سری دیوی کی آخری رسومات۔۔۔ کیا ان کی خواہش کیمطابق ادا کی جائیں گی ، دیکھئے خبر

ممبئی(ویب ڈیسک)بالی وڈ کی لیجنڈری اداکارہ سری دیوی کی آخری رسومات آج ممبئی میں ادا کی جائیں گی۔سری دیوی 24 اور 25 فروری کی درمیانی شب دبئی کے ایک ہوٹل کے کمرے میں مردہ حالت میں پائی گئی تھیں۔ابتدائی طور پر بتایا گیا تھا کہ اداکارہ کی موت حرکت قلب بند ہونے کی وجہ سے واقع ہوئی، تاہم بعدازاں دبئی کے پبلک پراسیکیوشن نے موت کی وجہ حادثاتی طور پر باتھ ٹب میں ڈوبنے کو قرار دیا تھا۔سری دیوی کی میت گزشتہ رات بھارتی صنعتکار مکیش امبانی کے نجی چارٹرڈ طیارے کے ذریعے ممبئی پہنچائی گئی تھی جہاں آج ان کی آخری رسومات ادا کی جائیں گی۔بھارتی میڈیا کے مطابق لیجنڈری اداکارہ کی میت کو آج صبح ساڑھے 9 بجے سے ساڑھے 12 بجے تک لوکھنڈوالا کے اسپورٹس کلب میں رکھا جائے گا، تاکہ مداح ان کا آخری دیدار کرسکیں، جس کے بعد ان کی آخری رسومات ساڑھے 3 بجے ادا کی جائیں گی۔