پشاور (25 اپریل 2026): خیبرپختونخوا حکومت نے صوبے میں ای رجسٹری سسٹم نافذ کرنے کا اعلان کر دیا ہے، جس کے تحت 15 جون 2026 سے مینوئل رجسٹریشن کا نظام مکمل طور پر ختم کر دیا جائے گا۔
محکمہ لینڈ ریکارڈز خیبرپختونخوا نے اس حوالے سے باضابطہ نوٹیفکیشن جاری کر دیا ہے، جب کہ ڈائریکٹوریٹ آف لینڈ ریکارڈز کی جانب سے تمام اضلاع کے لیے سسٹم کے نفاذ کا شیڈول بھی جاری کیا گیا ہے۔
نوٹیفکیشن کے مطابق سب رجسٹرارز کی تربیت کا عمل دو مراحل میں مکمل کیا جائے گا۔ پہلا مرحلہ 29 اپریل سے شروع ہوگا جب کہ دوسرا مرحلہ 30 اپریل کو منعقد کیا جائے گا۔ ٹریننگ سیشنز ریونیو اکیڈمی حیات آباد پشاور میں ہوں گے، جہاں شرکا کو لیپ ٹاپ ساتھ لانے کی ہدایت بھی کی گئی ہے۔
تربیتی سیشنز میں مینوئل رجسٹرز کی ریکنسیلی ایشن، ٹیکس ریکوری اور نئے ای رجسٹری سسٹم کے طریقہ کار پر بریفنگ دی جائے گی۔ حکام کے مطابق ای رجسٹری سسٹم کے نفاذ سے رجسٹریشن کے عمل میں شفافیت آئے گی اور رفتار میں بھی نمایاں بہتری ہوگی۔
زمین کے تنازع پر دو گروپوں میں خونی تصادم، باپ بیٹے سمیت 5 افراد قتل
دوسری طرف خیبرپختونخوا میں تمام غیر رجسٹرڈ ٹور گائیڈز کے خلاف کارروائی کا فیصلہ کیا گیا ہے، رجسٹریشن کے بغیر ٹور گائیڈنگ کرنے والوں پر جرمانہ عائد ہوگا، خیبرپختونخوا کلچر اینڈ ٹورازم اتھارٹی نے گائیڈز کی رجسٹریشن لازمی قرار دے دی۔
نوٹیفکیشن کے مطابق خلاف ورزی پر قانونی کارروائی کی جائے گی، اور بھاری جرمانے اور پابندیاں عائد کی جائے گی، سیاحتی مقامات پر غیر قانونی گائیڈنگ روکنے کے لیے اقدامات شروع کر دیے گئے ہیں۔
