پاکستان تحریک انصاف کی رہنما ڈاکٹر یاسمین راشد کا کہنا ہے عوام نے 8 فروری کو 9 مئی کے بیانیے کو مسترد کر دیا، 3 دفعہ کے وزیراعظم کی بیٹی شدید دھاندلی سے اقتدار میں آئیں، مہارانی کو پتہ ہی نہیں ملک میں غربت کتنی ہے۔
لاہور کی انسداد دہشت گردی عدالت کے باہر میڈیا سے گفتگو کرتے ہوئے پی ٹی آئی رہنما ڈاکٹر یاسمین راشد کہنا تھا کہ 3 دفعہ کے وزیراعظم کی بیٹی شدید دھاندلی سے اقتدار میں آئی ہے، مریم نواز تقاریر کی بجائےغریب کی بھوک بارے سوچیں، عوام کو ریلیف نہ ملا توعوام انکو نہیں چھوڑے گی۔
انہوں نے کہا کہ رمضان پیکچ سے کام نہیں چلے گا، رمضان کے بعد بھی لوگوں نے جینا ہے، اس وقت غریب لوگوں کے پاس ایک وقت کے کھانے کے پیسے نہیں، لوگ بھوک سے مررہے ہیں، عوام کو ریلیف نہ ملا تو عوام ان کو نہیں چھوڑے گی۔
یاسمین راشد نے مزید کہا کہ مہارانی کو پتہ ہی نہیں ملک میں غربت کتنی ہے، میں نے 35 سال سرکاری اسپتال میں کام کیا ہے، لوگوں کے پاس انجیکشن خریدنے کے پیسے نہیں ہوتے۔
پی ٹی آئی رہنما کا کہنا تھا کہ ایک لاکھ سے زیادہ ووٹ لینے والی خواتین جیل میں قید ہیں، فارم 45 میں ہارنے والے فارم 47 میں جیت گئے، عدالتیں خاموش تماشائی بنی ہوئی ہیں، عوام کے میڈیٹ کو چوری کیا گیا ہے۔
انہوں نے یہ بھی کہا کہ 9 مئی کا واقعہ بیچنے والے آج 9 فروری والے بن چکے ہیں، عوام نے 8 فروری کو 9 مئی کے بیانیے کو مسترد کر دیا ہے، ان کے ظلم جبر اور زیادتی کو عوام نے مسترد کر دیا۔
