بھکر(25 اپریل 2026): بھکر کے نواحی علاقے بستی چانڈیہ میں زمین کے دیرینہ تنازع پر دو گروپوں کے درمیان مسلح تصادم کے نتیجے میں 5 افراد جان کی بازی ہار گئے جبکہ 3 شدید زخمی ہو گئے۔
پولیس کے مطابق فائرنگ کے اس افسوسناک واقعے میں جاں بحق ہونے والوں میں باپ اور بیٹا بھی شامل ہیں۔ ابتدائی تحقیقات سے معلوم ہوا ہے کہ تصادم میں ملوث تمام افراد کا تعلق ایک ہی خاندان سے ہے۔
حکام کا کہنا ہے کہ ان کے درمیان گزشتہ ایک سال سے زمین کا تنازع چل رہا تھا۔ فریقین میں گزشتہ روز بھی اسی معاملے پر تلخ کلامی اور ہاتھا پائی ہوئی تھی جو آج خونی تصادم کی شکل اختیار کر گئی۔
ڈی پی او بھکر کا کہنا ہے کہ پولیس نے واقعے کی مزید تحقیقات اور شواہد اکٹھے کرنے کے لیے فرانزک ٹیم سرگودھا کو بھی طلب کر لیا ہے۔ ملزمان کی گرفتاری کے لیے مختلف مقامات پر چھاپے مارے جا رہے ہیں اور انہیں جلد قانون کے کٹہرے میں لایا جائے گا۔
دوسری جانب، اسپتال میں دوبارہ تصادم کے خدشے کے پیش نظر ڈی ایچ کیو اسپتال بھکر میں پولیس کی بھاری نفری تعینات کر دی گئی ہے۔ پولیس نے لاشوں کو پوسٹ مارٹم کے لیے منتقل کر کے قانونی کارروائی کا آغاز کر دیا ہے۔
