لاہور(ویب ڈیسک )مسلم لیگ (ن) کے صدر شہبازشریف نے ریحام خان سے رابطوں کے الزامات کی تردید کرتے ہوئے کہاہےکہ زندگی میں صرف ایک بار ریحام سے ملا۔ریحام خان نے عمران خان کیخلاف کتاب لکھنے پر ایک لاکھ پاو¿نڈز لیے، سلمان احمد: زندگی میں صرف ایک بار ریحام خان سے ملا، اس کے بعد ان سےکوئی ملاقات نہیں ہوئی، اگر ریحام کی کتاب لکھوانے کے پیچھے میری سپورٹ ثابت ہو جائے، یا اگر میں نے ایک دھیلہ بھی بلواسطہ یا بلاواسطہ خرچ کیا ہوتو میں ذمہ دار ہوں۔(ن) لیگ کے صدر کا کہنا تھا کہ عمران خان نے مجھ پر کرپشن کے کئی الزامات لگائے لیکن ثابت ایک بھی نہ کرسکے۔شہبازشریف کا خصوصی انٹرویو آج رات 10 بج کر 5 منٹ پر جیو نیوز پر نشر کیا جائے گا۔ پنجاب سب سے زیادہ نیب کے نشانے پر ہے، جہاں اربوں کھربوں کی کرپشن ہوئی وہاں نیب کسی کو نہیں بلاتی، بابر اعوان نے بغیر نیلامی کے نندی پور پراجیکٹ میں 30 ارب روپے لگائے، ان کے خلاف کوئی انکوائری نہیں کی گئی۔سابق وزیراعلیٰ نے کہا کہ ملک کے معاملات میں مجموعی مشاورت اور دانش مندی چاہتے ہیں، ملک کو درپیش مسائل کوئی ایک پارٹی یا ادارہ حل نہیں کر سکتا، تصادم کوئی حل نہیں، تمام اسٹیک ہولڈرز کو اکٹھا ہوناہوگا اور سب کو ذاتی مفاد سے با لا تر ہو کر قومی مفاد کے لیے سوچنا ہوگا۔

اسلام آباد (آن لائن) مسلم لیگ ن کی اعلی قیادت نے قومی احتساب بیورو کی مبینہ انتقامی کاروائیوں اور عدالتوں کے اپنے اراکین کے خلاف نا اہلی کے فیصلوں کے باوجود عام انتخابات کے بائیکاٹ کی تجویز ایک بار پھر مسترد کر دی ہے تاہم ن لیگ نے عمران خان کے جیتنے کی صورت میں ابھی سے لاہور سے اسلام آباد لانگ مارچ کرنے اور احتجاج کی حکمت عملی مرتب کرنا شروع کر دی ہے جس کی قیادت مریم نواز کو دی جائے گی۔ ذرائع کا کہنا ہے کہ بعض حلقوں نے سیاسی شہید بننے کے لئے ن لیگ کو پچیس جولائی کو ہونے والے عام انتخابات کا بائیکاٹ کرنے اور اعلی عدلیہ اور نیب کے خلاف ابھی سے احتجاج شروع کرنے کی تجاویز دی تھیں تاہم ن لیگ کے قائد نوازشریف ، صدر شہباز شریف سمیت سینئر رہنماوں نے اس سے اتفاق نہیں کیا اور واضح کیا کہ ان کے بائیکاٹ کی صورت میں عمران خان کو کھلا میدان مل جائے گا اور یہی عمران خان اور اس کے پیچھے قوتیں چاہتی ہیں کہ وہ ن لیگ کے بائیکاٹ کی صورت میں الیکشن جیت جائے اور وزیرا عظم بن جائے اس لئے یہ تجویز رد کردی گئی اور فیصلہ کیا گیا کہ الیکشن سے قبل چاہے جتنے بھی امیدوار نا اہل یا نیب کی جانب سے گرفتار ہوں اس کے باوجود ن لیگ الیکشن لڑے گی کیونکہ ن لیگ کے ذرائع کا کہنا ہے کہ ابھی بھی ان کی پوزیشن پنجاب میں مضبوط ہے اور عمران خان کو ٹکٹوں کی تقسیم میں نا انصافی اور جہانگیر ترین کے اختلافات کی وجہ سے نقصان پہنچے گا اور اس نقصان کا فائدہ مسلم لیگ ن کو ہوگا اس وجہ سے ن لیگ اس ساری صورت حال سے فائدہ اٹھانے کی کوشش کرے گی ذرائع کا کہنا ہے کہ ن لیگ نے عمران خان کے جیتنے کی صورت میں ابھی سے ہی اسے ٹف ٹائم دینے کے لئے حکمت عملی مرتب کر لی ہے اور مرضی کے نتائج نہ آنے کی صورت میں ن لیگ دھاندلی کو بنیاد بنا کر لاہور سے اسلام آباد لانگ مارچ کرے گی اور اسی طرح دھرنے دینے سمیت کئی آپشنز بھی زیر غور ہیں جن میں ایک اہم اور بنیادی آپشن پیپلز پارٹی اور دیگر جماعتوں سے مل کر حکومت بنانے کی کوشش بھی کرنا ہے ن لیگ کے ایک سینئر رہنماءکا کہنا تھا کہ اگر ن لیگ ساٹھ سے ستر نشستیں لے گئی او ر پیپلز پارٹی کو چالیس سے زیادہ نشستیں مل گئیں تو متحدہ مجلس عمل ، ایم کیو ایم اور اے این پی سمیت دیگر چھوٹی جماعتوں کو ساتھ ملا کر حکومت بھی بنائی جا سکتی ہے جبکہ تحریک انصاف کے حوالے سے اس رہنماءکا کہنا ہے کہ وہ سو سے کم نشستیں ہی لینے میں کامیاب ہوگا یہ بھی معلوم ہوا ہے کہ مرکز میں حکومت نہ بننے کی صورت میں ن لیگ کا سب سے بڑا ہدف پنجاب میں حکومت بنانا ہوگا اور اس کے لئے وہ زیادہ پر امید ہیں اس حوالے سے انہوں نے دیگر جماعتوں سے سیٹ ایڈ جسٹمنٹ کا آپشن کھلا بھی رکھا ہوا ہے او ر اسے استعمال بھی کیا جا رہا ہے۔

اسلام آباد (آن لائن‘ آئی این پی) قومی احتساب بیورو (نیب) نے پنجاب کے 2 سیکرٹریز اور 5 کمپنیوں کے سربراہان سمیت 23 افراد کے نام ایگزٹ کنٹرول لسٹ (ای سی ایل) میں ڈالنے کی سفارش کر دی ہے نیب کی جانب سے 23 افراد کے نام ای سی ایل پر ڈالنے سے متعلق وزارت داخلہ کو لکھے گئے خط مےں پنجاب سے تعلق رکھنے والے افسران اور 2 صوبائی سیکرٹریز کے نام شامل ہیں۔ خط کے مطابق سیکرٹری پرائمری اینڈ سکینڈری ہیلتھ پنجاب علی جان خان، سی ای او جی ڈبلیو ایم سی ڈاکٹر عطاالحق اور گوجرانوالہ ویسٹ مینیجمنٹ کمپنی کے ہارون اشرف کا نام ای سی ایل میں ڈالنے کی سفارش کی۔ نیب نے وزارت داخلہ سے ڈی سی او اوکاڑہ اسلم قاسمی، ممبر پرائس کمیٹی فیصل آباد ارشاد احمد، میاں لطیف، علی باجوہ اور محمد اسلم کا نام بھی ای سی ایل میں شامل کرنے کی سفارش کی۔ خط میں سفارش کی گئی ہے کہ لاہور ویسٹ مینیجمنٹ کمپنی کے سربراہ وسیم اجمل، سی ای او نالج پارک کمپنی شاہد زمان، منیجر پیرا گون سٹی شہزاد وحید اور ڈائریکٹر فنانس پیرا گون سٹی فرحان علی کا نام بھی ای سی ایل میں شامل کیا جائے۔ نیب کی جانب سے جن دیگر شخصیات کا نام ای سی ایل میں ڈالنے کی سفارش کی گئی اس میں ڈویلپمنٹ پارٹنر ایل ڈی اے سٹی ملک آصف، میاں طاہر جاوید، عبدالرشید، شاہد شفیق، عمران، رانا محمد عارف، جمیل احمد، خالد مجید، نجم شاہ، راشد مجید، سید فرخ علی شاہ کے نام شامل ہیں۔

شیخوپورہ (بیوروپورٹ) تھانہ بھکھی کے علاقہ مہمونوالی میں با اثر افراد نے ایک معذور شخص کی اراضی پر زبردستی قبضہ کرلیا محکمہ مال اور پولیس بھی قبضہ گروپ سے ساز باز ہو کر کاروائی کرنے سے گریزاں ہے اور الٹا معذور شخص کو ہراساں کیا جارہا ہے بتایا گیا ہے کہ مہمونوالی کا رہائشی عالمگیر جو ڈی ایچ کیو ہسپتال میں درجہ چہارم کا ملازم ہے اور معذور ہے اس کے گاﺅں میں وراثتی اراضی ایک کنال پر عبدالرشید اور شہباز وغیرہ نے زبردستی قبضہ کرلیا جس پر معذور شخص نے ڈی سی شیخوپورہ کو تحریری درخواست دی جس پر پٹواری حلقہ پٹوار سرکل عبداللہ نے رپورٹ دینے کی بجائے اسے دبا لیا اور متاثرہ شخص بار بار پٹواری کے پاس جارہا ہے مگر وہ داد رسی نہیںکررہا جبکہ تھانہ بھکھی پولیس کو بھی ملزمان کے خلاف کاروائی کی درخواست دی تو اے ایس آئی شہزاد نے اس درخواست پر کاروائی کی بجائے عالمگیر کو ہی ہراساں کرنا شروع کردیا متاثرہ شخص عالمگیر نے بتایا کہ اسکے والدین وفات پاچکے ہیں اور ایک کنال اراضی اسے والدین کی طرف سے وراثت میں ملی تھی جس میں اسکی بہن بھی حصہ دار ہے جس پر عبدالرشید وغیرہ نے زبردستی قبضہ جما رکھا ہے جبکہ اس کے علاوہ قبضہ گروپ نے اسکے بھائیوں کی چار کنال اراضی پر قبضہ کرلیا ہے وہ ڈی سی اور پولیس کے پاس کئی مرتبہ گیا ہے مگر اس کی داد رسی نہیں ہورہی اس نے اعلیٰ حکام سے امداد کی اپیل کی ہے۔

لاہور(ویب ڈیسک ) انتخابات 2018 کے لیے ا±میدواروں کو ٹکٹوں کی تقسیم پاکستان تحریک انصاف (پی ٹی آئی) کے چیئرمین عمران خان کے لیے زندگی کا سب سے زیادہ تکلیف دہ کام ثابت ہوا اور انہوں نے نہ صرف اس عمل کو ’عذاب‘ بلکہ اپنی زندگی کا مشکل ترین کام قرار دیا۔زمان پارک میں اپنی رہائش گاہ کے باہر مختصر طور پر خطاب کرتے ہوئے عمران خان کا کہنا تھا کہ ’میں اللہ کا شکر ادا کرتا ہوں کہ اس نے مجھے پارٹی ٹکٹ تقسیم کرنے کے بحران سے باہر نکال دیا‘۔ تحریک انصاف کے چیئرمین عمران خان کو پارٹی کے نظریاتی اور مخلص کارکنوں کو مکمل طور پر نظر انداز کرکے ’وفاداریاں تبدیل کرنے والے سیاست دانوں‘ کو پارٹی ٹکٹ دینے پر سخت تنقید کا سامنا کرنا پڑا تھا۔ٹکٹوں کی تقسیم کے حوالے سے لاہور کے مختلف حلقوں کے ساتھ ساتھ دیگر اضلاع کے کارکنوں کی جانب سے زمان پارک میں عمران خان کی رہائش گاہ کے باہر 2 روز تک احتجاج کیا گیا تھا۔اس حوالے سے جنید شہزاد کا کہنا تھا کہ ’ہم، کارکنوں نے اس جماعت کو اس کی موجودہ پوزیشن تک پہنچایا لیکن اس کا پھل ’وفاداریاں تبدیل کرنے والے‘ کھا رہے ہیں، جن میں سے متعدد نے حال ہی میں پارٹی میں شمولیت اختیار کی تھی۔اسی طرح مسلم لیگ (ق) کی حکومت میں پنجاب کے وزیر قانون رہنے والے راجا بشارت کی بیوی ہونے کا دعویٰ کرنے والی سابق ایم پی اے سیمل کامران نے بھی عمران خان کی رہائش گاہ کے باہر احتجاج کیا تھا۔احتجاج کے دوران انہوں نے الزام لگایا تھا کہ راجا بشارت جھوٹے ہیں، ساتھ ہی مطالبہ کیا کہ چیئرمین تحریک انصاف ان کو دیا گیا پارٹی ٹکٹ واپس لیں۔

واضح رہے کہ اگرچہ عمران خان کی جانب سے دعویٰ کیا گیا کہ ایک نظام کے تحت اس بات کو یقینی بنایا گیا تھا کہ صرف درست امیدواروں کو ٹکٹ دیا جائے، تاہم ٹکٹ کے خواہش مند مختلف لوگوں کا کہنا تھا کہ پاکستان مسلم لیگ (ن) سے منحرف لوگوں کو نوازنے کے لیے زیادہ تر حقدار امیدواروں کو نظر انداز کیا گیا۔

اسلام آباد(ویب ڈیسک )پاکستان انٹرنیشنل ایئرلائنز (پی آئی اے) حکام نے انکشاف کیا ہے کہ قومی ایئرلائن کا خسارہ 406 ارب روپے تک جاپہنچا ہے۔ڈان میں شائع رپورٹ کے مطابق قونصل عاصم حفیظ کے ذریعے سپریم کورٹ میں جمع کرائی گئی 23 صفحات پر مشتمل رپورٹ میں بتایا گیا کہ قومی ایئرلائن کے کل اثاثوں کی مالیت 111 ارب روپے ہے اور کرپشن کے باعث 2017 تک مجموعی نقصان 356 ارب روپے ہوا۔ گزشتہ برس جنوری میں پی آئی اے حکام نے سینیٹ کمیٹی کو بتایا تھا کہ قومی ایئر لائن کا خسارہ 300 ارب روپے تک جاپہنچا ہے جبکہ اس خسارے میں ہر ماہ 5 ارب 60 کروڑ کا اضافہ ہورہا ہے۔سینیٹ کمیٹی کو بتایا گیا تھا کہ قومی ایئرلائن ایک ماہ میں 7 ارب 50 کروڑ روپے کما رہی ہے جبکہ اس کے اخراجات 13 ارب 14 کروڑ روپے سے زائد ہیں۔ایئرلائن کے بڑے اخراجات میں 4 ارب 40 کروڑ روپے سے زائد قرضہ اور مارک اپ کی ادائیگی، 2 ارب 60 کروڑ روپے سے زائد فیول اور 1 ارب 60 کروڑ روپے سے زائد تنخواہوں کی ادائیگی شامل ہیں۔سپریم کورٹ میں جمع کرائی گئی حالیہ رپورٹ میں بتایا گیا کہ پی آئی اے صرف حکومت کی جانب سے ملنے والی امداد پر فعال ہے۔چیف جسٹس پاکستان میاں ثاقب نثار کی سربراہی میں پی آئی اے کے طیاروں پر پاکستانی پرچم کے بجائے قومی جانور مارخور کی تصویر بنائے جانے سے متعلق ازخود نوٹس کی سماعت میں عدالت عظمیٰ نے گزشتہ 10 سال کے خصوصی آڈٹ کا حکم دے دیا تھا.

اسلام آباد (مانیٹرنگ ڈیسک) اوگرا نے ایک بار پھر پیٹرولیم مصنوعات کی قیمتوں میں 12 روپے فی لیٹر اضافے کی سفارش کردی۔ نگراں حکومت نے ایک ماہ کے دوران دوسری مرتبہ عوام پر پیٹرول بم گرانے کی تیاری شروع کردی ہے، اوگرا کی جانب سے پیٹرولیم مصنوعات کی قیمتوں میں اضافے کی سفارش کی گئی ہے اور اس حوالے سے وزارت خزانہ کو باضابطہ سمری ارسال کردی گئی ہے جس میں پیٹرولیم مصنوعات میں 12 روپے فی لیٹر اضافے کی سفارش کی گئی ہے۔ وزارت خزانہ کو ارسال کی گئی سمری میں پیٹرول کی قیمت میں 5 روپے 40 پیسے فی لیٹر اضافے کی تجویز دی گئی ہے جب کہ ہائی سپیڈ ڈیزل کی قیمت میں 6 روپے 20 پیسے فی لیٹر، لائٹ ڈیزل کی قیمت میں 10 روپے 50 پیسے فی لیٹر اور مٹی کا تیل 12 روپے فی لیٹر مہنگا کرنے کی سفارش کی گئی ہے۔ پیٹرولیم مصنوعات کی قیمتوں میں اضافے کے حوالے سے وزارت خزانہ حتمی منظوری کل دیگی اور نئی قیمتوں کا اطلاق یکم جولائی سے نئی ہوگا۔