے ہیں۔ نجی ٹی وی سے گفتگو کرتے ہوئے انہوں نے کہا کہ لیگی رہنما یہ تاثر دے رہے ہیں کہ نواز شریف بینظیر بھٹو شہید سے زیادہ بہادر ہیں اور مضحکہ خیز باتیں کر رہے ہیں۔ نوازشریف کو دیا جانے والا پروٹوکول غیر قانونی ہے، وزیراعظم آفس کا غلط استعمال کیا جا رہا ہے۔ عدالتیں نوازشریف کے ساتھ نرمی برت رہی ہیں۔ نیب یا کسی ماتحت عدالت کو ضمانت دینے کا قطعی اختیار حاصل نہیں ہوتا یہ اختیار صرف ہائیکورٹ کا ہے تاہم نوازشریف کیس میں نیب عدالت سے اختیار استعمال کر رہی ہے یہ بھی شریف خاندان کو ایک رعائت دی جا رہی ہے۔ اعتزاز احسن نے کہا کہ احتساب عدالت کے جج اپنے اختیارات استعمال کریں اور حکم جاری کریں کہ صرف پاس جاری ہونے والے افراد کو اندر آنے کی اجازت ہو گی، لیگیوں اور اسلحہ کو عدالت میں آنے سے روکیں۔ ایم کیو ایک پاکستان نے ہمیں سینٹ میں یقین دہانی کرائی کہ ہمارے حق میں ووٹ دیں گے پھر ان کے 8 سنیٹر غائب ہو گئے۔ نظر یہی آتا ہے کہ متحدہ نے ہارس ٹریڈنگ کی، اب فاروق ستار بلاوجہ چلا چلا کر بیان دے رہے ہیں۔ حکومت کے پاس گنتی پوری نہیں ہو رہی تھی یہ لگتا ہے کہ کہیں سے ہدایت آئی اور میاں عتیق نے آ کر ان کے حق میں ووٹ دیدیا۔ اعتزاز احسن نے کہا کہ انٹیلی جنس بیورو بارے جس طرح کی رپورٹیں آ رہی ہیں اس کے بعد اس ادارے پر میرا اعتماد نہیں رہا۔ ومیراعظم اور وزرا کے پاس اقامے ہونا شرمناک ہے اس پر صرف یہی کہہ سکتا ہوں کہ کچھ حیا کرو کچھ شرم کرو۔

اسلام آباد(سید انوار زیدی سے) چوہدری نثار بھولے آدمی ہیں پہلے بھی نواز شریف کی باتوں میں آگئے تھے اور اب پھر پرانی تنخواہ پر کام کرنے پر راضی نواز شریف نے وقت کی نزاکت اور پارٹی کو انتشار سے بچانے کی خاطرشائد تھوڑی سی رعایت کردی ہو ورنہ ان کے کاغذات میں معافی کا خانہ کہیں نہیں ملتا ان خیالات کا اظہار معرو ف سیاسی و عسکری تجزیہ نگار جنرل(ر) امجد شعیب نے نمائندہ خبریں سے ٹیلیفونک گفتگو کے دوران کیا انہوں نے کہا کہ چوہدری نثار یہ بات یا د رکھیں کہ وہ پاکستان مسلم لیگ (ن) کے بارے جو کچھ کہہ چکے ہیں نواز شریف اس کا حساب ضرور لیں گے وہ دل سے معاف کرنے والے آدمی نہیں ہیں ۔ نواز شریف کی اچانک واپسی کے حوالے سے انہوں نے کہا کہ وزیر اعظم شاہد خاقان عباسی اور وزیر اعلیٰ شہباز شریف نے لندن ملاقات میں نواز شریف کوپارٹی میں گروپنگ بارے افواہوں اور خدشات سے آگاہ کیا تو وہ فوری طور پر پارٹی کو ٹوٹنے اور انتشار سے بچانے کے لیے واپس آگئے کیونکہ پارٹی کے کچھ لوگ منظر سے غائب تھے اور چند لوگ ہی بیان بازی کر رہے تھے اس سے یہ محسوس کیا جارہا تھا کہ پارٹی کے کچھ لوگ وفاداریا ں بدلنے جا رہے ہیں اور اندرون خانہ گروپنگ ہو رہی ہے اور چوہدری نثار علی خان اس میں نمایاں رول ادا کررہے ہیں اگر چوہدری نثار کچھ لوگوں کو اکٹھا کرکے ایک چھوٹی سی میٹنگ یا پریس کانفرنس ہی کر لیتے تو نواز شریف کے قدموں سے زمین نکل جاتی اس وجہ سے میاں نواز شریف پارٹی کو سنبھالنے اوربچانے کے لیے خود بھاگے بھاگے پاکستان چلے آئے۔