لاہور (مانیٹرنگ ڈیسک) اے این پی کی سینئر رہنما ستارہ ایاز نے کہا ہے کہ صدارتی امیدوار کے حوالے سے اپوزیشن جماعتوں کے درمیان اعتماد کے فقدان کا فائدہ تحریک انصاف کو ہو رہا ہے۔ اپوزیشن دو گروپوں میں تقسیم رہی تو ڈاکٹر عارف علوی صدارتی انتخاب جیت جائیں گے۔ عارف علوی تحریک انصاف کی جانب سے بہترین صدارتی امیدوار ہیں۔چینل ۵ کے پروگرام News @ 7میں گفتگو کرتے ہوئے انہوں نے کہا کہ پیپلز پارٹی بطور اپوزیشن کھل کر سامنے نہیں آرہی۔ اپوزیشن متفقہ صدارتی امیدوار لانے میں کامیاب ہوگئی تو تحریک انصاف کو مایوسی ہو سکتی ہے۔ انہوں نے کہا کہ مولانا فضل الرحمان مائنس پیپلز پارٹی تمام اپوزیشن جماعتوں کے متفقہ صدارتی امیدوار ہیں۔ انہوں نے کہا کہ وزیراعظم عمران خان نے ذاتی استحقاق کے حوالے سے اقدامات کیے ہیں،تحریک انصاف کے سو دن کے پروگرام کے مطابق ملکی معیثیت ، سکیورٹی اور دیگر اہم مسائل پر اقدامات ہوئے تو سراہیں گے۔پروگرام میں شریک تحریک انصاف کے سابق رکن قومی اسمبلی ساجد نواز کا کہنا تھا کہ خیبر پختونخوا میں کسی سیاسی جماعت کی تاریخ میں دوبارہ حکومت نہیں آئی مگر تحریک انصاف نے 2013 ءجو منشور دیا وہ پورا کیا۔ صحت تعلیم پولیس اور سکولوں کی حالت بہتر کی۔ عمران خان اب بطور وزیراعظم زیادہ بہتر طریقے سے ملک بھر میںپارٹی منشور پر عمل کر سکیں گے۔خیبر پختونخوا کے بلدیاتی نظام میں تبدیلی کر کے ضلع کے مئیر کے ڈائریکٹ الیکشن کر وا رہے ہیں تاکہ عوام اعتماد کے ساتھ براہ راست فائدہ اٹھا سکیں۔کراچی کو پرانے اکنامک ہب سے بہترکراچی بنایا جائیگا۔ تحریک انصاف کے سو دن کے منشور کا مطلب ترقی کے ٹریک پر آنا ہے ، نہ کہ اچانک سے سب حاصل کر لینا ہے۔ انہوں نے کہا کہ عمران خان کے ہیلی کاپٹر استعمال کرنے کے خلاف بیان بازی کرنے والوں کے لیے پالیسی کو کوئی بات نہیں۔ غیر اہم ایشوز کا ڈرامہ بنایا جا رہا ہے۔ایک سوال پر انکا کہنا تھا کہ سنت اپنی جیب سے پوری کی جاتی ہے سرکار کے خرچے سے نہیں۔ امریکا اور بھارت کے ساتھ برابری اور میرٹ کی سطح پر آنکھ میں آنکھ ڈال کر بات کی جائے گی۔ قرضوں کے دلدل میں ڈوب کر ہم نے خود کو قدموں میں گرایا ہوا ہے۔ایم کیو ایم کی سابق رکن قومی اسمبلی ڈاکٹر فوزیہ حمید نے کہا کہ وزیراعظم کو کراچی میں خوش آمدید کہتے ہیں کہ وہ آئیں اور کراچی کے عوام کے لیے کام کریں۔ عامر لیاقت کی ناراضی پارٹی کا اندرونی معاملہ ہے تاہم عامر لیاقت کا کردار ماضی میں بھی ایسا ہی رہا ہے۔
